Ahmad Sayyam's Recent LinkedIn Posts

سهل جدا تتحول من #مدير لئيم ومكره، الى #قائد محبوب وناجح، لو تأملت في هاي الـ 5️⃣ نقاط فقط، والي بتعكس تجربتي الشخصية. 1️⃣ ﴿فَبِمَا رَحْمَةٍ مِّنَ اللَّهِ لِنتَ لَهُمْ ۖ وَلَوْ كُنتَ فَظًّا غَلِيظَ الْقَلْبِ لَانفَضُّوا مِنْ حَوْلِكَ﴾ [آل عمران: 159] ◀️ اللين والرحمة بتساعدك تخلي فريقك قريب منك، القرب مش بالمسافة فقط، حتى القرب العاطفي والترابط مهم جدا لفريق عمل ناجح. 2️⃣ ﴿وَقُولُوا لِلنَّاسِ حُسْنًا﴾ [البقرة: 83] ◀️ أسلوب الكلام مهم جدًا في بيئة العمل. التعامل بكلمة طيبة واحترام بيساعدك في تحسين العلاقة مع فريقك، ورفع مستوى التعاون. 3️⃣ ﴿إِنَّ اللَّهَ يُحِبُّ الْمُحْسِنِينَ﴾ [البقرة: 195] ◀️ شجع فريقك وادعمهم ليوصلوا إلى الإتقان والجودة في العمل، وعزز عندهم ثقافة الإحسان في الأداء والسلوك. 4️⃣ ﴿وَتَعَاوَنُوا عَلَى الْبِرِّ وَالتَّقْوَى﴾ [المائدة: 2] ◀️ النجاح في بيئة العمل بده فريق متعاون. التنافس السلبي بيخلق عداوة، ودورك كقائد التشجيع على العمل الجماعي والمساعدة المتبادلة. 5️⃣ ﴿إِنَّ خَيْرَ مَنِ اسْتَأْجَرْتَ الْقَوِيُّ الْأَمِينُ﴾ [القصص: 26] ◀️ في اختيار فريقك وتوظيفهم الخبرة مش كل شي، أعطي فرصة للشباب الي عندهم الكفاءة والأمانة. #الخلاصة: لو حريص على نجاح فريقك ضروري تتعلم مهارات #القيادة_الناعمة، وتتعامل مع فريقك بلين وطيبة، وتفترض حسن النية دائما. القسوة ما بتنشر إلا سلبية، وبيئة العمل السلبية حتخلق بحر من السموم، وحتوصلكم لفريق مفكك، بيستنى فرصة ليتركوك تغرق لوحدك. شو عندكم تجارب او نصائح ممكن كمان نتعلم منها أساليب قيادة لينة وإيجابية، وتساعدنا نخلق بيئة عمل مريحة وفريق ناجح؟

في كل مقابلة عمل بحاول أخفف من المتطلبات الخاصة في #الخبرة و #المهارات و #الشهادات والسبب إنه: 🔵 الموظف الي ما عنده #خبرة، مع الوقت ممكن يكتسبها. 🔵 الموظف الي ما عنده #مهارات، مع الوقت ممكن تعلمه إياها. 🔵 الموظف الي ما عنده #شهادات، مع شوية دعم ممكن يحصلها. 🔴 بس الموظف الي ما عنده #أخلاق ولا #أمانة، للأسف لا يمكن إصلاحه ولو كان عنده أكبر الشهادات وأعظم الخبرات والمهارات. يا جماعة الخير والله، 🟢 الموظف الأمين نعمة، 🟢 الموظف الخلوق نعمة، 🟢 الموظف المرن والمجتهد نعمة. أعطوهم فرصة، مكنوهم وادعموهم وحافظوا عليهم. والسؤال المهم الأن وحسب خبرتكم، كيف ممكن ممكن نختبر الأمانة والأخلاق عند المرشحين خلال المقابلة؟

تذكرت اليوم نصيحة من محب أنقذتني بعد ما اشتد البلاء، وحبيت اشاركها معاكم 🛑 ١١ شهر بدون شغل ولا دخل. 🛑 مشاكل على الصعيد الصحي والنفسي والعائلي. صديق ومحب نصحني بـ٣ امور أواظب عليهم، وأكدلي على اخر نقطة فيهم: 1️⃣ كل ما ضاقت فيك الدنيا #اصبر: 🟢 "إِنَّمَا يُوَفَّى الصَّابِرُونَ أَجْرَهُم بِغَيْرِ حِسَابٍ" 2️⃣ كل ما اشتدت الأزمات عليك، أكثر من #الدعاء: 🟢 "وإذا سَألك عبادي عَني فإني قريبٌ أجيب دعوة الداع إذا دَعان" 3️⃣ كل ما زاد الكرب والهم، زيد من #الاستغفار: 🟢 "فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا، يُرْسِلِ السَّمَاءَ عَلَيْكُم مِّدْرَارًا، وَيُمْدِدْكُم بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا" 🔵 كل ما سبق ذكره كان هو وقودي لأستمر في السعي والمعافرة. وبفضل ربنا تغير الحال إلى أفضل حال. صدقوني ما هي بشطارتك ولا بعلاقاتك الإجتهاد مطلوب صحيح، بس التسليم لقضاء الله، والثقة برحمته، والتصديق بقرب فرجه، هو الأهم. ◀️ شو ممكن تشاركوا معنا نصائح إضافية بهيك مواقف؟ ◀️ شاركها لعل الرسالة توصل لشخص محتاجها.

حكون صريح معاكم وأعترف بعد ١٩ سنة في سوق العمل تأكدت إنه ما في شغل بيوقف على #موظف. 🔴 بس ممكن الشغل بصير #أبطأ. 🔴 وجودة العمل تصير #أسوأ. 🔴 والكُلف تصير #أعلى. نصيحتي لكل #مدير وصاحب قرار: 👇🏻 دير بالك على الناس الي بتخلي الشغل يبدو #سهل، بس في الحقيقة هو صعب و #ممتنع. الناس الي بتنتج بهدوء بدون ضجة، قدروهم وكافئوهم، قبل فوات الأوان. وإنتو شو رأيكم، الشغل ممكن يوقف على موظف؟

على فكرة أنا #أسمر البشرة، وعيوني مش ملونة ومش دارس في جامعات أجنبية وما عندي جواز سفر أجنبي ولا جنسية أوروبية وبرغم هيك، بفضل ربنا وكرمه: 🟢 استلمت مناصب قيادية في أكبر الشركات والمؤسسات. 🟢 مكنت ودربت وأهلت مئات الشباب #العرب لسوق العمل، واليوم هم قادة في شركاتهم. 🟢 إنجازاتي مشهود لها في كل مكان تواجدت فيه، وحصلت على الإقامة المميزة تقديرا لما قدمته في المملكة. #عقدة_الخواجا هاي #وهم في عقولنا بس، وصارت شماعة نعلق عليها يأسنا وإحباطنا. 🔵 الوعد الرباني واضح وصريح: ((وَأَن لَّيْسَ لِلإِنسَانِ إِلاَّ مَا #سَعَى)) 🔵 المعادلة واضحة وصريحة، إذا بتسعى وبتعافر وبتجيب أخر أخرك، ربنا حيكرمك. 🔵 انا مش #فريد من نوعي، و #الفرص_متاحة للجميع، وخير ربنا وفير، ورزقه واسع، والفرص ما بتيجي للي بيستناها، الفرص بدها الي #يصنعها. جاهز تبدأ يوم جديد بفكر جديد؟ جاهز تبدأ صناعة فرصتك؟ صباحكم سعادة ورضى وإنجاز 💪🏻

البحث عن عمل في هاي الفترة مرهق جدا وصعب. والي بيبحث عن وظيفة كريمة اليوم، كانه بيحفر في جبل صخري. بس الي ممكن يطمنك هو إنك تخيل معي هاي الآية العظيمة. ((هُوَ الَّذِي جَعَلَ لَكُمُ الْأَرْضَ ذَلُولًا فَامْشُوا فِي مَنَاكِبِهَا وَكُلُوا مِنْ رِزْقِهِ)) متخيل انه #الكرة_الأرضية بما فيها من شوارع ومباني وجبال وأنهار وخيرات وأرزاق مخبأة، كلها مُذللة ومُهيئة لك؟ والمطلوب منك فقط إنك تسعى!!! قوم عزيزي، زيح عنك عتمة الإحباط. وانفض عنك غبار اليأس، رزقك بإنتظارك، هو فقط مشروط بسعيك وهو أقرب مما تتصور. كلمة منكم ونصيحة لكل باحث عن عمل؟

بشرب قهوتي في أمان الله عند الحبايب Astrolabe Coffee ، فجأة سمعت واحد عم يفضفض بصوت عالي لصاحبه ويحكيله "والله ما أنا عارف من وين أبلش بعد إجازة العيد" خطر ع بالي أقدم هدية لكل واحد ضايع بعد إجازة العيد ملف بيحتوي على قائمة من ٨ مهام اساسية. إذا نفذتهم بضمنلك عودة للعمل بإنتاجية غير مسبوقة، المهام هاي عبارة عن خلاصة تجاربي خلال ١٩ سنة. الملف مجهز ومصمم ومرتب حسب أولويات محددة (قابلة للتعديل) مع مؤشرات إنجاز لسهولة تتبع التقدم في الإنجاز. لو حابب أشارك معك الملف، بس اكتبلي مهتم في التعليقات، والتفاصيل حتوصلك على حسابك. تمنياتي للجميع بالتوفيق والنجاح، وعودة الى العمل سهلة وسعيدة وموفقة. أُحِبكُم جميعاً في الله.

من فترة ليست ببعيدة كان فكرة إني أسافر بهدف إني أفطر عند والدتي وأهلي #حلم مستحيل المنال. اليوم بفضل الله، مجرد ما تخطرلي الفكرة بكون حجزت على أول طيارة. #الهدف من المنشور مش أستعرض قدامك وضعي وامكانياتي، #الرسالة الي بدي أوصلها لكل شاب وصبية في أول حياتهم، إنه دوام الحال من المحال. وقد ما اشتد الإبتلاء عليكم وطال، فهو مستحيل يدوم، وحيجي يوم تتذكروا كلامي منيح، لما تقطف ثمرة صبرك وتعبك وشقاك، وتشوف الخير الوفير والي ما هو إلا نتيجة معافرتك وسعيك. بسم الله توكلنا على الله سبحان الذي سخر لنا هذا وما كنا له مقرنين 🤲🏻 شارك هذا المنشور واحفظه عندك عشان ترجعله لما ربنا يكرمك من وسع.

صرخ في وجهي وحكالي اتحرك، مشان الله اتحرك. والله ما خُلِقنا لِنكون أصنام. كلمات سمعتها من والدي رحمه الله. معلمي الاول ومثلي الأعلى. لما شافني مستسلم لليأس ومحبط. صحيح والدي رحمه الله ما كان مثالي أبدا، بس كنت أحب عيوبه زي ما بحب فضائله، وفي بعض الأحيان القسوة مطلوبة مع من نحب، خصوصا اذا شفناهم عم يحيدوا عن الصواب. رحل ذلك الرجل الي في قسوته كل الطيبة، وفي عصبيته كل الحنان، وفي صراخه كل الهدوء. رحل بعد ما اطمأن وأمن مستقبل ٦ شباب و٤ صبايا. يمكن رحمه الله ما تركلنا ثروات مادية، بس ترك فينا ما هو أثمن، قيم وأخلاق ومبادئ تخلينا نعيش بكرامة لأخر يوم في عمرنا. والدي العزيز، إذا عم تسمعني، حابب أقلك وأطمنك إني عم #اتحرك وعم #أعافر كل يوم، وما راح أوقف ان شاء الله، لانه انت الي علمتني انه الله ما خلقنا أصنام. وانتو شو نصيحتكم لأي شخص محبط وحاسس انه عاجز عن الحركة؟

ورا هاي الصورة الحلوة قصة شوي غريبة. #المكان: #عمان (سويسرا العرب) #المحل: قهوة Marouf For Food Industries L.L.C شركة معروف للصناعات الغذائية الزمان: عصر أول أيام #عيد_الفطر المبارك دخلت المحل، وجدت بيشتغل فيه شب وصبية، واضح إنهم طلاب جامعة. واضح عليهم التعب، وبرغم الإبتسامة العريضة الي استقبلوني فيها وكان واضح إنه عندهم شوية حسرة وحزن على تواجدهم في أول أيام العيد في مكان عملهم وبعيد عن أهلهم. استلمت طلبي، وقلتلهم : إسمحولي أحكيلكم الله يعطيكم ألف عافية يا #أبطال، بفضلكم عيدنا صار أجمل وأسهل، الله يجزيكم الخير عنا، ويعوضكم خير. الرد منهم كان غريب، حكالي الشب، تعرف إنك أول زبون من فترة طويلة يحكيلنا كلام هيك حلو ويحفزنا!!! يا جماعة الخير والله الكلمة الطيبة صدقة. الكلمة الطيبة أثر يدوم. الكلمة الطيبة لها سحر عجيب اذا كانت طالعة من القلب. شكرا من قلبي لكل شخص ترك بيته وأهله وكلن على رأس عمله في أيام العيد. الله يعطيكم ألف عافية يا #أبطال. وربنا يجزيكم كل الخير عنا. برأيك كيف ممكن نعبر عن شكرنا لأبطال العيد؟ كل عام والجميع بألف خير عيد مبارك.

هاي الأيام فرصتك الحقيقة متعطل عن العمل وبتبحث على وظيفة؟ مديون وغرقان في الإلتزامات وبدك حل؟ عايش في كرب وهم شديد وبدك الفرج؟ الى كل شخص في كرب أو مهموم هذا الدعاء لك 👇🏻 عن أبي بكرة أن رسول الله صل الله عليه و سلم قال : " دعوات المكروب؛ اللهم رحمتك أرجو فلا تكلني إلى نفسي طرفة عين وأصلح لي شأني كله لا إله إلا أنت " قولوا آمين، وشاركوها لعلها توصل لكل شخص في حاجة هذا الدعاء.

باركولي 🥳🥳🥳، تأكدت إنه الحمدلله كلماتي لها #أثر. ومنشور واحد خلى #الخطوط_السعودية بتبحث عني!!! قبل أيام كنت مسافر على #الخطوط_السعودية 🇸🇦 وقبل الإقلاع وزعوا علينا هدية رمزية بمناسبة #يوم_التأسيس. لفتة بسيطة، بس كان إلهااثر كبير علي، كتبت عنها منشور على #لينكد_إن إن،بكل عفوية وصدق، بدون أي توقع لأي مقابل. واليوم وصلتني هذه الهدية من فريق #الخطوط_السعودية مع رسالة تقدير جميلة. بصراحة الي ادهشني مش الهدية، الموضوع إن كلمة صادقة ممكن توصل أبعد مما بنتوقع ويكون اثرها أكبر مما نتخيل. شكراً لفريق #الخطوط_السعودية على لفتة راقية تؤكد أن التفاصيل الصغيرة، بتصنع فرق كبير. سؤالي: هل بتأمن إنه الكلمة الها #أثر، وإنه وجودك على هاي المنصة أهم وأكبر من موضوع انه بس تبحث عن #وظيفة؟ SAUDI AIRLINES SAUDI_AIRLINES

في المقابلة، مستحيل أرفض المرشح لأنه متوتر #التوتر مش شرط #قلة_ثقة. التوتر يمكن نابع من حجم #الأمل الي متأمله هذا الشخص في الوظيفة. التوتر ممكن يكون بسبب حجم المسؤولية والضغط الي عليه. التوتر يمكن لأنك إنت مكشر وبتعامله بطريقة مستفزة. خلينا نتقي الله في الناس، يسروا ولا تعسروا عليهم، أعطوهم فرصة يظهروا أفضل ما عندهم. وفكر منيح قبل تقرر مصير شخص من وراه عائلة. إرحموا من في الأرض، يرحمكم من في السماء. برأيكم، هل التوتر خلال المقابلة معيار نقيس عليه مدى قابلية المرشح للعمل تحت #الضغط؟

تعالوا أحكيلكم تجارب #حقيقية تصدمكم: #احفظ هذا المنشور، لانك راح تحتاجه في أيامك الصعبة. 🔵 لما فصلوني 2018 من شغلي، طلع #فيها_خير 🔵 ولما رضيت أشتغل بشركة بنص راتب في 2019 كمان #فيها_خير 🔵 ولما سكرت شركتي 2022 وخسرت كل ما أملك طلع #فيها_خير 🟢 ربنا عز وجل كان بيجهزني وبيهيئني لخير عظيم أنا ما كنت شايفه. #الرسالة: إنت كمان، تأكد إنه كل شي عم يصير معك هو #خير، بس إنت مش شايف الصورة كاملة، ومش مدرك شو الخير الي عم يستناك. لسا عندك شك إنه #فيها_خير؟

تصدقوا إني بحمد ربنا إنه 90% من دعواتي ما استُجيبت!!! كم من شركة تمنيت أشتغل فيها، وقتلت حالي حتى أتوظف فيها، وربنا ما أراد، وأكتشف بعد فترة إنه عدم قبولي كانت خيرة. انت ما بتعرف #الخير وين، لذلك خلي دعاءك دائما عند كل حاجة: ((اللهم إن كنت تعلم أن هذا الأمر خير لي في ديني ومعاشي وعاقبة أمري، فيسره لي، ثم بارك لي فيه، وإن كنت تعلم أن هذا الأمر شر لي في ديني ومعاشي وعاقبة أمري فاصرفه عني واصرفني عنه، واقدر لي الخير حيث كان، ثم رضّني به)) وبعد هيك لا تزعل ولا تندم على أي قرار، وتأكد إنه #فيها_خير. بتمنالكم يوم كله رضى وسعادة وبركة.

جربت شعور #قهر_الرجال في أكثر #مقابلة عمل ما بنساها بحياتي. في عام 2019، وبعد أكثر من 11 شهر بدون شغل، بتيجي مقابلة العمر وطوق النجاة من إلي أنا فيه. المقابلة عن بُعد، مع مدير في شركة استشارية كُبرى. والله العظيم مجهز حالي، ومتأكد من جودة الشبكة والإتصال. لابس أفضل بدلة عندي، ومن يومين ما نمت من الحماس. بدأت المقابلة، واضح انه الشخص الي بيقابلني في مكان عام. ضجة حواليه، وصوته يا دوب مسموع والشبكة ضعيفة أكيد من عنده. لا إسلوب ولا طريقة في التعامل، وكل شوي يتذمر من سوء جودة الإتصال، ويلومني إنه المشكلة من عندي. بصراحة #قهرني وأنا حاسس انه فرصة عمري بتضيع مني. النتيجة بعد ربع ساعة من التوتر إنتهت المقابلة، على إنه ان شاء الله خير بنرجعلك. أقل من نص ساعة، وصلني الرد إني #مرفوض لأني لا أملك المعرفة المطلوبة. 🔴 إستنى شوي، القصة ما خلصت 👇🏻 كرم ربنا يحكُم، بعد عدة سنوات بس بعد ما تبدلت الأحوال. اشتغلت بجهة حكومية كُبرى، وتعينت لأكون مسؤول عن تنفيذ عمل إستشاري مع نفس الشركة الي قابلوني سابقا. وكان مطلوب مني أراجع ملفات الفريق المرشح وأختار منهم الفريق الي بده ينفذ العمل. واحد من ملفات المرشحين يطلع نفس الشخص الي قابلني. وبكل حيادية بعد مراجعة ملفه، كان بيستحق إنه يكون ضمن الفريق. #الرسالة الي حابب أوصلكم اياها إنه الدنيا #دوارة بشكل لا يصدقه عقل. لا تشيل بقلبك ضد أي إنسان. اشتغل على نفسك، وركز على أهدافك وراح توصل للمكان الي بتتمناه بكل تأكيد. لا تستسلم للظروف ولا تلعنها، إجعل ظروفك الصعبة اليوم تصير أكبر حافز الك للتغيير. شاركوني ظروف أكثر مقابلة عمل أثرت فيكم؟ ولو كنت محلي شو ممكن تتصرف، وشو ممكن يكون قرارك؟

كيف انقلبت حياتي رأسا على عقب!!! بين عامي ٢٠١٨ و ٢٠٢٠، تراكمت علي ديون بمبالغ كبيرة، بسبب فصلي من العمل ومشروع العمر الي فشل. خلال هاي السنوات، كنت ما أنام الليل من الهم والضيق. والنهار كان عبارة عن كابوس طويل بسبب المطالبين بحقوقهم. بالصدفة طلعلي فيديو لشخص (ربنا يكرمه ولكن لا يحضرني أسمه للأسف) وجهه سمح، وكلامه طيب، وكأن الفيديو كان موجه إلي، وكأنه بيخاطبني. ملخص الفيديو هو ٣ نقاط، لازم تعملها حتى يتسهل سداد الدين: 1️⃣ الإلتزام بالدعاء التالي بشكل يومي، (وهو دعاء ثابت عن رسولنا الكريم): ((اللهمَّ مالكَ الملكِ تُؤتي الملكَ مَن تشاءُ، وتنزعُ الملكَ ممن تشاءُ، وتُعِزُّ مَن تشاءُ، وتذِلُّ مَن تشاءُ، بيدِك الخيرُ إنك على كلِّ شيءٍ قديرٌ، رحمنُ الدنيا والآخرةِ ورحيمُهما، تعطيهما من تشاءُ، وتمنعُ منهما من تشاءُ، ارحمْني رحمةً تُغنيني بها عن رحمةِ مَن سواك)). 2️⃣ التواصل مع كل أصحاب الحقوق، وعمل تسوية وإعادة جدولة للديون، لإثبات حسن النية، وبهاي الخطوة بدك تكون شفاف وصريح، وتتكلم معهم بثقة وتشعرهم بصدق نيتك للسداد. 3️⃣ الإكثار من الصدقة، ولو بالقليل، حتستغرب إنه في ناس ممكن الدينار الواحد يفرق معهم، يمكن سندويشة تسد جوعهم، دور على المحتاجين وحتشوف العجب العجاب. خلال بضع أشهر فقط، معالم الفرج ظهرت وبدأ الحال يتحسن، وخلال سنة كانت الديون اتسكرت بفضل الله، وصار في فائض. #الملخص: ثقتك في الله، وصدق نيتك والتصدق هي مفتاحك لتعالج أي ديون متراكمة، هاي وصفة مجربة ومضمونة بإذن الله. لسا عندك شك في كرم ربنا؟ 🔄 شارك المنشور رجاء لاعم الفائدة.

من ٦ سنوات ومن تحت الصفر، وبالدين سافرت إلى هذا البلد الطيب البلد الوحيد إلي آمن بقدراتي. البلد الوحيد إلي عاملني كأنسان وما اعتبرني لاجئ ولا نازح. البلد الوحيد الي أعطاني فرصة لاثبت تميزي وقدراتي. ربنا لا يُريني في هذا البلد ولا في أهله الطيبين لا مكروه ولا شر. شاركونا قصص نجاحكم هنا، ودعواتكم لها البلد الطيب. #معلومة_إضافية #علم المملكة العربية السعودية، هو العلم الوحيد الذي لا #يُنكس، لأنه يحتوي على ((لا إله إلا الله، محمد رسول الله)) #يوم_العلم في المملكة العربية السعودية.

من فترة تشرفت بدعوة كريمة وخاصة لزيارة مكان كنا نسافر آلاف الكيلومترات عشان نعيش تجربة مثله. زيارتي كانت لـ Six Flags Qiddiya City و Aquarabia Qiddiya City في #القدية ما كانت مجرد جولة ترفيهية. كانت لحظة #وعي، وعي بحجم التحول، وعي بسرعة التنفيذ، وعي بوطن قرر يرفع سقف الطموح ثم يكسره. وأنا عم أسمع ضحكات الناس والأطفال وأشوف تفاصيل المشروع، حسيت بشي واحد: هذا #البلد ما عم يبني مدينة ألعاب، بل عم يبنوا #مدينة تصنع ذاكرة أجيال كاملة. #الخلاصة الي وصلتلها انه هذا مش مشروع ترفيه. بل هذا مشروع ليبني مستقبل جديد بمعايير جديدة. فخور جدا كوني شخص عربي موجود في هذا البلد لأساعد أهله في صياغة مستقبل مشرق ولتحقيق #رؤية طموحة. شو رأيكم بكل الي عم بصير في المملكة العربية السعودية 🇸🇦 ، وبهاي المشاريع الضخمة الواعدة؟

لا تضيع أجمل سنين عمرك زي صاحبنا. صديق مقرب ضيع أجمل سنوات حياته غرقان في #الخوف. 🛑 بيخاف يضحك ويفرح، من مبدأ ((الله يجيرنا من الفرحة)). 🛑 بيخاف يحكي رأيه، من مبدأ ((امشي الحيط الحيط وقول يا رب الستر)). 🛑 بيخاف يظهر إنجازاته، من مبدأ ((ما بيحسد المال إلا أصحابه)). بعرفه من أكثر من ١٠ سنوات، وهو مكانك سر، لا تطور ولا تغير، ولا انبسط في الي فات من عمره، ولا عارف ينبسط في الي جاي. يا جماعة والله العمر أقصر مما نتخيل. 🟢 انبسطوا وافرحوا، حتى في إنجازاتكم البسيطة. 🟢 لا تخافوا تحكوا كلمة الحق، الرزق على الله. 🟢 شاركوا فرحتكم وانجازاتكم مع الناس، ولكن حصنوا أنفسكم. هل معقول يوصل الإنسان لمرحلة يخاف حتى من الفرحة؟

الكوارث والمصايب الي اكتشفتها وخلتني تركت شغلي خلال أقل من #إسبوع، وما كان عندي فرصة بديلة. في شركة ما كملت عندهم إسبوع لأنه إكتشفت إنه من ضمن سياستهم المعمول فيها: 🔴 إنك تروح الساعة ٥ #جريمة. 🔴 إنك ما ترد على تلفونات الشغل بعد الدوام #تقصير. 🔴 إنك تطالب بحقك #تمرد. 🔴 إنك تقول لأ على طلباتهم الغير منطقية #وقاحة. للأسف كثير شركات بتتبنى هيك سياسات عمل، بدون حسيب ولا رقيب، ودائما بيعتمدوا على انه الموظف هو الحلقة الأضعف. لو اشتغلت بمثل هيك شركة ومريت بهيك تجارب، شو بتتصرف وكيف حتكون ردة فعلك؟ وهل بتأيدوا التصرف الي أنا عملته، بأني تركت ومشيت؟

🟠 ٤ سنوات في الجامعة عشتها قلقان وهاكل هم إنه بس أتخرج ما ألاقي وظيفة!!! 🟢 و #يشاء_ربك إنه الشركة الي أتدرب عندهم في الصيف يوظفوني بدون حتى ما أقدم طلب. 🟠 سنوات من العمل في شركة أردنية، بدخل محدود، هاكل هم اني كيف ممكن أقدر أكون نفسي بهيك دخل!!! 🟢 و #يشاء_ربك إنه الشركة الي كنت معهم في الأردن يخسروا مشروع في الخليج، وكان شرط العميل إنهم يوظفوا نفس فريق العمل القديم لضمان إستمرارية العمل، وأتوظف براتب ما كنت أتخيل إني ممكن استلم رُبعه. 🟠 سنوات بعد إنكسار الشركة الي أسستها وتراكمت الديون، قلقان إنه كيف ممكن اقدر أسكر الدين الي كان هم في الليل وذل في النهار 🟢 و #يشاء_ربك إنه شركة إستشارات كبرى تبحث عن مستشار متفرغ لعقد مدته ٣ شهور بمبلغ كبير، وما حد راضي يقبل كونه مخاطرة كبيرة، وتوصل لعندي الفرصة جاهزة، وأقبل بها، وأسكر ديوني، وبعدين العميل يطلبني بالإسم لتجديد عقدي ٦ شهور إضافية. وتنحل مشاكلي المالية كلها خلال شهور. #رسالتي_اليوم: 🔵 معظم الأشياء الي استنزفت طاقتنا لمدة شهور وسنوات، وإحنا قلقانين منها وهاكلين همها، بتنحل بلطف ورحمة من ربنا على غير ما بنتوقع وعلى أهون سبب. 🔵 القلق الزائد، مش بس ممكن يصيبك بعلل وأمراض، المشكلة الأكبر إنه حيخلي الأفق عندك ضيق، ويعدم الرؤية عندك، وبالتالي تأثيره على مستقبلك ممكن يكون مأساوي. 🔵 كل ما قربت وأمنت وسلمت أمرك لربنا، كل ما شملك بلطفه ورحمته وعطفه، وخفف عنك الهموم الثِقال الي مش قادر تشيلها. 🔵 كل ما يقرب يسيطر عليك القلق والخوف، إهرب من وحدتك، واستأنس بالقرب من عائلتك، أصحابك وأهلك، وخليهم سندك ودعمك في الأيام الثقيلة، أهم شي لا تستسلم لكابوس الوحدة والعزلة. من شو كنتوا قلقانين، وكيف لُطف ربنا طلعكم من الي كنتو فيه؟ شاركوا معنا تجاربكم لتعم الفائدة.

شو يعني #الإقامة_المميزة 🇸🇦 بالنسبة لشخص من عائلة عاشت #اللجوء و #النزوح، و #النكسة و #النكبة بالنسبة إلي هي أكبر من شهادة اعتراف بكفاءتي. 🔵 هي شعور بانتماء مفقود 🔵 وأمل كان على وشك أن ينعدم 🔵 وبذرة انزرعت في أرض مباركة وأنبتت ما بيعرف قيمة #الوطن، إلا من حُرم منه وما بيعرف قيمة #الانتماء، إلا من عاش الشتات وما بيعرف قيمة #الهوية إلا من فقدها #رسالتي لكل شب عم يعافر ويحارب ليل نهار ليغير واقعه للافضل: لا تستسلم، ولا تقارن نفسك بغيرك، ركز بأهدافك، اشتغل بالموجود والمتوفر. لا تستنى الوضع المثالي لأنه بإختصار عمرك ما راح توصل للوضع المثالي. مش شرط تكون بلبل انجليزي، ودارس في جامعات لندن لتثبت كفاءتك للعالم، كل الي بتحتاجه إنه يكون عندك إصرار وعزيمة بتهد جبال. #شكرا للمملكة العربية السعودية على هاي الفرصة، وفي كل صلاة بدعيلكم: ((رَبِّ اجْعَلْ هَذَا بَلَداً آمِناً وَارْزُقْ أَهْلَهُ مِنَ الثَّمَراتِ))

اليوم سافرت على #الخطوط_السعودية 🇸🇦 وكان في تفصيلة صغيرة، بس #أثرها كبير جدا. قبل الإقلاع بدقائق، وزعوا علينا هدية، بمناسبة #يوم_التأسيس. يمكن للبعض مجرد “هدية بسيطة" بس بالنسبة إلي كانت رسالة أعمق بكثير. 🔵 رسالة بتحكي: نحن لا ننسى جذورنا. 🔵 رسالة بتنشر فرح: لأنه نحتفل بتاريخنا حتى ونحن في السماء. 🔵 رسالة بتأكد: إنه الهوية ليست مناسبة، الهوية أسلوب حياة. وأنا ماسك العلبة، خطر ببالي سؤال: قديش فيه تفاصيل صغيرة ممكن تزرع شعور كبير بالانتماء؟ #يوم_التأسيس مش بس ذكرى تاريخية للسعوديين، هو تذكير بقصة فخر لكل عربي، لدولة عظيمة بدأت من الصحراء، وبحلم شعب تحول إلى واقع يدرس في الإدارة، والقيادة، وبناء الأمم. #رسالتي اليوم: المنظمات العظيمة لا تكتفي بتقديم خدمة، هي بتبني شعور. وكل عام والمملكة أقوى، وأعمق جذورا، وأعلى طموحا 🇸🇦

المنشور الي ورطني وجابلي استدعاء على #السفارة !!! من فترة نزلت منشور على منصة #لينكد_إن، المنشور وصل لأكثر من #350_ألف شخص ومن بينهم كان سعادة السفير الفلسطيني 🇵🇸 في المملكة العربية السعودية 🇸🇦 بعدها وصلتني دعوة كريمة للقاء سعادته والجلوس مع مجموعة من طلاب الجالية الفلسطينية نسمعهم، نحكي معهم، ونحاول نكون جزء من دعمهم لمستقبلهم المهني. كانت فرصة مهمة لدعم الشباب والصبايا، وتقديم نصائح لمستقبلهم المهني، سعادة السفير مشكورا كان مستمع جيد للجميع، وكان واضح إنه عم بيجهز خطة عمل واضحة لحل مشاكلهم وتقديم الدعم اللازم. #خلاصة هاي التجربة علمتني موضوع مهم جدا، كلمتك الها أثر واقوى مما تتخيل، لا تخجل تشارك تجاربك، كل تجربة مريت فيها ممكن تكون مصدر إلهام لشباب وصبايا لسا عم يبدوا حياتهم، تجربتك وكلمتك ممكن تكون إلهم كأنها بصيص أمل، أو حتى شعلة نور تضويلهم عتمة أيامهم. لا تنتظر #إعجابات و #مشاهدات، خلي عينك وهدفك على #الأثر الطيب، لأنه الإعجاب لحظي ويزول، اما #الأثر فهو يدوم للأبد. #رسالتي: إذا عندك تجربة شاركها يمكن تكون أنت النور اللي غيرك محتاجه اليوم.