Karim Hisham's Recent LinkedIn Posts

خليني أشارك معاكم واحدة من أقوى الحملات اللي اتعملت الفترة دي 🎩 بنك TD في كندا كان عايز يعمل إعلان يوري الناس إنهم يقدروا يشتروا أسهم في براندات عالمية زي آبل و ماكدونالدز و نايكي و غيرها من البراندات الشهيرة الكبيرة .. > المشكلة ان القانون ما بيسمحش للبنك إنهم يحطوا شعارات الشركات دي بشكل مباشر في الإعلان ولا حتي جزء من شعارهم .. الحل الي عملوه كان فكرة مبدعة وبسيطة جدًا 👏 + اخدوا أماكن في الشوارع قدام محلات البراندات الكبيرة ، وعملو ا بذكاء إعلان فيه فتحة صغيرة بتكشف اللوجو اللي ورا الإعلان في الخلفية . والرسالة كانت: “Own a piece of it” مع بنك TD ممكن تستثمر و تشتري أسهم من أي براند كبير حتى لو بدولار واحد بس الإعلان مبقاش مجرد outdoor campaign و دا لأن الناس بتحب تكافئ الابداع ب انها تتكلم عليه و تنشره ، ف الإعلان و الابداع في الفكرة خلاه ينتشر بشكل رهيب! > ناس كتير تقول إن إعلانات الشوارع بقت موضة قديمة وما بتجيبش نتيجة… لكن في رايي إنها زي أي أداة تانية، القوة مش في الوسيلة نفسها، القوة في الفكرة، وفي اختيار الوقت والمكان والرسالة الصح … Agency : Ogilvy Canada #marketing #advertising #outofhome #billboards #creativeadvertising

فصل الصيف واحد من أهم الفصول لأي بيزنس. و معروف ارتباطه كفصل بالإجازات و السفر و البحر و ما الي ذلك .. بس السؤال إزاي البراندات و اي بيزنس يقدر يستفيد من الصيف و ايه الحاجات الي ممكن تساعد علي كدا ؟ الاول تعالوا نبدأ من زاوية علم النفس التسويقي : في التسويق السلوكي، فيه مفهوم مهم اسمه ‏Contextual Priming أو “السياق التحضيري” وهو ببساطة بيقولك إن الظرف أو السياق اللي بتحصل فيه الرسالة بيأثر على استيعابها واستجابة الناس ليها. و بيخليهم ياخدوا ردود افعال مختلفة عن الطبيعي . في السياق دا الصيف بيخلق حالة مختلفة تمامًا عند الناس، بيخرجوا فيها عن سلوكهم “الطبيعي”. الصيف ك فصل و ك سياق بيتميز طبعا ب درجة حرارة عالية ، شمس موجودة اغلب اليوم ، سفر و كسر للروتين .. طيب و الدراسات بقي بتقول إيه عن سلوك المستهلكين في الصيف ؟ ١- الحل الأسهل يفوز : دراسة من Journal of Marketing Research بتقول إن ارتفاع الحرارة بيقلل القدرة على اتخاذ قرارات مركبة. بمعني ان الناس بتختار الحل السهل الي مفيهوش مجهود ، حتى لو أغلى، أو مش مثالي، بس واضح وسريع . ٢- الاعتماد على Social Proof بيزيد بحسب Journal of Consumer Psychology ان الناس في الجو الحر بتميل أكتر لاختيارات الأغلبية. و دا لأن المخ بيميل يختار الحل اللي “الناس كلها اختارته” او اجمعت عليه ممكن يبقي سبب كافي انهم يجربوا حاجة .. افتكر :“رقم 1 في السوق” .. “90% يفضلونه ” ..“موصى بيه من كذا” .. ٣-قرارات أسرع من الطبيعي بحسب ال “Affect Infusion Model” الحالة المزاجية الإيجابية بتخلي الناس أكتر قابلية للشراء والتجربة و دا بيكون سائد في الصيف بسبب الاجازات و السفر و الشمس .. ٤-الشراء العشوائي (Impulse Buying) سمة الفصل في الصيف، الناس بتكون في حالة ذهنية مختلفة بالذات في ال سفر أو إجازة.وده بيسهّل فكرة الشراء العاطفي والعشوائي بدون تفكير طويل 📍طب نعمل إيه كـ مسوقين او اصحاب بيزنس في حملات الصيف؟ ✅ ركّز على العاطفة مش المنطق ‏Emotional Priming الأفضل التركيز علي الرسائل العاطفية عن العقلانية لأستعداد المستهلك اكثر لاستقبالها في فصل الصيف . ✅ استخدم ال Social Proof بوضوح الصيف هو زي ما قولنا فيه تفضيل لشراء ما يبدو عليه اجماع ، لأن مفيش وقت للدراسة و المقارنة “رقم 1” – “90% يفضلونا” – “موصى بيه من…” = مفاتيح نجاح ✅ خفف الرسالة وخلّيها بسيطة مش وقت حملات معقدة أو رسائل تقيلة و معقدة اللي بيتفهم بسرعة… هو اللي بيكسب. ✅ خليك متماشي مع فصل الصيف Summer relevant استخدم ألوان، مشاهد، ورسائل تناسب الجو والمزاج العام في الصيف مع الحفاظ علي هوية البراند اكيد ✅ استخدام الـtrial activations التواجد على الأرض بالذات في الشواطيء و المدن الساحلية ، خلّي الناس تجرب المنتج ,لأن فعليًا محدش عنده طاقة يقرأ تفاصيل أو يعمل بحث ف التجربة مفتاح سريع للشراء في الصيف ✅ فرصة مناسبة للمسابقات و الهداية و العروض : طبعاً الصيف فرصه مناسبة لو عندك في خطتك انك تعمل مسابقات و جوايز ، التفاعل معاها هيكون اعلي من اي وقت تاني علي مدار السنة . نفس الكلام مع العروض و الbundles يبقي طبعا بعض المنتجات بتكون فرصتها اكتر في الصيف و لكن دا لا يمنع ان الصيف بشكل عام فرصة ممتازة لكل مسوق و بيزنس بس محتاج تعامل و طريقة مختلفة عن اي وقت تاني في السنة . #marketing #advertising #summer

“The essence of strategy is choosing what NOT to do.” هتفضل مقولة مايكل بورتر واحدة من أكتر الجمل الأيقونية والخالدة في علم الإدارة والتسويق ( و الجمل المحببة لي ) ومع كثرة التريندات، وكلام زي agility وpivoting وgrowth hacking… الجملة دي بتزيد قيمتها مش بتقل مع الوقت . كلنا طبعا ًبنتحمّس للأفكار الجديدة .. للمبادرات.. للفرص اللي شكلها مُغري . لكن تفضل أقوى المؤسسات، البراندات، وحتى الأشخاص، هم اللي فاهمين قيمة إنك تلتزم باستراتيجيتك… حتى لما الفرص تبان مغرية. الاستراتيجية مش بس بتحتاج شجاعة “البدء” و اختيار هنعمل ايه ،لكنها كمان محتاجة شجاعة “الامتناع " ! ⸻ كل البراندات الكبيرة جالها وقت و رفضت فرص ظاهرها ربح، لكن جوهرها تنازل عن الهوية و بعد عن الاستراتيجية . و فضلوا أوقات يمشوا ببطء على طريق واضح، بدل ما اللهث ورا كل جديد. ⸻ ❗ طيب والفرص اللي ممكن تضيع؟ والتريندات اللي مش هنركبها؟ أقولك أنا … تعرف إيه الأخطر من الفرص الضائعة؟ إنك تمشي من غير استراتيجية. أو تبقى خفيف لدرجة إن أي موجة تشيلك و توديك ... خسائرها اكبر و اكبر .. لأن وقتها كل حاجة هتبان فرصة ، وكل فكرة هتبان ضرورية ، وكل تغيير هتشوفه لازم تركبه لأن بتكون زي التايه في الصحراء الي من غير بوصلة ⸻ و بيترتب عليه حاجات زي: • فريقك و جمهورك هيتشتت • مواردك هتتبدد في اتجاهات فرعية • والبراند… هيبقى بلا شخصية ولا هوية . ⸻ وده مش معناه إنك ترفض الفرص او تتجاهلها.. لكن تقبل و تنتهز الفرص اللي ماشية في نفس طريقك او المتماشية مع استراتجيتك . (وده لا يمنع إن الاستراتيجية نفسها بتتراجع وبتتطور، لكن المؤكد إنها مش حاجة يومية… ولا رد فعل لحظي لأي تريند طالع) عشان كدا : اشتغل على الـ pre-strategy work كويس، خد وقتك و ذاكر السوق و المنافسين و افهم جمهورك و قدراتك . ولما تستقر على الاستراتيجية… اقفل عليها وابدأ التنفيذ. 🫡تحية لكل اللي عارفين إن وضوح الطريق مش بيقلل من فرص النجاح، بالعكس… دا بيزودها .. #marketing #strategy

إعلان جامد جداً و مبدع الحقيقة ❤️👏🏻👏🏻 Waba هو متجر لبيع منتجات ضيافة و مطبخية راقية (زي فناجين الشاي و القهوة والأطقم) بتصاميم عربية مميزة و جودة عالية في دول الخليج براند دايمًا بيركّز على فكرة الذوق بشكل عام عشان كدا و التاج لاين بتاعه .. أصالة و ذوق عشان كدا الإعلان طالع ذوقة حلووووو .. كل كادر و مشهد مع الموسيقي مع الحركات و الأزياء .. تحفة ، إعلان جديد لسه نازل امبارح بس رد الفعل عليه خطير.. نارداً لما إعلان يخليك تتفرج عليه كله من غير ما تزهق ، و من غير ولا كلمة 👏🏻 لسه ف بداية ٢٠٢٦ بس دا اكيد هيكون واحد من الافضل فيها Agency : Shareet Studios #advertising #gulf

"واحدة بسبوسة بندق قشطة .. وواحدة مدلعة، وأربعة مايصة واتنين هايصة ✍🏻 تمام يا فندم.. كدة هنحتاج نعمل تحليل سكر تراكمي، ورسم قلب، ومتابعة مع دكتور رمزي أو السعود! 😅” قبل ما نتكلم عن حملة "أنت الحل" بتاعة وزارة الصحة المصرية في رمضان ← خلينا الأول نتفق إن أصعب أنواع الحملات بلا شك هي حملات الـ Social Marketing أو ما يُسمى بحملات "تغيير السلوك المجتمعي". الصعوبة هنا لسببين : 1️⃣ طبيعة الجمهور : في العادة إحنا كبشر بنميل لتجاهل النصيحة المباشرة أو بنشوفها تقيلة على القلب 2️⃣ حجم التحدي : أنت هنا في الاغلب مش بتغير قرار شراء منتج ولا خدمة، أنت بتحاول تغير سلوك جمعي لشعب كامل متجذر في عاداته اليومية ← بشكل عام، الحملات دي عادةً أنواعها او طريقتها نادراً ما بتخرج عن 4 أنواع : • الـ Informational (المعلوماتية): ودي أضعفهم تأثيراً؛ أثبتت الدراسات إن الأرقام والدلائل لوحدها مش كفاية عشان تأثر في الناس لمجرد إنها بتشاور على مشكلة. • الترهيب (Fear Appeal): اللعب على غريزة الخوف من المرض أو الموت (زي حملات التدخين والسواقة المتهورة). • المكافأة (Incentives): نظام "اعمل كذا.. وخد كذا" عشان نشجعك تبدأ (زي: اتبرع بالدم وخد كشف مجاني). • اللعب على المشاعر (Emotional Appeals): نوع برضه مشهور بيدخلك من حتة الناس اللي بتحبهم وبيحبوك عشان يلمس قلبك. بس زي ما اتفقنا، المشاعر مش دايماً لازم تبقى نكد وتخليك تعيط.. ممكن جداً تبقى بتضحك، بس في حملة زي دي مش هينفع تبقى مجرد ضحك عابر كدا . نيجي بقى للحملة.. اللي أنا شايف إنها متأخرة كتير، أو اللي هو فينك من بدري يا راجل؟ الدنيا بتروح مننا ..بس أن تأتي متأخراً خير من ألا تأتي أبداً .. حمدلله علي السلامة ❤️ الحملة في رأيي عبقرية لأنها جت للمصريين من الحتة اللي بيحبوها ويفهموها وبتعلق معاهم ، بالمصري: وزارة الصحة لفّتها لفّة جاتوه! 😅 الـ Black Comedy والـ Sarcasm حاجة بيعشقها الشعب وبيتجاوب معاها الوزارة اختاروا يتكلموا مع الناس بلغتهم مش بأسلوب المكاتب أو تقارير الوزارة الرسمية. وفي زمن السوشيال ميديا، إنك تعمل رسالة "Viral" يسهل انتشارها، ده بيوفر عليك وقت وفلوس ومجهود رهيب . هتقولي يعني هي كدة الحملة نجحت؟ هقولك افتكر إننا قلنا إن "تغيير السلوك" محتاج نَفَس طويل وزنّ على الودان، فإحنا لسه في بداية الطريق..لكنها في رأيي بداية موفقة جداً كفايه انها مش مملة و في نفس الوقت الرسالة وصلت = ) وهختم البوست بجملة الإعلان المبدعة: "اللي بتحاسب عليه النهارده من جيبك.. بكرة هتحاسب عليه من صحتك! Ministry of Health & Population - Egypt 👏🏻👏🏻 #marketing

بعيداً عن الجدل اللي عامله فيلم السلم والتعبان كفيلم، وتباين آراء الناس عليه .. بس الأكيد إن الفيلم قدّم تجربة لافتة جدًا في جانب تسويقي مهم ، و هو الـ Product Placements الي اتعملت ف الفيلم .. عدد البراندات الي ظهرت تقريبا وصل ل اكتر من ١٢ براند في ساعتين مدة عرض الفيلم : Abu Auf , Kleek Developments , Juhayna Food Industries , Dancing Goat Coffee , Valu , Dolato Gelateria , VOO | a mart in an app, Marassi, Yango play , Vodafone بالمناسبة اكيد مهياش حاجة جديدة خالص بالعكس دي حاجة بتتعمل من زمان جدا .. بس الجديد هنا في مصر و الوطن العربي هو “الكمّ” وطريقة التنفيذ… لأن الفيلم جمع عدد كبير من البراندز بشكل متنوع و مدمج في احداث الفيلم . مش محتاج اقول ان دا يعتبر من أقوي الموارد الي دخلت للفيلم فلوس وقت إنتاجه . طب هل دا عدد كبير ؟ طب بره بيحصل ايه ؟ عايز اقولك و أصدمك ان اكتر فيلم ظهر فيه براندات كان فيلم انتاج السنادي و هو فورمولا ١ الي ظهر فيه اكتر من ٢٠٠ براند ! ( مع اختلاف طبيعة الظهور طبعا ) بالمناسبه فيه براندات كبيرة معروفة بتستثمر بشكل مستمر في الproduct placements في الافلام العالمية اشهرهم : آبل ، فورد ، نايكي و غيرهم كل الأبحاث و الدراسات بتثبت انه الproduct placement فعال جداً و افضل من اي اعلان تاني لو بس اتعمل بشكل صحيح لأن الناس تقدر تتفادي او تعمل Skip للإعلان ، انما هنا مستحيل لأنه جزء من المحتوي الي بيتفرجوا عليه . طيب السؤال: البراند نفسه بيقيّم إيه قبل ما يقرر يستثمر في الproduct placement في اي محتوي ؟ فيه كام عنصر أساسي بيحددوا قيمة الظهور دا هنطبقها علي الفيلم للتسهيل : 1- Share of Placement / Share of Screen Time هياخد وقت قد ايه علي الشاشة مقارنه ب باقي البراندات لو فيه ، في الفيلم كليك للتطوير العقاري و أبو عوف كانوا الاكثر ظهورا ك مدة علي الشاشة .. و دا لأن يعتبر هم الرعاة الأساسين للفيلم 2-Prominence شكل الظهور دا ايه ؟ هل هو واضح ولا ممكن المشاهد مياخدش باله ؟ فيه براندات ف الفيلم ظهرت واضحه و فيه حاجات اعتقد الناس ممكن مش هتاخد بالها انها موجوده ، زي فودافون الي ظهرت علي لوحة ف الشارع مثلا 3- Relevance & integration الملائمة للمشهد ، يعني هل البراند ظهر في مشهد او محتوي مناسب ليه ولا مقحم بشكل يفصل المشاهد ، يعني يانجو بلاي ظهرت و هم بيختارو فيلم يتفرجوا عليه ف التلفزيون ، ابو عوف لما كانوا محتاجين يشربوا قهوة . ڤوو لما كان عامل نفسه طيار ديليفري و لما كان فيه توصيل ثلج. 4- Type of Exposure هل البراند اتشاف صورة ولا اتقال صوت ولا الاتنين ؟ اغلب البراندات ف الفيلم كانت بتتشاف .. باسثناء ڤاليو مثلا اتقال في حديث انه هي قسطت ب" ڤاليو " بس ماشوفناش لوجو البراند . في حين ان يانجو بلاي و مراسي اتقالو بالكلام و اتشافوا بالصورة . 5- Character Association و دي حاجة يمكن مش مميزه في الفيلم و لكن في بعض الافلام بيفرق ربط البراند بيكون ب انهي شخصية ف الفيلم . لأنها برضه ممكن تؤثر علي صورة البراند ف الاخر الproduct placement هو الإعلان الوحيد الي تكفلته بتقل مع انتشاره ، لأن التكلفه بتيجي مره واحده و من بعدها مع انتشار الفيلم ، الexposure بتاع البراند بيفضل يزيد الي ما لا نهاية بدون تكلفه إضافية علي البراند الي بيعيش طول ما المحتوي عايش في السينمات او المنصات . بشكل عام الفيلم اكيد عمل تجربة مختلفة ف الحتة دي ، بغض النظر ان كان فيه حاجات in your face ب زياده ،، بس اعتقد بشكل عام تجربة مميزة .

الإعلان ده خطييييييير! ♥️😆 كحد بشتغل في السوق السعودي، أقدر أقول إنه من أفضل الإعلانات اللي اتعملت في الفترة الأخيرة: 1️⃣ دايمًا بنقول إن من اهداف أي إعلان هو إثارة مشاعر الجمهور… وأصعبهم بلا شك هو إنك تضحكهم! الإعلان لذيذ جدًا، وقدر يستخدم الكوميديا بذكاء علشان يجذب الانتباه ويخليك تكمل للآخر. Emotion ✅ 2️⃣ الإعلان مبني على Insights واقعية جدًا… ف هتلاقي الإعلان بيتم مشاركته ب شكل كبير Relatable ✅ 3️⃣ تواجد البراند: البراند موجود بشكل طبيعي ومتناغم مع القصة، لا هو مهمش ولا مقحوم. تخلص الإعلان و ف دماغك البراند ك مكان تفكر فيه لو عايز تجيب هدية Brand Salience ✅ 4️⃣ الإعلان مختلف: معظم الإعلانات اللي بتتكلم عن الهدايا بتركّز على الرومانسية، لكنهم قرروا يكسروا القاعدة ويقدم فكرة خفيفة ومرحة، وده اللي خلى الإعلان مميز و مختلف Different ✅ Bravo Floward team 👏🏻👏🏻 #marketing #advertising

لهذا نحب الـ ماركيتينج ! وإنا سايق طلع قدامي صدفةً على نفس اللوحة إعلانين ورا بعض مختلفين لمنتجين شيكولاتة جالاكسي و مورو : جالاكسي بتكلمك عن الindulgence والمتعة . ومورو عن الطاقة والانطلاق نفس الـ product (شيكولاتة) علي نفس اللوحة ، تقريباّ في نفس التوقيت ، بس كل براند واخد positioning مختلف تمامًا. واحدة بتقولك افتكرني “لما تحب تدلع نفسك”، والتانية أنا موجودة “لما تحتاج طاقة تكمل بيها يومك”. وهنا يكمن جمال التسويق… و طبعاً الموضوع مش مجرد إعلان و بكرة يتغير بنقول ايه . دي brand strategy و يحضرني هنا مقولة مايكل بورتر : Strategy is choosing what not to do يعني مستحيل بكرة تلاقي جالاكسي غيرت رأيها و قررت تكلّمك عن الطاقة، ولا مورو تحاول تدخل في منطقة الراحة والمتعة. ( إلا لو فيه مصيبة 🤣) و الموضوع مش مجرد إعلان او رسالة و خلاص ، دا بيأثر علي حاجات كتير ابسطها ، بيخليك تحدد انت بتنافس مين بشكل مباشر ، و غير مباشر ‏Competition happens at the benefit level, not just the product level. بمعني ان العميل عادة بيفكر الاول الي هيحقق له الي هو عايزه ، هو دلوقتي عايز حاجة تديلة طاقة او تفوقه ف هيبدأ يقيم الخيارات الي تلبيله الاحتياج دا . و هكذا و بالتالي جالاكسي في الشيكولاته بتتنافس بشكل مباشر مع براندات زي كادبوري، ومعاهم اي منتجات ممكن تؤدي نفس الغرض زي الآيس كريم و الهوت شيكولات و هكذا . أما مورو كدا فبتتنافس مع حاجات زي البروتين بار و مشروبات الطاقة و هكذا . و هتلاقي ف نفس الفئة فيه أختهم سنيكرز ( انت مش انت و انت جعان ) حاجة تالتة غير المتعة و الطاقة .. و هي إشباع الجوع ف الموضوع مش مجرد رسالة علي إعلان و بنغيره كل شوية و خلاص .. لأ الموضوع اكبر من كدا 😅 والمثير إن بالرغم إن دي أساسيات في التسويق، هتلاقوا فيه براندات مش واضحة و ماتقدرش تفهم الpostioning بتاعهم من كتر التشتت في رسائلهم . و بالتالي ف التسويق عمره ما بيبدأ او ينتهي بمجرد اعلان .. الموضوع اكبر من كدا .. و لهذا نحب التسويق ♥️🫶 #marketing #brandstrategy #advertising

اعلان جامدد و لذيذ 😅♥️ Relatability level 100 ماما عارفه كل حاجة 😅 إعلان عيد الام ل e& #advertising

عمر ولد جميل عنده توحد، بيعمل فيديوهات بسيطة مع أخته… الفيديوهات انتشرت جدًا من فترة ووصلت لناس كتير.في أكتر من فيديو كان واضح قد إيه عمر بيحب ‏1980 Coffee في مرة عمل فيديو بيشرح طريقته الخاصة في عمل الـ iced coffee ف البراند شاف الفيديو وتواصل معاه فورًا. وجهوله دعوة ييجي الكافيه ويعمل مشروبه بطريقته بشكل بروفيشنال و ب ادوات حديثة .. و فعلاً عمر راح و عمل كدا مش بس كدا البراند قرر يحط المشروب في المنيو رسميًا بأسم : طريقة عمر . و طبعا مش محتاج اقولكم الموضوع دا فرح عمر ازاي .. عامه 1980 من البراندات الي من اول ما طلعت و هتلاقي جزء كبير من محتواهم حوالين الناس و البشر .. سواء ال عاملين ف الفروع او زباينهم و هكذا .. ف ده جزء من شخصيته كبراند . لكن عامة لازم نتفق ان الدنيا اتغيرت كتير عن زمان ، زمان كان التواصل في اتجاه واحد بس . من البراند للجمهور .. انهارده بقي في الاتجاهين . ف لازم كبراند تبقي متابع و شايف جمهورك مين و بيعمل ايه و يكون تفاعلك سريع و real time .. لأن دا بيزود من حب الناس للبراند و احترامهم ليه كل ما حس انك سامع و شايف و بتستجيب .. #brands

سيشن في ٤ دقايق؟! و من لا شيء و أنا علي مكتبي كمان .. السرعة اللي بيتطور بيها المجال ده بقت مرعبة في ٤ دقايق بس، بنيت سيشن تصوير كامل من لا شيء: • اخترت بنت موديل من على النت • لبستها فستان اخترته من Gucci • نضارة Ray-Ban • شنطة معينة من Dior • وودّيتها تصور قدّام صخرة الفيل في العلا – السعودية وكل ده باستخدام أدوات بسيطة جداً طبعاً لسه النتائج بتتحسن كل يوم ولسه فيه مجال كبير للتطوير… و كمان زي ما قولت أنا استخدمت حاجات بدائية يعني في وقت قصير لكن تتخيل معايا حجم التكاليف اللي ممكن تتوفر؟ والسرعة اللي بنقدر نختبر بيها أفكار ونبني بيها قصص بصرية؟ أنت حتى لو هتعمل سيشن حقيقي ، هتقدر تشوفه بالكامل قبل يوم التصوير و تختبر و تختار كل حاجة ، بدل ما كنت بتتخيلها .. و تخيل الأدوات الي هتبقي متاحة مع الsmall businesses الي هيقدروا يعملوا حاجات عمرهم ما كان عندهم رفاهية انهم يعملوها .. المجال الإبداعي بيتطور بسرعة .. و أسرع بكتير من ما كنا متخيلين ! الموضوع بجد شيّق، ومحتاج متابعة… وجرأة 😉 الطريقة البسيطة في التعليقات 👇 #AI #Creative

بحب اللعبة الحلوة ، و فودافون المرادي لعبتها صح 😉 تعالي اقولك ازاي … كنت متحمس جداً أشوف شركات المحمول في مصر هتعلن ازاي عن إطلاق خدمات الجيل الخامس 5G . ودي واحدة من أصعب المواقف لأي مسوق ، لما يكون الي هتقدمه مش Unique ، يعني حاجة المنافسين كمان هيقدموها في نفس الوقت وبنفس المواصفات تقريبًا . ✅ الـ 5G هو في الأصل خاصية تقنية (Feature) وأكتر حاجة مرتبطة بيها في ذهن الناس هي السرعة . و بالتالي كل الشركات فعلاً إعلاناتها طلعت نفس الشكل بنفس الرسالة : الأسرع .. الأسرع .. الأسرع .. ال5G .. ب ميزة السرعة في الحالة دي بنسميها ‏Point of parity او نقطة تكافؤ (POP)، يعني ميزة مش لوحدك فيها دي حاجة كل السوق بيقدمها .. تيم تسويق فودافون بذكاء موقعتش في حفرة " السرعة " و ساعتها كانت هتبقي زيها زي باقي الشركات . فودافون مع إعلانها عن إطلاق ال5G .. قررت تتفرد ب فكرة التغطية " أوسع تغطية 5G في مصر " ك رسالة أساسية . و مع وجود محمد صلاح و سرعة محمد صلاح نقل فكرة السرعة برضة الي هي زي ما اتفقنا أصلا مرتبطة بال5G بشكل عام و الي المنافسين كدا كدا هيشتغلوا عليها و هيوعوا الناس بيها . و بالتالي رسالة فودافون اتحولت من : أنا كمان الأسرع (تكافؤ) .. لـ السرعة عندنا كلنا بس أنا عندي تغطية تخليك تستمتع بيها مكان ما تكون ( تفرد ). 🚨فوادفون كمان عززت الكامبين ب gamification experience بتكسب بيها ميجابيتس مجانيه ، لعبة علي الابليكشن بتجري بمحمد صلاح و كل ما بيلم نقط ال5G سرعته بتضاعف ( السرعة ) و الاهم انك بتلف مدن كبيرة و احياء بسيطة او ضواحي ( التغطية ) . لعبة حلوة و ذكية و عجبتني من فودافون لأني كنت مستني اشوف ازاي كله هيعلن عن ال5G و توقعت استخدام نفس رسالة السرعة البديهية .. و كما توقعت كله تشابه بس فودافون تفردت . توضيح مهم : دا تحليل لحملة إعلانية و ازاي فودافون اتعاملت مع المنافسة ، مش تقييم فعلي للشبكة نفسها . Vodafone #marketing #advertising

دروس من أزمة البنزين المغشوش ! اكيد سمعتوا عن مشكله البنزين الي بدإت من الاسبوع الي فات في مصر و الشكاوي الي انتشرت عن عربيات كتير تضررت لوجود بنزين مغشوش في السوق . وأنا بتابع اللي بيحصل، شد انتباهي زاوية مختلفة شوية حبيت أشاركها اولا البنزين يعتبر واحد من اشهر السلع او الcommodoites يعني منتج مفيهوش اختلاف جوهري بين مصدر والتاني . عادة المستهلك يميل دايمًا لاختيار الأرخص أو الأسهل في الوصول ، من غير ما يفكر كتير أو يدوّر على تفضيلات و دا بعكس ال Differentiated Products ، الي بيفرق فيها اسم مقدم المنتج او الخدمة . علماً كمان ان البنزين تحديداً من السلع الي كمان سعرها موحد . الي لاحظته و لفت انتباهي ان بدأ يبقي فيه ترشيحات كتير ل اسامي محطات بنزين ب عينها الناس بتنصح بيها زي " امارات مصر " الي اخدت النصيب الأكبر منها و دا علي مستوي حتي دائرة معارفي مرورا بالسوشيال ميديا و العكس حصل مع محطات تانية و دا معناه ان فيه ناس بقي معندهاش مشكله تروح مسافة ابعد ، و تضيع وقت اكتر عشان تروح ل براند بعينه عشان تحصل علي سلعة ! عملت يحث علي صغير كدا عشان افهم اشمعني (امارات مصر ) علماً ان مفيش حد اكيد بيقيس دا بشكل مباشر او مش مباشر ، و علماً - حتي لو دا مش صحيح - وارد يكون مصدر البنزين كله واحد بشكل او ب آخر . الجميل ان كل الاسباب ليها تفسير علمي و الاسباب كانت كالتالي : ١- الأغلبية بيشوفوا ان شكل المحطات و نظافتها و طريقة تعامل العاملين فيها معاهم مديهم تصور بجودة المنتج تلقائيًا (حتى لو مفيش علاقة علمية). ‏Signaling theory: refers to the ways brands communicate their value through various cues and messages, where it conveys information about the quality or attributes of a product or service. و دا مشهور عامة ف الخدمات اكتر لأنك ما بتقدرش “تعرف” جودة الخدمة قبل ما تجرّبها، فتعتمد على الإشارات اللي حواليك عشان تكوّن رأيك ٢- و دي نقطة طريفة شوية شريحة كبيرة برضه بتشوف ان عشان هي " امارات مصر " ف الامارات الصورة الذهنية عندهم مرتبط بالجودة بالذات في النفط هي و دول الخليج . Heuristics and Cognitive Shortcuts : mental shortcuts that your brain uses to make decisions زي كدا الساعة السويسري او الماكينة الألماني . اسم البلد لوحده بيكون إشارة ذهنية قوية بتأثر في قرارك حتى لو مفيش دليل عملي انها جاية من البلد دي . ٣- الWord of mouth .. الي سمعوه من تجارب الاخرين سواء معارف و أقارب او علي السوشيال ميديا ، تخيل بقي فيه جروبات معموله عشان تقولك تثق في انهي محطات . ٤- بالنسبة بقي ل تقريبا ١٠٪؜ الي قالولي لا بلاش امارات مصر أسبابهم كانت تجربة شخصية سابقة ، و دي برضه حقيقية علمية ، لا شيء يضاهي التجربة الشخصية ! في الأسبوع ده في محطات بنزين خَسرت سمعتها (ومبيعاتها)، ومحطات تانية كسبت و إحنا بنتكلم عن سلعة موحدة،ومع ذلك البراند فرّق! طيب نتعلم ايه من دا ؟ - اهتم بكل تفصيلة صغيرة بتبني صورتك الذهنية قدام الناس - إياك تستهين بتأثير تجربة سلبية واحدة في عصر السوشيال ميديا - حافظ على ثقة الناس في كل نقطة تواصل و قدم قيمة حقيقية و الناس الي بتقعد تقول التسويق هيختفي قريب ، البراندات مش هيبقي ليها وجود بعد ١٠ سنين و كل الكلام دا بالتأكيد مش هيحصل التسويق و بناء العلامات شيء موجود من القدم من قبل ما تبقي علم بيتدرس و هتفضل موجوده طول ما فيه بشر علي الكوكب . الي هيختفي البراندات الي مش بتقدم خدمة و قيمة حقيقية . لهذا نحب التسويق!♥️ #marketing

عمرك لاحظت إن في أماكن بتكتب الأسعار من غير ما تحط العملة جنبها… وفي أماكن تانية بتحطها؟ طب إيه الفرق؟! الفرق بسيط… إن فيه حد وراها قارئ أو فاهم في سيكولوجية المستهلك و التسعير > فيه دراسات كتير على الموضوع ده لكن أشهرهم دراسة جامعة كورنيل، اللي الباحثين فيها جرّبوا ٣ أشكال للأسعار في نفس المطعم: • $20 (مع علامة العملة) • 20 (أرقام بس) • twenty dollars (بالكلمات) و لقوا ان الزباين صرفوا أكتر بـ 8% لما شافوا الأسعار أرقام بس من غير أي إشارة للعملة والموضوع بشكل عام مثبت علميًا من خلال تجارب تصوير المخ … و هي ان علامة العملة بتنشّط في دماغك منطقة بيسموها ال pain of paying و هو شعور الألم النفسي المرتبط بفقدان المال لكن لقوا ان لما تشوف الرقم بس، مخك بيتعامل معاه كأنه مجرد رقم، مش فلوس خارجة من جيبك، وبدل ما ينشط مركز الألم بينشط اكتر مركز المكافأة المرتبط بالشيء اللي هتشتريه ، ف بتكون مقبل علي الشراء اكثر ! و تجارب تصوير المخ دي جزء من دراسة بعنوان Neural Predictors of Purchases عملتها فرق بحثية من جامعات أمريكية شهيرة الموضوع قد ما يبان بسيط لكنه أوقات كتير تفاصيل صغيرة بتفرق .. وتطبيقها مش محتاج أي تكاليف : ) و دا يعتبر مجرد مثال تطبيقي واحد من أمثلة كتير في علم نفس التسعير وسلوك المستهلك .. الموضوع واسع و شيق جداً .. #marketing #psychology #pricing

🚨المراجعة النهائية للماركتيرز قبل رمضان 🌙 رمضان طبعًا شهر عبادة، لكنه كمان واحد من أهم الشهور للمسوقين والبراندات! 🚀 ليه؟ لأن سلوك الناس بيتغير فيه تمامًا، من زيادة الإنفاق، لارتفاع استهلاك المحتوى التلفزيوني والإعلاني، لحد تغير أوقات النشاط الرقمي – كل حاجة بتختلف في رمضان! عشان كده، جمعتلك أهم المعلومات والإحصائيات اللي ممكن تفيدك لو بتخطط لحملة تسويقية في رمضان 2025! 👇 📊 1. الإنفاق في رمضان بيزيد بشكل ضخم 🔹 المستهلكين في الشرق الأوسط بيصرفوا أكتر من 66 مليار دولار خلال الشهر! 🔹 الطلب على منتجات التجميل والعناية الشخصية تحديداً بيزيد 78% في آخر أسبوع في رمضان استعدادًا للعيد. 📍فرصة : آخر أسبوع في رمضان هو التوقيت الذهبي لبراندات الفاشون والتجميل، خلي العروض والتخفيضات أقوى في التوقيت ده! 📺 2. استهلاك المحتوى بيزيد بشكل غير طبيعي 🔹 مشاهدة التلفزيون بتزيد 80% خلال رمضان 🔹 يوتيوب بيسجل زيادة كبيرة في المشاهدات، خصوصًا على المحتوى الديني والترفيهي. 🔹 فيديوهات الـ تيك توك و انستجرام ريلز بقوا أساسيين، و90% من المستخدمين بيتفاعلوا مع المحتوى الرمضاني عليهم. 🛒 3. التسوق الإلكتروني بيضرب أرقام قياسية 🛍️📲 🔹 المعاملات الرقمية زادت ل اكتر من 143% في آخر سنتين في رمضان. 🔹 تطبيقات توصيل الأكل والبقالة بتسجل نمو سنوي في أول أسبوع من رمضان. 📍 الفرصة: لازم يكون عندك طرق دفع سهلة وسريعة وتجربة مستخدم متكاملة على الموبايل! 🎮 4. الـ Gamers مش بيناموا في رمضان! 🎮🌙 🔹 عدد جلسات اللعب بيزيد بشكل ملحوظ في الشرق الأوسط خلال الشهر. 🔹 أكتر وقت بيكون فيه نشاط هو بعد التراويح ولحد السحور. 🔹 متوسط جلسات اللعب بيوصل لـ 33 دقيقة أو أكتر! 📍الفرصة: الإعلانات داخل الألعاب والبثوث المباشرة هتكون ممتازة لو بتستهدف الشباب! ⏰ 5. إمتى أحسن وقت للنشر في رمضان؟ 🕰️📊 🔹 قبل الفطار : بساعة او ساعتين هو اكتر بيكون مناسب للنشر قبل الفطار . 🔹 وقت السحور (2-3 صباحًا): قمة النشاط قبل النوم.( شيء مميز و خاص ب رمضان بس ) 🔹 بعد التراويح (10-12 مساءً): وقت مثالي للمحتوى الترفيهي والإعلانات. 📍 الفرصة: نشر المحتوى في الأوقات دي هيضمن وصوله لأكبر عدد ممكن من الجمهور! 👥 6. أنواع المستهلكين (Personas) في رمضان 💡 كل فئة ليها سلوك معين، واستهدافها محتاج استراتيجية ذكية: 1️⃣ 🎬 المتابع الترفيهي: عايش مع المسلسلات والبرامج الرمضانية! و بيتفاعل مع المحتوي المتعلق بيهم 2️⃣ 💰 المتسوق الذكي: بيستنّى العروض والتخفيضات، خصوصًا آخر أسبوع. 3️⃣ 🎮 الجيمر: بينشط بعد التراويح، وبيفضل الألعاب الجماعية والتحديات. 4️⃣ 🕌 الباحث عن الروحانيات: بيستهلك محتوى ديني بشكل كبير جدًا. 5️⃣ 🍽️ عشاق الأكل: بيبحث عن وصفات جديدة يوميًا وبيتفاعل مع محتوى الطبخ و أماكن الاكل بالذات في اول أسبوعين من الشهر . 💡 الفرصة: حدد فئتك المستهدفة وصمم المحتوى اللي يجذبها بأفضل طريقة! 📒 الخلاصة: رمضان فرصة ذهبية للمسوقين و دا ملخص الكلام : ✅ ركز على الفيديوهات القصيرة والتفاعلية ✅ اعتمد على الديجيتال و سهل طرق الدفع الإلكترونية. ✅ استهدف الجمهور في أوقات الذروة. ✅ افهم الـ personas وصمم محتوى يناسب كل فئة. ✅ خلي محتواك ملائم ل رمضان و خليك صاحي ل اي تريند مناسب يحصل خلال الشهر و كل سنة و انتوا طيبين رمضان كريم ♥️🌙 #marketing #digitalmarketing #brands #ramadan

عمرك فكرت إيه العلاقة بين الكحك وعيد الفطر؟ الكحك أو (الكعك) واحد من أقدم الأطعمة اللي عرفتها البشرية!بداية من عصر الفراعنة، وكان بيرمز للشمس ودورة الحياة واستمرت صناعته عبر العصور ، لحد ما وصلنا للعصر الفاطمي الي بدأ الكحك يرتبط فيه بالاحتفالات و الأعياد. ==== مع الوقت ارتبط الكحك ب عيد الفطر تحديدا ، الي ان وصلنا انهارده إن محلات الكحك بتبيع في موسم عيد الفطر أكتر من اللي بتبيعه طول السنة تقريبًا! و هنا هنفترض افتراض - مش حقيقي لمجرد شرح الفكرة - ان براند كحك كبير او بائعي الكحك في زمن ما هم الي عملوا الربط دا و خلوا الكحك هو الحلوي الرسمية للعيد الصغير . الربط الي بين عيد الفطر و الكحك ، بلغة البيزنس انقذ منتج ( الكحك) من انه مايبقاش ليه سوق خالص او يختفي مع الوقت ،و برضه كان ممكن يخلي الكحك اكثر نجاحاً لو كان مثلا قدروا يربطوه ب ايام تانية زي مولد النبي ، راس السنة ، الخ . ==== لو سيبنا الكحك على جنب شوية، هنلاقي إن نفس الفكرة حصلت مع حاجات تانية، زي الورد مثلًا! الورد من زمان وهو رمز رومانسي، لكنه مكنش مرتبط بعيد الحب بالشكل اللي نعرفه دلوقتي و لكنه مع الوقت تم تسويقه كرمز أساسي للمناسبة ! و بقى في صناعة عالمية بالمليارات قايمة على بيع الورد في الفلانتين و المناسبات المماثلة !🌹 و مثال تاني هو الألماس، اللي كان مجرد حجر كريم غالي محدش بيفكر يشتريه . لحد أواخر الأربعينات، لما شركة “دي بيرز” أطلقت حملتها الأيقونية “A Diamond is Forever” (الألماس للأبد)، واللي غيرت شكل سوق الألماس تماماً .الحملة لعبت على ترسيخ فكرة إن الألماس رمز للحب الأبدي ، و بسببها بقى خاتم الخطوبة الماسي قاعدة سائدة في ثقافات كتير، ومن وقتها، الألماس اتحول من مجرد حجر كريم نادر… إلى بيزنس بمليارات الدولارات .💍 ==== 📍أهلاً بيك في الـ Occasion-Based Marketing! ببساطة، دا نوع من التسويق بيعتمد على إنك تربط منتجك بـ مناسبة أو لحظة معينة في حياة الناس الفكرة إنك تخلق ارتباط ذهني تلقائي يخلي منتجك أول حاجة تيجي في بالهم وقتها! زي ما كدا ما الكحك مرتبط بعيد الفطر، والورد بالفلانتين، والألماس بالخطوبة والزواج. والموضوع مش مقتصر علي المناسبات ممكن كمان تبني الارتباط من خلال سلوك متكرر أو عادة، زي مثلاً: •أوريو ربطت نفسها بشرب “اللبن” •الفشار و الأفلام في السينما •الشيبسي و الفرجة علي الماتشات ==== 📒في كتاب Contagious لـ جونا بيرجر اتكلم عن مفهوم مهم اسمه “المحفزات الذهنية” و هي إن عقل الإنسان بيشتغل بالربط، بمعني ان فيه حاجات معينة لما تشوفها أو تسمعها، ممكن تخليك تفتكر تلقائياً حاجة تانية مرتبطة بيها في وقتها علي طول . وده بالظبط اللي البراندات بتحاول تعمله و فيه تقرير حديث من Ipsos بيأكد إن فهم لحظات الاستهلاك (Consumption Moments) هو أحد المفاتيح الأساسية لنجاح البراندات. و ان كل ما عرفت تربط منتجك بـ”لحظة” حقيقية في حياة الناس كل ما زادت فرص نجاحك. ==== و بالتالي، مهمتك كـ ماركيتير إنك تميز اللحظات اللي تقدر تربط فيها منتجك بعادات أو مناسبات موجودة، وتزود فرص استخدامه. كل ما زوّدت اللحظات دي، كل ما زادت فرص نجاح منتجك . بس مش أي ربط بين منتج و مناسبة بينجح! دا بيحتاج تخطيط وشغل كتير أهم حاجة إن اللحظة أو المناسبة اللي هتربطها بمنتجك تكون موجودة فعلًا و ان كان ممكن تحاول تخلق لحظة جديدة، لكن ده بيحتاج استثمار ضخم واستراتيجية طويلة المدى المهم، سيبكم من ليه بناكل كحك في العيد كلوا كحك و اتبسطوا بس ماتكتروش 😅 وكل سنة وانتوا طيبين، عيد سعيد! ♥️ ‏#marketing

لو انت كمان مستني تعرف تكملة النكتة بتاعة “عربي” في مسلسل أشغال شقة فاحب أقولك… أهلاً بيك في واحدة من أهم الأدوات النفسية المستخدمة في التسويق و صناعة المحتوى 📍فجوة الفضول (Curiosity Gap)! علمياً العقل البشري بيكره الحاجات غير المكتملة… و مش بيرتاح إلا لما بيكملها .. يعني لما تسمع حاجة زي “مرة مدرس جمباز اتجوز مدرسة السباحة و …”، أو تشوف عنوان زي “90% من المسوقين بيقعوا في الغلطة دي… إنت واحد منهم؟” بيفضل غصب عنك عندك فضول و مستني تعرف الباقي عشان عقلك يرتاح و يقفل الموضوع دا ! 📌 فحيث بقي ان الناس بتتعرض لمئات الإعلانات والمحتوى يوميًا، ف انت لو مقدرتش تعلق الجمهور من أول كام ثانية، ففرصتك في إنهم يكملوا معاك بتقل جدًا. و هنا بنتكلم علي اي محتوي سواء إعلاني لبراند شغال عليه ، او لنفسك ، إذا كانت صورة ، فيديو او مقال ف مش محتاج اقولك علي أهمية الHOOK الي هتخلي الناس تكمل معاك للاخر و ماتعملش scroll . و دي اللحظة الافضل بقي الي بيتم استخدام فيها " فجوة الفضول " دول 7 طرق سهلة و بسيطة هتساعدك ازاي تستخدمها في بداية محتواك : 1️⃣ حط عنوان مخالف للتوقعات او غير متوقع 🎯 ✅ “أفضل استراتيجية تسويق في 2025؟ بلاش تسوّق أصلاً!” ✅ “ليه رولكس كبراند مش مهتم يبيع أكتر ؟! (لو القارئ حس إنك بتقول حاجة عكس المتوقع او المنطق ، هيضطر يعرف ليه بتقول كده لأن بالتاكيد فيه تفسير !) ⸻ 2️⃣ الاسئلة المفتوحة صعبة التجاهل 🤯 ✅ “إنت بتخسر عملاء كل يوم بدون ما تعرف… ليه؟” ✅ “ازاي إعلاناتك السيئة بتنجح أكتر من إعلاناتك المثالية ؟” (المخ البشري بيكره الأسئلة المفتوحة، ولو السؤال كمان بيلوح لوجود مشكلة هيبقي العقل محتاج يعرفها و يوصل لحلها ) ⸻ 3️⃣ إخلق إحساس “الخوف من فوات الفرصة” (FOMO) ⏳ ✅ “الطريقة الجديدة لزيادة التفاعل… جربها قبل ما تبقي بفلوس !” ✅ “الترند ده بينتشر بسرعة… لو ما استخدمتهوش دلوقتي، هتندم!” (العقل بيكره فكرة “إنك آخر واحد يعرف المعلومة”، ولو حس إن في فرصة بتضيع منه، بيتفاعل فورًا عشان يغتنمها ! ⸻ 4️⃣ استخدم القصص أو السرد 📖 ✅ “نافس الكبار بميزانية صفر وباع الشركة بملايين… القصة اللي قلبت السوق المصري !” ✅ “لماذا فشلت ستاربكس في غزو إيطاليا… ثم عادت أقوى؟” (الناس بطبيعتها بتحب القصص، ولو حسّوا إنهم مقبلين علي قصة قوية، هيكملوا لحد ما يعرفوها كاملة) ⸻ 5️⃣ الربط غير المتوقع 🤔 ✅ “كيف يمكن لحبة رمل واحدة أن تغيِّر العالم؟!” ✅ “كيف يؤثر الفيل علي قراراتك الشرائية ؟” ( شوف البوست السابق ليا 😀) (لو الجملة فيها شيء غير منطقي زي الفيل و حبة الرمل ، المخ هيحاول يربط الحاجات ببعض، و ف هيكون عندك فضول تقرأ عشان تفهم.) ⸻ 6️⃣ إعادة طرح معلومة معروفة بشكل جديد 😮 ✅ “الإعلانات مش أهم حاجة في التسويق .. بالدليل! ✅ “السر الي بيخلي الفنادق تسيبك تدفع عند المغادرة، مش عند الحجز؟؟” (لو بتقدم معلومة تبدو من منظور مختلف او زاويا غير معتادة ، الناس هتضطر تقرأ عشان تعرف المنظور الجديد عليهم الي بتقدمه ) ⸻ 7️⃣ استخدم الأرقام والقوائم (List Format) 📊 ✅ “7 استراتيجيات تسويقية تقدر تنفذها النهاردة!” ✅ “5 أخطاء قاتلة في التسويق… و90% من الناس بيقعوا فيها!” (الأرقام بتدي إحساس بالنظام، والمخ بيكون فضولي يكمل الترتيب، ويفضل يدور على رقم 7 حتي يتمم مهمته ، زي ما عملت هنا كدا 😅) بس كدا و في الاخر اتمني "عربي " يكمل النكتة عشان نقفل فجوة الفضول الي عملها من اول رمضان دي #marketing #copywriting #advertising

أكيد سمعت قبل كده عن كتاب The Tipping Point لمالكوم جلادويل،واحد من أشهر الكتب اللي بتتكلم عن انتشار الأفكار، المنتجات، والظواهر الاجتماعية بشكل عام . الـTipping Point أو نقطة التحول، زي ما عرفها مالكوم، هي اللحظة اللي بيحصل فيها تغيير وتسارع مفاجئ وكبير في انتشار فكرة، منتج، أو سلوك او اي حاجة . اللحظة دي بتكون النقطة اللي بيتحول فيها الأشياء من كونها شبه مجهولة، لظاهرة الكل بيتكلم عنها او تريند ب لغة انهارده .. شبهها بالعدوى الي بتبدأ عند حالات قليلة جدا ، و بين يوم و ليلة بتلاقي شعوب بقت مصابة بيها . طيب ازاي دا بيحصل ؟ مالكوم قدم الاول ٣ قوانين أساسية: ‏➊ The Law of the Few مش كل الناس بتلعب نفس الدور في المساعدة علي الانتشار ، هم ناس معدودة مهمه بس تأثيرهم بيكون رهيب ! ( هنتكلم عنهم ) ‏➋ The Stickiness Factor (علشان فكرة او حاجة تكمل انتشار، لازم تكون مميزة و بتعلق في ذهن الناس ( بتلزق ) مش مجرد حاجة عابرة هتتنسي علي طول مع وصولها لعدد اكبر . ‏➌ The Power of Context (التوقيت والمكان والظروف حوالين الفكرة بيفرقوا في نجاحها أو فشلها) مثال : ساعات بيحصل احداث بتغطي علي احداث او افكار تانية كان عندها فرصة للانتشار بس بسبب التوقيت وقف انتشارها . ومن هنا بقي وضح جلادويل إن فيه ٣ أنواع شخصيات أساسيين، وجودهم هو اللي بيحرك أي فكرة وبيخليها تنتشر بسرعة : Connector - الوسيط ➊ الشخص الي بيكون عنده دائرة معارف كبيرة و متعددة و متنوعة . و بيبقي شاطر اوي في إنه يربط بين ناس مختلفين و بعضها . الي هو دايما لما تقابل ناس مختلفة تلاقيهم عارفينه ماتفهمش ازاي . وجود الـConnector بيخلي الفكرة تعدي حدود أي دائرة ضيقة، وتتحول لشبكة أوسع بكتير . Maven - الخبير ➋ الشخص اللي بيجمع المعرفة و الشغف . بتلاقيه مهتم بحاجة معينة بيحبها و بيفهم فيها و بيقدم دايما مساعدة فيها . ( افتكر صاحبك المتخصص ف العربيات ، العقارات و هكذا ) وبتلاقيه دايما بيحب يشارك اللي يعرفه مع غيره.الـMaven مش بس مثقف،الناس بتثق فيه لأنها بتحس إنه بيشارك المعلومة عشان يفيد، مش عشان يبيع او يقنع حد ب حاجة . Salesman - البائع المُقنع ➌ الشخص اللي بيعرف يقنعك بالحاجة و يبيعلك الفكرة بطريقته و أسلوبه ، من غير ما تحس إنه هدفه البيع ، هو عندة القدرة علي الإقناع ، حتي لو مش مثقف او متخصص ف الحاجة بس يعرف يبيع اي حاجة .الـSalesman بيعرف ازاي يحرك مشاعر الناس و يقنعهم . 📌 و بالتالي ال ٣ بيكملوا بعض .. الconnector بيوصل فكرتك لعدد كبير من الناس في وقت قصير ، و الMaven بيديها مصداقية ، و الSalesman يقنعهم هم ليه لازم يشتروها او يعتنقوا الفكرة .. و من هنا تتحول الحاجة من شيء محدش يعرفه ل شيء كل الناس بتتكلم عنه . 🟢 وكـ مثال ل تطبيق عملي ..لو بتجهز حملة إنفلونسرز لمطعم و عايز الكلام عليه ينتشر بسرعة ، حابب أقولك إن حتى الإنفلونسرز هتلاقي فيه منهم التلات أنواع: الConnector: اللي مجرد اتكلم عن المطعم هيخليك توصل لجماهير مختلفة و متنوعة بسرعة عنده قاعده متابعين رهيبه متنوعة. وفيه ال خبير (Maven) : مش لازم عنده قاعده جماهيرية بس الناس هتسمع رأيه في جودة الاكل و انواعة و كدا لان دا تخصصه و الحتة الي معروف انه خبير فيها . وفيه ال(Salesman)، بحماسه وطريقة كلامه و "الشو "الي هيعمله هيخلي الناس تتحمس وتجرب المطعم و تتكلم عنه . الخلطة دي نفسها ممكن تعملها في اي مجال ، المهم انك تعرف تلاقي ال ٣ شخصيات دول .. انت بقي بتشوف نفسك انهي نوع من ال٣ عامة ؟ 😅 #marketing

في التسعينات، كان فيه رجل أعمال بريطاني اسمه جيرالد راتنار، وكان بيقود واحدة من أكبر سلاسل المجوهرات في بريطانيا وقتها بقيمة سوقية تعدت ال 1.2 مليار جنيه إسترليني و كانت علي اسمه . راتنار كان غاوي يعمل ضجة كل شوية ، تصريحاته دايمًا مثيرة، أسلوبه مستفز، وكان مؤمن إن أي دعاية حتي لو سلبية هي دعاية و شهرة ليه و للبراند بتاعه . لحد ما ف يوم قال تصريح ما مستفز ، بقي تريند بلغة انهارده و كل الناس و وسائل الإعلام اتكلمت عنه ، و لكن بعدها مباشرة العملاء قرروا انهم مش هيشتروا تاني منه ، أسهم الشركة انهارت بين يوم و ليلة ، و الشركة بعدها أعلنت افلاسها . ومن يومها، اتولد مصطلح في التسويق : ‏“Ratner Effect” ازاي ممكن في لحظة شهرة ، تهد قيمة براند بالكامل ============= قبل الفترة دي بشوية و تحديداً في أواخر الستينات عالم الاقتصاد الشهير هربرت سايمون كان طلع بمصطلح ‏Attention Economy او اقتصاد الانتباه . و لكنه لم يشتهر إلا في التسعينات مرة تانية مع صعود الإنترنت، والميديا الرقمية، وبداية عصر المحتوى المفتوح . سايمون كان بيقول إن المشكلة ما بقتش في قلة المعلومات…و لكن في تضخمها الرهيب لدرجة إن الانتباه البشري نفسه بقى مورد نادر . و له مقولة شهيرة بتشرح دا : ‏“A wealth of information creates a poverty of attention” “وفرة المعلومات تخلق فقرًا في الانتباه ” ومن وقتها، بدأت تظهر أكتر فكرة “لفت الانتباه لمجرد لفت الانتباه” بغض النظر عن الرسالة أو القيمة الحقيقية ورا اللي بيتقال أو بيتعرض . و بدأت شركات و مشاهير كتير تستخدم دا بهدف الشهرة و كل ما اجذب الانتباه اكتر اتعرف و اتشهر اكتر و اكسب اكتر ، و بقي الهدف ازاي نعمل حاجات تلفت الانتباه و تخلي الناس تتكلم عننا . ============ طب هو لفت الانتباه دا بيعمل إيه؟ الحقيقة إن لفت الانتباه (Attention/Exposure) هو مجرد المرحلة الأولى في أي عملية بناء الوعي ب اي براند. ودي خطوة مهمة طبعًا . لأن مفيش حد هيشتري أو يتفاعل مع حاجة هو مش عارفها أصلاً و لكن بالتأكيد مش هي كل حاجة . طبقًا لنموذج Customer-Based Brand Equity (CBBE) لـ Kevin Keller وده طبعاً من أقوى النماذج اللي بتشرح إزاي الجمهور بيبني قيمة البراند . مرحلة الوعي هي اول مرحلة او اني اعرف بوجودك و لكن الاكيد ان بيجي بعدها حاجات مهمة زي ال brand image الي بعدها بيبدأ يتبني عند الناس مشاعر تجاه البراند و يقرروا انهم يتعاملوا معاه ولا لأ .. يحبوه ولا يتجنبوه .. و المفاجاة ان الbrand equity ممكن تبقي بالسالب .. بمعني ان معرفة الناس ب اسم البراند لو بيسبب نفور منه يبقي مبروك البراند كدا الequity بتاعته بالسالب . و دا بالظبط الي حصل ل استاذ راتنار الي اتكلمنا عنه .. 📌في التسويق : ليس كل ما يلمع ذهباً وليس كل شهرة نجاح #marketing #branding

روّاد الفضاء قبل ما يطلعوا أي مهمة لمنطقة جديدة، بيقضوا شهور و أحيانًا سنين في دراسة كل حاجة ممكن تقابلهم. من أول فهم و دراسة طبيعة المكان الي رايحين عليه للظروف المحيطة، لحد أسوأ السيناريوهات اللي ممكن تحصل. فهماً علي ان مهما كانت خبرتك انت رايح علي مكان جديد عليك بظروف مختلفة ، و لذلك مفيش مهمة بتبدأ قبل دراسة و فهم للوضع . و لأن فشل المهمة بيكون ليه عواقب ضخمة، وبيمثّل إهدار لموارد بشرية، وتقنية، ومالية كمان . ف مستحيل تحصل مهمة واحدة قبل دراسة متأنية و تدريب علي كل حاجة . “Every mission is unique , previous experience is never enough.” =========== تعالى بقى نشوف اللي بيحصل في التسويق ، واللي على فكرة، مش بعيد خالص عن فكرة رائد الفضاء اللي رايح منطقة جديدة عليه. النهاردة، بشوف كتير من الماركيتيرز او الـ agencies أول ما تدّيله البريف ،يبقى جاهز على طول بفكرة الكامبين! " احنا نعمل اعلان زي الريفرنس دا .. و نخلي الرسالة كذا .. او نجيب النجم الفلاني .." وده بيبقي قبل ما يكون اخد اي وقت لدراسة او فهم السوق أو المنتج أو حتى المشكلة! مع إن المسوّق الشاطر عارف إن تقريبًا ٧٠٪ من شغلك بيبدأ قبل أي تنفيذ في فهم البراند، السوق، المنافس، والسلوك الحقيقي للناس. الtactics و الactivations دي آخر حاجة خالص بتوصلها . نفس الفكرة اللي قالها آينشتاين: “If I had an hour to solve a problem, I’d spend 55 minutes thinking about the problem and 5 minutes thinking about solutions.” لكن كتير بيبدأوا من الآخر .. من الحل يفكروا في الكامبين… قبل ما يفهموا فعلاً هم بيحلّوا إيه و دا للأسف بيكون يا اما اراء شخصية او ثقةً في خبرتهم اللي غالبًا جاية من مهمة تانية، في سوق تاني، في وقت تاني! وتسمع بقي جُمل زي: “العميل في الخليج بيحب كذا” “معروف إن الستات بتتصرف كدا” افتراضات وكتير منها وارد يكون مش بيعكس الحقيقة، ولا المشكلة الحقيقية. عشان كدا يا عزيزي المسوّق ويا عزيزي الكرييتف: أهم قاعدة: أنت مش زبونك ! الـ Unlearning مهم جدًا في المرحلة دي. حيّد الأحكام المسبقة اللي مبنية على رأيك الشخصي أو على خبرة جاية من ظروف وسوق مختلف . و ابدأ الاول بدراسة سوقك و مهمتك الجديدة زي ما بيعمل رائد الفضاء بالظبط . و بعد كدا يا تتأكد ان نظرياتك و آرائك متماشية مع الواقع او لا . طب لو أنا مكان صغير او بيزنس صغير و معنديش رفاهية اني اعمل research محترم ، يبقي علي الأقل أبدا ب ادوات مجانية تعرفك اكتر علي السوق و المنافسين . 📌 دي بعض من الأدوات المجانية المشهورة الي ممكن تفيد في دا : 1.Google Trends اعرف الناس بتدور على إيه، واهتماماتهم بتتغير إزاي مع الوقت. https://trends.google.com 2.Answer The Public شوف الناس بتسأل إيه عن مجالك، وابدأ من أسئلتهم مش من افتراضاتك. https://lnkd.in/dS7Ejx29 3.Meta Ad Library تابع إعلانات المنافسين وشوف بيتكلموا إزاي، وفين، ولمين. https://lnkd.in/dDkhmKjp 4.Think with Google تقارير، أبحاث، وinsights حقيقية عن سلوك المستهلكين. https://lnkd.in/d7w9R8Nm 5.SimilarWeb اعرف المواقع اللي جمهورك بيزورها، والمصادر اللي بيجوا منها. https://www.similarweb.com 6.Reddit Search دور وسط المحادثات … وشوف الناس بتتكلم عن إيه يهمك https://lnkd.in/dcYTKe7i 8.Ubersuggest أداة SEO وKeyword Research تساعدك تعرف اكتر عن البحث وسلوك الجمهور. https://lnkd.in/d5PC9256 و لو عندك ادوات تانية مفيدة شاركوها #marketing #research

احتاج العربي ايه و قد ايه عشان يقول " العربي … كلمته ضمان " ؟! و الله الموضوع بيحتاج كتير اوي ، شوف كام براند ظهر و اختفي علي مدار السنين دي ، الموضوع مش حملة اعلانية تكسر الدنيا ، ولا تريند تطلع فيه سنتين و بعدين تختفي .. “A brand is a promise kept consistently, over time.” - Marty Neumeier ”العربي” بالنسبالي، واحد من خمس علامات تجارية مصرية بشوفها زيها زي اي case study بتدُرس في كتب التسويق و بناء العلامات التجارية . دايمًا بحس إن الحاج محمود العربي ساب playbook واضح إزاي البراند دا يفضل Consistent . عارف هو بيعبر عن إيه، وملتزم بنفس الرسالة في كل حاجة بيقولها أو بيعملها لأنه كان فاهم من الأول إنه مش بيبيع منتج وخلاص،هو بيبني قيمة حقيقية والقيمة دي بتاخد سنين، ومجهود، وتعب، وصبر علشان تتبني . ويمكن الي أصعب من كده هي إزاي تحافظ عليها وتخليها عايشة على مدار السنين. و ازاي في يوم توصل علامتك ان تبقى فعلاً تقدر تقول – بالقول والفعل “العربي كلمته ضمان”. و دايماً البراند اللي عنده values واضحة ، بيبقى زي الشخص كدا الي عنده بالظبط . انت ممكن تختلف معاه ، ممكن مايعجبكش في وقت، و مش لازم كل الناس تحبه ، و وارد يغلط اوقات ، بس دايمًا هتفضل بتحترمه وتقدّره. حتي منافسينه . و فيه تفصيلة بحبها في براند العربي… وهي إن فيه براندات كبيرة بتحس دايما إنها واخدة من روح المؤسس،كأن البراند دا لو كان بني آدم، كان هو نفس الشخص اللي بناه. ‏Apple مثلًا تحس ان دايما فيها نفس صفات ستيف جوبز زي الابتكار، البساطة، الدقة، وحب التفاصيل. ‏Virgin تحس فيها من انطلاق ريتشارد برانسون، وروحه كدا ، وميله لكسر القواعد. و العربي بقي دايما تحس فيه روح الحاج محمود العربي: الاحترام، القيمة، الثقة، وكلمة الراجل الأمين الصادق “When you build a brand around your values, it lives longer than any campaign ever will.” Bernadette Jiwa الموضوع مش لوجو و كامبين حلوه ولا اعلان كريتيف و خلاص .. الموضوع اكبر من كدا ب كتير .. .. و لهذا نحب التسويق ❤️ ELARABY Group #marketing #brandbuilding

ازاي الناس بتاخد قرارتها الشرائية ؟ طب تسمع عن الphysical availability و الMental availability ؟ تعالي هنبسطها . هنفترض سيناريو …تخيل انك انهارده حضرت الغداء و انت متعود تشرب مياة غازية مع الاكل .. بتفتح التلاجة مالقتش ولا عبوة موجوده . نزلت السوبر ماركت الي تحت البيت و الي مفيش غيره ف المنطقة و فتحت التلاجة الي فيها المشروبات الغازية ، لقيت VCola موجود , و رف كوكاكولا فاضي ، و مشروب تالت اسمه سبايدر كولا . لو افترضنا انك مش مقاطع و كان اختيارك الاول هو كوكاكولا لأنه اشهر حاجة و انت متعود عليه و بتفضله، بس بما انه مش موجود وقتها فمش هتقدر تشتريه . الphysical availability هي إن المنتج يكون متاح قدامك، في المكان اللي بتشتري منه، وفي الوقت اللي محتاجه فيه . ‏Physical availability means that your brand must be easy to find and easy to buy for those who want to purchase it right now و ف أيامنا دي بالذات مع تعدد الخيارات الرهيب و قلة الولاء و التنافسية الرهيبه لو أنت مش موجود مكان ما عميلك بيدور و وقت ما هو محتاج يلاقيك ، فأنت بنسبة كبيرة هتخسره و هتدي فرصه ل منافس تاني انه ممكن ياخد مكانك . المهم .. رجعت بصيت علي التلاجة و في لحظة اخدت Vcola مفكرتش كتير لأنه بالنسبالك خيار كويس ، واحد من الconsideration set الي أصلا عندك . بالنسبالك هو لا يقل عن كوكاكولا ف حاجة ، ممكن بس سعره اغلي شويه بس تمام انت من الاول ف دماغك كوكاكولا ، Vcola او بيج كولا و انت نازل تشتري . طب و سبايدر كولا ؟ المشكله انه انت ماتعرفش دا إيه أصلا و شكله بالنسبالك غريب اول مره تشوفه ماتفتكرش انك شوفت عنه اي حاجة قبل كدا أبداً . مخك معندوش اي معلومات متخزنة عنه ! هنا Vcola كسب ف الmental availability الي هي مدى سهولة إن البراند ييجي في بالك وقت الشراء أو في لحظة الحاجة للفئة دي. طب و دا بيتبني ازاي ؟ بتكرار التواجد برسائل واضحة وثابتة و تواصل مستمر مع الوقت بيبدأ يتكوّن في دماغك صورة ذهنية عن البراند عن طريق وسائل كتير سواء دعايا و إعلان او سمعت عنه من ناس و حاجات و شغل تاني كتير عشان يبقي خيار مطروح في اللحظة اللي تحتاج فيها تشتري من الفئة دي. مع ان وارد جدا كطعم و كجودة يطلع سبايدر كولا دا هو الاحسن ، بس بسبب انه مش كسبان في الmental availability لم يتم اختياره … و مع ان كوكاكولا ممكن يكون اقوي ك mental availability بس عدم توفره أجبرك تروح للخيار المتاح وقت الشراء .. ف مش معني ان معاك المنتج الأفضل او الأكثر توفراً انك كدا كدا كسبان ،،عشان كدا دورك ك ماركيتير عشان تكبر البراند بتاعك انك تتاكد انك دايما ناجح في الاتنين الmental و الphysical availability و طبعا الموضوع بيختلف شوية من فئة للتانية و فيه عوامل تانيه ممكن تأثر ، لو بنتكلم عن منتجات زي المشروبات، الشوكولاتة، أو ما الي ذلك دي فئات بتسمي ب low involvement categories القرار فيها سريع، وغالبًا تلقائي . لكن مثلا لو بتشتري عربية او لاب توب ممكن جدا الموضوع يتأثر ب عوامل تانية لان مش بيكون مطلوب منك تاخد قرار في لحظتها زي انك تشتري عبوة مشروب غازي ؛) وهنا باقتبس من Byron Sharp، واحد من أهم الباحثين في التسويق الحديث، ومؤلف كتاب “How Brands Grow” واللي بقى مرجع أساسي ل شركات و براندات كتير . ‏Brands grow by being easily accessible both in the minds of consumers (mental availability) and in the marketplace (physical availability) ‏#marketing #brandgrowth

اغلب الناس بعد الإجازات، خصوصًا المرتبطة بالأعياد، بيمرّوا بحاجة اسمها Post-Vacation Blues او اكتئاب ما بعد الاجازة ، و دي حالة من انخفاض الحالة المزاجية والتركيز والدافعية . فيه دراسات بتقول إن أكتر من ٥٠٪؜ من الناس بتحس بالاكتئاب ده، خصوصًا الناس اللي كانت مسافرة أو خرجت من الروتين اليومي بتاعهم خلال الاجازة . 📍و المهم ان ده كمان بينعكس بشكل مباشر على سلوكهم كمستهلكين. الإجازات بطبيعتها، بتعتبر موسم استهلاكي مهم، بيحصل فيها زيادة في معدلات الشراء، العروض، الحملات، والضغط الاجتماعي للاستهلاك. فما بالك بقى لما نتكلم على إجازة عيد الفطر،اللي بتيجي بعد شهر استثنائي زي رمضان – واحد من أكتر الشهور استهلاكًا على مدار السنة . طب عشان نعرف العميل بيتغير ازاي بعد العيد خلينا نفهم هو جاي من ايه ؟ العميل في موسم زي رمضان والعيد، بيكون داخل في “حالة شرائية عاطفية مؤقتة”، وهي حالة سلوكية ونفسية بيوصفها خبراء السلوك الاستهلاكي بـإنها لحظة بيحصل فيها اختلال مؤقت في التوازن بين العقل والعاطفة عند اتخاذ قرارات الشراء.المستهلك بيتأثر بالجو العام، الضغوط الاجتماعية، و التخفضيات و العروض و الرسائل التسويقية و الإعلانات ، وحالة “الاحتفال الجماعي”، فـتحصل حالة من impulse buying أو الشراء الاندفاعي .في أوقات كتير بياخد قرارات شرائية لو في ظروف تانية ممكن مايخدهاش . 📌طيب ازاي العميل بقي بيتغير بعد العودة من الاجازة : 1. صحوة بعد الاندفاع بعد موجة المشاعر والعروض، العميل بيرجع يفكّر بشكل عقلاني اكتر ما هو عاطفي ⸻ 2. مراجعة الشراء دي لحظة الـ Post-Purchase Evaluation، الي فيها العميل بيقيّم هل المنتج أو الخدمة فعلاً كانت تستاهل؟ ⸻ 3. شد الحزام الإنفاق العاطفي بيتحول لإنفاق واعي، والمشتريات بتروح اكثر للاحتياجات مش للرفاهيات . ⸻ 4. موجة المرتجعات الندم الشرائي بيتحول لفعل. الـ Return Rate بيرتفع بعد المواسم في أغلب القطاعات خصوصًا الملابس، الإلكترونيات، والهدايا. ⸻ 5. مقاومة العروض العميل اللي كان بيستجيب لأي خصم أو عرض، دلوقتي بقى يشك و يقيم ويدوّر على المنطق في قرارته الشرائية ⸻ 6. بداية أهداف جديدة بعد الأعياد و الاجازات الناس بتحط أهداف جديدة لنفسها ك تنظيم لوقتها . العلماء بيسموا الظاهرة دي “تأثير البداية الجديدة” (Fresh Start Effect). سلوك المستهلك بعد الإجازة بيكون مزيج معقد بين مشاعر نفسية وبين اعتبارات مادية ومنطقية. ⭐️طب إزاي الماركتير الشاطر يستغل دا في استراتيجيات عملية؟ 1️⃣ ابدأ بتواصل قائم على الفائدة العميل بيكون محتاج محتوى فيه قيمة و تعليم يفيده مش مجرد يبيع له . لأن زي م اتفقنا العميل بيكون اكثر عقلانية مش عاطفية في الفترة دي . 2️⃣ قدّم عروض قيمة تناسب حالة “التوفير” في المرحلة دي، العميل بيدوّر على value for money، مش مجرد تخفيضات و خلاص علي اي حاجة . 3️⃣ حسّن تجربة ما بعد الشراء العميل ممكن يكون حاسس إنه اتسرع أو اتورّط.لو لقي خدمة محترمة واهتمام بعد الشراء، هتقدر تحوّل التردد لولاء. 4️⃣ اعرف إمتى تلعب على “البدايات” لو شغلك ليه علاقة بـ تنظيم، صحة، تعليم، أو تجديد… الوقت ده ذهبي و مناسب انك تكسب فيه . 5️⃣ ارجع للعملاء الجداد بذكاء الناس اللي اشترت منك في العيد او في التخفيضات؟ دي فرصة لـ cross selling أو retargeting بمنتجات مرتبطة بس برضه عن طريق الفائدة . 6️⃣ جهّز للي جاي من دلوقتي إذا كان عيد الأضحى، الصيف، Back to School ابدأ التخطيط من بدري للسيزون الي جاي و خليك مستعد بس كدا :) #marketing

اجدد كامبين لينا 📢📢 انهارده يوم التأسيس السعودي، اليوم اللي بتحتفل فيه المملكة بجذورها وتراثها، و الي فيه النساء و الرجال من كل منطقة بتعبر عن هويتها بطريقتها الخاصة، سواء من خلال أزيائها التقليدية أو العادات والاحتفالات المميزة 🇸🇦✨ ومن هنا، لقينا في برايورين إن الاحتفال ده متماشي جدًا مع منصتنا “جذور قوية، روابط ما تنكسر” الي أطلقناها من سنة ، ك خبراء في نوع تاني من الجذور و هي جذور الشعر . وعلشان كده، قررنا نحتفل بيوم التأسيس بطريقة تعكس روح التنوع والترابط اللي بيميز المملكة. و ربطنا بين اليوم و بين البراند بشكل مختلف .. طبعا الكامبين فيها حاجات كتير 🚨🚨 بس المميز السنادي بقي اشتغلنا مع Snap Inc. و عملنا عدسة تفاعلية .. تقدر كل واحدة من خلالها تختار اللبس التقليدي الخاص بمنطقتها وتحتفل بجذورها وهويتها مع برايورين تقدروا تجربوا العدسة من هنا : https://lnkd.in/dhHkjec5 Thanks to the amazing Saudi team : Ahlam Bin Afif Amal Tunsi Saud Algadheb Thanks to OLIVER Agency Team : Rayan Rahal Hanna Magdy Alok Tiwari Thanks to EssenceMediacom Team : Elias Odeh Samiah Arshad And Thanks to our partners at Snapchat

📌 زمان ولفترة كبيرة , الإعلانات كلها كانت كلها بتركز علي خصائص و مزايا المنتجات بشكل مباشر ! او ما يسمي بالHard sell لكن لو قولتلك انهارده افتكر كدا اخر اعلان شوفته ل براند كبير . بنسبة كبيرة هيكون ذكر المنتج او خصائصة مش موجود ، يعني ماكدونالدز مثلا كل فين و فين لما هتلاقي الإعلان بيتكلم عن ساندوتش معين ، نفس الكلام ل نايكي و غيرهم . و الاهم ان بتلاقي ان بعد الحملات او الاعلانات دي ، بيع المنتجات بتاعة البراندات دي بيزيد .. المنتجات الي اصلا مجاتش سيرتها في الاعلان او الحملة بشكل مباشر .. طب ايه الي بيحصل ؟ تعالي اقولك .. 🔗 سنة ٢٠٠٦ ، عالم نفس اسمه " جوناثان هايدت " اتكلم عن ازاي الانسان بياخد قرارته .. هل بالعقل و المنطق ولا بالعاطفة و المشاعر ؟ جوناثان قدم نموذج عقلي في علم النفس السلوكي و تشبيه مهم اصبح بُيستخدم من علماء النفس و كمان خبراء التسويق و هو : الفيل و راكبه - elephant and rider analogy 🐘 تعالي نشوف نموذج عم جوناثان دا بيقول ايه : ✅نظرياً لو تخيلت ان عندك شخص راكب فوق فيل كبير .. فالراكب الي فوق الفيل هو الي في مقعد القيادة و هو الي متحكم في حركته و اتجاهه ، و دا حقيقي طول ما الفيل و راكبه متفقين و مفيش اختلاف .. بس يحصل ايه لو الفيل شاف حاجة اثارته في اتجاه عكس الي عايزه الراكب القائد .. ؟ ساعتها الراكب هيلاقي انه تحكمه شبه وهمي و انه مستحيل يقدر يمنع الفيل او يوجهه عكس رغبته و الاتنين هيروحوا ف الاتجاه الي الفيل عايزه .. -الراكب هنا هو التفكير العقلي و المنطقي Logical Rational 🧍🏻 -الفيل هو جانب العاطفة و المشاعر Emotional Irrational 🐘 طول ما العقل و العاطفة متفقين ، ف الامور بتبدو منطقية اكثر و يبان ان كل قرارات الانسان و منها قرارات الشراء منطقية و عقلانية ، و لكن مع اول اختلاف بينهم هتلاقي ان العاطفة غالباً بتغلب .. Humans make decisions based on emotions and justify it with logic afterwards. و لو فكرت فيها كدا ، كام حاجة انت ك مستهلك بتشتريها بالعاطفة مش بالمنطق ؟ فكر ف حاجه سعرها مثلا اغلي ب كتير من غيرها اذا كانت كوباية قهوة او مكان بتقعد فيه او تليفون او مكان بتفضله ، لو بالمنطق و الحسابات كنت ممكن تختار خيار تاني . فيه تجربة شهيرة جداً تسمي بال Pepsi challenge , عن اختبار طعم بين بيبسي و كوكاكولا الي فيه الناس كانت بتختار ان طعم بيبسي احسن (منطق ) بس عند الشراء بيشتروا كوكاكولا لارتباط البراند معاهم بذكريات و نوستالجيا ( مشاعر ) مين كمان يقول إن منتج زي ريدبول يكون ناجح عالميًا رغم إن طعمه أغلب الناس في العالم بتقول إنه مش حلو، وفي اختبارات الطعم قبل دخوله السوق، الناس كانت بتبصقه بمجرد تذوقه؟لكن لأن ريدبول مش مجرد مشروب ولا بيتم تقييمه على طعمه (منطق)، لكنه مرتبط بإحساس معين وتجربة مختلفة (عاطفة) و غيرها من الامثلة كتير ! ‼️طب انت ك ماركيتير تستخدم الكلام دا ازاي ؟ أولاً لازم تفهم ان مش معني الكلام الي فوق دا ان كل البراندات تقدر تعمل دا و تلعب بس علي المشاعر و تهمل الجزء المنطقي .. الموضوع بيختلف حسب وضع البراند في السوق، نوع المنتج، ومرحلة المنتج في دورة حياته ، لو البراند جديد أو المنتج محتاج إثبات، المنطق بيكون أساسي، لكن لو البراند قوي وعنده مكانة، التسويق العاطفي بيكون أكثر تأثيرً . الشطارة هي ازاي تعمل مزيج يخاطب عقل و قلب العملاء بتوعك .. عشان مايجيش منافس ليك يسحب الفيل بالراكب الي عليه 😉 و انت قاعد بتحاول تخاطب عقله بس بمزايا منتجاتك . #marketing #advertising #brands

ناس كتير أول ما بيسمعوا كلمة “منافسة”، أول حاجة بتيجي في دماغهم: خطر، تهديد، حرب! و بالتبعية بيشوفوا إن المنافس عدو و لازم نشوف هنخلّص عليه إزاي أو نعلّم عليه بأي طريقة! 📍مع إن لو رجعنا لتعريف الكلمات في القاموس، هنلاقي فرق كبير جدًا بين كلمة “عدو” (enemy)، وكلمة “منافس” أو “ند” (rival أو competitor) العدو دايماً بيتمنّى ليك الأذى، وانتصاره لازم ييجي على حساب تدميرك .اما المنافس ف و ان كان بيسعى للفوز و التفوق بس من غير ما يأذيك . لأن العداء بتنتهي ب مكسب طرف علي حساب خسارة الطرف الاخر ، اما في المنافسة ف وارد جداً الاتنين يطلعوا كسبانين لكن كل واحد بدرجة متفاوتة . المنافس الجيد هيفضل أعظم فرصة لأي بيزنس -أو حتى لأي شخص- علشان يتطور . ⭐️ و دي ٦ حاجات بتعملها المنافسة الجيدة : 1️⃣ يساعدك في استكشاف وفهم السوق ‏Helps You Explore and Understand the Market عارف وإحنا صغيرين، لما كنا بنلعب لعبة ندور على حاجات مستخبية في البيت؟لو بتدوّر لوحدك الموضوع بيبقي صعب ، لكن لما بيكون في حد تاني بيدور معاك – حتى لو منافس – بتبدأ تلاحظ طرق تانية، أماكن جديدة، بتتعلم من طريقته. نفس الفكرة بتحصل في السوق ، المنافس بيساعدك تشوف احتياجات وفرص ما كنتش هتشوفها لوحدك 2️⃣ توفير الوقت وموارد ‏Saves You Time & Resources رحلة الاستكشاف الي بيعملها المنافس مش بس بتساعدك تفهم السوق… ده كمان ممكن بتوفر عليك وقت و مجهود و موارد كانت تكلفتها هتبقي عليك انت لوحدك . 3️⃣ يوسّع السوق ويزود فرصك ‏Expands the Market and Your Opportunities المنافس قوي بيكبر حجم السوق، و بيزود التوعية بالمنتج لناس أكتر. وقتها حتى لو نسبتك فضلت زي ما هي، السوق نفسه بيكبر وإنت بتكبر معاه! زي ما بنقول بيكبر الكيكة ف كله بيستفيد 4️⃣ يدفعك للابتكار والتطور ‏Drives You to Innovate and Evolve وجود منافس قوي في نفس مجالك بيخليك دايمًا عايز تطور لأن لو وقفت مكانك، هو هيسبقك… فبتضطر تطور، وتحسّن، وتبدع . و الابداع دا نتيجته انك بتعرف ترضي العميل بشكل احسن بخدمات و منتجات افضل مع الوقت و بتاخد قصادها مقابل و ربح افضل كثمن للإبداع . 5️⃣ يوفّر عليك أخطاء ويوجهك ‏Helps You Avoid Mistakes and Learn Faster مش لازم تجرب كل حاجة بنفسك، ولا تغلط الغلطات كلها بأيدك. المنافس ساعات بيكون زي الكشاف اللي بيمشي قبلك في طريق مظلم ، ولو وقع في حفرة… إنت ببساطة بتتفاداها.سواء غلطة في منتج، أو حملة إعلانية ما جابتش نتيجة، أو حتى تسعير مش مناسب، كل دي دروس أنت بتاخدها ببلاش 6️⃣ يفتح لك باب الشراكات والتعاون ‏Opens Doors for Collaboration and Partnerships رغم إن المنافسة دايمًا بتتقدم في صورة صراع، إلا إن في أوقات كتير بيكون فيها التعاون مع المنافس هو أكتر حاجة ذكية ممكن تعملها. سواء علشان تدخلوا سوق جديد، أو تطلعوا بمنتج مشترك، أو حتى تحطوا معايير للصناعة كلها. “I have been up against tough competition all my life. I wouldn’t know how to get along without it.”– Walt Disney🧚‍♂️ مقولة رائعة ل والت ديزني بيقول انه عاش حياته كلها بيواجه منافسة قوية ، و لكنه لا يتخيل أبدا انه من غيرها كان ممكن يوصل ل حاجة آه، في أوقات المنافسة بتخرج عن كونها شريفة، وبتتحول لحرب زي حروب البراندات الشهيرة (Brand Wars) بس تفضل دي حالات استثنائية مش قاعدة وغالبًا الكل بيخسر فيها، سواء بخساير تسعير، أو تضرر في الصورة الذهنية عند الجمهور. المنافسة الشريفة مفيدة جدا لكل مؤسسة و براند و حتي علي مستوي الأفراد #Marketing

دراسات كتيرة بتثبت ان الناس بتفتكر القصص علي الاقل ١٢ ضعف أكتر من تذكرهم للحقائق و الأرقام المجردة . في كتاب Contagious ل جوناه بيرجر، القصص كانت واحدة من الست عناصر اللي وصفهم انهم بيساعدوا في انتشار أي فكرة أو منتج، و شرح كمان إزاي القصة مش بس بتوصل الرسالة، لكنها بتخلي الناس تحب يحكوها لبعض. و كمان في كتابهم الشهير Made to Stick للمؤلفين تشيب هيث ودان هيث، حطوا القصص كواحدة من العناصر الأساسية اللي بتخلي الأفكار والرسايل ما تتنسيش . في التسويق، عندك مساحة تحكي قصص كتير. البراند بتاعك نفسه ممكن - أو يفضل - يكون ليه قصة قوية بتعبر عنه وتخليه أقرب للناس. لكن لو بنتكلم عن كتابة إعلان أو بوست قصير، فصعب تكون قصة بالمعنى التقليدي .ومع كده، تقدر من خلال كام جملة بسيطة ترتب المحتوى بحيث تحكي رحلة صغيرة أو مشهد يحسس القارئ إنه شايف موقف أو تحول ، وده في حد ذاته بيعتبر storytelling فعال يساعد في توصيل رسالتك . 📌دي 5 صيغ عملية تقدر تستخدمها لما تحس انك مش عارف تحكي الي عايز تقوله في شكل قصة : 1. Before – After – Bridge (BAB) صيغة الجسر : • Before: الوضع الحالي/المشكلة • After: النتيجة المرغوبة • Bridge: إزاي نوصل للحل مثال: "بتضيع ساعات في تنظيم يومك ؟ دلوقتي كل حاجة هتترتب في دقايق الحل؟ مع أداة واحدة بتختصر لك كل ده ⸻ 2. Thesis – Antithesis – Synthesis (TAS) صيغة دمج النظرية : نظرية – عكسها – دمجهم • Thesis: فكرة شائعة • Antithesis: اعتراض أو وجهة نظر مضادة • Synthesis: الدمج بينهم لتقديم حل أو منظور جديد مثال: عايز تخس؟ لازم تتمرن كتير” (Thesis) لكن التمرين من غير تغذية سليمة بيضيع مجهودك” (Antithesis) الحل هو التوازن بينهم بكورس معمول ليك شخصياً ” (Synthesis) ⸻ 3. Promise – Picture – Proof – Push (4Ps) صيغة التحفيز بالدليل : وعد – صورة – إثبات – تحفيز • Promise: نتيجة مرغوبة • Picture: تصور الحياة بعد تحقيقها • Proof: دليل أو تجربة • Push: CTA مثال: وعد : ضاعف مبيعاتك خلال ٣ شهور صورة : و هتلاقي تليفونك مش بيوقف طلبات اثبات : عميلنا x بدأ من نفس النقطة، ودلوقتي بيحقق أرقام عمره ما تخيّلها تحفيز : ابدأ خطوتك الأولى معانا انهارده . ⸻ 4. Situation – Complication – Question – Answer (SCQA) صيغة حل العقدة : حالة – تعقيد – سؤال – إجابة • Situation: السياق الحالي • Complication: تحدي أو مشكلة • Question: طب نعمل إيه؟ • Answer: الحل مثال: الوضع: شركتك بتستخدم كلمات مرور قوية التعقيد: لكن لسه بتتعرض لاختراقات السؤال: طب هل ده كفاية؟ الجواب: الحل هو طبقة حماية متعددة المستويات ⸻ 5. Problem – Agitate – Solution (PAS) صيغة تضخيم المشكلة مشكلة – تأزيم – حل • Problem: تحدي واضح • Agitate: تكبير أثره على العميل • Solution: تقديم الحل مثال: المشكلة: بتاخد وقت طويل ترد على استفسارات الزباين التأزيم: والعميل بيزهق و بيقفل و بتخسر فلوس كل يوم الحل: شات بوت بيرد خلال ثواني علي الاسئلة الشائعة وبيوفر وقتك و فلوسك ! =============== ‎دي كلها صيغ بسيطة ممكن تساعدك لو مش عارف تبدأ تكتب منين، أو لو حسيت إنك تايه في وسط الفكرة ومش قادر ترتبها #marketing #advertising #copywriting #storytelling

اللقطات اللي واخدينها كلها طبيعية 🎶 أنا دايماً بحب أربط اللي درسته واتعلمته وطبقته بأي حاجة بتحصل قدامي.. وعودة "الكاميرا الخفية" السنادي كانت بالنسبة لي Case Study ملهمة جداً ، و هشرح في البوست دا ليه ، لأن فيها تطبيق تسويقي عبقري :) ← سنة ٢٠٠٦، آبل لما جت تنزل الـ Mac كانت عارفة كويس هي عايزة تعمله Positioning كإيه، بس الحقيقة هما كانوا عارفين أكتر ومحددين هما كمان "مش عايزين يكونوا إيه". وقتها كان الـ PC هو الخيار الوحيد والمسيطر في السوق، فكانت آبل عايزة تقول بوضوح: "إحنا كذا.. ومش كذا". وده اللي ألهمهم يعملوا حملة (Get a Mac) الشهيرة؛ شخصين واقفين قدام الكاميرا، واحد بيمثل الـ PC (معقد، فورمال، ومشاكله كتير) والتاني بيمثل الـ Mac (بسيط، روش، وسريع). آبل هنا اختارت "عدوها" بذكاء عشان تثبت هي "مين" في دماغ الناس عن طريق إنها أظهرت هي "عكس" مين. الي فوق دا بيتعرف بـ Anti-Positioning أو ال Versus Positioning ← بقالنا سنين أشهر برنامج مقالب في الوطن العربي كله هو رامز، وبرغم كل الهجوم والانتقادات، إلا إن محدش قدر يزحزحه من مكانه أو يقدم بديل حقيقي . القائمين على البرنامج السنة دي اشتغلوا بـ Versus Positioning Strategy واضحة ضد برنامج رامز، وده انعكس في كذا نقطة تطبيق : • الجمهور المستهدف: العائلات اللي بتحب تتفرج على حاجة خفيفة وظريفة، و بيدوروا علي حاجة مفيهاش ألفاظ خارجة او إيحاءات عشان الأطفال الي بتكون علي نفس السفرة ، حاجة مناسبة لجو اللمة في رمضان ( عكس رامز ) • اسم المنتج أو البرنامج: عبقرية اختيار براند له Equity كبير جداً عند الجمهور المستهدف. بدل ما يبدأوا من الصفر، استثمروا في استخدام براند "الكاميرا الخفية" اللي محفور في ذكرياتنا انه آخر برنامج مقالب محترم و مفيهوش خروج عن الاداب العامة ( عكس رامز ) • الفورمات: مواقف بسيطة بعيدة عن الافتعال أو التمثيل المفضوح لأن المقلب بيحصل في قلب لوكاشن تصوير عادي و الي بيعملوا المقلب هم افراد الكرو الظريف المشاركين فيه إلي فعلا دمهم خفيف و عفويّين جدا ( عكس رامز ) • التوقيت: اختيار وقت العرض هو نفس وقت عرض رامز بالظبط علي التلفزيون بعد الفطار علي قناة تانية ك رهان ان العيلة الي في ايديها الريموت و عايزين يتفرجوا علي حاجة وقت الفطار هيبقي قدامهم اما رامز .. او ال ( عكس رامز ) في الآخر، الكاميرا الخفية عشان ينجح ويكمل في السنين الجاية ( هيحتاجوا يغيرو المقلب ) ، لازم يفضل فاكر هو ليه لقى القبول ده من الأول Effective positioning is as much about who you are NOT, as who you are. وعشان كدة شوفت إن الكاميرا الخفية حالة مثالية عن أهمية البراند و استخدام brand equity لصالحك وعن ذكاء الـ versus postioning الي أتعمل ، الي ممكن يتطبق في مجالات مختلفة . #marketing

اعلان جامد جدا 👏🏻👏🏻 صندوق التنمية السياحية السعودية عامل إعلان رائع في اليوم الوطني Flipping the Narrative technique زي ما الكتاب بيقول ازاي تاخد صورة نمطية قد تبدو سلبية و تقلبها ل صالحك بذكاء و تبني عليها واحدة من أقوى طرق إعادة تقديم الصورة الذهنية عن الشيء و حلو ان الtone of voice مش فورمال خالص ، لكن لذيذ و فكاهي ، و دا برضه ليه معني مهم حبيت بصراحة ❤️👏🏻 🇸🇦 Tourism Development Fund صندوق التنمية السياحي

صورة الشهر بلا منازع!📸 عمر مرموش واقف متأثر قبل انتقاله الكبير لمانشستر سيتي و جمهور فريقه بيودعه في مشهد جميل ، و الأجمل مشهد زمايله في الخلفية الي فرحانين له من قلبهم. “True friends celebrate your success as if it were their own.” نجاح كبير لعمر إنه يسيب مكان وهو محاط بكل الحب والتقدير ده، ونجاح أكبر للفريق على الروح دي اللي بتأكد ليه بيقدموا موسم استثنائي ولسه قادرين يكملوا بقوة حتي بعد رحيل مرموش هكذا تُبنى الفرق و الكيانات العظيمة ♥️♥️👏🏻👏🏻

عارف لما تدخل محل ملابس ، و أول ما بتدخل بتلاقي في وشك في العرض ، جاكيت شكله غريب جدا و سعرة 20,000 جنيه مثلاً ! 🤯 ( فيه محل معروف بيعمل الموضوع دا علي طول 😉 ) تضحك في سرك، وتقول: “هو مين المجنون اللي ممكن يدفع الرقم ده ف البتاع الوحش دا ؟!” تكمّل جولتك… فجأة تلاقي جاكيت تاني شيك جدًا بسعر 7,000 جنيه. مقارنةً بالأول، السعر بقى “معقول”، رغم إنك لو شفته لوحده كان ممكن تشوفه غالي برضه! مبروك! 👏 إنت وقعت في واحدة من الخدع التسويقية النفسية: الـ Price Anchoring 🧠⚓️ اللعبة النفسية دي بتلعبها براندات وبائعين كتير. لأن تقييمك لسعر السلعة “الأشيك” في المثال بقى معقول عندك من غير ما تدرك، بسبب ربطها ومقارنتها بسعر السلعة اللي شُفتها في الأول من غير ما تحس . ببساطة، ال anchoring effect تعريفها إن الإنسان لما يتحط قدّامه خيارات متشابهة متتالية، لا إراديًا بيعمل مقارنة مرجعها أحد أول الخيارات اللي اتعرضت عليه كنقطة ارتكاز . وبيلجأ للحل “المناسب” أكتر ليه من بين الخيارات دي… وبالتالي بتأثر على تقييمه و اختياره النهائي. ✅ اللعبة دي بتحصل بوجود أو زرع خيار مستحيل او مش مثالي ف دا بيخلي باقي الخيارات تبدو ممكنة جدًا! وده اللي بتعمله براندات كتير عشان تزرع المرتكز ده وتبقى نقطة مقارنتك من غير ما تدرك، فيسهّل عليك الاختيار والشراء بعد كده. 📍نفس الموضوع بيحصل في العقارات. لو وقعت في ايد بروكار او سمسار شاطر هتلاقيه بيبدأ يفرّجك على شقق أو ڤلل أسعارها عالية جدًا، وهو عارف إنك مستحيل تشتريها. بس عشان لما يعرض عليك الحل “المناسب” ليك تحس إن سعره مناسب جداً لأنك نقطة المقارنة عند لا ارادياً اختلفت بعد العرض الاول حتى لو كان أعلى من اللي كنت عامل حسابك عليه في الأصل! 😅 📒في كتاب Blindsight لـ مات جونسون، قال عن تجربة بسيطة عملها متجر Williams Sonoma لأدوات المطبخ: كانوا بيبيعوا آلة خبز بسعر 200 دولار، والمبيعات كانت قليلة. في يوم ما، لما حطوا جنبها آلة تانية شبيهة بسعر 420 دولار… تضاعفت مبيعات الآلة الأولى، رغم إنهم مباعوش ولا واحدة من الجديدة! 🤯 رغم إن عمليًا مفيش أي حاجة اتغيرت في السعر أو السلعة نفسها. بس وجود السلعة الجديدة كسِعر مرتكز خلى السلعة الأرخص تبقى اختيار مناسب لناس كتير. الموضوع ده معروف كمان في مجالات بيع كتيرة . يعني قابليتك إنك تدفع رقم كبير في شراء إكسسوار موبايل أو إكسسوار عربية مثلاً ..دايمًا أعلى وقت شراء المنتج الرئيسي اللي بيكون غالي. بعكس لو بتشتري الإكسسوار بعد فترة. لأن وقتها المرتكز النفسي في المرة الأولى بيكون: “أنا دافع 60 أو 70 ألف في الموبايل، إيه المشكلة لما أجيب كوفر بـ 1500 جنيه؟” مع إنك لو كنت بتشتري الكوفر لوحده، من غير تأثير الـ 60 ألف، وارد جدًا تشوف الـ 1500 جنيه كتير عليه😏 عشان كده الشركات بتحاول دايمًا تدبّسك في كل حاجة ممكنة وانت بتعمل عملية الشراء الكبيرة، لأن بيكون عندك تقبّل أكتر لأسعار الحاجات التانية. لأنك لا ارادياً بتقارنها ب الرقم الكبير المدفوع ف بتحس انها بسيطة التطبيقات كتير جدًا لا حصر لها … ركز وانت هتشوفها! 😅 تقدر كمان تقرأ أكتر عنها في الكتاب الشهير: ‏📚 Influence - Robert Cialdini واللي وصفها بـ Perceptual Contrast. إمتى آخر مرة وقعت في الفخ ده وانت مش واخد بالك؟ او حتي استخدمته في شغلك قبل كدا ؟! 😄 ‏#Marketing #Psychology #تسويق #ماركتينج #استراتيجيات_تسعير #تسويق_إبداعي

إيه الأحسن في موسم إعلاني مهم زي رمضان؟ 🌙 تجيب نجم كبير ومحبوب بس عامل أكتر من إعلان لبراندات مختلفة في نفس الموسم؟ ولا نجم أقل شهرة شوية بس يكون Exclusive ليك؟ اللي أخد باله من إعلانات رمضان السنادي هيلاقي إن تامر حسني دخل رسمياً في الي سميته من سنتين "متلازمة أحمد سعد" 🤣.. تامر عامل ٤ إعلانات، وعشان هو مغني مش مجرد وجه كمان ، فصوته "مسيطر" على ٤ إعلانات بييجوا في نفس الفاصل الإعلاني تقريباً ورا بعض ! إحنا مش بنناقش هنا اختيار تامر أو استخدام النجوم في الإعلانات، لأن الموضوع ده قُتل بحثاً بإيجابياته وسلبياته.. بس بنفكر بعض ، إيه اللي بيحصل في عقل المشاهد لما النجم يتكرر في كذا إعلان في نفس الفترة ؟ ← علمياً، إنت غالبا هتقابل مشكلة كبيرة في الـ Brand Linkage (ربط العلامة التجارية بالإعلان ). العقل البشري بطبعه كسول و بيميل انه يخزن المعلومات بالروابط، ولما المشاهد يسمع نفس الصوت لـ ٤ براندات ورا بعض، بيحصل حاجة اسمها Memory Interference (تداخل الذاكرة) و دا بيسبب واحده من اشهر المشاكل في الدعاية و الإعلان و هي ما تسمي بال Ad Misattribution ، و هي ببساطه ان ٣٠٪؜ من الإعلانات الناس بعد كدا بتربطها و بتفتكر بيها براند تاني غير المعلن الحقيقي ، و دا في الاغلب بيروح للبراند الأشهر او الأكثر صرفاً خلال الفترة دي. يعني لو قفلنا التلفزيون انهارده و شغلنا حته من اعلان من الي عملهم تامر ، ٣ من كل ١٠ هيقولوا دا اعلان البنك الاهلي و هو ف الحقيقة اعلان اتصالات . بعكس مثلا لو شغلنا إعلان الي بصوت هيثم شاكر غالبا هيعرفوا دا اعلان ايه لأنه مش مربوط إلا ب براند واحد في ذاكرتهم القصيرة . المهم ان المشكله هتكون دايما انه صعب جداً تاخد نجم "سوبر ستار" حصري في رمضان إلا برقم فلكي، أو إنك تكون متعاقد معاه كـ وجه دائم للبراند طول السنة، وبرضه ده مش بيمنعه يشتغل مع مجالات تانية غير منافسة ليك. السؤال هنا لو إنت في إيدك الاختيار؟ تروح لنجم كبير ومحبوب بس "مُشارك" من كذا براند في كذا إعلان؟ ولا تختار نجم أقل شهرة شوية بس يكون Exclusive ليك ؟ #marketing #advertising

تفتكر إيه العلاقة بين أشهر وأقيم جايزة أكل في العالم وبين… شركة إطارات؟ + الإجابة ببساطة: التسويق بالمحتوى .. خليني أحكيلك واحدة من أهم وأشهر القصص التسويقية اللي بتشرح قيمة المحتوى، وقد إيه ممكن يغيّر شكل بيزنس بالكامل. مبدئياً للي مايعرفش تقييم ميشلان او نجمة ميشلان ⭐ هي من أشهر وأقيم الجوائز اللي أي شيف أو مطعم ممكن يحلم بيها في العالم انهارده .. بس اللي يمكن بس ناس كتير ماتعرفوش إنها مرتبطة ارتباط مباشر بشركة الإطارات الفرنسية Michelin (ايوة نفس الشركة اللي دُميتها البيضاء الشهيرة بتشوفها في كل مكان عند محلات الإطارات). > القصة بدأت سنة 1900 لما الأخوين “أندريه” و”إدوار ميشلان” كانوا قدام مشكلة كبيرة شوية لبيزنس بيع الإطارات بتاعهم و هي ان عدد العربيات في فرنسا كلها مكانش بيعدي 3000 عربية! يعني حجم السوق كان محدود جدًا بالنسبالهم. دا غير ان الناس الي عندها عربيات دي كان استخدامها للعربية محدود جداً .. لما قعدوا فكروا لقوا ان عشان البيزنس يكبر قدامهم حاجة من اتنين لازم تحصل .. 1️⃣ يا إمّا ان ناس اكتر تشتري عربيات فعدد العربيات يزيد ف يبيعوا اكتر .. بس دا كان حل صعب شوية عليهم 2️⃣ يا إمّا يخلو الناس الي معاها عربيات تسوق أكتر و بالتالي يحتاجوا يغيروا اطارات اكتر ف يبيعوا اكتر .. قالوا دي فكرة حلوة بس ازاي نخلي الناس تسوق اكتر دي 😈💡؟! و من هنا اتولدت واحدة من أذكى الأفكار : اننا نعمل دليل مجاني للسائقين بس الدليل العادي الي كان موجود وقتها كان بيقتصر علي محطات الوقود و شويه معلومات عن قطع الغيار و أنواع الإطارات و كدا .. محتوي مناسب جداً للبيزنس بتاعهم بس مكانش كافي انه يساعدهم في مشكلتهم .. > و هنا فكروا في فكرة مختلفة تماماً .. احنا ليه مانقدمش محتوي مفيد اكتر للعملاء بتوعنا .. يكون فيه احسن المطاعم الي موجوده في أنحاء البلاد .. و بالتالي لما الناس تعرف ان فيه مطاعم يستاهل يتراحلها هيبدوا يستخدموا عربياتهم اكتر و الإطارات تحتاج تغير في مدة زمنيه اقصر ف نبيع اكتر و هكذا .. لدرجة انهم عينو مفتشين شغلتهم يلفوا البلد و يكتشفوا افضل المطاعم و الاماكن الي موجوده حتي في اماكن بعيدة .. و بقوا يقيّموها بنظام النجوم: ★ = مطعم جيد جدًا ★★ = يستحق إنك تعمل تغير مسارك عشانه ★★★ = يستحق تضرب مشوار طويل مخصوص عشانه + اللي كانوا بيعملوه وقتها يعتبر كان نسخة بدائية جدًا من الـ restaurant reviews اللي بنشوفها دلوقتي و الفود بلوجرز بس بهدف إثراء المحتوى وتقديم قيمة تخلي الناس تسوق أكتر وتستمتع بالرحلة و بالتالي يعود بالنفع عليهم ك بيزنس ! الي حصل ان مع الوقت، Michelin Guide انتشر بشكل رهيب.ماكانش بس بيساعد الناس يسافروا، لكنه بقى مرجع عالمي، وصنع قيمة ضخمة للبراند. لدرجة ان المطاعم نفسها بقت بتتمني تاخد ال ٣ نجوم من شركة أصلا البيزنس الاساسي بتاعها هو اطارات السيارات .. لكنه المحتوي يا عزيزي :) دليل ميشلان دايما واحد من ٣ أمثلة عن كيف بدء الcontent marketing من قبل ما يكون لسه المصطلح دا موجود . > اوقات كتير بيكون من المهم إنك تلاقي طريقة تضيف قيمة نفعية حقيقية لحياة عملائك حتى لو مش مرتبطة مباشرة بالبيع في حينها ، لأن في الاخر القيمة دي هي اللي بترجعلك في صورة مبيعات + سمعة + ولاء طويل المدى .. #marketing #contentmarketing

مش مصدق إن جه اليوم اللي الشخبطة اللي كنت بعملها عشان أشرح لحد فكرة في دماغي ممكن في لحظة واحدة تتحول لتصميم إعلان جاهز بكل بساطه بالAI فكرني بكتاب اسمه The Advertising Concept Book واحد من اعظم الكتب في حتة الاعلانات و يعتبر مرجع .. الكتاب كله كان عبارة عن رسومات بقلم رصاص ل إعلانات مشهورة ، و كان الكاتب بيتكلم ان الناس بقت مهتمه توصل للتصميم علي طول .. كان بينصح انك تمسك قلم و ورقة و ارسم الي ف دماغك و بعد كدا ييجي التنفيذ . التنفيذ مع الوقت هيبقي اسهل و اسرع .. و هيبقي الأهم هو المضمون .. تاني المجال الإبداعي كل يوم فيه جديد و دا شيء عظيم ! #creative #Ai

اغرب اسم شوفته من فترة 😅 اختيار اسم " مسكون " ل كومباوند سكني او شركة عقارية هو شيء غريب جداً . ولا اتخيل انهم مش عارفين الكلمة دي مرتبطه ب ايه في ثقافتنا ، و الأغرب بالنسبالي كمان الديزاين نفسه محاولش يقلل من غرابة الاختيار دا يمكن زودها 😅 الاسم هو أول انطباع بياخده العميل عن المنتج او الخدمة وعشان كده بيفضل دايما الابتعاد عن اي حاجة ليها negative association ارتباط سلبي او علي الاقل Negative Connotation دلالة سلبية . فيه case studies عن براندات مشهورة تضررت من موضوع الاسم دا زي ‏Ayds Candy الي كان منتج حلوى شهير لإنقاص الوزن بس بعد ظهور الإيدز (AIDS) في التمانينات، و الاسم ارتبط تلقائيًا بالمرض و دا ضر البراند بشكل كبير .. نفس الموضوع مع ماتسوبيشي الي غيرت اسم عربيتها الباچيرو في الدول الناطقة بالإسبانية لأن الكلمة معناها سيء جدًا هناك . و ان كان اوقات فعلا فيه ناس بتروح ل اسامي ليها دلالات او ارتباطات سلبية ك نوع من التفرد وسط السوق بشرط تكون بعيدة عن صلب نشاط البراند ..يعني زي ما ديور عندها برفيوم اسمه Poison كدا .. او guilty او غيره .. و دا عشان يدي إحساس بالجرأة والغموض، وده طبعاً مناسب لطبيعة المنتج ، لكن ماينفعش منتج اكل مثلا يبقي اسمه Poison . مش متخيل تقول لحد أنا عايش في كومبارند " مسكون "👹 عامة مصر مالهاش كتالوج .. إذا كان عندنا عبدة تلوث و heart attack fried chicken ..و الدنيا ماشية 😅 رأيكم ايه ؟!

منطقي جدًا يحصل جدل علي انتقال عمرو دياب من فودافون ل أورنج .. مش عشان عمرو دياب - الي تختلف أو تتفق عليه - هو واحد من اهم نجوم الوطن العربي آخر ٣٠ سنة .. عمرو دياب هو بذاته براند قوي . لكن كمان ل ارتباطه الشديد ب فودافون لفترة طويلة و كان هو اساسي في حملاتهم بالذات في بداية الصيف آخر ١٠ سنين ! و هنا بقي بيظهر مشكلة من مشاكل ال التعاون مع المشاهير و النجوم . مع العلم ان التعاون دا فيه درجات كتير حسب مدة التعاون و نوعه ، يعني من الاقل للأكثر : ‏١- Digital collaboration اضعف درجات التعاون و اقلها ك مدة و تأثيرها بيكون علي المدي القصير فقط ، و الي فيه المشهور او النجم بينزل محتوي عنده بيعلن عن منتج معين مقابل اجر معين و خلاص . بيكون الهدف منه بشكل اساسي هو رفع الوعي عن طريق استغلال شهرة النجم و عدد المتابعين علي وسائل التواصل . ‏٢- Campaign Face وجة الحملة و هو انك بتجيب نجم يكون وجه إعلاني للبراند في حملة واحدة ممكن تكون مدتها شهر او اكتر حاجة بسيطة ( مثال إعلانات رمضان ) و هنا بيكون مفهوم ان النجم دا السنادي مع حد و وارد السنة الي بعدها يبقي مع شركة تانية . ‏٣- Brand ambassador درجة اعلي بقي الي بيتم فيها التعاقد مع النجم لفترة طويلة بيكون فيها سفير للعلامة التجارية و بيظهر مش بس وجه إعلاني لا ممكن كمان يتواجد في events للبراند و مش بيكون مسموح ليه انه يعمل اي دعايا لشركات منافسة خلال الفترة دي ، و عادة بيتم تجديد السفير كل فترة زمنية ( مثال مني ذكي مع لوريال ، كريستيانو رونالدو و كلير ) ، و وارد يكون عندك اكتر من سفير في نفس الوقت . ‏٤- Creative collaborator يمكن دا نوع مش مشهور عندنا اوي بس دا ليفيل اعلي بيتسمي شركاء إبداعيين و دول بيشاركوا في تطوير افكار و منتجات مع البراند زي بيونسي لما عملت خط ازياء مع اديداس في وقت ما . المشهور دوره بيكون اكبر من مجرد سفير ، لا دا ليه رأي وتأثير فعلي في المنتج وغالبًا بينتج عن التعاون دا منتج او لاين بيعكس ذوقه وشخصيته هو مش بس البراند ‏٥- Equity holder / Strategic partner دا اعلي درجة الي نجم بيوصل انه يكون بيملك اسهم في البراند و ليه جزء من الأرباح و دا طبعا بيكون مستحيل خلاص يشتغل مع اي منافس و لأنه بيكون موجود بشكل مستمر ومكرّس في كل نقطة تواصل بيتحول لـ جزء من الهوية المميزة للعلامة التجارية أو زي ما بتُسمي : Distinctive Brand Assets يعني الحاجات اللي الناس بتعرف و تفتكر بيها البراند فورًا اول ما تشوفه ، زيه زي الألوان، الشعار، التاج لاين ، النغمة و هكذا .. زي مايكل جوردون مع نايكي و زي روجير فيدرر مع اون و جورج كلوني مع نيسبرسو ( بدأ ك سفير ف الاول ) وعمرو دياب في حالته مع فودافون و ان كان يصنف ك مجرد سفير للبراند لمدة طويلة شوية .. بس لان فودافون كانت بتستغله صح جدا كل صيف ف كان وصل ل حاجة زي جورج كلوني مع نيسبرسو كدا عند الناس .. عمرو دياب = صيف فودافون الالبوم بينزل ب لوجو فودافون - الرينج تون - حفلات فودافون في الساحل - إعلانات بداية الصيف . صوت عمرو دياب كان جزء لا يتجزء من كل إعلانات فودافون في رمضان . يعني وصل انه بقي أقرب لكونه جزء من هوية البراند نفسه ،فخسارته مش قليلة . في حين ان اورانچ مكانش عندها النوع دا من التعاون ، كل سنة حد مختلف و صوت مختلف .. خلينا نشوف هيستغلوا التعاقد دا ازاي.. يبقي دايما فكرة استغلال النجوم و المشاهير منطقة شائكة ليها مزاياها و عيوبها .. #marketing

فيه إشارات ودلائل كتير بتقول إننا داخلين قريبا على تحوّل كبير في السوق هيقضي علي منتجات عريقة.. بسبب ما يُسمّى بـ The Ozempic effect — > الOzempic و المونچارو و الادوية الي شبههم من فئة ‏GLP-1 ظهرت ف الأساس كعلاج لمرضى السكر، لكنها تحولت لظاهرة عالمية في فقدان الوزن. الأدوية دي بتقلل الشهية وبتخلي الإحساس بالجوع أقل، وده خلّى استخدامها ينتشر بسرعة كبيرة، خصوصًا في أمريكا وأوروبا و كمان في الشرق الأوسط ، ومع توقّعات إن انتشارها هيكمل ويكبر في السنين الجاية. +الفكرة بقي و المثير ان تأثير Ozempic ما وقفش عند الوزن أو قطاع الصحة بس، لكن بدأ يبان بوضوح في سلوك الناس وطريقة صرفهم و استهلاكهم للمنتجات و الخدمات بشكل جَمعي ! > بناء علي دراسة حديثة من PwC لقوا ان فيه ربط بشكل مباشر بين استخدام أدوية GLP-1 وتغيّر حقيقي في سلوك الصرف داخل البيوت. اخرها دراسة شملت أكتر من 11 ألف أسرة في الولايات المتحدة، بتقول إن الأسر اللي فيها مستخدم GLP-1 هو المسؤول الأساسي عن الشراء، إنفاقها على البقالة قل بنسبة 6% إلى 8% خلال أول 12 شهر. وده رقم كبير جدًا لفئة معروفة إنها بتتحرك ببطء وبشكل متوقّع. الأهم بقى إن الانخفاض ده ماكانش على إجمالي الصرف يعني الناس دي ما بطّلتش تصرف، لكنها بدأت تصرف بشكل مختلف تماما عن حياتها السابقة . تقدر تقول قلّ الاستهلاك التلقائي، وبدأنا نشوف إعادة توزيع للصرف ناحية فئات تانية مرتبطة بنمط الحياة الجديدة . + فتعالي نبص علي شكل التأثير دا علي فئات مختلفة : ‏Grocery & Food | الأغذية والبقالة ⚠️ تراجع في الاستهلاك الكمي ، يعني الناس بقت تشتري كميات أقل خصوصًا السناكس والمنتجات المعتمدة على التعود و سهولة الشراء ، مقابل توجه أكبر لاختيارات محسوبة وليها قيمة أو وظيفة واضحة . ‏Restaurants | المطاعم ⚠️ انخفاض في الوجبات السريعة، مقابل نمو في المطاعم التي يختارها المستهلك كخروجة اجتماعية مع العائلة او الأصدقاء . ‏Apparel | الملابس ⬆️⬆️ من الحاجات الي حصل فيها زيادة في الإنفاق بشكل كبير، بسبب تغير المقاسات ورغبة المستهلك في أن يعكس مظهره الخارجي إحساسه الجديد و ثقته بنفسه .. و دا علي كل أنواع الملابس بشكل عام و بالذات والـ activewear ‏Fitness & Wellness | اللياقة البدنية والصحة العامة ⬆️⬆️ اندفاع مبكر نحو الاشتراكات للچيم والمنتجات، و بيعقبه استقرار وتحول من الأداء المكثّف إلى روتين صحي مستدام. ‏Travel | السفر والسياحة ⬆️ نمو في رحلات الـ wellness والـ retreats، وتجارب السفر المرتبطة بالصحة ونمط الحياة الواعي الصحي . ‏Supplements & Functional Products | المكمّلات الغذائية والمنتجات الوظيفية ⬆️ ⬆️ زيادة واضحة في الطلب على حلول مرتبطة بالآثار الجانبية للأدوية دي زي تساقط الشعر، فقدان الكتلة العضلية، ودعم الطاقة والهضم. ‏Retail & Pharmacies | التجزئة والصيدليات ⬆️⬆️ فرص لخلق أقسام مخصّصة لمستخدمي GLP-1 تجمع منتجات داعمة، أطعمة وظيفية، وحلول مكمّلة في مكان واحد ليهم . > استقصاء من جامعة هارفارد حط اسئلة في انتظار اجابات ليها عن الموضوع دا زي : إيه مصير الفئات اللي اتبنت أساسًا على الـ indulgence، السهولة، أو الترفيه الي قواعدها بتتغير؟ وإيه نماذج البيزنس الجديدة اللي ممكن تطلع حوالين التغذية الوظيفية بدل الاستهلاك الكمي؟ اللي باين لحد دلوقتي إن الناس مش هتبطّل تصرف، لكن اختياراتها هتختلف، وتبقى أكثر عناية ووعي والسؤال الأهم بقى: إلى أي مدى سيستمر صعود أدوية GLP-1، و تأثيرهم في إعادة تشكيل سلوك الاستهلاك وشكل السوق هيوصل لحد فين ؟

في أواخر التسعينات، ماكدونالدز كانت بتحاول تزود مبيعات الميلك شيك بتاعها. و وقتها بدأوا ياخدوا آراء الزباين عن إزاي نقدر نحسّن المنتج علشان نبيع أكتر؟ و فعلاً مكدونالدز بدأت تطوّر المنتج بناءً على الآراء يعني شويه تزود السكر، يجربوا تغيّر النكهات، تجرب تخليه “أكتر صحّي”، تظبط في السعر .. بس رغم كل ده المبيعات فضلت زي ما هي❗️ فقرروا يستعينوا بحد يساعدهم يفهموا المشكلة بشكل أعمق و ساعتها استعانوا بـ كلايتون كريستنسن أستاذ في جامعة هارفارد و الفريق البحثي بتاعه . كلايتون والتيم بتاعه لما استلموا المهمة ، بقوا يراقبوا الزباين فعليًا في الفروع، و يشوفوا مين بيشتري الميلك شيك و إمتى و بيطلبوا معاه ايه … وقتها اكتشفوا حاجة غريبة جداً هي ان اغلب المبيعات كانت بتحصل بدري الصبح لناس داخلة لوحدها، مش بتطلب حاجة تانية و بياخدوا الميلك شيك ويمشوا و لما بدأوا يسألوا اكتر فهموا ان الناس دي مكانتش بتشتريه علشان طعمة ولا سعرة ولا اي حاجة من الحاجات الي كانوا فاكرينها .. الناس دي و هي رايحة شغلها الصبح في طريق طويل بتكون عايزه حاجة تسليها في ملل الطريق و تملي بطنهم لحد وقت الغدا و في نفس الوقت يبقي سهل يشربوه و هم سايقين ، من غير ما يوسخوا هدومهم ، من الاخر وظيفته هو " رفيق في الطريق " مش مشروب طعمه حلو و خلاص و قالوا انهم بيفضلوه عن حاجات تانيه ل سهولة شربه و هم سايقين و كمان مش بيوسخ الهدوم زي الدوناتس و غيرها . 📍التفكير دا وصل ماكدونالدز لفكرة ان تحسين المنتج مش اني اخلي طعمة حلو ، ولا صحي اكتر ولا اي حاجة من الكلام دا ، تحسين المنتج الي عملته ماكدونالدز وقتها كانت ك الاتي : - خلوا المنتج نفسه اسمك و اكثر دسامة عشان ياخد وقت اطول في الطريق و يشبع لحد الوجبة الي جاية - سهلوا عملية شرائة مبقتش محتاج تقف في طابور الفطار ، لا ممكن تدفع و تستلم و تمشي علي طول لو هتشتري ميلك شيك . و فعلاً المبيعات اتضاعفت بشكل رهيب بعد التطوير دا و و ومن هنا، خرج كريستنسن والفريق بتاعه بنظرية اسمها: ‏Jobs to Be Done ( الي بالمناسبة كانت موجوده قبل كدا بس مكانتش متبلورة بالشكل دا ) النظرية بتقول ببساطة ان كل منتج له وظيفة في حياة اللي بيشتريه . مش مهم تصنيفه إيه، ولا شكله عامل إزاي، المهم هو بيحلله انهي مشكلة و بيمثله ايه في يومه ؟ و بالمناسبة ال نظرية بتقول ان مش لازم دايما الوظيفة تكون عملية ، ممكن تكون عاطفية او اجتماعية .. بس المهم توصل ان تكون عارف الوظيفة دي ايه .. لأن بمعرفتها ، هتعرف اكتر مين منافسيك الفعليين ، و وقتها بس هتعرف ازاي تقدر تطور و تحسن منتجك و خدمتك بالشكل المناسب الي محتاجه جمهورك . #marketing #research

على باب واحد من أشهر المتاجر في عالم التجميل، اللي بيتميز بديكوراته اللي واخدة خطوط "الأسود في الأبيض" الجريئة.. هتلاقي دايمًا "نادي الرجال المنتظرين 😅" ، طابور من الرجالة واقفين ساندين على الحيطة، باصين في موبايلاتهم بملل، ومحاوطين بشنط كتير مستنيين زوجاتهم اللي بقالهم ساعات جوه.. أهلاً بيك في عالم سيفورا ◼️♠️◻️ سيفورا تعتبر من البراندات اللي غيرت تماماً شكل تجربة التسوق في قطاع التجزئة ، بينسب ليهم الفضل إنهم أول ناس "كسروا الـ Counter" والـ Partition اللي بيفصل بين العميل والمنتج سنة ١٩٧٠ ..وسمحوا بحاجة كانت تعتبر "جريمة" في عرف المحلات وقتها : "اللمس مسموح، و التكسير جائز ، والتجربة حق مكتسب لكل عميل " ← سيفورا بشكل عام قدرت تعمل ده لأنها ببساطة فهمت "سيكولوجية المشترية" بعمق ولعبت على 5 حيل نفسية أساسية حولت المتجر من مجرد "محل" لـ "ماكينة مبيعات" لا تتوقف : 1. تأثير التملك (The Endowment Effect): واحدة من أقوى قواعد الاقتصاد السلوكي. الفكرة ببساطة إن "القيمة" النفسية للمنتج بتتضاعف في عقلنا بمجرد ما بنلمسه. في سيفورا، أول ما العميل بيمسك المنتج ويجربه، بيحصل "ارتباط عصبي" وعقله بيترجم ده لـ "تملك نفسي". وفي علم النفس السلوكي "تجنب الخسارة" محرك أقوى بكتير من الرغبة في المكسب ، فبمجرد ما يحس إنه امتلك المنتج بالتجربة، عقله بيصنف "ترك المنتج على الرف" كأنه "خسارة" لشيء بيمتلكه ، ف بيكون اقرب انه يشتريه . 2. سيكولوجية "الملعب" والدوبامين: لو دخلت سيفورا، هتحس إنك داخل مدينة ملاهي أو ساحة استكشاف مش محل، وعشان كدا هما مسميين الاستراتيجية دي فعلياً (Sephora Playground) المتجر مصمم بالكامل لإثارة الحواس وتحفيز إفراز الدوبامين بشكل مستمر. وطبعاً الإنسان بطبعه من صغره بيحب "اللعب" ف سيكولوجياً العميل اللي بيدخل حالة اللعب دي، بيفقد إحساسه بالوقت (Dwell Time)، ومن الصعب جداً يدخل ويخرج بسرعة. والقاعدة بتقول: "كلما زاد عدد الدقائق اللي العميل بيقضيها جوه المتجر، زادت قيمة فاتورته النهائية بشكل تلقائي". 3. مبدأ المبادلة (Reciprocity Norm): سيفورا بتتبع سياسة "الكرم المفرط". عينات مجانية (Samples)، خدمات مكياج سريعة، ومساحة تجربة غير محدودة. العقل البشري متبرمج إنه لما بياخد حاجة "ببلاش"، بيحس بمديونية خفية والتزام أخلاقي إنه يرد الجميل، وده بيترجم في شراء منتج أو اتنين مكنش مخطط ليهم. 4. لا "قلق ما بعد الشراء" (Zero Purchase Anxiety): أكبر عائق في البيع هو دايما الشك (هل اللون ده هيليق عليا؟ هل النوع ده كويس؟). سيفورا بتنهي الشك ده تماماً. أنتِ بتشتري وأنتِ جربتي وشفتِ النتيجة النهائية على وشك في مرايات المحل وبإضاءة مثالية. الشراء هنا بيتم بحالة "يقين"، واليقين هو عدو التردد. 5. استراتيجية الضغط المنخفض (Low-Pressure Environment): الموظفين في سيفورا ماسمهمش بياعين، اسمهم "Cast Members" (طاقم العرض) ، وظيفتهم هي المساعدة عند الطلب مش "مطاردة" العميل. ده بيدي العميل إحساس بالسيطرة والاستقلالية، وإنه مفيش حد بيحاول "يبيع له" حاجة. سيكولوجياً، العميل لما بيحس إن البائع بيضغط عليه بالعافية، عقله بيفهم ده كأنه "توريط" فبيبدأ يقاوم ويرفض الشراء. ← ممكن للوهلة الاولي تفتكر ان سيفورا بتخسر كتير تكلفه الtesters و المنتجات الي بتتبهدل دي ، لكن سيفورا مش بتشوفها خسارة قد ما بتشوفها استثمار في "تجربة العميل" الي حوّل البراند في الاخر لماكينة أرباح لا تتوقف سيفورا خلقت نموذج عمل (Business Model) ، الكل بيقلده انهارده.. #marketing #psychology

تعرف ان لحد سنة 1955، كان كل معاجين الأسنان لونها أبيض و كانت السوق كله خيارات متشابه جداً و دا حول المنتج ل مجرد سلعة عادية و المنافسة فيه مقتصرة علي فكرة السعر .. لحد ما جيه مبتكر أمريكي اسمه ليونارد مارافينو .. عمل حاجة أبسط مما تتخيل بس غيرت شكل السوق للأبد : خلّى المعجون ٣ ألوان بدل لون واحد. كل اللي عمله هو إنه اخترع أنبوب خاص بيخلّي المعجون يطلع بخطوط ملوّنة من غير ما الألوان تندمج مع بعض . و باع الاختراع دا بعد كدا لشركة Unilever،واللي نزلت المنتج في أوائل الستينات تحت اسم “Stripe”. و تم التسويق له علي انه اول معجون أسنان بال “القوة الثلاثية”: علي اساس ان كل لون بيمثّل فايدة: 🔴 العناية باللثة 🔵 الانتعاش ⚪ الحماية والتنظيف مع إن المعجون الأبيض كان بيعمل نفس التلات حاجات دي .. بس عرفوا إزاي يلعبوا على الإدراك بتاع المستهلكين اولا بالتميز و التفرد بالاختلاف عن كل المنافسين في السوق بمعجون ثلاثي الالوان لما كان كله ابيض .. و ثانيا باستخدام مبدأ مهم في علم النفس التسويقي و هو ال Sensation Transference و هو التقييم اللاواعي اللي الناس بتعمله لأي منتج او شيء ، بناءً على مظهره الخارجي . المستهلكين بسبب ال ٣ الوان وقتها حسوا انه فعلا المعجون دا افضل و فيه مزايا اكتر من المعجون الأبيض .. في خلال سنة واحدة بس المنتج كسر الدنيا ، و حقق 8٪ من حجم السوق ! عشان كدا المضمون دايماً مهم و لكن كيفية تقديمه تبقي برضه مهمه .. مش دايمًا محتاج تغيّر الي بتقدمه ، أوقات كل اللي محتاجه تغيّر طريقة حكايته و تقديمه .. :) #marketing #psychology #consumerbehavior

أظرف إعلانات رمضان لحد دلوقتي 👏🏻😅 قدروا بذكاء جداً يعملوا Portraying لجيل الثمانينات و التسعينات بطريقة لذيذة و حقيقية اوي .. الجيل الي بيفكر يفتح بيت السكريبت تحفة بصراحة .. حبيته ❤️😅 بيدوس علي الجرح Wadi Degla Developments

من فترة طويلة كدا كنت قررت اني هغير المكان الي بقعد اشرب فيه قهوة الصبح و أنا بشتغل . و كنت بفاضل ما بين اماكن مختلفة و استقريت تقريبا علي ٣ اماكن بقعد فيهم اغلب الوقت . ك جودة قهوة ال٣ اماكن كانوا قريبين من بعض جدا . و في يوم كدا قاعد بشتغل و كنت لسه مش زبون دائم يعتبر يعني ، و اليوم دا كان بعد ٣ اسابيع كنت مسافر فيها ، لقيت الولد الي واقف بيخدّم علي المكان بره اول ما شافني جالي و قالي بالظبط كدا "ازاي حضرتك يا فندم ! اسف بس كنت عايز اسالك علي حاجة ، أنا آخر مره و أنا بشيل الكوباية عشان ارميها بعد ما مشيت لقيتها تقريبا مليانة زي ما هي ، ف هل كان فيه مشكله ف القهوة ؟ لاحظت ان حضرتك مجاتش من ساعتها و كنت مستنيك تيجي تاني بس عشان اقولك يعني لو فيه اي مشكله ف القهوة حضرتك ممكن تقولهم جوه و نعملك واحدة تانيه عادي او نشوف فين المشكلة ! " و فعلا اليوم الي هو بيقول عليه دا أنا كنت مشيت من غير ما اشرب إلا حاجة بسيطه بعد ما طلبت عشان حصل موضوع كدا مالوش علاقه بالمكان يعني . بس كنت مستغرب اولاً ازاي هو فاكر الموضوع و مهتم ب عميل من وسط الف عميل بيجي كل يوم .. لا و فاكر بعد ٣ اسابيع كاملة اول ما شافني . دلوقتي بعد اكتر من سنة ، أنا بقيت تقريباً عميل دائم للمكان ، بس مانستش الموقف دا ، ف الاخر زي ما قولت هو كان واحد من ٣ اماكن بالنسبالي تمام . بس موقف بسيط زي دا خلي عندي للمكان افضلية عن غيره . ___________ افتكرت بقي الموضوع دا بمناسبة اننا كنا لسه في ورشة عمل مع التيم ف شركتنا ، و واحدة من اهم الرسايل فيها ان بناء العلامات التجارية مش شغلة ادارة التسويق بس ! دا كل فرد في الفريق بشكل او بآخر ليه دور فيها ! ف لو فيه حاجتين بالنسبالي شايفين مهمين يوصلوا من القصة دي : ١- كل فرد في المؤسسة او ف الفريق ليه دور بشكل او ب آخر في بناء البراند ، فيه منهم الي backstage و فيه منهم الي customer facing ، الموضوع مش مقتصر علي ادارة التسويق بس . اي تقصير في اي جزء من العملية هيأثر علي العلامة التجارية و تجربة العميل . عشان كدا مهم تخلي كل حد مشارك و فاهم دا و عارف دوره . فيه مقوله بحبها لمؤسس HP بتقول ‏Marketing Is Far Too Important to Be Left to the Marketing Department ٢- اهمية ان يكون الفرد حابب المكان الي بيشتغل فيه و مقتنع بالبراند الي بيشتغل عليه لأنه في الاخر بشكل او ب آخر هيكون دافع ليه انه يخلي دايما صورة البراند و المكان احسن . تخيل لو الفرد الي حكيت عنه دا مش حابب المكان الي هو شغال فيه ؟! او مش فارقه معاه ! هيعمل كدا ؟ دا حاجة مش مطلوبه منه ولا حد هيكافئه عليها بشكل مباشر . فيه مقولة لSimon Sinek بتقول “Customers will never love a company until the employees love it first.” بالمناسبة كنت اتمني أكون عارف اسمه عشان اشكره علي ذوقه و إتقانه لعمله و انه أمين في شغله كدا . #marketing #brandbuilding

طبيعي جداً كمتفرج إنك تحب إعلان معين في رمضان أو تشوف إعلان تاني دمه تقيل وده من غير ما يكون مطلوب منك تقول أسباب . أغنيته عجبتك بقى أو النجم اللي فيه ، كلها آراء من حق صاحبها، إحنا هنا مش في لجنة تحكيم. بس لو حابب تعرف الناس المتخصصة أو المسؤولة عن التقييم بيشوفوا الإعلان إزاي؟ يعني مثلاً إدارة التسويق في الشركة لو بتقيم نجاح الحملة أو لو الحملة مرشحة لجائزة دولية في الإبداع والفعالية زي الـ (Effie’s)و غيرها ، التقييم بيكون على أي أساس؟ 🥇 ← التقيم في الاغلب بيكون مبني علي أربع أساسات : 1. الـ Objective: ايه الهدف من الإعلان ( التوعية بالبراند ، زيادة مبيعات ، تحسين صورة البراند ، الخ) 2. الـ Insights: إيه المعلومة اللي بنوا عليها الفكرة من الحملة او الاعلان الزتونة اللي عرفناها عن الجمهور وبنينا عليها الفكرة عشان نلمس مشاعرهم ويحسوا إن الإعلان بيكلمهم 3. الـ Creative Idea & Execution : الإعلان نفسه كفكرة و تنفيذ الي بيطلع قدامك علي الشاشة 4. الـ Results: هل الحملة حققت أهدافها الي كانت ف النقطة رقم ١ ، طبعا كل هدف ليه طريقة قياس مختلفة لنجاحه (و دا الاهم في الاخر لو الحملة حققت أهدافها تبقي نجحت ، محققتش تبقي ولا كأنها اتعملت) فـ الفكرة إنك كمتفرج، غالباً مش هيكون عندك لا الـ Objectives ولا الـ Insights ولا الـ Results. ممكن تحاول تتوقع أول اتنين، بس الأكيد إن الصورة الكاملة مش هتكون عندك. وبالتالي، الحاجة الوحيدة اللي بتشوفها هي الإعلان نفسه أو الـ Creative الحلو بقى إن فيه Frameworks ومعايير مُعلنة بنقدر نقيّم بيها قوة الإعلان كفكرة و تنفيذ ، بيبقي موجود في الشركات الكبيرة لتقييم شغل الوكالات الي بيشتغلوا معاها ، او حتي بيقدمه الجهات الإبداعية ك دليل ✅ الملاحظ انه فيه اتفاق علي حاجات معينة مهما اختلفت المسميات ← أهم 5 حاجات مشتركة بينهم جمعتهم ليكم : 1. الـ Cut-through (كسر الزحمة): يعني مثلا في وسط زحمة إعلانات رمضان، هل الإعلان قدر يشد انتباهك؟ هل كان مختلف كفاية انه يخليك تاخد بالك منه ؟ دا ممكن يكون أما فكرته مختلفه عن الباقي، تنفيذه مختلف ،او ظهر فيه نجم او حاجة مش متوقعه خلته يلفت الانتباه . 2. الـ Emotion (المشاعر):فيه اتفاق ان الإعلان الي بيحرك مشاعر المتفرج بتكون نتايجة و تاثيره افضل ، و المشاعر هنا تشمل كل انواع المشاعر : الفرحة ، الضحك ، الحنين ، الدهشة ، الخ ) 3. الـ Fluency & Distinctiveness (التميز والربط بالبراند): قوة ارتباط البراند بالإعلان وسهولة تمييز مين البراند اللي ورا الإعلان، لأنه لو الإعلان كان مميز وأثار مشاعرك لكنك معرفتش مين البراند اللي عمله ولا ركزت معاه.. يبقى فيه مشكلة كبيرة. 4. الـ Relevancy (الملائمة ): هل الاعلان ملائم للفترة الي بيتعرض فيها ، زي ملائمته لرمضان مثلا ، و هل ملائم لطبيعة البراند و لجمهوره المستهدف ؟ 5. الـ Shareability (القابلية للمشاركة): دي نقطة زادت في عصر الديجيتال والسوشيال ميديا ،كل ما كان الإعلان "قابل للمشاركة"، بيوفر على الشركة ميزانية ميديا ضخمة لأن الناس هي اللي بتسوق له ،فهل الاعلان فيه حاجة تخلي الناس تتكلم عنه و تشيره ؟ بعض إعلانات رمضان تميزت في حاجات من دي ، بس زي ما قولت ف الاخر حقك ك متفرج يعجبك اعلان و مايعجبكش غيره ، و المقياس الحقيقي في الاخر بيكون خلف الستار في الاهداف و النتائج .. #marketing #advertising

إعلان حلو اوي 😂❤️ إزاي تعلن عن خصومات عيد الأم بطريقة لذيذة و Relatable؟ ب استخدام ملكة الفصال 👑 لذيذ و حلو و مباشر ariika 👏🏻👏🏻 #advertising #marketing

Even though I’ve been super busy lately and a bit away from writing here I was really happy to see that in Favikon’s recent October ranking release, I was listed among the Top 200 Arabic-speaking creators on LinkedIn #66 in Egypt overall, and #7 in Digital Marketing 🇪🇬 Very Grateful and happy and hopefully still adding value along the way 🙏 رغم انشغالي الفترة اللي فاتت انبسطت جدًا إن ڤايكون تصنيف أكتوبر اختارتني ضمن أفضل 200 صانع محتوى عربي علي لينكدين رقم 66 في مصر كل المجالات والسابع في الديجيتال ماركتنج 🇪🇬

📍لو انت شغال أو مهتم بالتسويق، أكيد ملاحظ التطورات السريعة الي بتحصل في المجال ! كل يوم في حاجة جديدة بتحصل، حملة إبداعية بتكسر الدنيا او تحديث الناس كلها بتتكلم عليه . كمية المعلومات اللي بتطلع كل يوم ممكن تكون مرهقة، وده بيخلي متابعة التطورات تحدي كبير لأي ماركتير. وعلشان كده قررت أشارك معاكم أفضل 14 موقع أنا باعتمد عليهم عشان أكون دايمًا متابع الي بيحصل : 1️⃣ 𝐌𝐚𝐫𝐤𝐞𝐭𝐢𝐧𝐠 𝐃𝐢𝐯𝐞 موقع بيغطي كل أخبار التسويق يوم بيوم، وكمان بيقدم تحليلات عن الحملات اللي بتلفت الأنظار Link: https://lnkd.in/duzY_9bQ 2️⃣ 𝐒𝐨𝐜𝐢𝐚𝐥 𝐌𝐞𝐝𝐢𝐚 𝐓𝐨𝐝𝐚𝐲 كل الجديد في السوشيال ميديا، الموقع ده بيقدّم التريندات والأخبار والنصايح اللي هتفيدك في شغلك لو مهتم بيها Link:https://lnkd.in/dJCTwNJ5 3️⃣ 𝐓𝐡𝐞 𝐃𝐫𝐮𝐦 واحد من أهم المواقع اللي بيغطي عالم الإعلانات والتسويق، بالإضافة لفعاليات الصناعة حوالين العالم Link: https://www.thedrum.com 4️⃣ 𝐌𝐚𝐫𝐤𝐞𝐭𝐢𝐧𝐠 𝐁𝐫𝐞𝐰 منصة يومية بتقدّم لك كل جديد في عالم التسويق بأسلوب بسيط وخفيف، من التريندات لاستراتيجيات النجاح Link: https://lnkd.in/dtPKZkGj 5️⃣ 𝐌𝐚𝐫𝐤𝐞𝐭𝐢𝐧𝐠 𝐖𝐞𝐞𝐤 الموقع ده بيقدّم كل الأخبار والتحليلات اللي بتساعدك تفهم تحديات السوق واتجاهاته و آخر اخباره Link: https://lnkd.in/d-xFK9zH 6️⃣ 𝐂𝐨𝐧𝐭𝐚𝐠𝐢𝐨𝐮𝐬 مصدر ملهم بيركز على الأفكار الإبداعية في التسويق، وبيقدم استراتيجيات جديدة وتقارير عن الحملات الأكثر تأثيرًا حوالين العالم Link: https://lnkd.in/dGxj9uF2 7️⃣ 𝐀𝐦𝐞𝐫𝐢𝐜𝐚𝐧 𝐌𝐚𝐫𝐤𝐞𝐭𝐢𝐧𝐠 𝐀𝐬𝐬𝐨𝐜𝐢𝐚𝐭𝐢𝐨𝐧 (𝐀𝐌𝐀) واحدة من أكبر المنظمات اللي بتجمع موارد تعليمية، أبحاث، وأخبار عن كل اللي بيخص عالم التسويق. Link: https://www.ama.org 8️⃣ 𝐅𝐚𝐦𝐨𝐮𝐬 𝐂𝐚𝐦𝐩𝐚𝐢𝐠𝐧𝐬 منصة بتعرض الحملات الإعلانية الأكثر شهرة ونجاحًا، وبتديك فرصة تتعلم من استراتيجياتها وأفكارها المميزة. Link: https://lnkd.in/dBkYiQtU 9️⃣ 𝐌𝐚𝐫𝐤𝐞𝐭𝐢𝐧𝐠 𝐓𝐞𝐜𝐡 𝐍𝐞𝐰𝐬 مصدر بيغطي كل جديد في عالم التسويق الرقمي، من التكنولوجيا اللي بتأثر على الصناعة لآخر الأخبار والتحليلات عن الاتجاهات الحديثة Link: https://lnkd.in/dxtz5EHH 🔟 𝐀𝐝𝐰𝐞𝐞𝐤 منصة رائدة بتغطي أخبار التسويق والإعلانات، وبتقدم رؤى وتحليلات عن العلامات التجارية والحملات الناجحة Link: https://www.adweek.com 1️⃣1️⃣ 𝐓𝐡𝐢𝐧𝐤 𝐰𝐢𝐭𝐡 𝐆𝐨𝐨𝐠𝐥𝐞 مصدر غني جدًا بالتقارير والرؤى اللي بتقدمها جوجل عن اتجاهات المستهلكين واستراتيجيات التسويق Link: https://lnkd.in/dpwRH8q9 1️⃣2️⃣ 𝐇𝐮𝐛𝐒𝐩𝐨𝐭 𝐁𝐥𝐨𝐠 لو بتدور على نصايح وأدوات شاملة عن التسويق الرقمي، إدارة العملاء، وإنشاء محتوى، الموقع ده كنز ليك Link: https://blog.hubspot.com 1️⃣3️⃣ 𝐒𝐨𝐜𝐢𝐚𝐥 𝐌𝐞𝐝𝐢𝐚 𝐄𝐱𝐚𝐦𝐢𝐧𝐞𝐫 مصدر مليان نصايح وأفكار عملية عن استخدام السوشيال ميديا في التسويق، بيساعدك تطور استراتيجياتك Link: https://lnkd.in/d9HVfWN2 1️⃣4️⃣ 𝐂𝐚𝐦𝐩𝐚𝐢𝐠𝐧𝐬 𝐨𝐟 𝐭𝐡𝐞 𝐖𝐨𝐫𝐥𝐝 منصة بتجمع أحدث الحملات التسويقية والإعلانية من كل أنحاء العالم، وبتعرض أفكار إبداعية تخليك تتابع اللي بيحصل في الصناعة Link: https://lnkd.in/dGW6GUeA و لو حد عنده مواقع او مصادر تانية يا ريت يسيبها ف كومنت 👇✍🏻 #marketing #socialmedia #advertising

احنا داخلين علي ايام عظيمة 👏🏻 جوجل امبارح أعلنت عن أداة جديدة اسمها Whisk، واللي حرفيًا هتفتح باب جديد لكل المبدعين. الأداة دي بتستخدم الذكاء الاصطناعي علشان تولد صور .. تمام دا عادي و فيه ادوات كتير بتعمل كدا بس الفكرة او المختلف هنا إنك مش محتاج تكتب وصف طويل أو تفكر في كل التفاصيل الموضوع بقي اسهل ب كتير الأداة يتطلب منك ٣ مدخلات أساسية : • تحط صورة للعنصر الأساسي (Subject) • صورة للمشهد أو الخلفية (Scene) • وأخيرًا، صورة للنمط اللي في دماغك (Style). (ممكن تستخدم اي ريفيرنس بقي انت عايزه :) ) الأداة بتاخد مدخلات الصور دي وتبدأ تشتغل، تطلعلك تصميمات جديدة بالكامل مستوحاة من اللي اخترته. طب دي استخدماتها ممكن تكون إيه الأداة دي؟ -لو بتشتغل على ستوري بورد ل إعلان او اي حاجة . -لو بتطوّر تصميم منتج جديد أو محتوى للسوشيال ميديا. -لو حتى بتجرّب أفكار لشخصيات وأماكن لألعاب أو قصص. تجربتي مع Whisk: اخترت صورة لمؤثرة سعودية كعنصر اساسي ، ومشهد بسيط ف دماغي قدام مرايتها ، و النمط ستوري بورد كارتوني . النتيجة زي ما انتوا شايفين كدا .. مشهد اتبني كستوري بورد في ثواني زي منا عايز بالظبط . كمية الوقت الي ممكن يتوفر في حاجة زي كدا رهيب 👏🏻👏🏻👏🏻 لينك الأداة : Labs.google/whisk Google #creative #Ai #marketing #content#brand

جهزت نفسك تبيع أحمر شفايف 💄 ولا لسه ؟ 😅لا استنى متستغربش السؤال .. هوضح اكتر ← سنة 2001 ، وقت الركود الاقتصادي في أمريكا و في عز الأزمة الاقتصادية الرهيبه الي كانت بتمر بيها البلد ، ليونارد لودر (رئيس شركة Estée Lauder) لاحظ حاجة غريبة جداً في الوقت اللي السوق كله بيقع وأغلب مبيعات منتجاتهم كانت بتقع ، مبيعات الـ Lipstick عندهم كانت بتزيد و بتنمو ! ومن هنا طلعت ظاهرة اقتصادية اتسمت بالـ "Lipstick Effect": و تفسيرها ببساطة إن قطاع كبير من الناس لما بيحسوا إن الرفاهيات الكبيرة او الغالية بقت صعبة عليهم بسبب الظروف الاقتصادية ، بيبدأ يدوروا على ما يسمي ب "الرفاهيات الصغيرة المتاحة" (Affordable Luxuries) يعني الموضوع مش مقتصر علي قلم الروچ ، هي في الفكرة نفسها الي بتتكرر في سلوك المستهلكين في الأزمات ، و الي تفسيرها العلمي انه ده بيكون ميكانزم دفاعي نفسي او سيكولوچي "Indulgence Spending" و هي ان العميل لما بيشتري الروچ أو قهوة غالية أو رفاهيه صغيرة كان في العادي ممكن مايجبهاش ف دا مش عشان هو بقي محتاجها لمنفعتها ، لكن عشان يحس بالرضا النفسي ويثبت لنفسه إنه لسه قادر يبسط نفسه وسط الأزمات . ← طيب ده بيأثر إزاي على البيزنس بتاعك وتعمل إيه؟ 1. الـ Downsizing الذكي (صغّر الحلم): لو أنت أصلا بتبيع منتج غالي (عقار، سيارة، اشتراك سنوي)، ابدأ قدم نسخة "Entry-level" تكون هي الـ Lipstick بتاع العميل. بدل ما تبيع الباقة الكبيرة، بيع "خدمة واحدة" أو "منتج أصغر" يحافظ على صورة البراند (Premium Image) بس بسعر إجمالي العميل يقدر يدفعه كـ مكافأة لنفسه و بتتسمي ساعات في منتجات الرفاهية "Slice of Luxury" يعني مش العميل مش قادر يشتري المنتجات الي كان متعود يشتريها ف بياخد حاجة يقدر عليها من البراند ( دا الي حصل مع الlipsticks ) ٢. ارسم الـ Consumer Journey الجديدة (شوف عميلك اتحرم من إيه؟): بشكل عام محتاج تدرس السوق و تشوف ايه الفراغ اللي سابه الركود في حياة عميلك. العميل اللي لغى سفرية الصيف أو أجّل شراء العربية، بيفضل جواه رغبة استهلاكية مكبوتة محتاجة تتعوض . ادرس الرحلة بتاعته وشوف إيه الرفاهية الكبيرة اللي سقطت منها.. وهنا بيجي دورك إنك تقدم الحاجة الي هتعوضه عنها " نفسيا" و دا كمان بيؤدي ل فكرة هتبيعهاله ازاي الي هتكلم عنه في النقطة التالته . ٣. بيع الـ "Emotional Utility" (الطبطبة النفسية): بعد ما تحدد انت ايه المنتج الي هتقدر بيه تعوض عميلك عن الي مبقاش قادر يعمله ، اخرج بقي بره دايرة المواصفات الفنية، وركّز إن منتجك هو الـ "Little Treat" ازاي في التواصل معاه تبيع له فكرة ان الي أنا بقدمه هو التعويض المستحق حتي لو مؤقت . يعني الي كان متعود يسافر بره ، ازاي ممكن day use واحد جوه البلد كافي انه يبسط نفسه و هكذا . الFraming كلمه السر ! ٤. الـ "Placement" والـ "Micro-Moments" (خليك قدام عينه ): لو منتجك من الحاجات اللي ينفع تكون Impulse Buying (قرار شرائها سريع ومش محتاج تفكير)، يبقى السر كله في "التواجد" و برسائل الـ Self-Reward . كافيء نفسك ، انت تستحق … الخ . وقت الأزمات الاكيد ان الكل بيعاني سواء البيزنس او العميل ، عشان كدا بيكون مهم ازاي نقدم حلول تناسب العميل و تكون تعويض ليه تفهما لظروفه و في نفس الوقت يفضل البيزنس مستدام ماينهرش لحد ما تعدي الأزمات … ‏#marketing

من الحاجات اللي دايمًا بتعمد اهتم بيها ، وبشوف إنها مظلومة أو مش واخدة حقها بالشكل الكافي، هي الصياغة الإعلانية أو الـ Copywriting! > يمكن ناس كتير شافت الإعلان دا واتكلمت عنه وأخد إشادة واسعة و دا نادر في إعلانات العقارات . لكن اللي حبيت اقف عنده او أتناوله هو ان ازاي مجرد جملة مكتوبة بشكل صح، سلس، ومختلف…عملت فارق كدا؟ “إذا الجوار صفا، صفت الحياة” جملة من 5 كلمات بس خلّت الناس تمدح الإعلان وتنشره و متأكد انه لو اتعمل بحث عن انطباع الناس عن الاعلان او الكومباوند و سألنا الناس تصورك عنه ايه بعد ما شوفت الاعلان .. غالباً هيقولك حاجات من نوعية : شيك، راق، هادي ‏(associations & image) تخيل! كل دا من غير ما نشوف الكومباوند ولا نعرف غير إنه في التجمع السادس . لو تفتكروا كان فيه أمثلة سابقة في نفس المجال أدّت لانطباع عكسي ومنفر. الكلام ممكن يخليك تبان شيك ، رخيص ، غالي ، موثوق فيك ، مبدع ، او مبتكر .. ممكن يخليك حاجات كتير و ممكن مايحسسكش بأي حاجة خالص .. بس الاهم.. خلينا فاكرين ان الكلمة = وعد. والوعد = بيبني التوقعات (expectations). فالنهارده لما تحسسني إنك كومباوند راقٍ وهادي… ما ينفعش في المرحلة الجاية تفاجئني بإعلان صاخب ومليان دوشة و يطلع الكومباوند نفسه عكس الصورة الي صدرها لأنساعتها يحصل عند الجمهور لغبطه في الصورة الذهنية الي اتبنت في مرحلة الawareness دي ! ف شوفت الكلام ممكن يعمل ايه ؟ > فكرني ب نص مشهور من مسرحية «الحسين ثائرًا» للأديب عبدالرحمن الشرقاوي عن أهمية الكلمة ، الي في جزء منها بيقول : "أتعرف ما معنى الكلمة ؟! الكلمة نور .. وبعض الكلمات قبور بعض الكلمات قلاع شامخة يعتصم بها النبل البشري الكلمة فرقان ما بين نبي وبغي بالكلمة تنكشف الغمة، الكلمة نور، ودليل تتبعه الأمة .." + نرجع بقي للإعلان الي الوانه و تصميمه كمان بيساعد علي بناء نفس الصورة .. لكن الجملة و الكلام المكتوب … هي اللي حوّلته من إعلان عادي زي اللي قبله واللي بعده علي الطريق ، لإعلان خطف الأنظار و القلوب . في الآخر، الكامبين في المرحلة دي هدفها الأساسي بسيط: 📌 الناس تعرف اسم الكومباوند، ويتكوّن عندهم بداية صورة ذهنية .. و دا لو نجح فهيكون بسبب الصياغة الإعلانية.. في حب الكوبي رايترز الشاطرين ❤️ #copywriting

"رجعوني عينيك لأيامي اللي راحوا.."🎶 على رأي الست أم كلثوم، بيبسي قررت "تفتش في الدفاتر القديمة" وتستدعي حدث تاريخي عمره 50 سنة. الأسبوع ده ، وفي أهم حدث إعلاني في أمريكا (السوبر بول)، بيبسي نزلت إعلان بطلُه هو "الدب القطبي" الي يعتبر رمز تاريخي و ايقوني لمنافستها كوكاكولا! في الإعلان، الدب بيخضع لأشهر اختبار في تاريخ التسويق وهو الـ Pepsi Challenge (اختبار التذوق الأعمى). الدب الي المفروض بينتمي لكوكاكولا، بيكتشف إنه بيفضل طعم بيبسي على كوكاكولا لما داق الاتنين من غير ما يشوف اللوجو و الإعلان بيوريك الدب وهو في "أزمة نفسية" وكوميدية بيحاول يستوعب إزاي اعترف ان طعم بيبسي أحلي و خان برانده المفضل و بيكتشف ان ناس كتير زيه مش هو بس .. و الإعلان بينتهي ب ‏You deserve taste .. you deserve Pepsi انا هنا مش عشان تحليل الإعلان، لكنها فرصة نحكي عن الاختبار الشهير الي اتعمل سنة ١٩٧٥ و سبب شهرته و ليه دايما بيتم ذكره و الاشاره ليه في كتب و مراجع التسويق في موضعين مهمين ←الموضع الاول : الـ Brand Equity وفهم سيكولوجية المستهلك وتأثير البراند على قراراته الاختبار كان بيبدأ كـ "اختبار تذوق أعمى": أكواب سادة فيها المشروبين والنتيجة إن الأغلبية كانوا بيختاروا بيبسي وبيرجحوا إن طعمها أحلى و دا كانت بيبسي بتفتخر بيه و بتستخدمه في دعايتها . لكن المفارقة كانت أن لما يعيدوا نفس الاختبار بالظبط بس المرة دي اللوجوهات محطوطة على الأكواب؛ نفس الناس دي كانت بترجع تختار كوكاكولا! العلم أثبت بعد كدا (من خلال أبحاث الـ Neuromarketing) إن مخ المستهلك لما بيشوف لوجو "كوكاكولا " بيفرز هرمونات سعادة وذكريات ونوستالجيا (خصوصاً عند الأمريكان لارتباط المشروب بذكريات طفولتهم وأعيادهم)، وده بيخلق حالة من "الانحياز الإدراكي" بتخلي الشخص يشعر فعلاً إن الطعم أفضل لمجرد إنه شاف البراند اللي بيحبه الاختبار ده دليل القاطع على إن البراند مش مجرد شكل، ده "قوة ذهنية" تقدر تعطل حواسك وتجبرك تختار "العاطفة" على حساب "المنطق". الطبيعي المشروب الي أغلب الناس تستطعمه أحلي انه يكسب . دا لو كان قرارات الشراء مبنية علي المنطق ! ←الموضع التاني : الشركات الكبيرة قد ترتكب "أخطاءً جسيمة" بسبب إساءة فهم البيانات في أكثر من مصدر ذُكر إن معامل كوكاكولا السرية عملت الاختبار ده داخلياً قبل بيبسي بكتير و كانوا عارفين نتيجته من قبل بيبسي ، والنتائج فعلاً كانت بتقول إن بيبسي "بتكتسح" في اختبار التذوق الأعمى. من قلقهم إن بيبسي تتفوق بسبب الطعم و خوف فريق الإدارة اللي ماكنش مدرك وقتها قيمة البراند ومعناه العاطفي عند الجمهور قرروا يتصرفوا . اشتغلوا على تركيبة جديدة أحلى و مسكرة زي بيبسي وعملوا عليها اختبارات تذوق مكثفة على 200 ألف شخص، والنتائج كلها أكدت إنها "أحلى" من التركيبة الأصلية ومن بيبسي بكتير. و نزل المنتج تحت اسم New Coke سنة 1985، وكانوا متخيلين إنها هتنجح نجاح مالوش مثيل.. لكن الحقيقة إنهم و كأنهم كسروا "الرابط المقدس" مع جمهورهم. الجمهور ثار واعتبر إن كوكاكولا بتغير هويتهم وتاريخهم، وخرجت مظاهرات هجمت على الشركة لدرجة إنهم اضطروا يرجعوا للتركيبة الأصلية (Coca-Cola Classic) بعد 79 يوم بس من الفشل الذريع . كوكاكولا وقتها رجعت أقوي بعد ما الجمهور رجعله التركبية الي مش بيختاروها في الاختبار الشهير ف انهارده بقي بيبسي رجعت تاني تحاول بطريقة كوميدية تنكُش الأمريكان و تفكرهم ان حتي الدب اختار طعم بيبسي ! ‏Marketing is not a battle of products, it's a battle of perceptions." Al Ries

سنة 2020 ظهر ابليكشن اسمه Clubhouse، و كان طالع بسرعة الصاروخ ، و هو أبليكشن قايم على محادثات صوتية مباشرة، ناس بتفتح غرف صوتية بتتناقش فيها مع بعض . الأبليكشن فكرته كانت وقتها جديدة ومميزة، ووصل تقييمه لحوالي 4 مليار دولار، بعدها دخل العمالقة زي فيسبوك وتويتر وأخدوا نفس الفكرة ونفذوها جوّه منصاتهم وبالتالي الاهتمام بـ Clubhouse قل واحدة واحدة، لحد ما تقريبًا انتهى و فقد تقييمه القصة بالشكل ده مش جديدة، وحصلت بدل المرة مليون في منتجات وبيزنس كتير، وعشان كده هتلاقي أي مستثمر دايمًا بيسأل عن الـ barriers to entry أو ساعات عن الميزة التنافسية . لأنه بيكون عايز يضمن الاستمرارية في النمو و الربح. ← تعريف الكتاب للbarriers to entry هي العوائق الي بتخلي دخول منافسين جدد لسوق معين صعب ، و بالتالي بتحمي الشركات الي جوه السوق من خساره حصتها السوقية او إيرادتها ( لاحظ انها عوائق مش مستحيلات ) و هي مختلفه ك تعريف شويه عن الميزة التنافسية ، الي هي بتكون قدرة فريدة او مميزة عند الشركة عن منافسيها الي جوه السوق ، و بيخليها تقدر تتفوق عليهم . طيب ايه بقي اشهر الbarriers to entry ؟ 1- Control of Resources / Distribution (السيطرة على الموارد أو التوزيع) لما شركة تكون مسيطرة على الأماكن أو القنوات اللي المنتج او الفئة بيتباع او يتوزع فيها ،ساعتها أي حد جديد بيعاني انه يدخل ينافس مثال: لو مثلا مشروب غازي معين ماضي عقود حصرية مع كل المطاعم و سلاسل الاكل في بلد ما ، بيمنع اي مشروع تاني يدخل الاماكن دي و بالتالي بيعوق نموه في الشريحة دي ⸻ 2- Economies of Scale (وفورات الحجم) بعض الأسواق أو المنتجات بتحتاج حجم انتاج كبير عشان تعرف تربح منها ، مش لفرادة المنتج و لكن عشان التكلفة بتقل بشكل يسمح بالمكسب ، في الأسواق دي الي بيوصل للحجم الأول بيبقى عنده أفضلية تلقائية بتصعبها علي اي منافس تاني جديد انه يدخل و ينافس ( عشان كدا ساعات في شارك تانك بيقولوا لبعض المشاريع انت محتاج حد يجري بيك بسرعة ؛) ⸻ 3- Switching Costs (تكلفة التغيير) بعض المنتجات أو الخدمات بيكون تكلفة التغيير منها لحاجة جديدة ، عالية أو متعبة، فدخول منافس جديد للأسواق دي بيكون مش سهل ،التكلفة هنا مش شرط تبقى فلوس،ممكن تبقى وقت، مجهود مثال: الشركات اللي بتستخدم ERP معين في أعمالها ، نقل البيانات والنظام الجديد مكلف جدًا. ⸻ 4- Patency / Patents (الحماية القانونية أو براءات الاختراع) لو المنتج أو الفكرة محمية و ممنوع ان حد يقلدها لفترة معينة مثال: زي شركات الأدوية،لما شركة تطلع بدواء جديد بتركيبة معيّنة،التركيبة بتكون محمية ببراءة اختراع، فمفيش أي شركة تانية تقدر تنتج نفس الدواء غير لما مدة الحماية تخلص ⸻ 5- Brand Loyalty (ولاء البراند) النقطة دي من أكتر النقط اللي بحبها، وموجودة في الكتب والمراجع كـ barrier to entry،إن يكون عندك براند، براند ليه جمهوره وعملاؤه،لدرجة إن أي منافس يفكّر ألف مرة قبل ما يدخل السوق اللي إنت فيه . لأنه هيكون مكلف و صعب جدا انه يقدر ينافسك ، حتي لو داخل ب منتج افضل . ← فلما نرجع لمثال Clubhouse وازاي حصل اللي حصل، هنلاقي إنه مكانش فيه أي عوائق حقيقية، فكرته ما كانتش محمية قانونيًا فاتنفذت بسهولة، وما لحقش يبني ولاء حقيقي و حتى الـ exclusivity اللي كان بادئ بيها اضطر يشيلها عشان يعرف ينتشر، وتكلفة التغيير منه لغيره كانت تقريبًا صفر، كل دا مع اسباب تانيه طبعاً انهي نجاح المنصة في اقل من ٣ سنين . النجاح حلو لكن مهم مايبقاش مؤقّت ..👌 #business

عمرك فكرت ليه ماكدونالدز وبيرجر كينج بيفتحوا جنب بعض؟ او ليه بتلاقي كل محلات الموبايلات في شارع واحد؟ نفس الفكرة في محلات المجوهرات بتبقي كلها متجمعة في منطقة معينة ؟ " زي شارع الصاغة في وسط البلد او مصر الجديدة ، أو منطقة ذهب الرياض ) المنطق ممكن يقول ان كل ما أبعد عن المنافس، أكسب لوحدي ! طب ايه تفسير الموضوع دا ؟!! الحقيقة إن الموضوع له تفسير علمي ومبني على نظريتين مهمين جدًا في الاقتصاد والسلوك التنافسي . 📍 النظرية الأولى: قانون هوتلينج – Hotelling’s Law نظرية ظهرت سنة 1929، وشرحت بشكل عبقري ليه المنافسين بيفتحوا جنب بعض. و فكرتها الاساسية هي ان كل منافس بيحاول ياخد أكبر عدد من العملاء،فبيبدأوا يقربوا من بعض في نفس المكان بدل ما يتفرقوا،علشان يضمنوا إنهم قريبين من “الكتلة الأكبر” من الزباين. 🍦المثال الأشهر لشرح النظرية : تخيل شاطئ طوله 1 كيلومتر، وعليه مصيفين موزعين بالتساوي على طول الشاطئ و فيه اتنين بيبيعوا آيس كريم: أحمد وسامي. لو في البداية كان كل واحد فيهم واقف في طرف من الشاطئ و بالتالي تقريباً كل واحد بيخدم نص الزباين المتاحين الاقرب ليه .. بس تاني يوم، سامي شغل دماغة و قرر يتحرك شوية للنص علشان يقرب من الزباين اللي في النص اكتر و كمان ياخد شوية من زباين أحمد. ف يقوم اليوم اللي بعده أحمد يعمل زيه و يتحرك هو كمان للنص لحد ما يوصلوا انهم بقوا جنب بعض ف النص و كل واحد عنده نفس الفرص . و رجعوا تاني لنقطة ان كل واحد بيخدم تقريباً نظرياً ٥٠٪؜ من المصيفين علي الشط . وهنا بتظهر النظرية التانية: 📍نظرية توازن ناش – Nash Equilibrium ودي نظرية ظهرت سنة 1950 على إيد عالم الرياضيات جون ناش – واللي اتعمل عنه الفيلم الشهير A Beautiful Mind. و هي بتتكلم عن الحالة الي بيكون فيها كل منافس “واقف مكانه” لأنه عارف إن أي حركة من ناحيته لوحده هتخسره يعني نرجع للمثال تاني : لو أحمد قرر يرجع مكانه الأصلي علي الطرف .. سامي هيكسب هو عدد أكبر من الزباين ولو سامي حاول يتحرك لوحده برضه هيخسر جزء من النص فبالتالي الاتنين واقفين جنب بعض في النص،ومفيش أي واحد يقدر يغيّر استراتيجيته لوحده من غير ما يتضرّر. عشان كدا هتلاقيهم زي “الأخوة الأعداء" بيفتحوا في نفس الأماكن، ومتقبلين وجود بعض وكل واحد منهم بيحاول يقنع الترافيك الموجود إنه الأفضل. و منها بقي بيظهر فكرة ال food court في المول ، في الاغلب صعب محل ينجح لو مش موجود في نفس الاماكن الي فيها محلات الاكل ، و هتلاقي بشكل عام المولات كلها مبنية على تجميع المنافسين مع بعض علشان يحصل جذب جماعي . لكن ده ما يمنعش إن فيه براندات بتتبع استراتيجية مختلفة تمامًا…وأبرز مثال على كده هو: IKEA على عكس معظم المنافسين .. ايكيا ما بتحبش تتواجد وسط “التجميعة”.هي بتفضّل تبني تجربتها الخاصة من أول الطريق، وتكون هي السبب في الترافيك، مش جزء منه. بيختاروا في الأغلب يفتحوا في أماكن بعيدة عن الزحمة والأسواق التقليدية وغالبًا بتكون في أطراف المدن أو مناطق صناعية،لكن بيعتمدوا على إنهم يخلقوا سبب يخلي الناس تيجي لهم مخصوص باختلاف تجربتهم . وده طبعًا مش سهل، ومش أي براند يقدر يعمله.الأسهل دايمًا إنك تعتمد على الترافيك الموجود، وتفتح جنب المنافسين وتاخد نصيبك من الزباين بدل ما تخسر لوحدك بعيد بس كدا .. #marketing

سمعت عن نظرية الأنوف العمياء ؟ تعالي احكيلك سنة 1996، شركة P&G ابتكرت منتج جديد اسمه Febreze، وده كان أول ابتكار من نوعه يقدر يزيل الروائح الكريهة فعلًا، مش بس يغطيها زي أغلب المنتجات الموجودة في السوق وقتها. التركيبة كانت معتمدة على مادة فعالة بتشتغل على جزيئات الروائح نفسها، بتحبسها وتحيّدها سواء من الجو أو من الأقمشة. المنتج ده اتكلف ملايين الدولارات في البحث والتطوير، وكانت التوقعات في P&G إنه هيحقق نجاح ساحق، خصوصًا إنه داخل سوق كل اللي فيه بيعتمد على منتجات عطور قوية بس بتغطي الريحة، مش بتشيلها فعليًا. وتم إطلاق المنتج برسالة واضحة: “يزيل الروائح الكريهة تمامًا”. لكن عكس كل التوقعات .. المبيعات كانت ضعيفة جدًا، وبدأت تقل مع الوقت.وقتها بدأت P&G تفكر بجدية تسحب Febreze من السوق وتعلن فشل المنتج. قبل ما يعملوا كدا، قرروا يشكّلوا فريق بحثي، ينزلوا بيوت الناس ويسمعوا منهم، يمكن يوصلوا للمشكلة اللي مخليّة المنتج مش بيتباع رغم كل الإعلانات اللي اتعملت. المجموعات البحثية كانت بتشمل مجموعتين: -ناس مش بيشتروا المنتج ومش مقتنعين بيه -وناس قليلة كانوا جربوه وحبّوه. في واحدة من الزيارات، دخلوا بيت ست عندها تسع قطط، والريحة كانت خانقة لدرجة إن الباحثين كانوا بيكتموا نفسهم.لكن لما سألوها عن الريحة و بتعمل ايه فيها و كدا .. ردت بمنتهى البساطة:“ريحة إيه؟! القطط بتاعتي مالهاش ريحة 😊” وساعتها اكتشفوا الـ insight اللي غيّرت كل حاجة: و هي ان الناس بتتعود على الريحة اللي عايشين فيها، وبتبقى حرفيًا “أنوفهم عمياء” عن الروائح المحيطة .. وده المفهوم اللي اتعرف بعد كده باسم Noseblindness. وهنا فريق P&G فهموا إنهم بيحاولوا يبيعوا منتج بيحل مشكلة العميل أصلاً مش حاسس إنها موجودة! 💡 في نفس الوقت، اكتشفوا حاجة تانية عند القلة اللي اشترت المنتج .. الناس دول ماكانوش بيستخدموه علشان يشيل ريحة معينة…كانوا بيرشّوه بعد التنضيف كـ “لمسة نهائية” بتدي إحساس بالنظافة و الارتياح في نهاية التنظيف . 📍هنا وبعد ما فهموا جمهورهم، قرروا يغيروا تمامًا positioning المنتج: من “مزيل للروائح الكريهة” إلى “المكافأة العطرية بعد التنضيف”. ربطوا المنتج بالروتين اليومي للتنضيف، ووقفوا الكلام عن إزالة الروائح الكريهة خالص ! مع ان دا كان الابتكار .. بس ادركوا ان الاهم هو فهم العميل ! ومن هنا بدأ النجاح الحقيقي.المنتج بقى بيُستخدم يوميًا، واتربط بعادة قوية عند شريحة ضخمة من البيوت. ومع الوقت، دخل Febreze كل بيت، وباع أكتر من مليار دولار سنويًا . مش بس كدا مع الوقت و بعد ما البراند بدأ ينجح فعلًا بالـ repositioning الجديد، قررت الشركة ترجع تاني لنفس الـ insight اللي بدأوا بيه: Noseblindness ال المرة دي استخدموا الـ insight ده بشكل مباشر في التوعية. بدأوا يعرفوا الناس بالمفهوم ده برسالة : “مش شرط تكون الريحة مش موجودة… ممكن بس تكون إنت اتعودت عليها.بس ضيوفك هيشموها ” ومن هنا أطلقوا واحدة من أقوى الحملات في تاريخ البراند: The Noseblind Experiment. جابوا فيها ناس حقيقية من الشارع، غمّوا عنيهم، ودخّلوهم أوض مش نضيفة - فيها فوضى وقطط وباسكت زبالة… بس كانت مرشوشة Febreze. والناس – وهم مش شايفين – قالوا إن المكان ريحته حلوة ومريحة…قبل ما يكتشفوا المفاجأة إنهم قاعدين في مكان المفروض يبقى “مش محتمل”. الحملة كانت ضربة تسويقية قوية، كملت على نجاح فعلي، وعززت مكانة البراند، وفازت بجوايز كتير كمان و كله بدأ من فهم بسيط للجمهور :) #marketing #research #insights

⚠️ اللي هتقراه هنا ممكن يكون مختلف شوية عن اللي بيتقال حوالين فضيحة البراندات الفاخرة في الصين. الي مايعرفش الفترة اللي فاتت، انتشر ترند لعمال ومصنعين في الصين بيقولوا إن شنط و منتجات البراندات الكبيرة بتتصنّع عندهم بجودة وسعر أقل بكتير من الي بتتباع بيه بعد كدا ، و الفرق بس ان بيتحط عليها اللوجو في الاخر ف السعر يتحرك من من عشرات الدولارات ل الاف الدولارات . وناس كتير شافت إن دا فضح البراندات دي و محدش هيشتري كدا منهم تاني و الكلام دا كله و ان دا سر كان مستخبي و طلع للعلن بقي و الدنيا هتتقلب . مع ان المعلومة دي هي بالظبط تعريف الـ Brand Equity الي موجود في اي كتاب تسويق . الـ Brand Equity ببساطة هو: القيمة الإضافية اللي بياخدها المنتج لما يتحط عليه اسم براند قوي ، نتيجة الشغل على القصة، المعنى، الثقة، والرمزية اللي اتبنت على مدار سنين. ‏Brand equity is the differential effect that brand knowledge has on consumer response to brand marketing يعني لو دا مكانش حقيقي و كان سعر المنتج هو هو او الفرق بسيط بين الcommodity او السلعة الي من غير لوجو و بين المنتج الي عليه لوجو البراند .. يبقي ايه لازمة فريق التسويق علي مدار السنين في الشركات دي بقي 😅 دا يقعدوا في البيت اوفر للشركة و اكرم لهم . اللي بتشتري شنطة من Dior أو Louis Vuitton مش فاكره إنها بتدفع غالي عشان بتشتري شنطة من جلد نادر، هي فاهمه و عارفه كويس إن السعر مش في الخامة ، الكواليتي دا جزء و لكنه مش سبب فرق السعر ،زيها زي اللي بيشتري ساعة رولكس .. ف الهدف مش مجرد شنطه ب جودة كويسه تشيل حاجتها فيها ولا هو بيشتري ساعة عشان يعرف الوقت بس .. و إلا مكانش حد راح لفرق السعر دا أبدا .. مع برضه وضع ف الاعتبار ك تكلفة علي البراند حاجات تانية غير القيمة و المعني و الصورة الاجتماعية و كل دا ، طبعا فيه تكاليف زي تكفله الديزاين نفسه الي بياخده التاني علي الجاهز و غير طبعا تكلفة الدعايا و الاعلان عشان يبني الاسم علي مدار سنين و خدمات الضمان و ما بعد البيع و الحاجات دي الي مش هتكون موجوده في سعر المنتج الي من غير لوجو . و هو مش مجرد فكرة لوجو بيتحط علي الحاجة و خلاص .. لأنه لو كدا ما الصينيين وغيرهم بيقلّدوا نفس اللوجو حرفيًا، و المضحك انهم بيبعوه وقتها بسعر أعلى من أي منتج تاني مفيهوش لوجو ، لمجرد انه قرب بس اكتر انه يكون شبه الأصلي ، رغم إن الناس عارفة إنه برضه تقليد.. بس طبعًا مش بيكون بنفس سعر الأصلي برضه .. وده لوحده بيأكد إن القيمة مش في اللوجو بس .. ؛) دا مايمنعش إن فيه اتجاه قديم ومتنامي ضد منطق البراندات نفسه ، ناس مش مؤمنة بفكرة ندفع أكتر لمجرد انه علامة معروفة و مشهورة و شايفين إن البراند جزء من آلية استهلاك رأسمالية بحتة. و الاتجاه دا مش جديد، و فيه كتاب حلو في الموضوع دا اسمه No Logo– Naomi Klein تناول فكرة هو احنا ليه ندفع فارق التكلفة دا عشان نملك البراند أو ما يحمله من معني .. ف للتوضيح أنا هنا مش بقول إنك تدفع أكتر للبراند صح أو غلط، ولا حقهم ولا مش حقهم .. بقول بس إن أي حد شغال في التسويق عارف ان دا عادي مش فضيحة ولا حاجة :) #marketing #brands

🚫 لو لسه مدخلتش مجال التسويق و بتفكر .. ماتدخلش عشان حياتك هتبوظ. أو اعمل حسابك إنك مجرد م بتشتغل في الماركتينج، بيبقي صعب كده تعيش كـ”بني آدم طبيعي” تاني. يعني مثلاً: تشوف إعلان في الشارع، مش بتستقبله كأي مشاهد طبيعي.. بتلاقي دماغك بقي : هو ده targeting مين؟ اه تمام… عشان كدا عاملين postioning له في كذا .. طب بس هم مختارين اللون ده ليه؟ طب مش كان احسن يبقي كذا 🤔 ايه دا فيه اوفر علي المنتج الي بتحبه ، المفروض تفرح بقي .. لا بتبدأ تشك بقي الي هو طب يمكن دا near expiry ما تيجي نبص كدا .. ولا يمكن بيخلصوا الكمية عشان هينزلوا ب حاجة جديده. حد يطلب منك رأيك في كارت فرح عادي الي هو و الله هو كويس بس الـ contrast ضعيف، والـ visual hierarchy محتاجة تتظبط شوية بس مبروووك تدخل تحجز فندق، تلاقي ‏“Limited time offer!” “آخر أوضة متاحة! “في ١٣ واحد بيبص على الأوفر دلوقتي!” تقوم الي هو لا مش علينا شغل ال FOMO و ال Scarcity tactic دي تعملها علي حد تاني .. لحد ما الحجز يضيع 🤓 تشوف صحابك بيتكلموا عادي علي منتجات بيحبوها و تبدأ بقي تفكر ازاي براند خلاهم advocates كدا و تبقي عايز تبدأ تفتح استجواب عشان تعرف البراند دا نجح ازاي يعمل كدا .. بعدين تقول يا عم كفاية تفكير ف الشغل بقي بص الله يكون في عون كل الي ف التسويق .. هم مبسوطين بس حياتهم بتتغير للابد .. 😅 #marketing

لو فتحت التلفزيون في رمضان في أي وقت، غالبًا هتلاقي نفسك في فاصل إعلاني. امبارح بدأ الموسم الرمضاني، ومعاه بدأت الإعلانات بكل أنواعها من شركات اتصالات، لحلويات، لأجهزة كهربائية، لملابس… كل البراندات تقريبًا نزلت إعلان رمضان بتاعها امبارح ! لكن خلينا نبدأ بسؤال بسيط جدًا: 📍إيه الهدف أصلاً من أي إعلان؟ ليه البراندات بتصرف ملايين على الإعلانات؟ الأهداف بتختلف حسب موقف البراند في السوق، واستراتيجيته، لكن بشكل عام، أي إعلان بيكون هدفه واحد أو أكتر من دول : 1. بناء الوعي بالعلامة التجارية Awareness and salience 2.التميّز عن المنافسين Differentiation from competitors 3.التأثير على قرارات الشراء Influencing purchase decisions 4.خلق ارتباط عاطفي مع الجمهور Creating an emotional connection 5.تعزيز الولاء للعلامة التجارية Building brand loyalty (كل هدف من دول ليه طريقة قياس مختلفة، سواء من خلال الأبحاث أو بالأرقام المباشرة لو كان الهدف هو المبيعات.) و مفيش اعلان بيبقي الهدف منه تسلية الناس لمجرد اني اعمل اعلان لطيف ، في الاخر لازم يكون فيه هدف واضح و محدد من وقت التخطيط للاعلان . = 🎯 رمضان: موسم الإعلانات الأكبر رمضان هو الفترة الذهبية للإعلانات، المشاهدة بتزيد، الاستهلاك بيزيد، وكل البراندات بتحاول تستغل الفرصة عشان توصل لأكبر عدد ممكن من الناس. المشكلة؟ إن الكل بيعمل نفس الشيء تقريبًا، وده بيخلق زحمة إعلانية ضخمة جدًا، لدرجة إن بعض الإعلانات بتعدي بدون ما حد ياخد باله منها ف مبدئياً كدا قبل ما نتعمق .. خلينا متفقين ان لو الإعلان ما اتشافش وسط الزحمة دي او عدي من غير ما حد ياخد باله منه وسط الزحمة ، يبقى مفيش حاجة تانية نتناقش فيها زي ما بيقول William Bernbach: ‏If your advertising goes unnoticed, everything else is academic الحقيقة لو ركزت هتلاقي ان رمضان السنادي بقى موسم إعلانات متشابهة جدًا. نفس الأفكار، نفس الأساليب، ونفس النجوم. لدرجة إنك لو بدّلت اللوجو في نهاية الإعلان ببراند تاني، الإعلان نفسه هيفضل زي ما هو مش هتحس فيه حاجة غلط ! 😬 وده معناه مشكلة كبيرة جدًا في صميم الإعلان . دا غير مشكله تانية بقي ، الناس حتي ساعات تيجي عشان تشوفك شوفت الإعلان ولا لا تقولك : شوفت إعلان عمرو دياب!”إعلان أحمد عز!” مش فاكرين حتي مين البراند صاحب الإعلان في الاخر النجوم مجرد أدوات تسويقية قوية، لكن لما يطغوا على البراند، الإعلان بيتحوّل إلى “إعلان النجم”، مش إعلان المنتج. مثال ناجح؟ شوف مثال حملة نيسبريسو وجورج كلوني محدش بيقول “إعلان جورج كلوني”، الكل بيقول “إعلان نيسبريسو اللي فيه جورج كلوني”، لأن البراند كان البطل، والنجم مجرد وسيلة ، حتي الإعلانات كلها اتعملت معاه بترسخ للفكرة دي . ف مع الكم الهائل من الإعلانات، الإعلان الناجح هو اللي: ✅ له هدف واضح ✅مختلف و فيه فكرة ✅ رسالة مباشرة وسهلة التذكر ✅ مش بس مُسلي، لكن فعّال ومرتبط بالبراند لأن في النهاية، المشاهد ما عندوش مساحة في دماغه يفتكر كل حاجة مع كل الدوشة دي و بالتالي لو هنجاوب علي سوال : مين الخاسر في معركة رمضان الإعلانية؟ ❌ الخاسر هو كل براند صرف فلوسه في موسم بحجم رمضان ( التكاليف خيالية ) لكنه: •لم يُلاحظ وسط الزحمة 👀 •أو تمت ملاحظته، لكن الجمهور خرج من الإعلان بلا رسالة واضحة 🧐 •أو الأسوأ، تفاعل الناس مع الإعلان لكن ما عرفوش أصلاً البراند كان إيه أو كان عايز يقول إيه! 🤦‍♂ قولولي بقي عجبكوا ايه ف إعلانات رمضان ؟! #marketing #advertising #ramadan

سنة 1966، عالم النفس الشهير إليوت أرونسون عمل دراسة على تأثير الأخطاء في نظرة الناس لبعضهم و للأشياء و اكتشف حاجة غريبة جدًا ان الاشخاص اللي بيبان عليهم المثالية المطلقة ، الناس مش بتنجذب ليهم قوي ، بتحس ان فيه حاجة غلط او مش حقيقية فيه ! بعكس الشخص اللي عنده غلطات أو عيوب ، بيكون أقرب وأكتر جاذبية للناس . 🖇️وهنا طلع نظرية مهمة اسمها “Pratfall Effect” أو “تأثير السقطة”، واللي فكرته ببساطة إن لما تعترف بعيوبك، الناس هتحبك وتقدّرك أكتر! (وأصبح للنظرية دي تطبيقات تسويقية كمان!) 📍 امبارح بلبن نزل إعلان جديد ، ظهر فيه أكرم حسني – اللي كان بطل أشهر إعلان لبُلبُن السنة اللي فاتت – كمتحدث رسمي لبلبن وبدأ كلمته ب الاعتذار الاول عن مشاكل حقيقية بتُعاب عليهم : بدأ كلمته ب يتقدم بلبن بخالص الاعتذار لجميع عملاءه و بنقولكم : -لكل واحد وقف ساعتين في الطابور عشان يطلب الاوردر (الزحمة اللي الناس بتشتكي منها دايمًا عنده ) -لكل واحد أتكسف يطلب و هو بيطلب الاوردر ( الأسامي الغريبة اللي بلبن بيستخدمها الي تم انتقادها ) -لكل واحد كان بيعمل دايت ( منتجاتهم الدسمة اللي بيعاب عليها انها بتسبب زيادة الوزن ) طب قبل ما نكمل تحليل إعلان بُلبُن، خلينا نرجع شوية لنظرية “تأثير السقطة”، اللي واحد من تطبيقاتها اتذكر في الكتاب الرائع “Hidden Persuasion” . الكتاب بيتكلم عن التكتيكات النفسية اللي العلامات التجارية بتستخدمها للتأثير على قرارات المستهلك و اول شابتر في الكتاب عن ال ‏“Acknowledging Resistance” و هي ببساطة إنك لو اعترفت بعيوبك فإنت كده قللت من تأثير النقد اللي ممكن يواجهك عليها بعد كدا لانك معترف بيها مسبقاً . 📌 مثال ل تطبيق للنظرية في الكتاب كان عن حملة فندق “Hans Brinker Budget Hotel” في أمستردام. الفندق ده مشهور بإنه من أرخص الفنادق، وبدل ما يحاول يخفي الحقيقة، قرر يعترف بعيوبه في كامبين عليها صورة غرفة باين انها مش افخم حاجة و غير مرتبة و كتب عليها : ‏“It can’t get any worse… but we’ll do our best!” عارفين ان مفيش اسوء من كدا ..بس هنحاول 😅 و هنا الرسالة الي هو أنا مكان الغرف عندي مش احسن حاجة علي قد البادجت و أنا معترف ب دا . ف تقبل معايا المشكلة دي لو هتبقي زبوني 😅 الكامبين دي بالمناسبه كسرت الدنيا و شهرت الفندق جدا ! 🔗نرجع بقي لإعلان بلبن تقريبا دا الي عمله بلبن حط عيوبه في الاعلان ، أنا عندي مشاكل ، هتقف طوابير معانا ، عندنا اسامي صعبة ، و اكلنا مش هيلثي بس لذيذ و حلو . يمكن عملوا حاجة ذكية كمان زودا عليها حاجات مش مشاكل حقيقية بس عشان يوصلوا رسايل منها : بنعتذر لكل حد يقلدنا و ماعرفش ( أنا بقيت البراند الي بيتقلد خلاص ) بنتأسف اننا فتحنا في كل الدول العربية و لسه مفتحناش ف اوروبا ( بيوضح ازاي انه براند ناجح و بيكبر و بيتوسع ) ⚠️ فيه امثله كتير ل براندات معروفة استخدمت ال pratfall effect بشكل ناجح ، و علي فكرة الأسلوب دا خطر يعني يا ينجح اوي ، يا يقلب عكسي علي البراند عشان كدا قصدت ف اول ساعات أراقب تفاعل الناس علي إعلان بلبن و رد فعلهم عامل ازاي و الحقيقة انه ايجابي جداً حسب ما شوفت . طبعا كل دا مايمنعش ان بلبن لازم دايما يشتغل علي تحسين الجودة و الخدمة ، بس دا تحليل ل فكرة الإعلان اكتر ما هو مناقشة عن البراند نفسه و ادائه . بُلبُن براند عليه جدل دايمًا، والناس بتختلف عليه كتير، و لكن الأكيد إنهم عارفين إزاي يخاطبوا جمهورهم ويوسّعوا شريحتهم بشكل أو بآخر . و انتوا ايه رأيكم ف الاعلان ؟! #marketing #advertising #brands

أكيد سمعت قبل كدا عن “البقرة البنفسجية" 🐮🟣 ‏📍lلفكرة اللي قدمها “سيث جودن” في كتابه المشهور the purple cow : قالك تخيل إنك ماشي في طريق كله أبقار… كلها عادية، أبيض × أسود ، غالبا ممكن تنسي أصلا انك شوفت بقر ف اليوم دا ، لكن يحصل ايه لو فجأة ، لقيت وسطهم بقرة لونها بنفسجي ! أكيد هتقف، هتركز ، و لو عرفت تنزل تتصور معاها هتعمل كدا و كمان هتتكلم عنها و تحكي للناس انك شوفتها ======= افتكرت الكلام دا في رمضان السنادي و أنا بشوف ازاي حياتنا بقت كلها بستاشيو ، كنافة بالبستاشيو ، شيكولاته بالبستاشيو ، حتي الفرايز بقت بالبستاشيو بالمناسبة الموضوع ف الاول كان متفرد و جديد اول ما طلع و كان مميز الي بيعملوه عن غيرهم ، انهارده بقي ممل و مكرر . الي لفت نظري بقي محل مع انه أصلا مش بيبيع كنافة ف العادي، هو متخصص ف المشروبات اكتر ، لكنه قدر يلفت الأنظار ليه لما قرر ينزل في رمضان كنافة بالتارو… واللي بالصدفة مختلفة كمان ب ان لونها بنفسجي! 🟣 فجأة وسط كل البيستاشيو و لونه الاخضر ، بقى فيه حاجة جديدة شكلها ملفت، مختلفة، و بالتالي الناس بدأت تتكلم عنها و تنشرها . و بقت كنافتهم حتي وسط محتوي الفود بلوجرز و الإنفلوينسرز مميزة و باينه كدا وسط الريفيوهات و الكومنتات بتسأل عنها تحديداً وسط باقي اختراعات البيستاشيو . ======= 📝في علم النفس، فيه حاجة اسمها “Von Restorff Effect” أو “Isolation Effect”، واللي بتقول إن المخ بيحتفظ اكتر بالشيء المختلف وسط المتشابهات 💡 في دراسة شهيرة، عرضوا على مجموعة من الناس قائمة كلمات كلها باللون الأسود، لكن كان فيها كلمة واحدة بس لونها أزرق… طبعا المشاركين افتكروا الكلمة الزرقا أكتر من أي كلمة تانية! ======= ف تخيل الاختلاف لوحده بيديك ميزة ،فما بالك لو مختلف و كمان عامل حاجة قيمة او مدروسة بناء علي احتياج معين ! في الاخر الموضوع اكبر من مجرد لون او طعم او غيرة هي ف الفكرة نفسها ازاي تبقي مختلف لما يكون فيه تكرار . يعني قيس علي كدا لما تلاقي كل الإعلانات شبه بعض ازاي تبقي مختلف ، لما تلاقي كل المنتجات المنافسة بتقدم نفس الحاجة ازاي تقدمها ب اختلاف و هكذا .. ======== ملخص اهم ما ذكر في الكتاب كنصائح عشان تكون زي البقرة البنفسجية : 1️⃣ العادي ممل و سهل تقليده لو بتقدم منتج عادي مش مميز حتى لو كان جيد ، مش هتقدر تلفت الانتباه بسهولة و مش هتقدر تحقق بيه نجاح مستدام لأن مع الوقت السوق بيتملي بعروض متشابهة و مكررة . ⸻ 2️⃣ تعامل مع منتجك انه ممكن يكون افضل دعاية : لو منتجك عادي، غالباً هتضطر تصرف كتير عشان الناس تاخد بالها منه.أما لو مميز و مختلف، الناس هي اللي هتتكلم عنه وتنشره من نفسها. ‏Higher Talkability ⸻ 3️⃣ ما تستهدفش الجميع… خليك متميز بالنسبة لشريحة محددة علي الاقل في الاول لو حاولت ترضي الكل، هتكون ممل ومش مميز لأي حد. حاول تكون مميز لجمهورك المستهدف اولاً ⸻ 4️⃣ متخافش من مخاطرة انك تكون مختلف و مبهر لأن العكس خطر اكبر الدنيا نوعين : نوع مستحيل تتجاهله، و نوع محدش بيفتكره و الي ف النص محدش بيفتكره مع الوقت ⸻ 5️⃣ لا تستسهل التقليد … حاول تكون الأول في شيء معين ك مثال Airbnb نافست الفنادق بتقديم فكرة جديدة و هي إنك تأجر بيتك الخاص، و ساعتها خلقت سوق جديد تمامًا لوحدهم فيه ! ⸻ 6️⃣ الشركات الناجحة هي اللي بتعرف تتحول لبقرة بنفسجية مرة بعد مرة ماتعتمدش علي انك تتميز مرة و خلاص ، لا دايما حاول كل فترة تطلع بحاجة جديدة تميزك اكتر ‏“You’re either remarkable or invisible. Make your choice.”- Seth Godin ‏#marketing

لو مش متابع براندات الأزياء الفاخرة كلها تقريبًا بقى عندها مطاعم وكافيهات خاصة بيها وبنفس اسم البراند. طب ليه؟ وإيه الفكرة؟ 🤔 خلينا متفقين إن اللي جاي كله في التسويق هيكون حوالين: Brand Experiences. زمن “إعلان + منتج + خصم + بيع” انتهى خلاص ! البراند عشان يفضل عايش و ينافس، بقى محتاج يبني عالم متكامل حوالين نفسه. عالم الناس بتعيش فيه، مش مجرد بتشتري منه منتج و خلاص .و دا بيحتاج ما يسمي بال Immersive Brand Building ⸻ فيه دراسة مشتركة من McKinsey & Business of Fashion سنة 2024 بتقول: 80% من جيل Z و Millennials بيفضّلوا البراندات اللي بتقدملهم تجارب حسّية وواقعية، مش بس منتجات. و ان البراندات اللي هتستثمر في التجربة هتحقق نسب ولاء أعلى بـ 34% من الباقي . ⸻ و احنا هنا بنتكلم علي اشهر البراندات زي Gucci، Louis Vuitton، Dior، Ralph Lauren و طبعا مش مطلوب ان كل البراندات تفتح مطاعم او كافيهات و لكن لازم تفكر ازاي تقدر دايما تحول الي بتقدمه من مجرد منتج ل تجربة كاملة .. و الاهم ان التجربة دي تعزز صورة البراند ماينفعش انها تقلل منها او تضرها الهدف إنك تخلق نقطة تَماس جديدة بين الناس والبراند. نقطة تكون خفيفة، يومية، و قابلة للمشاركة😉 الموضوع بدأ من زمان علي استحياء و لكنة زاد في آخر سنة بشكل رهيب و أتوقع اننا هنشوف منه تطبيقات اكتر و اكتر الفترة الجاية .. #marketing #brands

فيه نظرية او مفهوم في علم النفس و علم الاجتماع اسمه الSelf Reference effect . و هو ببساطه بيقول ان عقلك بيفتكر و بيركز اكتر مع المعلومات الي تبدو مرتبطة او ليها علاقه بيك او بحياتك . و الموضوع دا اتعمل عليه تجارب كتير مختلفة ، واحده منهم تجربة بتسمي Cocktail Party Effect و دي كانت على مجموعة أشخاص كان بيسمعوهم رسالتين صوتيتين في نفس الوقت، واحدة في كل ودن , اتطلب منهم يركزوا على رسالة واحدة بس، ويتجاهلوا التانية و كانوا بيحطوا اسمهم ف الرسالة الي المفروض يتجاهلوها ..و طبعا النتيجة كانت ان تركيزهم غصب عنهم بيروح للرسالة الي فيها اسمهم و بيركزوا ف الكلام الي بيتقال فيها حتي لو هم بيحاولوا يعملوا عكس كدا . انت نفسك لو قاعد ف مكان زحمه مليان دوشة او حاجة و حد قال اسمك او حاجة ليها علاقه بيك هتلاقيك لا اراديا بتركز معاها .. نفس الفكرة في المحتوي علي وسائل التواصل او ف الإعلانات او غيره . المتلقي مش مهتم اطلاقاً ب المنتج او الخدمة الي بتقدمها و لو تواصلك هيبقي مركز عليها صعب جدا تقدر تاخد انتباه جمهورك .. بالذات وسط زحمة الإعلانات و الرسائل الي بيشوفوها كل يوم . كمثال بسيط : إعلان ١ : سماعة بعزل صوت متطور، بطارية تدوم 30 ساعة، تصميم مريح. ❌ إعلان ٢ : وسط الزحمة هتبقي أنت لوحدك، مع الموسيقى اللي بتحبها طول مشوارك . ✅ و طبعا الموضوع مش بيكون سهل لان اسهل حاجة انك تتكلم علي الحاجة الي انت عارفها كويس و هي منتجك و لكن دي ٥ طرق تقدر تغير بيها رسالتك من منتجك ل قلب عميلك عن طريق عقله : ١- حدد المشكله الي بيحلها منتجك او خدمتك و أبدا بيها ❌ بنك جديد بخدمات رقمية متطورة. ✅ لسه بتستنى ساعة علشان تفتح حساب؟ جرّب تعملها من موبايلك في ٥ دقايق. ٢- ارسم الصورة المثالية الي عميلك او جمهورك ممكن يبقي عايز يوصلها لما هيستخدم الي بتقدمه ❌ منتج بيخسسك ٥ كيلو في شهر ✅ هتقدري تلبسي كل الفساتين الي نفسك فيها و كل صحابك هيلاحظوا الفرق في شهر ٣- لو جمهورك اكتر لدرجة عارف الأسئلة الي ممكن يكون بيسألوها لنفسهم بس مش بيقولوها ❌ كورس لتنمية مهارات القيادة الإدارية ✅ بتسأل نفسك كتير أنا ليه مش بتقدم في شغلي ايه ؟ و ناقصني ايه عشان اترقي ؟ عندنا الإجابة في كورس ٤- لو فيه مصطلحات معينة بيقولها جمهورك اتكلم بيها مش بالمصطلحات التقنية . ❌ مكمل غذائي لتعزيز النشاط والتركيز ✅ “صاحي؟ بس مش فايق و مش ف المود ؟ الحل عندنا . ٥-اختار لحظة مميزة من يومهم و ارسمها قدامهم . ❌ أسرع خدمة توصيل طعام بجودة ممتازة ✅لسه راجع من الشغل جعان و مالقتش اكل في البيت ؟ بسيطة اطلب من عندنا Marketing is no longer about the stuff that you make, but about the stories you tell.” - Seth Godin #marketing #copywriting