Khaled Al-Sayed's Recent LinkedIn Posts

محتاجين حملة رمضانية دينية وسط كل الحملات الترفيهية والتجارية الي مغرّقة شوارع القاهرة. ما هو في الاصل رمضان شهر عبادة برضه!

احسن حاجه تعملها في رمضان ... اطعام الطعام مع مطبخ الرحمن #حكاوي_في_البيزنس

الحمد لله والشكر لله ....

اوع تقولي مشوفتش الاعلان السنة ده.. الحمد لله والشكر لله ربنا كرمني للسنة الثالثة على التوالي اني اكون مدير حملة مستشفى د. عبلة الكحلاوي رحمة الله عليها لمرضى الزهايمر .. بس السنة ده الاعلان غير الفنان الجميل امير عيد (كايروكي) والفنانة الجميلة رنا رئيس اتبرعوا لينا بأفضل تحفه فنية ممكنة السنة ده، حملتنا المرة ده حاولنا متكونش بس بإلقاء الضوء على المرض والمريض ولكن بابراز جانب مهم جدا .... مرافق المريض. بنت صغيره سايبه حياتها ودنياتها ومكرسه كل تركيزها ومجهودها لوالدها مريض الزهايمر الي عمله الفنان المسرحي عزت زين بشكل حقيقي جدا، وفي خلال مجموعة من المشاهد بنحاول نظهر جزء يسير من معاناة مرافق المريض وحيرته والمه. الحمد لله ربنا وفقنا باننا نعكس الصورة بشكل مختلف السنة ده مع المخرج العبقري عصام نصار ... والمفاجأة الحقيقية السنة ده .... ان احنا خلاص بنعد الايام لافتتاح حلم الدكتورة عبلة الله يرحمها. ربنا يقدرنا ونخلص المسؤولية الكبيرة ... بجد محتاجين لكل جنيه ممكن تتبرع بيه سواء زكاة او صدقه علشان ننتهي من الحاجات الصغيرة الكتيرة قوي الي بنحاول ننجزها. لنك التبرع: https://lnkd.in/dBDAxsdD

ممكن نفكر في نفسنا واهلنا كده شوية ونبطل هزار وميمز وضحك ونركز علشان الموضوع مش هين وبدأ يقلب عكننه على الكل الحرب الي دايره ده مفيش اي دليل بيقول انها ممكن تخلص بسرعه بالعكس الموضوع بيكبر كل يوم، واحنا في مصر مش بعيد خالص عن الكلام ده. انت كمواطن مقيم في مصر، قدامك ثلاثة مخاطر رئيسية في الفترة القادمة: 1️⃣ تآكل قيمة الجنيه: وده بدأ بالفعل بخروج 1.12 مليار دولار من الاموال الساخنه الكام يوم الي فاتوا وده رفع قيمة الدولار الى 48.7 جنيه وفي محللين متوقعين يوصل الى 51- 52 جنيه للدولار. 2️⃣ تضخم متسارع: لان متوقع ارتفاع أسعار السلع الأساسية (غذاء، طاقة، شحن) نتيجة اضطراب سلاسل الإمداد وزيادة تكاليف التأمين على البضائع. 3️⃣ شح محتمل في السيولة الدولارية: ارتفاع ثمن البترول والغاز وزيادة تكلفة الشحن من ناحيه ومن ناحية تانية شركات شحن عملاقه زي ميرسك ابتدت تحول سفنها الى راس الرجاء الصالح بدل قناة السويس، يبقى في ضغط على المخزون الدولاري. الكلام ده واحنا لسه مكملناش اسبوع على الحرب، يعني لا قدر الله لو الحرب ده كملت 3 او 6 شهور حنضطر نروح لحلول قاسية من ناحية الدعم والصندوق والكلام اياه ... يبقى انت تعمل ايه علشان تقلل من تأثير الكلام ده عليك وعلى عيلتك؟ 3 حاجات لازم تكون فاهمهم كويس قوي 1️⃣ خلي معاك شوية كاش جنيه مصري للمصروف اليومي (علشان لو ضربوا خطوط النت في البحر و ال ATM حصل فيه اي حاجه)، ولو معاك كمية صغيرة دولار أو يورو في البيت سيبهم احتياطي دلوقتي. 2️⃣ جنيهات دهب صغيرة (8 جرام) أو سبائك صغيرة (ربع جرام) مهمة تكون معاك في البيت، وليه الحجم الصغير علشان تقدر تحولهم كاش بسهوله اكبر من الحجم الكبير. 3️⃣ لو عليك قروض أو أقساط، حاول تسددها بسرعة. علشان لاقدر الله لو حصل في الامور امور والفايدة ارتفعت بشكل كبير التسديد هيكون صعب. اما البطاقات الائتمانية او الكريديت كارد خفف استخدامها دلوقتي على قد ما تقدر. وفي بعض الاحتياطات يا ريت تحسب حسابها بس بالعقل والهدوء وواحده واحده: ⬅️  لو حد في البيت عنده مرض مزمن (ضغط، سكر، قلب)، اشتري علاج شهرين أو تلاتة مقدماً، علشان لو شركات الشحن اتاخرت الصيدليات اكيد حتتأثر. ⬅️ لو الكهرباء قطعت لاي سبب من الاسباب في الصيف لازم يكون عندك باور بانك كبير علشان الموبايل دلوقتي بقه نافذة الاخبار. ⬅️ اخر حاجه بقه، لو شغالك في مجال ممكن يتأثر بالي بيحصل ده زي الانشاءات والتشييد، السياحه كده يعني .. حاول يكون عندك مهنة في ايدك تشغلها بسرعه لا قدر الله لو القطاع ده اتاثر ... يعني كورس تصليح موبايلات مثلا او اي حرفه تانية وربنا يستر علينا جميعا #حكاوي_في_البيزنس

الجائحة الجديدة اللي حتقعد الناس في بيوتها مش فيروس ... ده الطاقة! بس المرة دي مش حتجيلك رسالة من وزارة الصحة على تليفونك بتقولك اقعد في البيت... الإغلاق ده هيجي تلقائي لما البنزين يبقى بـ 40 جنيه اللتر، والكهرباء تتقطع، والبضاعة متوصلتش للمحل وانا مش بتكلم عن مصر انا بتكلم عن العالم كله. خليك معايا وركز شوية ده مش ريل عادي لان الأحداث مش عشوائية في خيط واحد بيربطهم، الناس شايفة كل حدث لوحده، لكن لما تحطهم على ورقة واحدة هتلاقي إن في حاجة شبه سيناريو بيتنفذ. ⬅️2022 الضربة الأولى على شريان الطاقة الأوروبي تفجير خطوط نورد ستريم، أكبر شبكة نقل غاز بين روسيا وأوروبا. التحقيقات في السويد والدنمارك اتقفلت في فبراير 2024 من غير ما يتحدد مسؤول. يعني جريمة من غير متهم  وده في حد ذاته خبر. ⬅️2023 الموجة اتوسعت إضرابات عمال Chevron في أستراليا هددت بانقطاع 7% من إمدادات الغاز المسال اللي بيتصدر للعالم كله. أوروبا حست بالضغط في أسعارها على الفور. وفي نفس السنة تم اتلاف أنبوب الغاز Balticconnector  بين فنلندا وإستونيا. ⬅️2024 التخريب بقى روتين قطع كابلَي BCS East-West وC-Lion1 في نوفمبر. قطع كابل الكهرباء Estlink-2 في ديسمبر. وزير الداخلية الإستوني قال بالنص: "من السذاجة الاعتقاد إن 3 حوادث في سنة واحدة مجرد صدفة." بس محدش قادر يتهم حد رسمياً.... نفس الحكاية! ⬅️يناير 2026 الموضوع وصل ألمانيا حريق متعمد على جسر كابلات رئيسي في برلين فوق قناة تيلتو والنتيجة 45,000 بيت و2,200 منشأة تجارية من غير كهرباء. تبنّته مجموعة يسارية متطرفة، لكن مجلة Small Wars Journal وصفت النموذج ده بأنه "تخريب منخفض التكلفة وعالي التأثير" ⬅️فبراير 2026 الهجمات الإلكترونية وصلت للطاقة النظيفة اختراق سيبراني للبنية التحتية للطاقة في بولندا. المرة دي مش محطات غاز ده محطات طاقة متجددة. يعني حتى البديل في خطر. ومارس 2026 السيناريو بدأ يكتمل 🔻الكيان ضرب حقل South Pars الإيراني، أكبر حقل غاز في العالم، خسارة طاقته المتوقعة 40 مليار متر مكعب سنوياً. إيران ردت على منشأة رأس لفان القطرية اللي هي رئة أوروبا في الغاز بعد ما قطعت علاقتها بروسيا. 🔻ضربة على منشآت النفط في طهران، رد بصواريخ ودرونز على حقل الشيبة السعودي وحقل الشاه غرب أبوظبي ومنشآت الفجيرة الإماراتية. 🔻هوووب مضيق هرمز يتقفل ..... 20% من النفط العالمي وخمس الغاز المسال في العالم يتوقف. والنتيجة اللي بنشوفها دلوقتي على أرض الواقع ⬅️اليابان وكوريا الجنوبية: تقنين رسمي للوقود، كميات محددة لكل عربية، وممنوع تملأ جالونات احتياطية. ⬅️سريلانكا: الدراسة 4 أيام في الأسبوع. ⬅️باكستان: أسبوع العمل 4 أيام والمدارس اتقفلت أصلاً. ⬅️بنغلاديش والفلبين: طوابير على البنزين زي ما شفنا في 2020 بس المرة دي مش خوف من مرض، خوف من إن المحطة تفضل فاضية. طب ليه ده مش مجرد غلاء أسعار عادي؟ لأن الطاقة مش بند في ميزانيتك، الطاقة هي الميزانية كلها. لما البرميل يعدي 130-150 دولار، السوبر ماركت بيتأثر قبل محطة البنزين. الأدوية، الأسمدة اللي بنزرع بيها الأكل، المصانع اللي بتشتغل بالكهرباء كل ده بيتوقف أو بيتقلل أو بيغلى لدرجة إن الناس مش قادرة توصله. وتاني انا بتكلم عن العالم مش عن مصر بالتحديد. #حكاوي_في_البيزنس

دبي ماتت اقتصاديا ... ايران تخطط لتجويع الخليج ... امريكا ستهد سدود ايران المائية .. الكلام ده مش تنبؤات العرافين، ده النتيجه الي وصل اليها بروفيسور التاريخ التنبؤي البروفيسور جيانغ شيويه تشين الصيني الكندي الي يعتبر من اهم مصلحين النظام التعليمي الصيني.. البروفيسور كان بقاله فتره بيعمل محاضرات على قناته على يوتيوب بعنوان Game Theory او نظرية اللعبة، والنظرية ده للي مايعرفش مشهورة جدا بين القادة السياسين والمدراء التنفيذيين للشركات الكبرى وهي ببساطة دراسة التفاعلات الاستراتيجية بمعنى ان في اي موقف أنا حفكر انت حتعمل ايه، وأنت حتفكر انا حعمل ايه من قبل ما اي حد يتحرك فينا علشان نبني قراراتنا. وفي وسط المحاضرات ده حصلت الحرب الي هو بالفعل كان كتوقعها من فترة، فبدأ يطبق النظرية على الي بيحصل دلوقتي .. في الاول وضح البروفيسور اسلوب كل من الطرفين: امريكا والكيان استخدموا تيكتيك اسمه Shock & Awe عن طريق قطع الراس الكبيرة وبعدها الجسم كله حينهار وده نفس الاسلوب الي استخدموه في فنزويلا مع مادورو. ولكن ايران مش فنزويلا لان ايران في قلب العقيدة الشيعية الي هي اقلية اصلا في العالم الاسلامي، وبالتبعية ايران استخدمت اسلوب الحرب الشاملة Total War بمعنى اخر اتحولوا من نظام مركزي تحت قيادة واضحة الى نظام غير مركزي بيتحكم فيه قادة كتير يمكن اصلا مش بينسقوا مع بعض. والسبب الرئيس ان الايرانيين بيعتبروا ان الحرب ده حرب دينية مقدسة والجهاد والشهادة اسمى الاماني. بعد كده بدأ بتوضيح كل طرف بيقصد ايه بضرباته الحالية ☪️ ايران 1️⃣ضرب كل القواعد الامريكية في الخليج وبتركيز على دبي، توقع موت دبي اقتصاديا لانها فقدت اهم ما يمزها بكونها هدف للصواريخ الايرانية فحتى لو الحرب خلصت محدش حيرجه يثق انه يحط فلوسه ويعيش في مكان ممكن ينضرب تاني. 2️⃣غلق مضيق هرمز مش بس حيأثر على اسعار النفط والغاز، ده الي خارج منه لكن الي داخل اهم للخليج. دول الخليج بتستورد 80% من احتياجاتها الغذائية فغلق المضيق مع غلق المجال الجوي بمثابة تجويع للخليج. 3️⃣الضربات القادمةمحطات تحلية المياه الخليجية والبنية التحتية النفطية ⚠️الهدف النهائي انهيار هذه الخليج اقتصادياً واجتماعياً وده حيدمر نظام البترودولار ويؤدي إلى انهيار الاقتصاد الأمريكي⚠️ 🕎 امريكا واسرائيل 1️⃣حرب مياه عن طريق استهداف السدود وخزانات المياه الايرانية 2️⃣استخدام الحركات الانفصالية بسبب التنوع العرقي في ايران لتفتيت البلد داخليا 3️⃣استخدام القوات البرية داخل ايران او ضربو نووية لانهاء النظام ⚠️الهدف النهائي تفكيك إيران من الداخل وتوريطها في صراعات داخلية علشان تبقى غير متماسكة وغير مستقرة فمترجعش تهديد من تاني⚠️ ده ملخص المحاضره ده بس هو ناوي يشرح اكتر توقعه لمسار الحرب ودور الصين وروسيا في المحاضرات القادمة. عرفتم ليه كنت بقول الموضوع ده مطول ومش حيخلص بسرعه واثاره حتتمد للجميع #حكاوي_في_البيزنس

تخيل قانون يطلع في مصر ان لو المسلم كسر الاشارة سماح، بس لو مسيحي غرامة 10 الاف جنيه !!! او في السعودية لو مقيم سرق تتقطع ايده بس لو مواطن ممكن تعدي !!! هو ده بالضبط الي عمله الكيان، جريمة الاعدام ممنوعه عندهم علشان يبانوا متحضرين زي اوروبا (بس عادي الي بيحصل في القطاع من مجاعه وقتل وتشريد وغيره) لكن من يومين تم اقرار قانون اعدام الاسرى الفلسطينيين يعني قانون اعدام عنصري لفئة واحدة من الناس. فاكرين لما كانوا بيلفوا يعيطوا في العالم كله علشان المقاومة تطلق الاسرى بتاعهم الي كانوا بيتم معاملتهم بكل احترام زي ما الاسرى نفسهم شهدوا بعدوا ما رجعوا، اهم نفس الكائنات ده بقه حيعدموا الاسرى الي عندهم ولا حول ولا قوة الا بالله. مش عارف الهوان الي احنا فيه ده اخرته ايه .... يعني لما نشوف الاسرى بيتم اعدامهم .... ونشوف الاقصى المقفول بقاله اكتر من شهر بيتهد لا سمح الله هل في حد حيعمل ايه حاجه ولا الكلام حيبقى على شجب وتنديد وكده!! طب لو ده حصل لا قدر الله، حندعي ربنا ازاي ونقوله يا رب الرزق ... يا رب المغفرة .... و الاقصى متسوي بالارض والي كانوا بيدافعوا عنه اتعلقوا على المشانق .... واحنا بنتناقش في مشاهد السلم والتعبان عيب ولا ده افوره لا حول ولا قوة الا بالله ... اللهم اشكوا اليك ضعفي وقلة حياتي وهواننا على اعدائنا

بس يا سيدي ولقيتني بتناقش مع رئيس هيئة الاستثمار على السحور في مستقبل البيزنس في مصر! في واحده من الليالي الرمضانية (الي انا خروجي فيه نادر اصلا) تم دعوتي بفضل الله لحضور meet-up برعاية مستنير، الفكرة في الاجتماع ده ان يكون في 3 متحدثين في موضوع واحد علشان نلمه من جميع الجوانب. والاجتماع ده بيحضره عدد من المدراء التنفيذيين ورواد الاعمال. نقاش مفتوح الغرض منه اننا نوضح ازاي الشركات ممكن تستثمر علشان تكبر وتعظم ربحيتها وطبعا علشان تتحوط خصوصا في الظروف الحالية. رئيس هيئة الاستثمار د. حسام هيبه اتكلم عن التوجه العام للدولة وايه المجالات الي ممكن تكون مفيده للاستثمار خصوصا للشركات وايه المزايا الي ممكن يحصلوا عليها. اما صديقي المرشد كان بيتكلم من وجهة النظر المالية طبعا وايه افضل الادوات الي الشركات ممكن تستخدمها وكل اداة الفرق بينها وبين غيرها. اما العبد لله كانت كلمتي عن الفرق بين استثمار الافراد واستثمار الشركات بشكل عام وعن تحاربي السابقة كاستشاري مع Keystone Consultancy شركتنا الوليدة، مع رجال اعمال وشركات بتبحث عن الاستثمار لتقوية مراكزهم المالية وللتحوط طبعا ضد تقلبات العملة. لكن منسيناش نسقط كل الكلام على الحرب الي دايرة اليومين دول وازاي نقدر نكون مستعدين من زوايا مختلفه علشان نقلل الاثر السلبي وكمان ازاي نقدر نستفيد ونلاقي فرص استثمارية كويسه في الوضع ده. بجد اتبسط جدا بوجودي في ال meet-up ده والف شكر لشركة مستنير وكل القائمين عليها. #حكاوي_في_البيزنس

البترول حيرتفع، النقل البحري تكلفته حتتضاعف، الذهب حيطير يعني من الاخر كل حاجه حتغلى. ده مش تهويل ده قراءة منطقية لو حصل تصعيد عسكري كبير في الخليج. معظم الخبراء العسكريين العرب والاجانب بيتنقاشوا دلوقتي امتى معاد الحرب ومين حيكون صاحب الضربة الاولى مش هل الحرب حتحصل ولا لأ! ماهو حشد ثلث القوة البحرية والجوية الامريكية في منطقتنا بما في ذلك حاملة طائرات تانية وتحركات طائرات دعم وتزويد بالوقود وتمركز طائرات مقاتلة في قواعد إقليمية من ناحيه ومن ناحية تانية مناورات ايرانية بالذخيرة الحية لاغلاق مضيق هرمز وتدريبات حرب بحرية بين ايران والصين وروسيا ده مش خبر عادي ..... ده فلوس خرافية بيتم ضخها بسخاء للتجهيز القوات لحرب يمكن تطول اصلا. لو الحرب حصلت فعلا لازم تبقى عارف الضرر الاقتصادي حيكون عليك ايه من دلوقتي خصوصا لو انت صاحب شركة، في ثلاث حاجات عبنك عليهم: 1️⃣ الطاقة (نفط/غاز): ارتفاع علاوة المخاطر التأمينية طبعا حيتعكس في سعر البترول والغاز، الارتفاع ده ممكن يتحول لارتفاع دائم في اسعار الطاقة إذا حدث تعطيل مادي لمنشآت او موانئ اومضيق هرمز. 2️⃣ الشحن والتأمين: التأمين البحري ارتفع 60% بالفعل بمجرد الحشد العسكري، اما أجور الناقلات ووقت الرحلة دي حترتفع بسرعه حتى قبل النقص الفعلي لمراكب الشحن والمنتجات إذا ارتفعت احتمالات الاشتباك. (في توترات سابقة ارتفعت تكاليف التأمين في هرمز بشكل ملحوظ). 3️⃣ المال والائتمان “Risk-off” : متوقع طبعا هروب المال لملاذات آمنة زي الفرنك السويسري السندات الامريكية الذهب والمعادن طيب في ظل الكلام ده ... مصر ممكن تتأثر ازاي؟ 🔻فاتورة الطاقة والتضخم: مصر مستورد للغاز والنفط، وأي ارتفاع عالمي حيتم ترجمته لزيادة الاسعار المحلية بما ان النهج المصري اصلا رايح في اتجاه خفض الدعم على المحروقات يعني لو زاد السعر اكيد حيتم تمرير جزء كبير منه للمستهلك. 🔻العملة والتمويل: ارتفاع اسعار النفط حيكون سبب لطلب أعلى للدولار علشان نستورد احتياجاة البلد من الطاقة و ده معناه ضغط على الجنيه. 🔻ال Risk-off: زي ما قلنا المال حيهرب الى الاماكن الاكثر امانا مش الاكثر ربحية وده معناه اننا نتوقع خروج بعض المال الساخن من الاوراق المالية المصرية الى السندات الامريكية. 🔻السلع الغذائية: طبيعي ان كل السلع الغذائية في الحالة ده سواء المستورده او المصنعه محليا حيزيد سعرها بسبب ارتفاع اسعار الطاقة. 🔻قناة السويس: هنا عندنا موضوعين الاول ان لو التجارة العالمية تباطأت او غيرت مسارات ناقلات الطاقة قد يتأثر حجم المرور من القناة، اما لو الحوثيين سخنوا للدفاع عن ايران كده باب المندب كله ممكن يقفل وبالتبعية الدخل من القناة حيكون تحد التهديد. 🔻السياحة والاستثمار: رغم ان مصر مش طرف اساسي في التوتر الإقليمي (لا مشاركين في الحرب ولاعندنا قواعد امريكية) الا ان متوقع اي حرب في المنطقة حتقلل عدد السياح للاسف. يعني الموضوع في خطر كبير ممكن يمتد لينا .... انت كصاحب شركة هل عندك خطة لمواجهة الوضع ده ؟؟ #حكاوي_في_البيزنس

حملة مستشفى الدكتورة عبلة الكحلاوي السنة ده غير كل سنة .... #حكاوي_في_البيزنس

هو الذهب سعره بينخفض ليه ؟؟ مش الذهب بس ... لأ ده المعادن المهمة زي الفضة والبلاتينيوم والبلاديوم، هو ايه اللخبطة ده مش احنا في حرب والفلوس بتروح للملاذ الآمن وقت الحرب؟؟ اللي بيحصل دلوقتي عكس المنطق التقليدي (الحرب ⬅️ ارتفاع الذهب). السبب إن السوق شايف إن الحرب دي بتخلّي سعر البترول يرتفع بسرعه، وده بيخلي التضخم يزيد، وبيخلّي البنك الفيدرالي الأمريكي يضطر يرفع الفايدة أو يثبتها زي ماحصل. وبما ان الدهب مش بيدّي عائد -فايدة يعني-، فلما الفايدة بتزيد، المستثمرين بيفضلوا يشتروا الدولار أو السندات اللي بتدي عائد أحسن، وده بيخلي سعر الدهب ينزل لان في ضغط على الدولار سواء بسبب ارتفاع سعر البترول او بحث المستثمرين على عائد عالي. طيب ازاي نحلل الارقام الي في الرسم البياني ده ... 1️⃣ الدهب نزل 14.9%.... ده انخفاض كبير جدًا، وسببه الأساسي إن المستثمرين خافوا من رفع الفايدة أكتر ما خافوا من الحرب. 2️⃣ الفضة نزلت 27.6%  ... الفضة نصها معدن صناعي -يعني نص قيمتها سببه الاستخدامات الصناعية بجانب انها مخزن قيمة-، فلما يبقى في خوف من ركود اقتصادي بسبب الحرب وارتفاع البترول طبيعي ان الطلب على منتجات المصانع بيقل وبالتبعية المواد الخام الي بتستخدمها المصانع ده ومن ضمنها الفضة، فبتنزل أكتر. 3️⃣ البلاتين والبلاديوم نزلات أكتر لأنهم معادن صناعية بالدرجة الأولى اكتر بكتير من الفضة كمان. طيب امتى بقه سعر الذهب يرجع يرتفع تاني؟؟ حاجات كتير الصراحه زي مثلا: 🔻 سعر البترول ينزل –لاي سبب بقه سواء فتحوا المضيق او غيره- ده هيرفع التوقعات بنزول الفايدة، تقوم الفلوس تتحرك من البنوك لاسواق المال -البورصات- والذهب. 🔻 لما الخوف يتحول من خوف من التضخم إلى خوف من الركود الكبير – يعني لو استمرت الحرب وارتفع البترول زيادة-، السوق هيفقد الثقة إن الفيدرالي يقدر يسيطر على الاقتصاد، وقتها المستثمرين هيرجعوا للدهب كـملاذ آمن حتى لو الفايدة عالية 🔻 لو الحرب وسعت اكتر او دخلت دول تانيه في الخناقه او حصل ضرب منشآت نووية كل ده اسباب تخلي الذهب يرتفع بسرعه وغيرها من الاسباب بس دايما خلي عينك على السبب الرئيس لارتفاع الذهب في النظام المالي الحالي .... الخوف الخوف من التضخم ... الخوف من الركود ... الخوف من الفايده ... الخوف من اتساع الحرب. يعني كل ما الخوف يزيد المال يروح للملاذات الآمنة على طول. #حكاوي_في_البيزنس

بداية الخسائر الحقيقية للإقتصاد الخليجي اللي حصل امبارح مش خبر عادي يعدي. شركة زي ماكواري الاسترالية العملاقة (واحدة من اكبر شركات الاستثمار في البنية التحتية في العالم) انسحبت من صفقة كانت حتستثمر في خطوط انابيب نفط في الكويت بقيمة ٧ مليار دولار. والسبب الرسمي: "تصاعد الأحداث". طب ليه الشركة عملت كده وهي المفروض متبتديش مشروع غير لما تدرس كل حاجة بحساب؟ لأن المنطقة تحولت من منطقة مخاطر منخفضة الى خطر مباشر على استثماراتهم، هم شافوها ازاي؟ 1️⃣ النفط مش هيخرج: ماهو الكويت بتصدر نفطها كله تقريباً من مضيق هرمز مش زي المملكة الي ممكن تصدر من البحر الاحمر والمضيق دلوقتي مش مضمون، يبقى لو النفط مش طالع، خط الأنابيب اللي هما استثمروا فيه هيفضل فاضي ومش هيجيب فلوس. 2️⃣ الأصول على الأرض هدف ثابت: خطوط الأنابيب دي أهداف سهلة لو الحرب اتسعت. ومن هنا لازم تفهم عقلية المستثمر في مشاريع في دول الخليج، في الغالب شركات زي Macquarie بيكونوا عاملين حسابهم على الآتي: 🔻تدفقات نقدية ثابتة (stable cash flows) 🔻مخاطر منخفضة 🔻عقود طويلة (20–30 سنة) علشان كده التهديد ده ضرب اساس المشروع في مقتل لان المستثمرين الكبار (اللي بيجوا يبنوا مصانع ومشاريع بتشتغل لعقود) بدأوا يعيدوا حساباتهم، واهم حاجه محتاجين يعيدوا التفكير فيها بيكون تسعير المخاطر ودلوقتي المخاطر محدش قادر يحط عليها سعر لان الحرب بتكبر وبتتسارع ومفيش قواعد اشتباك والي النهارده آمن من الضرب ممكن جدا بكره يكون هدف استراتيجي وللاسف المشروع ده مش المثال الوحيد... من كام يوم كمان مراكز بيانات التابعه لشركة أمازون في الإمارات والبحرين اتهاجمت. الشركات العالميه زي أمازون ومايكروسوفت وجوجل صرفت مليارات في البنية التحتية الرقمية عشان تحط بياناتنا في "سحابة" في الخليج. دلوقتي السحابة الرقمية دي تحولت لهدف حربي للصواريخ. في نفس التوقيت، دول الخليج نفسها بتدرس انها تسحب استثماراتها الترليونية من اوروبا وامريكا عشان تضغط عليهم وقف الحرب. الخلاصة: إحنا قدام منعطف خطير. مش بنقول ان الاقتصاد الخليجي هيقع لاقدر الله. لكن اللي بيحصل ده إعادة تسعير للمخاطرة. المستثمر العالمي لسان حاله بيقول: "عشان اجي استثمر عندك دلوقتي، عايز ارباح اكبر وضمانات اكتر، لأن الخطر بقا أعلى". وده معناه ان المشاريع الجديدة هتتأجل، والموجودة هتكلف فلوس أكتر للتأمين، وممكن ناس كتير تمشي زي ماكواري وبالتبعية عاملين ممكن يتم تسريحهم ومنهم العمالة المصرية الي تعتبر من اهم الموارد الدولارية لمصر .... بس ده موضوع تاني نتكلم عليه بعدين. #حكاوي_في_البيزنس

في الاوقات الصعبة زي الي احنا فيها دلوقتي محتاجين نعيد التفكير في الطريقة الي احنا عايشين بيها، مصر من زمن الزمن معتمدة على الاستيراد على الرغم من ضعف الدخل الدولاري وده بيضعف موقفنا المالي سنة بعد سنة. احدى المشاكل الي كل رجل صناعه عارفها هي المواد الخام واننا في مصر عندنا ضعف طبيعي من بعض المواد الخام، بس لما تفكر شوية في الموضوع حتلاقي لا اليابان ولا الصين عندهم مواد خام برضه ..... الفكره في النظام الي بنستخدمه للنتاج مش بس الماده الخام. ده مثال بسيط جدا جدا ممكن يوفر فاتورة استيراد ب 6 مليار دولار باستثمارات ممكن توصل الى 30 او 40 مليون دولار بس بشرط تغيير التفكير وطريقة الادارة #حكاوي_في_البيزنس

السر خلف انخفاض الذهب وارتفاع الدولار رغم الحرب الامريكية الايرانية #حكاوي_في_البيزنس

كل عام وحضراتكم بالف خير وصحة وسلامة يارب وينعاد علينا وعليكم بالخير واليمن والبركات

المعركة لحد دلوقتي متوازنة من اول 19 فبراير حتى اليوم حسب تقرير العربية بيزنس مصر خرج منها 6.7 مليار دولار من الاموال الساخنه وده رقم مش قليل خالص واتسبب في ارتفاع الدولار زي ما شوفنا. وفي نفس الوقت شركات شحن ضخمة بدأت تحول مسار ناقلاتها البحرية الى رأس الرجاء الصالح كبديل لقناة السويس وده سبب ضعف وقتي في المدخول الدولاري. ولكن .... زي ما الازمة ده اضعفت موارد لينا، بدأت تظهر موارد جديدة برضه بسبب نفس الأزمة، موردين على الاقل قائمين دلوقتي. 1️⃣ الأول (خط سوميد): مع إغلاق مضيق هرمز بشكل شبه كامل، أصبح نقل النفط الخليجي (خاصة السعودي الموجود بكثرة في المنطقة الشرقية) عبر البحر عن طريق الخليج والمضيق مستحيل. وهنا مصر قدمت بديل بري كحلقة وصل حيوية بتعمل كالآتي: ⬅️ نقل النفط السعودي عبر خط الأنابيب الخاص بالمملكة من الحقول الشرقية إلى ميناء ينبع على البحر الأحمر وده اسمه خط شرق-غرب. ⬅️ ثم نقل هذا النفط عبر خط أنابيب "سوميد" المصري، الذي يمتد 320 كم من العين السخنة (على البحر الأحمر) إلى سيدي كرير (على البحر المتوسط) بطاقة تصل إلى 2.5 مليون برميل يومياً . ⬅️ من سيدي كرير، يتم تحميل النفط مجدداً على ناقلات عملاقة متجهة إلى أوروبا والعالم. وبكده المسار ده جعل مصر ممر إجباري للنفط الخليجي في زمن الأزمات، وطبعا ده المفروض يدر عائدات كبيرة. 2️⃣ الثاني (تأجير خزانات النفط) في خطوة ذكية الصراحة ومتزامنة مع التطورات الاقليمية، أعلنت مصر عن تحولها الى مركز لوجيستي إقليمي عن طريق طرح 10 مستودعات لتخزين النفط للإيجار في مينائي العين السخنة ورأس بدران على البحر الأحمر . الهدف هو جذب شركات الطاقة العالمية الباحثة عن مراكز تخزين آمنة بعيداً عن منطقة الخليج المشتعلة. وبما ان مصر تمتلك طاقة تخزينية فائضة تُقدر بنحو 29 مليون برميل من النفط في موانئها الرئيسة، ده افضل فرصةلاستغلال الفائض ده عبر عقود تأجير مع الشركات ده. الموارد الجديدة تمثل "بوليصة تأمين" استراتيجية وفرصة ذهبية. فبينما تتعرض قناة السويس لضربة قوية، ممكن لمصر أنها تعوض جزءا من الخسائر من خلال تحويل نفسها إلى الممر البري والمركز اللوجيستي البديل لإمدادات الطاقة العالمية. #حكاوي_في_البيزنس

"كان بامكان مصر انها تتحول الى سوريا... لولا دعم الإمارات لمصر" ده صدمة واحدة من صدمات كتير اتقالت في حوار د. علياء المهدي مع د. عبد الخالق عبد الله، الي مش مجرد استاذ جامعي عادي ده مقرب من دوائر صنع القرار في ابوظبي انا مش حلخص لكم اللقاء، اظن حتلاقوا كل السوشيال ميديا بتتكلم عنه ... بس كل واحد واخد جملة زي الي قولتها في الاول ومركز فيها، انا حاولت اجاوب على سؤال الحلقة من كلام الدكتور نفسه الي مليان تناقضات الصراحه هي الامارات عايزه ايه؟ الرواية الرسمية وده اللي عبد الخالق عبد الله بيمثلها إن الإمارات تسعى لإستعادة المشروع النهضوي العربي وإعادة الاستقرار لمنطقة دخلت في فوضى بعد الربيع العربي. بما ان الثقل السياسي والحضاري اتحول من دول المشرق العربي (مصر، سوريا) إلى دول الخليج، وفي قلب هذه اللحظة "الزخم الإماراتي" زي ما هو بيسميه ولكن اللي بيكشفه الحوار فعلاً حاجه تانيه الصراحه اول هدف هو الاستقلالية الاستراتيجية الكاملة، ده واضح في الخلاف مع السعودية. الإمارات وصلت لقناعة إنها مش تابعة لحد، وده حقهم طبعا. السيطره على اقتصاد المنطقه و تأمين الممرات التجارية، ماهو الحضور في اليمن والصومال وجيبوتي والقرن الأفريقي مش مصادفة. دبي مركز لوجستي عالمي ومحتاج شرايين بحرية مضمونة. حتى لو الضيف انكر الكلام ده لان الواقع بيفرض نفسه، موانئ (DP World)، سلاسل إمداد، استثمارات في أفريقيا يعني تقدر تقول سيطره عبر الاقتصاد او geo-economics الي يخوف بقه هو بناء شبكة نفوذ إقليمية مش احتلال بالمعنى الكلاسيكي، لكن حضور عسكري واقتصادي في نقط استراتيجية للامارات يقدر يدعمها بحلفاء يدينون بالولاء لأبوظبي في بلاد المنطقه. من كلامه الامارات مش عايزه تحكم المنطقه لكن عايزه تتحكم في مساراتها عن طريق دعم اطراف داخل الدول زي الامثله الي هو ضربها في السودان وليبيا واليمن. واخر نقطه ممكن تكون الوصول لواشنطن وده صريح في الكلام عن الاتفاقيات الإبراهيمية، يعني العلاقة مع الكيان ليست غاية في ذاتها ولكنها مفتاح للـ Capitol Hill والـ Pentagon. ولكن في تناقضات كتير بيكشفها الحوار الرجل بيرفض كل اتهام بشكل قاطع لكنه في نفس الوقت بيبرره، زي لما قال: "إحنا ما دعمنا انفصال الجنوب" وبعدها اكد ان "الجنوب قضية عادلة ونحن وقفنا مع حلفائنا هناك." ده بيكشف إن السياسة الإماراتية فيها هوة واضحة بين الخطاب الرسمي والممارسة الفعلية. “إحنا بنعيد الاستقرار” ده روايه افتتح بيها كلامه لكن التدخلات الكتير زودت تعقيد الصراعات، وده كلام د.رباب معاه في ان زي ما الامارات مسؤولة عن بعض النجاحات في استقرار السودان مسؤولة كمان عن الفشل الحالي ادعى اكتر من مره ان الامارات معندهاش اي اطماع بس التوسع الاقتصادي في كل دول المنطقه واضح زي انهم من اكبر المستثمرين في السعودية ده مصالح واضحه، ومش عيب خالص على فكره بس ده تناقض في الكلام الدكتور قال ان الامارات مش بتختار اطراف، ولكن من سياق الحوار لأ .... الامارات دايمًا عندها انحيازات على الأرض وتقدر تتابع ده في الحوار نفسه كلمة اخيرة لاستاذتنا د. رباب “أنت كسبت المعركة التكتيكية الصراحه ماشاء الله عليكي، استخدمت الأدب الأكاديمي كسلاح، وبرود الأعصاب كدرع، علشان الضيف يتحول من دور المفكر استراتيجي الى مدافع متحمس عن سياسات بلاد ويقع في كمية تناقضات غريبه .... وفي الاخر المكسب من وجهة نظري ظهور الزخم الاماراتي الي بيتكلم عنه الدكتور انه له ثمن سياسي كبير في علاقات المنطقه ببعضها وبالامارات #حكاوي_في_البيزنس

مصر داخله على ازمة صعبة ولكن بافضل وضع احتياطي من سنين   السؤال الاشهر دلوقتي بين الناس تأثير الحرب الدايره ده على اقتصادنا، الصراحه الاجابة مش سهلة لان محدش لسه قادر يعرف ابعاد الحرب ايه وان كان شاكلها غير مريح. علشان كده تتبعت مجموعة من لقاءات الخبراء حلخصهالكم واقولكم متوافقين في ايه ومختلفين في ايه وفي الاخر حقولكم رايي المتواضع في الكلام ده   اللقاء الاول مع وزير البترول السابق اسامة كمال في الشرق بلومبرج، ا. اسامة شايف ان الخطر الاكبر على مصر خطر مزدوج بسبب ارتفاع اسعار النفط مع فجوة الغاز الي وسعت بعد توقف الغاز الاسرائيلي مع موازنة مبنية على 75$ للبرميل اللقاء الثاني مع الصديق هاني جنينة على قناة المصرفي مع صديقي المحترم محمد رجب، د. هاني بص للموضوع من زاوية تانيه، تسعير النفط الحالي سياسي اكثر منه شح في المعروض والكلام ده بيأكده تقرير JP Morgan على فكرة. فبالتبعية الأثر الفوري المحدود (حتى وقت اللقاء طبعا )وبيتلخص في  انخفاض الجنيه 5% مقابل الدولار، وارتفاع بسيط في بعض السلع لا يتجاوز 1-2% الا ان المهم الصراحه كان التطمين من وضع الاموال الساخنه لانه قال ان الاحتياطيات الأجنبية وصلت  52.74$ مليار، إضافةً إلى "احتياطي المستوى الثاني" (وده أصول أجنبية لا تدرج في الاحتياطي الرسمي) وصل إلى 18$ مليار، مع 14$ مليار صافي أصول أجنبية في البنوك، يعني مجموعها تقريبا 31-32 مليار دولار كدرع أمام تدفق الأموال الساخنة للخارج المصدر الثالث كان تقرير الاستاذه فهيمة زايد مراسلة العربية بيزنيس، وهنا حتلاقي العربية بيزنس بتشوف الموضوع بزاوية مختلفه تماما، التقرير مش بيركز بس على الحرب ولكن على هشاشة النموذج الاقتصادي نفسه حسب التقرير الاقتصاد المصري بيعتمد بدرجة كبيرة على مصادر دولارية حساسة للوضع الخارجي زي السياحة والتحويلات وقناة السويس، وفي نفس الوقت رجعت الطاقة في مصر إلى وضع المستورد الصافي للنفط والغاز. وبرضه الكلام ده مدعوم ببيانات حديثة من صندوق النقد إلى قال ان التحسن الحالي بفضل التحويلات والسياحة، لكن ده لا ينفي أن موارد مصر الخارجية ما زالت شديدة الحساسية للتقلبات الجيوسياسية.   يعني خلاصة الثلاث لقاءات ده ⬅️الوضع الراهن: مريح نسبيا ولكن غير مطمئن للوزير السابق للبترول، د. جنينة شايف انه محدود الأثر حتى الان، بينما العربية شايفه ان الوضع عبارة عن ضعف هيكلي متراكم. ⬅️الخطر الأكبر: من وجهة نظر أ. اسامة كمال هو فجوة الغاز وارتفاع الاستيراد، بينما جنينة شايف انه الاموال الساخنة واسعار النفط و أ. فهيمة شايفه انه الاعتماد على مصادر دولارية خارجية ⬅️اسعار النفط: العربية بتقول حيرفع فاتورة الاستيراد نحو 20 مليار دولار، جنينه شايف انه مصطنع وقابل للانخفاض سريعا والوزير السابق واقعي وبيقول ان ده حيحمل الموازنة عبء جديد.   طيب الخلاصة بقه من وجهة نظري المتواضعه بعد كلام القامات دول ايه؟ مصر داخله ازمة جديدة للاسف ولكن بأفضل أوضاع احتياطياتها من سنين يعني وضعنا الدفاعي المرة ده اقوى بكتير من 2022، لكن فعلا عندنا ثغرة هيكلية قديمة ومتجددة ولا تنتهي وهي الاعتماد المفرط على مصادر دولارية لا نبذل فيها مجهود كبير ومرتبطة باستقرار المنطقة و هي تحديدا السياحه، التحويلات، وقناة السويس. المتوقع فعلا اثر فوري محدود وملموم. لكن الخطر بيزيد بالتدريج كل يوم مع طول أمد الصراع، فكل ما طال أمد الحرب، زادت احتمالية تحول الضغوط الحالية (الملمومة ده ) إلى أزمة حتوصل لجيب المواطن المصري بشكل مباشر من خلال ارتفاع الأسعار وتآكل قيمة الجنيه. #حكاوي_في_البيزنس

كل عام وحضراتكم بالف خير وصحة وسعادة يا رب

ارتفاع اسعار البترول مش اكبر هم عندنا ... الخوف الاكبر من توفر البترول والغاز اصلا ! غلق المضيق رفع اسعار الطاقة، لان خروج البترول والغاز من الخليج العربي قارب الصفر، وبما ان المعروض من منتجات البترول انخفض السعر ارتفع ... مفهوم ده بس فكرة ان المعروض قل ده في حد ذاتها مشكلة بتواجهنا حاليا ... حنجيب منين ولو بالغالي! علشان كده مصر اتحركت بسرعه على 3 محاور علشان تأمن متطلبتنا من البترول والغاز من مصادر جديدة مكنتش مصادر بنتعامل معاه قبل كده بالحجم ده... ليه انا عامل البوست ده ... لان غالبا انت مشوفتش غير محور واحد بس بتاع الترشيد ومتعرفش حاجه عن الباقي 1️⃣ مصادر جديدة للبترول والغاز 🔸البترول: الهيئة المصرية العامة للبترول قدمت طلب لاستيراد ما لا يقل عن مليون برميل بترول شهريًا من ليبيا علشان نعوض النقص الحاد في الخام المستورد للتكرير للسوق المحلي. 🔸الغاز: - تم التوقيع على اتفاقية لتعزيز التعاون الغازي، علشان نربط حقول الغاز القبرصية (كرونوس وأفروديت) بمحطات الإسالة المصرية في إدكو ودمياط على هامش مؤتمر ايجبس وده في حد ذاته تعظيم لاستخدام البنية التحتية بتاعتنا الي بنبني فيها من سنين. - وفي اتفاق مع شركة "أركيوس" باستثمارات 500 مليون دولار لتطوير الحقل في البحر المتوسط، بهدف إنتاج 150 مليون قدم مكعب من الغاز يوميًا، مع دراسة زيادتها إلى 200 مليون قدم مكعب. -وفي ختام معرض إيجبس، وقعنا مع شركة BP لتطوير منطقة امتياز، ومع شركة SLB لإجراء مسوحات زلزالية متطورة لتحسين فهم المكامن. 2️⃣ تعزيز الانتاج المحلي 🔸تطوير الحقول: مجلس النواب المصري وافق على دمج وتمديد اتفاقية امتياز لشركة "كابريكورن" في الصحراء الغربية، يعني تمديد الامتياز 20 سنة علشان نطور الحقول القائمة وزيادة معدلات الانتاج المحلي من الصحراء الغربية. 🔸 المستحقات المتأخره: وزير البترول قال ان مصر حتخفض المستحقات المتأخرة للشركاء الأجانب من 6.1 مليار دولار في يوليو 2024 إلى 1.3 مليار دولار ده كلها فلوس ليهم كنا لسه مدفعناهاش على اساس ندفع الباقي على 30 يونيو 2026. 3️⃣ ترشيد الاستهلاك وخفض الضغط غالبا هو ده الي انت تعرف، إغلاق المحلات والكافيهات الساعة 9 مساءً (خمسة أيام في الأسبوع)، والعمل من المنزل يوم الأحد، وتقليل إنارة الشوارع والإعلانات بنسبة 50%. أنا مش حدافع عن قرارات الترشيد ولا عن تصريحات مدبولي الأخيرة. أنا زيي زيك، بدفع الفاتورة غالية، ومضرور زيك من قفل المحلات بدري. هل التحركات كفايه؟ مش متأكد طبعا. هل النتيجة هتتحسن قريب؟ للأسف مش واضح. لكن الي اعرفه يقينا قولتهلكم قبل كده في بوست جائحة الطاقة .... العالم كله مضرور بنسب متفاوته والوضع شاكله مكمل للأسف #حكاوي_في_البيزنس

اوع تسمع خبر وتصدقه حتى لو كان من مكان موثوق ... الجميع عنده اجنده! خبر تم تداوله بشكل كبير اليومين الي فاتوا ان الصين رفعت حيازتها للسندات الأمريكية لاول مرة من 5 شهور، ولما تكمل الخبر تحس ان الكلام رايح ناحية ان ده تغيير في الاستراتيجية الصينية في التخلص من السندات الامريكية وانه نوع من عودة الثقة في الاقتصاد الامريكي وكده. وعلى الرغم من ان الرقم صحيح الا ان في سبب فني وإداري بيتعلق بسعر الصرف الي اجبر الصين انها تعمل كده .... تعال اشرح لك في يناير 2026، قيمة اليوان الصيني حصلها ارتفاع ملحوظ مقابل الدولار. وده دفع المصدرين الصينيين إلى بيع الدولار الي معاهم وتحويله إلى اليوان علشان يتجنبوا خسائر أسعار الصرف. ونتيجة الكلام ده انه تراكمت كميات كبيرة من الدولارات في البنك المركزي الصيني، وده الي اجبره على إعادة استثمار السيولة الضخمة ده في مكان آمن وسريع السيولة، وكان الخيار الأوحد هو شراء سندات الخزانة الأمريكية. يعني الصين بجلالة قدرها مقدرتش تلاقي حلول تانيه ؟؟ الحلول التانيه زي الأسهم الأمريكية (عالية المخاطر) أو الذهب (الي بالفعل تم الشراء منه بكثافة) مكانتش قادرة على استيعاب الكم الهائل من السيولة الدولارية ده بالسرعة المطلوبة، علشان كده سوق السندات الأمريكية كان الوعاء الطبيعي للدولارات ده. يعني من الآخر الزيادة الشهرية في يناير لا تعكس تغيير في الاستراتيجية. نقدر نعتبرها إعادة تموضع اضطراري للسيولة لتجنب خسائر سعر الصرف، مش قرار استثماري. طيب نتأكد من الكلام ده ازاي؟؟ بمجرد أن توقعات السوق اتغيرت في مارس (بعد تلميحات الفيدرالي الأمريكي باستمرار رفع الفوائد)، السندات الأمريكية حصلها موجة بيع واسعة، وده بيأكد أن التحركات الشهرية قصيرة ومش بالضرورة بتعكس ثقة طويلة الأجل. علشان كده لما تشوف خبر ... حاول تدور كويس على معناه الحقيقي وياريت ماتعتمدش فقط على المصادر الامريكية .... لازم تنوع مصادرك وتدخل فيها مصادر روسية وصينية وبعدين تعقل الكلام وتحكم عقلك علشان الجميع عنده اجندة يا سيدي #حكاوي_في_البيزنس

الدولار كسر حاجز ال 53.5 جنيه امبارح لاول مرة في تاريخ مصر. حتسمع اسباب كتير في الاعلام والسوشيال ميديا عن الي بيحصل ده، تعال افردهم لك بسرعه قبل ما نتكلم عن قلب الحقيقية: 🔸بسبب الحرب الحالية المستثمرين بيهربوا لاصول امنة زي الدولار 🔸خروج الاموال الساخنة بتقديرات 5 الى 6 مليار دولا ر من نص فبراير 🔸عندنا فوايد قروض السنة ده ب 32 ملاير دولار 🔸الدولار عالميا بتزيد قوته كل يوم بسبب ندرة البترول وارتفاع سعره   تمام كده ...   كل الي اتقال ده صح طبعا، ولكن كل الي اتقال ده عرض للمرض الحقيقي، المرض الي مصر بتعاني منه من السبعينات لحد دلوقتي مرض اسمه عجز الميزان التجاري. الميزان ده عبارة عن الفرق بين القيمة النقدية لصادرات وواردات مصر من السلع والخدمات، لو الصادرات اكتر من الواردات، كده عندك فائض تجاري، وإذا زادت الواردات عن الصادرات ... عندك عجز زي ما انت شايف في الرسم البياني مصر بتعاني من عجز مزمن ومن زمان جدا، بس تفاقم اثره من 2010 تقريبا لحد ما وصلنا الى الوضع الحالي. وبصراحه لما بتكلم مع حد في الموضوع ده لازم اصطدم بالحقيقية الي بيتم استخدامها كحجة طول الوقت .... مصر بلد فقيرة الموارد والمواد الخام، حنصنع ازاي يعني لازم نستورد. على الرغم من ان الكلام ده حقيقي وان المواد الخام المصرية محدودة، بس انت عارف مين افقر مننا في المواد الخام ... الصين اليابان!! اه والله ... اليابان ده من افقر دول العالم في الموارد والصين مواردها استحاله تكفيها   ⬅️ احنا عندنا ارض زراعية وفيرة وقابلة للتوسع بينما اليابان الارض الزراعية شحيحة ⬅️عندنا شمس وطاقة متجددة من الاعلى عالميا و هم على قدهم   ⬅️اليابان معدومين الغاز الطبيعي والبترول والنسب الي في مصر اكتر من الصين اصلا الي بتستورد احتياجتها وبتعتمد على الفحم ⬅️حديد وفوسفات كتير وغير مستغل بقوة بينما اليابان معندهاش ريحتهم ⬅️ده غير الموقع الجغرافي الاستثنائي والعمالة الرخيصه اليابان 1945 كانت أسوأ من مصر عام 2026 بكثير، مدمرة، جعانه، محتلة ومن غير موارد، ومع ذلك بنت ثالث أكبر اقتصاد في العالم خلال 35 سنة. مصر عندها غاز، وحديد، وشمس، وموقع استثنائي، وعمالة شابة وده وضع الصين كانت تتمنى تكون فيه في السبعينات. اومال هم عملوها ازاي وقدروا يتحولوا الى اباطرة الصناعة والتكنلوجيا؟ السر في كلمة واحدة .... ال system الصين مثلا قالت انا مش حبتدي بمشاريع قومية ضخمة، انا حعمل نظلم ينقلني من تصنيع حاجات بسيطه بجودة فقيرة الى تصنيع تكنلوجيا العالم ونجحوا نجاح مذهل، يبقى تعمل زيهم وتمشي على نفس الخطوات ببساطه وبلاش نخترع العجلة 1️⃣ابدأ بمناطق محدودة واعتبرها جيوب تصنيعية بدل الاصلاح الشامل، كل منطقه ليها تخصص واحد مركز فيه، واديهم كل الصلاحيات الممكنة والتسهيلات. 2️⃣المناطق ده يكون ليها قانون خاص بجهة واحده للتراخيص وكل المعاملات الحكومية 3️⃣التمويل للمستثمرين دول يكون موجه للمعدات، لرأس المال العامل، لعقود تنفيذية مش قروض عامة 4️⃣كل مصنع يتربط بالعملاء او بالسوق بالفعل من ناحية ومن ناحية تانية بعقود مع مورديين محليين 5️⃣كل منطقة مركزة في مجموعة منتجات بتعتبر حمل على فاتورة الاستيراد، مع الزام المشتريات الحكومية ان مشترياتها تكون منتجات محلية   الفرق بيننا وبين الصين: - وجود رؤية صناعية طويلة المدى مش بتتغير بتغيير الحكومات - اتصال حقيقي بين قرار الدولة وقرار الشركة الخاصة - مفيش بيروقراطية تقتل المبادرة. - والغيرة الإنتاجية، يعني يكون هاجس الشركة والموظف هو التحسين المستمر مش مجرد الاستمرار #حكاوي_في_البيزنس

🔔 جرس انذار صوته عالي🔔 التصعيد في الشرق الأوسط بيزيد كل يوم والموضووع مش بس الاخبار السياسية والعسكرية، التأثير المباشر على أسواق الطاقة، سلاسل التوريد، والاستراتيجيات الاقتصادية العربية. الي بيحصل على الأرض (أو البحر) دلوقتي جرس انذار صوته عالي سفن الأسطول الأمريكي الخامس بتتحرك من قواعدها في البحرين إلى عرض البحر وده بالضبط الي حصل في حرب ال 12 يوم الي فاتت، اكيد القوات ده مش مروحة بالعكس الي بيحصل جه معناه: 🔻بيستعدوا لعملية عسكرية وشيكة 🔻  نقل السفن من الأرصفة الثابتة في القواعد (مثل قاعدة الجفيرة في البحرين) إلى عرض البحر ده بيصعب استهدافها بالصواريخ أو الطائرات المسيرة الإيرانية وغيرها طبعا من الاهداف العسكرية بس الفكرة ان المنظر ده غير مريح ابدا، يبقى حرجع تاني وتالي اقولك المتوقع لو الحرب لا قدر الله حصلت: 1. اسعار الطاقة ترتفع بشكل غير مسبوق 2. سلاسل الامدادت حيزيد تكلفة تأمينها وتكلفتها التشغيلية وطرقها حتطول علشان تبعد عن مناطق الحرب دول اهم نقطتين لازم تحطهم في اعتبارك وانت بتعمل خطة طوارئ دلوقتي مش بكره علشان التأثر يكون اقل شئ على البيزنس بتاعك لو البيزنس بتاعك صناعي ركز على تأمين مخزون وقطع غيار وخامات ودور على موردين محليين لو البيزنس بتاعك تجاري لازم تتخلص من المخزون الراكد الي مش بيتحرك بسرعه لانك حتكون محتاج سيولة نقدية وحول تركيزك على السلع الاساسية اما لو البيزنس خدمي اولويتك القصوى عملة اجنبية طبعا زود استهدافك للاسواق الدولية نصيحة جوكر لكل اصحاب البيزنس في مصر .... راقب علاوة المخاطر  شركات التأمين العالمية حتبتدي ترفع تكلفة التأمين على السفن الي بتعدي على البحر الأحمر وقناة السويس. ده يعني أن كل حاجه مستوردة حيزيد ثمنها بنسبة 15% إلى 25% بشكل تلقائي خلال أسابيع. اتحرك دلوقتي وجهز نفسك بسرعه مفيش وقت والله اعلم #حكاوي_في_البيزنس

حتفلس لو انت صاحب شركة وحرب ايران قامت ... بس انا عندي الحل حديلك خريطة قرارات لازم تعملها بسرعه لمدة 30 يوم، وخلينا نسميها وضعية دفاعية تكتيكية، وبعدها حقولك على سيناريو ال 90 يوم تشتغل بيه لو الحرب امتدت   خريطة قرارات ال 30 يوم حنقسمهم 3 حاجات: 1️⃣ إدارة التكاليف (وهنا حنتكلم على 3 حاجات برضه) ⬅️قولنا في البوست الي فات ان اول حاجة سعرها يحعلى الطاقة والنقل، يبقى: o لو الوقود نسبته 10–15%  من تكلفتك: o تسعير الشحن داخليًا تحوله الى أسبوعيًا بدل شهريًا o وتحط بند تعديل وقود في العقود الجديدة o وتتفاوض على سعر نقل ثابت 30–45 يوم بس لو انت الي بتنقل بضاعتك يبقى احنا كده رتبنا حسبة تكاليف الوقود لو حصل تعطيل جزئي لهرمز ⬅️لو بتستخدم مواد خام مستوردة يبقى اعمل الاتي: o زوّد مخزونك من المدخلات الحساسة 30–45 يوم كحد أقصى o ما تحولش كل السيولة لمخزون (لانك حتحتاج السيولة) o اسأل المورد بتاعك: ايه هي  نسبة مكوناتك التي بتعدي من الخليج؟ يعني من الاخر اوع تقع في الخطأ المصري الشائع انك تعمل تخزين مفرط علشان لو الحرب قامت تكسب انت من فرق السعر لو الحاجة ارتفعت، انت محتاج سيولة يعني بتتحوط مش بتكسب من التخزين علشان منجمدش راس المال الي له تكلفه مش قليلة. ⬅️ اخر حاجه في ادارة التكاليف حتكون الدولار اي التزامات دولارية خلال 60 يوم غطي 50–70% منها دلوقتي لو تقدر ومتستناش تحسن مفاجئ للجنيه ... ده حيكون نوع من القمار لان في الأزمات الجيوسياسية الدولار غالبًا بيقوى.   2️⃣ اتكلمنا عن ادارة التكاليف ... تعال نتكلم عن التسعير: عارفين ان الاسعار حترتفع لان التكلفة حتزيد عليك ولكن انت محتاج نموذج تسعير ذكي لمدة 30 يوم، اوع ترفع الأسعار بشكل فجائي واستخدم زيادة تدريجية 3–5% مع تقليل الخصومات وتقليل آجال السداد احنا هنا هدفنا حماية الربحية من غير كسر الطلب واوع تحاول تستغل الفرصة وتحاول تزود ربحك على حساب مصيبة الحرب ... ربك شايفك 3️⃣ اخر حاجه في خطة ال 30 يوم اكيد حيكون المبيعات والتحصيل .. ولنا هنا وقفه عدوك الأول في الازمات الي زي ده حيكون التدفق النقدي cashflow علشان كده لازم تركز في الكريديت الي بتديه للعميل بتاعك o لازم تشدد شروط الائتمان علشان تضمن مالك o قلل الائتمان للعملاء 10–15% o راقب العملاء المعتمدين على استيراد مكثف في حالة ال B2B طيب لا قدر الله الموضوع حصل والحرب قامت ايه سيناريوهاتك لل 90 يوم القادمة؟ ⚠️ اول سيناريو انه يحصل ضربة محدودة والدنيا تهدأ زي حرب ال 12 يوم الي فاتت، في الحالة ده: o النفط حيرتفع وبعدين يبتدي يرجع جزئيًا o التضخم يزيد مؤقتًا وبعدين يرجع تاني الاستراتيجية في الحالة ده بسيطه: o التسعير بتاعنا حيرجع واحده واحده زي الأول o ونحاول نشتري مخزون بسعر أقل بعد التهدئة ⚠️ طيب لو سيناريو حملة عسكرية لأسابيع حصل، في الحالة ده: o اسعار الطاقة حتفضل مرتفعة لفترة أطول o النتيجه ضغط على الجنيه وتمويل أصعب – راجع البوست الي فات- هنا بقه نتحول من دفاع تكتيكي إلى إعادة هيكلة تكاليف .. يعني: o نعيد تصميم المنتج لتقليل المكونات المستوردة o نبحث عن موردين محليين حتى لو بجودة أقل مؤقتًا o للاسف الأسعار لازم نعيد دراستها بشكل واضح ومدروس حسب التكلفة الجديدة ⚠️ السيناريو الأسواء ان يحصل تعطيل ملاحي كامل في مضيق هرمز: ده نتيجته قفزة كبيرة في النفط والسيناريو ده الأخطر على مصر علشان كده لازم نستخدم خطة طوارئ سريعه: o وقف اي خطط للتوسع o جمّد أي استثمار رأسمالي o خلي عندك سيولة تكفي 3 شهور تشغيل وربك يستر #حكاوي_في_البيزنس

الاسبوع الي فات كنت بحضر لل meet-up ده بشكل عام، يعني مثلا مثلا بعض المواضيع الي كنت ناوي اتكلم فيها كانت زي: 🔻الفرق الجوهري بين شركة بتستثمر وشخص بيستثمر 🔻في شركات بتبان profitable لأنها مش بتستثمر في نفسها… وده مش نجاح، ده تأجيل للانفجار لان الربحية ممكن تكون بسبب تسعير مؤقت او تأجيل صيانه او بيع بيكريديت طويل. 🔻 امتى تقدر تقول ان شركتك جاهزة للتمويل، وهل التمويل ده لسد عجز ولا للتوسع؟ 🔻 لو عندك سيولة ازاي تقسمها علشان يكون عند ذراع استثماري قوي، وتستثمر في ايه وازاي بس بعد بداية الحرب الامريكية الايرانية اظن ان الكلام اتحول من ازاي تبني استدامة مالية الى ازاي تحمي شركتك في حرب لا تعرف مداها؟ اظن ان ال meet-up ده الي بترعاه Mustaner ان شاء الله حيكون مهم جدا لكل من هو C-level ومحتاج يفهم الوضع ويحمي شركته ازاي، خصوصا ان في قامات حتكون موجودة في اللقاء ده زي: Hossam Heiba الرئيس السابق للهيئة العامة للاستثمار (GAFI) Fouad Houssien مؤسس مستنير Ahmed Morshed المدير العام، شركة Bokra لإدارة الأصول اللقاء حيكون: 📅 Thursday, 5 March ⏰ 9:00 PM 📍 Kapitalize – The District Vill 🔒 Limited seats – curated audience – registration required وده لينك الحجز https://lnkd.in/dfaMNv2i ⚠️ الاماكن محدودة فياريت بعد الحجز تتواصلوا مع Seif Mohammed للتأكيد ⚠️ حكون في انتظاركم بحول الله وقوته #حكاوي_في_البيزنس

ماذا لو .... عاد المصريين بالخارج؟ انا مش بتكلم عن عودة تراجيدية لكل العاملين بالخارج علشان متفمنيش غلط انا بتكلم عن عودة محدودة بسبب الحرب، في البوست الي فات اتكلمنا عن بعض المشاريع في بعض الدول الخليجية الي بدات تتاثر بسبب الحرب، فلو لا قدر الله الحرب ده فضلت مكملة ممكن جدا بعض المشاريع تتلغي او تتأجل وبالتبعية حنلاقي عدد من المصريين العاملين بالخارج بيرجعوا ... طبيعي يعني. تحويلات العاملين بالخارج من اهم المصادر الدولارية لمصر في ظل وضع ممكن يأثر على السياحه وقناة السويس، يعني الموضوع مش بسيط فهل احنا مستعدين للكلام ده؟ طيب خلينا الاول نشوف احصائية الجهاز المركزي للتعبئة العامة والإحصاء، إجمالى تصاريح العمل الصادرة للمصريين للعمل بالخارج 2023 ما بين تجديد وأول مرة كانت 917,833 تصريح 91% منهم للدول العربية الاسيوية .. الخليج يعني. تحويلات المصريين بالخارج في 2025 كانت 41.5 مليار دولار، بينما صافي الاحتياطيات الدولية في البنك المركزي المصري 52.7 مليار دولار بنهاية فبراير 2026، والعاملين في قطاع البناء بيمثلوا تقريبا 28% من العاملين في الخليج وده اول قطاع ممكن يتأثر بشدة من الحرب .... اكثر من مشاريع النفط كمان. لو عملنا stress test سريع كده (مش دقيق قوي طبعا بما اننا بنتكلم عن وضع غير مفهوم قوي) ممكن نطلع بالآتي: 1️⃣ سيناريو أ - ضغط محدود لو رجع من 150 الى 300 الف عامل (من 3 الى 5%) ده معناه خسارة من 3 الى 5 مليار دولار من التحويلات يعني من 0.3 الى 0.5% تقريبا من التحويلات الحالية. 2️⃣ سيناريو ب - ضغط متوسط من 500 الى 800 الف عائد (من 9 الى 14%) وده خساره دخل من 10 الى 15 مليار دولار - يعني من 1 الى 1.8% تقريبا 3️⃣ سيناريو ج - ضغط عالي من مليون ونص الى 2 مليون عائد (26 الى 34%) كده احنا بنتكلم في 20 الى 30 مليار وده رقم مش قليل ولكن حتى مع اسواء سيناريو احنا لسه عندنا هامش امان في الدخل الدولاري ولكن الاثر مش بس حيكون على الدولار، الناس الي ممكن ترجع ده حتصطدم بقدرة استيعابية في سوق العمل محدودة، والاسر الي بيتحول لها فلوس من الخارج حتواجه مشكلة في الاستهلاك والتعليم والصحة وغيرها لان مصدر الدخل وقف. ده غير قطاع العقارات الي بيعتمد على بيع وحدات كثيرة بالتقسيط للمصريين بالخارج، واحنا في مصر بنعتمد عليه في تشغيل عدد مش قليل من العمالة حتى ولو مش نظامية. فيبقى السؤال المهم ... هل احنا مستعدين لوضع زي ده وهل عندنا خطط لاستيعاب حالة زي ده ؟؟ hashtag #حكاوي_في_البيزنس

للأسف بدأت الاجراءات الي اتكلمت عليها في البوست الي فات. انا متفهم التعليقات السلبية الي اتقالت لما عملت البوست -طبعا الغير محترم اتعمله بلوك- لكن الوضع العالمي بيضغط على حكومات كل الدول بالفعل انهم ياخدوا قرارات صعبه. هل انت البيزنس بتاعك جاهز لتحمل الصدمات القادمة؟؟ #حكاوي_في_البيزنس

من غير مقدمات في حاجه عبقرية بتحصل في مصر ... ومش فاهم ازاي مش واخده حقها في الاعلام؟ طول عمرنا بنقول: الصناعة ضعيفة، الاستثمار رايح للعقار والذهب، التمويل صعب ... النهاردة الكلام ده اتقلب، حقولك ايه الي بيحصل وإزاي لو عندك مصنع أو شركة او حتى شركة ناشئة تقدر تستفيد من الموجة دي. لأول مرة الاقتصاد المالي -سوق المال يعني- حيشتغل بشكل منظم ومؤسسي مع الاقتصاد الحقيقي الي هو الصناعة!! الحكومة عن طريق صندوق مصر السيادي مش هتنزل تضخ فلوس وتدير المصانع، لأ.. هتعمل حاجة أذكى، هتخلق الأدوات المالية اللي تسمح للقطاع الخاص نفسه يدخل يستثمر في الصناعة. ده حيحصل ان شاء الله بتحالف مع أكبر 5 بنوك استثمار في مصر: 🔹 إي إف جي هيرميس   🔹 بلتون   🔹 كايرو كابيتال   🔹 سي آي كابيتال   🔹 الأهلي فاروس هيأسسوا صناديق استثمار صناعية متخصصة، ومش نوع واحد من الصناديق.. فيه صناديق للبورصة (زي صندوق بلتون الصناعي اللي تقدر تشتريه زي السهم)، وفيه صناديق استثمار مباشر للمستثمرين الكبار، وفيه رأس مخاطر للشركات الناشئة. مش بس كده.. ده الكبار كمان داخلين!! بنك الاستثمار الأوروبي (EBRD) بيتفاوض دلوقتي على إطلاق سلسلة صناديق استثمار وصناديق رأس مال مخاطر، ومستعد يدعم مصر بـ SPACs (آداة تمويل متطورة جدًا بتساعد الشركات الناشئة تطلع البورصة بسرعة). ومجموعة البنك الدولي (IFC) ناقشوا وزير الصناعة في إطلاق صناديق استثمار صناعية جديدة، وهيدوا دعم فني للمصانع عشان توصل للمعايير العالمية. ليه بقه انت مسمعتش عن الخبر ده؟ لان الإعلام للاسف غطى الخبر بالشكل ده "وزارة التعاون الدولي تبحث مع بنك الاستثمار الأوروبي تعزيز التعاون المشترك" لا حد ترجم الكلام ده لصاحب المصنع ولا قاله هو هيستفيد إزاي؟    الصناديق دي مش نازلة تعمل إنقاذ عشوائي، لكن بتدور على حالات قابلة للنمو السريع، يعني لو شركتك: ✅ جاهزة للتصدير (عندك منتج بينافس عالميًا، وعندك طاقة إنتاجية تقدر تتضاعف)   ✅ عندك اختناق تمويلي مش مشاكل تشغيلية يعني فاهم في شغلك بس محتاج تمويل ومساعده ✅ أو حتى لو متعثر بس عندك أصول وسوق قائم والمشكلة إدارية أو مالية أنت بالضبط المستهدف، الصناديق هتدخل تستثمر في مشروعك مش تقرضك وتخرج بعد 5-10 سنين بربح، واخد بالك من الفرق؟ العبقرية الي بتكلم عليها ان الحكومات دائمًا بتتعامل مع الصناعة المتعثرة بـدعم أو إعانة، أما دلوقتي الحكومة مش بتصرف لا ده بتنظم وتسهل وتشارك في التمويل مع القطاع الخاص. السيولة الضخمة اللي في سوق المال اللي كانت رايحة عقارات وودائع واصول غير منتجه هتتوجه للصناعة لأول مرة بشكل منظم، الصناديق هتشتغل بمعايير استثمارية مش عواطف، يعني نجاحها مرتبط بنجاح المصانع الحقيقية. الخلاصه بقه لو انت صاحب شركة أو مصنع... 1️⃣ جهز نفسك: جاهزية التصدير، الحوكمة، القدرة على مضاعفة الإنتاج، دي الي هيخليك مؤهل للتمويل. 2️⃣ متستناش قروض بنكية تقليدية.. الصناديق دي بتاخد حصة في الشركة وتدخل معاك شريك طويل الأجل. 3️⃣ راقب الإعلانات الرسمية لصندوق مصر السيادي والبنوك الخمسة، لأن الصناديق هتنزل تباعًا بداية من الربع الثاني 2026. وبالتوفيق للجميع ... #حكاوي_في_البيزنس

ربنا يوفقكم لكل الخير يا رب