Shady Salah's Recent LinkedIn Posts

موضوع إن عميلك يطلب منك خصم… شيء مرهق ، خصوصًا لو السوق اللي أنت بتشتغل فيه "بيعتبر موضوع الخصم دة هو اللغة الرسمية " مش هنشتغل غير بخصم. بيني وبينك ساعات بيكون الحل الاسهل " نمشي الامور ياجماعة " (هي فعلًا هتمشي) بس هتفضل تمشي بيك لحد ما تطلع برّه اللعبة خالص. الخصم بيمشي الأمور صحيح لكن بيعمل مصايب تانية "مش بتكون ظاهرة وقتها". 🏹 أنت بتخلق منافس جديد… اسمه “أنت السنة اللي فاتت” مش بتتنافس مع شركة أرخص فقط. بتتنافس مع رقم أنت اللي حطيته بإيدك. 🏹 الخصم المتكرر بيبني سلوك " انت اللي بتكون ضحيتة" العميل يتعلم إن أول رقم هتقوله بيكون قابل “للتفاوض”. فبالتالي هيأخر القرار وهو مرتاح… مستني الجولة اللي بعدها. أنت عارف إن "اللي بيطلب الخصم مش دايمًا محتاجه" 😄 ساعات بيطلبه علشان يطلع “بإنجاز” قدّام الإدارة " يعني أنت بتدّيه أداة داخلية… يستخدمها ضدك في كل Renewal. أنا مش ضد الخصم. أنا ضد الخصم اللي ملوش منطق واضح. عايز أشرح أكتر إزاي أقدر أتعامل مع العميل اللي بيطلب خصم… خصوصًا لما يكون بيتعامل معايا بقاله سنين. وده هيكون في فيديو قصير هنزّله على "الكوميونتي" اللي اسمها The Next Win. لو متعرفش أنا عامل مجتمع لكل اللي هدفهم "نبيع مرة تانية لنفس العميل القديم" في الـ B2B. انا هنزل الفيديو دة خلال الاسبوع الحالي علي جروب الكوميونتي لو مهتم تنضم لـ The Next Win… عرفني فى التعليقات وهتواصل معاك

وأول حاجة طلبها مني اني " أرفد " واحد في الفريق .

تخيل لاقيت واحد ماشي في الشارع رافع رجل وماشي على رجل واحدة... حركتة بطيئة... ومجهد جدًا... " حمل الجسم كله على رجل واحدة " بس الموضوع غريب " هو شكلة سليم" فجيت قربت منه وسألته، "أنا مش شايف حاجة تخليك ترفع رجلك وتمشي على واحدة" انت معذب نفسك ليه؟ هو ده وضع شركات الـ B2B لما يبقى التركيز الوحيد على "نجيب عملاء جدد يشتروا مننا"... محمل كل الشركة علي رجل واحدة: "البيعة الجديدة". في حين إن عندك عميلك القديم "الحالي" تقدر تحقق منه أرباح زي الجديد بالضبط. الصورة اللي انت شايفها دي وأنا بسجل حلقة جديدة بعنوان "Don’t Just Deliver. Influence the Path" هشارك فيها 3 تكتيكات بستخدمهم عشان أقدر أحقق أرباح من العميل الحالي. الحلقة هتنزل خلال أيام، لكن فقط على الـ Community .. لو ماتعرفش , انا عملت مجتمع فيه كل اللي مهتمين إنهم يحققوا أرباح من العميل الحالي في الـ B2B. اسم المجتمع: The Next Win لو عايز تنضم، عرفني في التعليقات.

أكتر حاجة بتبوّظ شغلي , لما اللي وعدت بيه العميل… ما يحصلش ! ويا سلام بقي لما يكون عميلك من زمان , دة بيودي الموضوع أبعد بكتير. 😶 في عالم البيع للشركات، ده مش بس غلط… دي كارثة, انت اصلا بتبني معاة عشان يكمل اطول وقت ممكن " لكن طبعا دة بيضيع" وللاسف بعد تكرار المواقف دي لاقيت انة فية اسباب مشتركة بتؤدي بينا للحال دة  : 1.    باقي الأقسام الفنية مش فاهمة المنتج كويس… حتى لو حضروا الاجتماع معايا     2.     فيه تسرّع في تسليم العميل قبل ما نتأكد من متطلباته.   3.    التنسيق بين الفرق بيكون وقت المشكلة… مش قبلها. 4.    اللغة اللي بنستخدمها مع العميل مش هي نفس لغة التنفيذ. 5.    ضغط الشغل بيخلي الناس تكمّل المهمة… مش تحقق النتيجة. 🔰 واكتشفت اني زي ما بفهم العميل عن المنتج , لازم افهم الفريق مين هو العميل واية توقعاتة 🔰 اكتشفت اني انا اللي لازم اقف جوة شركتي وكاني موظف في فريق العميل وبيدور على مصلحتة 🔰اكتشفت اني افهم خبرة , اسلوب , طريقة تفكير الفريق اللي في ضهري , دة هيخليني احدد توقعات اوقع للعميل.   ادارة حسابات العملاء هي مزيج ما بين ( المبيعات , خدمة العملاء , ادارة المشروعات ) ولو جامد هيكون عندك قدرة على تطوير الاعمال اللي هي Business Development       أنا شادي صلاح، بشتغل مع فرق المبيعات اللي بتتعامل مع شركات، علشان يحافظوا على عملاءهم، بقدّم تدريب واستشارات تساعدك تبني خطة ما بعد البيع مش بس تقفل الصفقة، لكن تفتح منها فرص تانية. لو شغلك فيه تجديد، بيع إضافي، أو توسّع داخل نفس الحساب... اعمل "فولو " علشان توصلك أفكار تطور بيها شغلك باستمرار.

تدريب البنك المركزي المصري أكتوبر 2025 - تحليل وعرض البيانات في زمن أصبحت فيه القوة الحقيقية للي بيعرف يختار ويحلل الارقام ، مبقاش رفاهية إننا نتعلم كلنا "تحليل وقراءة البيانات" واللي هيكون نتيجة اننا نقدر ناخد قرارات مستنيرة. ليا عظيم الشرف إني أكون بدرب موظفي البنك المركزي المصري علي هذا الموضوع. بالشراكة مع الاعزاء جدا Leadership Factory , شراكة وصداقة ممتدة عبر السنين. مجموعة محترفة وغاية فى الاحترام .

فيه عميل عندك بقاله سنين… ومكمل معاك. وإنت فرحان جدًا بيه. بس ممكن يكون هو أكتر عميل بيخسّرك… من غير ما تاخد بالك. دة العميل الخبره فيه عملاء في ال B2B بيبقوا فاهمين قوي هم بيعملوا إيه. يعرفوا إزاي يستنزفوا الموارد… وياخدوا أكتر بكتير من اللي دفعوه. والاستنزاف ده ليه أشكال كتير… مش دايمًا واضحة. 1) استنزاف “خلّينا نخلصها… مش هتاخد وقت” كل مرة يقولك: “دي دقيقة”… و تتحول لنص ساعة شغل، وربع ساعة علشان ترجع تركز تاني. بس ما بتتحسبش… لأنها ما بتبانش كـTask كبير. 2) استنزاف “اجتماعات من غير قرار” اجتماع… مفيش Next Step واضح فية ترجع الأسبوع اللي بعده تعيد نفس النقاش. 3) استنزاف “طلبات من غير Ticket” طلبات تيجي على واتساب، مكالمة، فويس… تدخل في الشغل من غير ما تتحسب. وفي آخر الشهر تكتشف إن نص وقت الفريق راح في الهوا. 4) استنزاف “التحرّك من غير اتفاق واضح” شغل يتعمل… وبعدين يتعاد. وتعديلات… وكل ده تحت عنوان: “عشان العميل يتبسط.” لو إنت مدير الفريق… أو صاحب الشركة… مهم تبقى شايف كل حساب بيستهلك قد إيه فعلًا. لأن المجهود غير المحسوب بيسحب طاقة الفريق من الحسابات اللي بتجيب فلوس بجد. وده بيرد على جملة بنسمعها كتير: " التكلفة عالية عليا ..مش عارف أرخص ولا عارف اكسب"

" الدرس اللي اتعلمتة من مندوب التحصيل "

أخطر جملة في الاجتماع… هي "أيوه نقدر نعمل دة " لما تبقى أكبر من قدرتك. عارفين لما شركتك تحط هدفين عكس بعض! 💠 المبيعات: عايزين الأرقام بأي شكل. 💠 الـAccount Managers: عايزين العملاء يكملوا أطول وقت ممكن. فا صاحبنا في المبيعات نجاحه بيتقاس بـ: "مضيت كام عقد"… و محدش بيبص في التفاصيل. أقولك سر: ساعات مدير المبيعات نفسة بيبقى عارف إن فيه وعود زائدة عن اللزوم… وبيعمل مش شايف. فيصحى الـAccount Manager على مكالمة من العميل الفلاني وهو بيزعق ومنفعل: "البياع قالّي إني هاخد 1، 2، 3، 4…" (😵 ده وش الـAccount Manager وهو بيسمع) دماغه فيها صوت: "أقوله الحقيقة وأخلص؟" ولا أأجل شوية… يمكن ينسى؟ كلمة "لا مش هنقدر" مش ضد البيع. دي أحيانًا أكتر جملة بيستنى العميل إنه يسمعها. إنت عارف إن العميل الشاطر مش بس بيسأل عشان يعرف معلومة عن المنتج… ده بيختبر حدود مصداقيتك. عايز يعرف: إنت عايز تطلع من جيبه الفلوس وخلاص، ولا ناوي تنفذ اللي بتوعد بيه. مش كل "لا" بتضيع صفقة. في "لا" بتحافظ على الصفقة الصح… وتمنع الصفقة الغلط. دة لو انتوا شركة عايزين تكبروا وتكملوا فى السوق. لو مهتم بموضوع ( الحفاظ على العميل فى ال B2B ) تقدر تلاقي موضوعات اكتر في قسم ال Newsletter علي البروفايل الخاص بي.

ولاء العميل بيضعف ... أول ما الحرية تبقى سهلة. طول عمرنا بنفكّر إن اللي جودته أعلى وسعره أقل هو اللي هيكسب العميل. بس علي ارض الواقع الموضوع لية أبعاد اخري .... عمرك فكرت لية فيه شركات بتحافظ على عملاءها سنين، رغم إنها لا الأفضل في الجودة… ولا الأرخص في السعر. الحقيقة ان نوعية الشركات دي  بنَت نظام بيخلي العميل يفكّر 100 مرة قبل ما يروح لبديل.  شكلة اية النظام دة ..وازاي نقدر نعملة ؟ ده بالضبط موضوع المقالة الجديدة بعنوان " الخطر مش في إن العميل عايز يمشي… الخطر إنه يقدر " هناقش فية عنصر مهم يكون فى خطتك في 2026 , واللي هيساعدك فى الحفاظ على عميلك فى مجال ال B2B اطول فترة ممكنة المقالة من هنا ⬇️

أول Newsletter ليا .. ( شكرا لكل اللي شجع وطلب) فيه موقف في شغلنا محدش بيحضّرنا ليها… لما التليفون يرن وتلاقي اسم العميل XXXX   ايوة دة اللي بيتصل يتخانق  😲 وفى لحظات تعرف ان المكالمة دي ممكن تنتهي ب شكرا مش هنكمل الشغل معاكم في نفس الوقت اللي يعرف يدير اللحظة دي صح، بيكسب ثقة ما قدرش يبنيها طول الوقت اللي فات. المقالة بعنوان  "  اللحظة الحرجة ليست خصمك… إنها معلمك القاسي "

نصيحة من واحد جرى كتير ورا تارجت وأرقام وضغط… هتبيع لو عرفت تبيع بـ“الحق”… بس للأسف ظروفك ممكن ما تساعدكش. بعد أكتر من 15 سنة في المجال أقدر أقولها وبكل ثقة: - نجاحك في مجال الـB2B كشخص بيبني Portfolio فيه عملاء مكملين سنين… مبني على “اختيارات حياتك الشخصية”. مش كل الشركات عندها عقلية “النمو”… وده ممكن يزنقك جامد. * إنت بتفكر long-term. * إنت بتفكر تقدّم للعميل المفيد. والشركة مش بتسمع… “أنا مالي باللي بتعمله؟ فين الفلوس؟” طول الوقت: فين الفلوس؟ على طول وبسرعة… طيب يا جماعة… ما أنا ماشي مع العميل في سكة بنبنيها واحدة واحدة، وفيه خطوات على الأرض… والفلوس جاية… فلما تلاقي شركتك مش فاهمة اللي فوق ده… بتلاقي نفسك مزنوق… عليك أقساط… مش هتقدر تسيب دلوقتي… خلاص“همشي بأسلوبهم”. صديقي العزيز… العميل عايز “الحق”… الضوضاء كتير حواليه، وعود كتير… وكأنه بيستغيث: “فين الحق؟ فين الصدق؟” واللي هيقدّم الحق ده… هيعرف يخلّي العميل يفكر ألف مرة قبل لما يروح لغيره. لو سمحت… ما تربطش نفسك بالتزامات عنيفة فوق طاقتك، تخليك تفرّط في الحق. الحق مش بس ينجّحك في شغلك، لكن يخليك متسق مع نفسك كإنسان. لما تقف قدّام أصحابك وعيالك… تبقى مفيش حاجة خجلان منها… والأهم لما تقف قدّام نفسك… آخر مرة وقفت فيها قدّام نفسك… حصل إيه؟ ربنا معانا كلنا.. الواقع محتاج مجهود... بس ينفع يتغير

علي فكرة ...انت بتطلب المستحيل من فريقك ..!! ازاي تطلب منهم : يبيعوا ... يساعدوا... ويشرحوا للعميل ... من غير ما يكون عندهم القدرة علي " فهم الاختلافات ما بين كل عميل والتاني ! - فهم شخصياتهم المختلفة.. - تفضيلاتهم ..اولاويتهم .. - اية اللي كل واحد لو سمعة وشافة هيتجاوب .. ! هو دة اساس بناء بيزنس قوي والاهم ( مستدام) اتشرفت بتدريب فريق من المهندسين شركة Handler Auto Service . ناس محترفين و فاهمين شغلها كويس.

موقف حصل معايا من كام يوم. كان عندي استشارة مع شركة، وكنا عايزين ناخد قرار حاسم في أمر مهم. فأنا قلت: يا جماعة، محتاجين نعمل 1 2 3 4… المدير التنفيذي بصّ لي وقال: على بركة الله. انا ...مش مطمن للرد دة " هقولكم لية" في آخر الاجتماع سألته: أنت هتقدر تعمل التغيير الجذري ده ولا نفسيًا مش متقبّله؟ قال لي: الصراحة… أنا مش متقبّله نفسيًا خالص… دي حاجة جديدة عليّا. وقالها بشكل مباشر من غير تردد 😲 قلت له: يبقى ننفّذه بالتدريج… قال لي: لا، هنعمل الصح اللي انت قلتة. قلت له: الصح جزء منه بياخد في الاعتبار “الواقع النفسي”. ما إحنا ممكن ناخد القرار النهارده في دقيقة… لكن طالما ده قرار توابعه كتير، لازم يكون عندنا الحد الأدنى من التقبّل النفسي للفكرة… فهنفّذ نفس الفكرة، لكن بالتدريج. لقيته وشّه نوّر، وكأن اتشال من عليه حمل تقيل. 😄 الخلاصة… العميل بتاعك إنسان، حتى لو كان في أعلى درجات صناعة القرار. في الـ B2B اللي بينجح، هو اللي بيقرأ اللي قدامه كويس… مش بس بيقرأ الميزانية والتفاصيل التقنية، لكن كمان الإشارات اللي زي دي: -هو اقتنع بجد؟ -هيرجع يكلمنا تاني؟ -وصلته قيمة المنتج؟ عارف لو ما قريتش كل اللي فوق ده، إيه اللي بيحصل؟ بتتحرك على إشارات كاذبة… العميل بيقول: “ابعتوا لنا عرض”، بس عمره ما هيشتري. عرفت وقتك بيضيع فية اية ! انا شادي صلاح وعندي خبرة فى مجال ال B2B اكتر من 15 سنة  اقدر اساعد الشركات والافراد اللي بيشتغلوا في ال B2B إنهم: ✅ يحافظوا على عملاءهم ✅ يفتحوا فرص بيع أكتر " لنفس العميل " وبعمل دة من خلال 3 اشكال : 1.     التدريب 2.     الاستشارات 3.     بناء استراتيجية كاملة لما بعد البيع ⬅️ انا بخاطب مين ؟ كل من يعمل فى انشطة - ما بعد البيع- , علي سبيل المثال وليس الحصر : 1️⃣ Account Manager 2️⃣ Business Owner 3️⃣ Business Developer 4️⃣ Sales Professional او اي ان كان ال title بتاعك اية. تقدر تتواصل معايا بشكل مباشر لو محتاج مساعدة.

أنا رايح RiseUp 2026 >>> ليه مهم حضرتك تروح؟ ببساطة لانة هيساعدك تحقق التارجت.. ممكن تفكر إنك، كواحد تركيزك B2B و مع العملاء الحاليين، إن حضور إيفينت زي ده مش هيكون مفيد… أنا مش متفق معاك.. وعندي أسبابي. اولا: ( تفهم البدايل اللي متاحة لعميلك ) مش معني انة عميلك من زمان فا كدة كدة مكمل. يا عزيزي , ولاء العميل الاول لمصلحة الشخصية هو طول الوقت بيفكر لو فية بديل افضل , لو هو شاف البديل قبلك خطوة هتسبق خطوتك. ثانيا: (العميل بيحتاج واحد شايف السوق) إيفينت زي ده بيعرفك السوق رايح فين، الصناعات بتتحرك إزاي، التحديات، والتغيرات. وفي يومك العادي اللي مليان طلبات، خناقات، مش بيكون عندك وقت غالبًا تبص برّه الدائرة الضيقة دي. ثالثا ( تسمع غيرك بيحلّها إزاي " حتي لو مش في مجالك ) عارف لما المهندسين بيطلعوا تصميم طيارة حربية من “حركة طيران طائر”؟ يعني ممكن تسمع عن مشكلة في التسويق، على سبيل المثال، في شركة ما… وإزاي حلوها، فعينك تتفتح على حل لمشكلة العميل اللي عندك اللي عايز يمشي ويسب الشركة أهي هي كده بالظبط… شوف الطائر حلّها إزاي… تنوّر عندك. عندي أسباب تانية كتير، بس هكتفي بدول عشان ما أطولش… أشوفكم هناك إن شاء الله، يوم 5، 6، 7 فبراير. ابعتلي لو رايح، واحب جدًا أشوفك هناك. سلام

عارف لما تبقي واقف فى النص و اتنين بيشدوك كل واحد فى اتجاهة ! العميل قدامك، عايز حل حقيقي وسريع، وجوه الشركة… بتسمع "مش في الخطة" أو "مش دلوقتي " روح handle العميل .... 😣 ايوة ما هو هيفرقع تاني كمان شوية صغيرة .... ! العميل اللي مفروض يثق فيك عشان تعرف تكلمة بعد كدة في فلوس وارقام وخدمات اخري ! واخد بالك انت رايح فين ؟ أنا عارف الإحساس ده كويس… إحساس إنك بتعتذر عن حاجة مش بإيدك. عشان كدة عايز اشاركك هعمل اية لو انا في مكانك. 1️⃣ قول الحقيقة… بس بلُغة الحل. ما تكررش جُمل الإدارة. وضّح للعميل الموقف من غير تفاصيل كتير ، وادّيله خطوة صغيرة ممكن تبدأ بيها دلوقتي. 2️⃣ سجّل كل وعد داخلي بيتقال. مش عشان تلوم، لكن علشان تخلق ذاكرة للكل, تضمن إن اللي اتقال يتنفّذ، ومحدش ينسى إنك كنت في الصف الأول بتدافع عن الصورة. دة مستوي مش سهل بس دة مستوي الاحتراف واللي بيوصل للمستوي دة , بيكون لية شأن كبير ودة يستحق المحاولة هل اتعرضت للموقف دة قبل كدة ؟

كل ما ترد علي العميل فورًا… كل ما العميل يتعوّد إنك دايمًا متاح. والخطر هنا مش في الرد نفسه… الخطر في الانطباع اللي بيتبني. العميل اللي متعود ترد علية علطول اول ما يبعتلك ....   هيستغرب جدًا لو رديت عليه بعد ساعة – حتى لو كنت في اجتماع مع شركة اخري.   هو مش هيفهم انك مسؤول عن Accounts تانية ...  وخصوصا لو العميل دة معاك بقالة فترة,  فا هيعتبر دة حق مكتسب عشان كده: لازم يكون في مسافة واضحة بين رسالة العميل… وردّك. والهدف انك : تحافظ علي علاقة مستدامة فيها احترام لوقت الطرفين. طيب، الفترة دي تكون قد إيه؟ الحقيقة مفيش إجابة واحدة. بس القاعدة العامة: كل ما العميل كان كبير أو الموضوع urgent أكتر، كل ما تقصّر المسافة. وفية حالات طبعا محتاجة رد فوري بغض النظر عن حجم العميل ..... لكن الاغلب "لا"     افتكر ديما انك "إنت اللي بتعلم العميل إزاي يتعامل معاك… إما تبني حدود ذكية، أو تفتح على نفسك ضغط ما بيقفش." أنا شادي صلاح، وبساعد فرق المبيعات اللي بتبيع " للشركات " إنها تحوّل العميل الحالي من “صفقة وحيدة” إلى “علاقة مستمرة”. التجديد، والبيع الإضافي، والتوسّع… دي أدوات بتكبر بيها ال Revenue من العميل الموجود بالفعل .

أمبارح ببص على موبايل عشان أشتريه… دخلت أول محل ، لاقيت البائعة اتحركت ناحيتي وبدأت أسألها على اللي أنا عايزه. كانت مركزة جدًا وبتحاول تجاوبني، ولما عطلت في إجابة منهم راحت كلمت حد تاني عشان تسأله. ده مستوى احترافي , الله ينور لكن يا فرحة ما تمت… خرجت من المحل وما اشتريتش، عشان عايز أشوف المحلات اللي جنبه. وفعلًا لاقيته أرخص بوضوح في المحلات التانية. شكّيت إن اللي شوفته في الأول عند البائعة أغلى " عشان ممكن تكون مواصفاته أعلى " فرجعت لها وجيت أسألها: هو الجهاز الفلاني ده برده فيه كذا وكذا؟ ردّت عليّ، لكن المرة دي كانت مُحبطة جدًا، وما بصّتش ليّ أصلًا. 😮‍💨 أنا في الاول قلت " اية قلة الاحترافية دي " بس بعد كدة تعاطفت جدًا معاها… عليها تارجت، وفي نهار رمضان، وبذلت معايا مجهود، وفي الآخر شايفاني بدخل المحل التاني. أي إنسان طبيعي هيضايق. لكن لحد فين تضايق؟ الموضوع أصعب في الـ B2B. ممكن نقعد شهور في اجتماعات ومكالمات… وخصوصا لما العميل دة يكون عميلك من زمان و شايفة بيطير قدامك عايز افكرك بشوية امور من وحي الموقف دة.. 🌰 إدّي للغضب مكان. ما تكتمش نفسك وتقول “عادي”. لأ… اضايق. لأن الإحساس ده طبيعي جدًا. لكن خليه إحساس لحظي… مش هو اللي يسوق تصرفاتك قدام العميل. 🌰 افصل بين كرامتك المهنية وقرار العميل. هو لما يختار غيرك… ده مش حكم على قيمتك .. ممكن تكون غلط , وارد لكن لا يقلل من قدرك في شئ. 🌰 راقب نفسك… مش المنافس. أغلب الناس أول رد فعل ليها بيقعدوا يحللوا عرض المنافس. لكن السؤال الأهم: هل أنا كنت فاهم Priority العميل بجد؟ ولا كنت ببيع Features؟ 🌰 حافظ على مستوى الأداء حتى في لحظة الرفض. الطريقة اللي بتتعامل بيها بعد الخسارة… أحيانًا هي اللي بتفتح باب بعد 6 شهور. شوفت حالات كتير العميل رجع بعدها لأن “اللي خسر كان أهدى وأرقى”. شغلانتنا فيها جولات كتير , و بتعرف انت ناضج ادي اية لما تتقبل خسارة واحدة منهم.

أكبر عملية نصب .. العالم بيصمم أنظمة وشكل حياة " ظاهرها الإنجاز.. والنجاح" " واقعها الإنهاك المستمر " أنا وأنت في احتياج شديد إلى " استرداد النفس " أن تسترد أنفسنا: 🔰 من كل ما يُلهينا.. ويفرّغ حياتنا من المعنى 🔰 من كل ما يعدنا بحياة أفضل وهو فخ يزيدها إنهاكًا 🔰 من كل ما يضع أمامنا أهدافًا وهمية.. ويسلب العمر 🔰 من كل من يعمّق داخلنا الشعور بالعجز والدونية ليقدم منتجًا مصنوعًا من التراب ويدّعي أنه العلاج إدراكنا "أننا نُسلب كل يوم" هو بداية العلاج هذا يقيني الشخصي.

عايز أشاركم بحاجة من قلب استشارات الشركات… أكبر تحدي بيقابل نمو الشركات هو: "قدرة القائد على تقبّل أسلوب هو مش معتاد عليه" لما بتناقش مع صاحب شركة مثلًا إننا محتاجين نعمل 1، 2، 3 علشان نوصل للي هو عايزه بشوف في أحيان كتير صراع داخلي بيقول: "حلو جدًا ده… ومقتنع" "بس مش قادر أتقبّل… مش متعود… أنا دايمًا كنت بعملها بشكل مختلف" وهنا عايز أقول التالي: 🔵 حضرتك في صراع مشروع - لأنك متعود على أسلوب نجاح معين - وعندك خبرات حقيقية حققت نجاح فى السابق - فالشعور ده منطقي وطبيعي 🔵 مش لازم التحوّلات كلها تكون جذرية وعنيفة ده هيزوّد من رفضك النفسي للتحوّل 2026 هتتحرّك على أساس - مدى قدرتك على تقبل اسلوب تفكير لم تعتاد علية - وبركة ربنا كل سنة وإنتوا طيبين 🌿

" يمشي مع السلامة"   ساعات بنوصل للقرار دة مع العميل وبنفتكر اننا اخدنا القرار الصح إنت وشركتك بتعملوا حاجات كتير جدًا، لكن العميل مش شايف إنه بيستفاد من وجودكم كمورد معاه... فبتوصل لنتيجة إن العميل ده "بيستهبل وإحنا عملنا كل اللي نقدر نعمله" ساعات بتكون غلطان يا عزيزي.... لآن فيه فرق بين 🔻 إنك بتقدم قيمة... 🔺 وإنك "بتخليه يدرك القيمة دي " ☢️ حقيقة غائبة عن كثيرين، " مش معنى إن العميل استفاد فعليًا، فده معناه إنه حاسس بده زي ما إنت شايفه... غريبة... صح؟ طيب بص على المثال ده.. شركة برمجة بتعمل حماية لموقع العميل من الاختراقات ... حصل هجوم سيبراني على موقع العميل ده.. وشركة البرمجة أمنت الموقع ووقفت الهجوم بشكل أوتوماتيك. لا إنت أخدت بالك، ولا هو أخد باله إن حصل هجوم وإنتوا حميتوه... ييجي وقت التجديد.. فالعميل يسأل: هو أنا بدفع للناس ليه؟ جزء أصيل من إدارتك للحساب إنك تبقى بشكل ممنهج وذكي بتعرفه إنه بيستفيد، من غير مبالغة ولا اصطناع. بس لو سيبته هو اللي يشعر بالقيمة لوحده... إنت في خطر حقيقي. أنا شادي صلاح، 16 سنة خبرة في الـBD والـAccount Management. في ال B2B بساعد الشركات تكبر من خلال نفس العميل — مش بس تجيب عميل جديد كل مرة. ده عن طريق تدريب، استشارات، وأنظمة واضحة لزيادة ربحية الحسابات. لو ده مجال شغلك، مقالاتي على لينكدإن (في الـFeatured) اكيد هلاقي فيها موضوعات مفيدة واكثر تفصيلا .

المنتج الجديد طلع تحفة , هايل يلا نرجع للقديم 😶 دي مش نكتة علي فكرة.. دي حصلت قدامي فعلا .... شركة بتقدم " برنامج حسابات اونلاين " SaaS Model " - اشتراك شهري قرروا يحدّثوا شكل الموقع , فا بقي مودرن... و جذّاب... الهدف كان سامي جدا " يا جماعة العميل لازم يشوف إننا بنحدث " فا العميل يطول معانا اكبر فترة ممكنة. و النتيجة = النسخة الجديدة طلعت ممتازة! بس بعد الإطلاق بأسبوعين… -بدأت تيجي الشكاوى...... كتيير 🔺 «مش عارف أوصل للReports» 🔻 «فين زرار الـSettings؟» 🔺«أنا رجعت أستخدم الـOld Shortcut... ومشتغلش!» وفي يوم ..مكالمة مدتها لا تتخطي ال 30 ثانية : عميل كبير لغى اشتراكه بسبب التصميم الجديد! 😲 عارفين الشركة قررت تعمل اية ؟ يرجعوا للنسخة القديمة مؤقتًا. يا عزيزي لا تقع فى هذا الفخ ...فكر ديما : ✅ هل التعديل ده هيخلّي العميل يستخدم أكتر؟ ✅ ولا هيقلّل الـAdoption ويعلّي الـChurn؟ ✅ التجربة بقت أحلى في الشكل؟ طب أصعب في الاستخدام؟ مش كل تحديث = تحسين. وأي تحسين مش مربوط بـ ROI... خطر كبير أنا شادي صلاح، هدفي اساعدك (تبيع اكتر لنفس عميل ال B2B ) , بشتغل مع ال 🔹 Account Managers 🔹Business Developers 🔹Customer Success 🔹واي شخص هدفة ادارة حسابات عملاء ال B2B …

بيعجبني قوي المزارع ... 🔺 عارف امتي هيروي الارض 🔻 امتي هيحط سماد 🔺وامتي ( للاسف هيرش مبيدات) اللي بيعجبني بقي هو فكرة انة  " مش كل يوم الصبح بيدور على الشجرة "   هو كل يوم بياخد خطوة ..محسوبة من قبل كدة وعارف ان كل خطوة فوق التانية هتدّيله النتيجة المطلوبة , وهي شجرة فيها ثمر… صالح للأكل يمكن محاولاتك لتعظيم العائد من الحسابات اللي تحت إيدك مش بتجيب نتيجة… مش لأنك مش شاطر، " بس لأن مافيش نظام بيساعد العلاقة تنضج، واحدة واحدة " من غير نظام هتتعب كتير والنتيجة هتكون ضعيفة جدا . بس كدة ...فكر فى اخر سطر دة كدة تاني و اعمل Save  عشان يظهرك وانت مركز اكتر

مش عارف عديت بده قبل كدة ولا لا ... طول اليوم بتطفي حرائق، 🔥 تحل مشاكل ، وتهدي عملاء قبل ما الدنيا تولّع، 👩‍🚒 وفي الآخر… اجتماع مع مديرك ( فين البيع ... الارقام...) فا تحس كدة انك..يا جماعة مش كدة ... اومال انا كنت بلعب !! للاسف فية مديرين مش هيكونوا " ناضجين كفاية " رغم انة عارف انك شغال على اكونت كبير .. ودة B2B وكنت لازم تحط مجهود فى حل المشكل بس هتلاقية بردة يعمل مش فاهم "او يمكن هو مش فاهم فعلا ..محدش عارف" اسمع مني ( انا اشتغلت الشغلانة دة اكتر من 15 سنة ) وبقلك ان العميل اللي هتحل له مشكلته النهارده، هو نفسه اللي هيقف في ضهرك بعدين وهيسهل عليك موضوع الارقام دة المجهود اللي ما اتشافش دلوقتي. هو اللي هيبني سمعتك قدام. ما تسمحش للشك يتملك منك ، اللي بيكمّل في الشغلانة دي، بيبني ثقة مش مجرد انتظار لتقييم. اعمل شير ...فية ناس محتاجة الرسالة دي.

كنت بشتغل في شركة كـKey Account Manager، بحكم شغلي كان عندي حساب شركة أنا مسؤول عن -       التجديد معاهم -        بالاضافة اننا نكبر الشغل معاة.   بس الحساب ده بالتحديد… كان صعب جدا. يعني تقوله: خد منتج تاني؟ يقولك لأ. أي نوع من أنواع التوسع؟ مفيش الدنيا كانت مقفولة تماما… وشهور على الحال ده. لكن انا ما فقدتش الامل . ولما عرفت إنهم عاملين حملة إعلانية على منتج معين وعايزين يبيعوه… قلت: دي فرصتي. صاحب الشركة بنفسة كان جاي يخلص شغل مع الحسابات عندي ( علي شغل قديم) , فطلبت منه بالمرة: اني اقابلة 10 دقايق ... والراجل وافق حضّرت Presentation سريعة—5 سلايدز. وأنا بعرض, وضحت لة بمنتهى البساطة: (المنتج الفلاني اللي عندنا… ممكن يساعدكم تبيعوا المنتج بتاعكم) ولسة بكمل الكلام...بصلي وقالي انا اشتريت   مكنتش مصدق.... يعني انا بقالي 5 شهور بحاول ...وتخلص بالصدفة فى 5 دقائق ! وهنا ان اتعلمت عدة امور : 1. الرفض مش ديما نهاية… أوقات بيكون التوقيت هو اللي غير مناسب. ( لما العميل بيرفض... ساعات بسمعها "مش محتاج"،  لكن هي فعلا بتكون "مش دلوقتي" ) 2. سرعة القبول ساعات بتكشف بطء فهمنا للعميل. (البيعة اللي قفلت في 5 دقايق، كانت ممكن تبدأ من 5 شهور.) 3.التوسع مش شطارة إقناع (ده مهارة ربط بين الضغط اللي عنده والحل اللي عندك.) انا شادي صلاح ,   بساعد فرق الـ B2B تحافظ على عملاءها، وتفتح فرص بيع تاني من نفس الحساب،   بشتغل على ده من خلال التدريب، والاستشارات، وبناء استراتيجيات ما بعد البيع. لو شغلك فيه Retention /  Upselling    /Cross-Selling   اعمل Follow  عشان يوصلك المحتوي بشكل مستمر

في لحظة كده بتعدي على كل مدير او صاحب شركة  👨‍💼 بيتعامل مع حسابات طويلة الأجل…  هل الفريق اللي ماسك العملاء دلوقتي، هيساعدنا نحقق نمو الفترة اللي جاية ؟ انت عايز تجري وتكبر عدد الشركات اللي بتقدم ليها الخدمة وفعلا المبيعات شغالة كويس. لكن لما الإيرادات تفضل مكانها… هنا محتاج تقف وتفكر !! هل السبب ان :  مافيش أرضية صلبة تبني عليها حاجة تانية مع نفس العميل  ؟ , فا بنبدأ من الاول كل مرة. اسمعني كويس "مفيش مشكلة إن الصورة تتهز شوية وما تبقاش واضحة… طول ما عندك شجاعة تبص لها من جديد." فكر في خطوة واحدة: 🔵 صنّف فريقك وشوف مين يناسب أي نوع من الحسابات…   🔵ولما تيجي تعيّن، عين على الكفاءة الفعلية مش السيرة الذاتية. اعمل save  للبوست عشان يظهرلك تاني وما يتهش منك

من فترة كنت قاعد مع عميل بدردش معاه ولفت نظري إنه “فاهم” السوق كويس… فا قلتلة .. حضرتك عندك كم كبير من المعرفة بالسوق ..  اية مصدرك للمعرفة دي ؟ قالي: فلان… وكمان فلان (موردين… منافسين… وزمايل شغل في شركات تانية). ودي قوة الـ Community  او  المجتمع… و المقصود إنك تحاوط نفسك بناس: 1.   عندهم نفس تحدياتك 2.   بيدوروا على حلول 3.   جرّبوا سكك كتير وجودك وسط النوع ده من الناس بيخليك دايمًا “قريب من المعلومة والتجربة”… بقالي حوالي 9 شهور مركز جدا مع لينكد ان , وكان هدفي الوحيد انقل خبراتي و قبلها اخفاقاتي .... ولاقيت الحمدلله فية ناس كتير مهتمة باللي بقدمة , ومن هنا فكرت انة يكون فية Community خاص بكل ( اللي بيهتم أنة يفضل يبيع لنفس العميل فى ال B2B ) المجتمع دة هيكون اسمة : The Next Win عشان كدة لو انت عميلك B2B وعندك هدف انك " تعظم الارباح من العملاء اللي بالفعل بتتعاملوا معاهم " ! المجتمع دة هيكون مناسب جدا ليك ... خصصت وقت في يومي أتفاعل مع الاسئلة ... هنتشارك دراسات حالة من السوق ... وانا متحمس نتعلم كلنا من بعض هتلاقي لينك الانضمام في أول كومنت

تجديد العقود... هو نتيجة لسكة بتاخد فيها خطوة كل يوم. نتيجة إنك قرّبت من العميل وهو لسه بيكتشف المنتج. نتيجة إنك سمعت قلقه من بدري، مش وقت التجديد. نتيجة إنك بقيت بتفكر معاه… مش بترد عليه وخلاص. نتيجة إنك قلت "مش لازم يطلب علشان أساعده". اسمعني كويس: "التجديد مش قرار مالي فقط… حتي لو البيع لشركة ده نتيجة طبيعة علاقتك - بوقته - وقلقه - وسكوته عملت اية انهاردة عشان لما يجي اليوم دة يكون عندك رصيد كافي !

لو ما تعرفش , انا اطلقت ال Newsletter الخاصة بيا واتفاجأت .. 4000 شخص اشترك فى اقل من اسبوعين ! عارف جملة " انا حسيت بمسؤولية " اهي دي اللي انا حسيت بيها دلوقتي . دة بذرة Community " لاي حد مهتم بالبيع مرة اخري للعميل ال B2B " ربنا يقدرني واقدر انزل مقالات بشكل منتظم ,, لاني بقدر اتكلم بتفصيل اكتر عن موضوع محدد ... زي أول موضوع كان : “اللحظة الحرجة ليست خصمك… إنها معلمك القاسي " لو موضوع البيع مرة أخرى للعميل الـB2B يهمّك، الاشتراك فى ال Newsletter ممكن يكون اختيار كويس

المشهد كالتالي… أنتم شركة ماركتنج شاطرين جدًا في " ادارة صفحات السوشيال ميديا " وعندكم عميل بتقدموا له الخدمة دي، والدنيا بينكم ماشية بشكل ممتاز. ربنا كرمكم وقررتوا تدخلوا عالم صناعة الفيديو ( لوكيشن تصوير وممثلين....) فجيتوا عند العميل اللي مبسوط منكم في خدمة ادارة السوشيال ميديا، وبدأتم تحاولوا تبيعوا له الخدمة الجديدة. لكن قابلتم رفض شديد… فاستغربتم. مش العميل مبسوط من شغلنا في السوشيال ميديا؟ وهو أصلاً بيعمل فيديوهات… " مع شركة تانية" فا فية احتياج واضح طيب ليه مش عايز ياخد مننا؟ ركز معايا. أنتم بقالكم سنين بتبنوا البراند حوالين إنكم " أجمد شركة بتعمل ادارة صفحات سوشيال ميديا." هو صنّفكم في دماغه انكم بتوع كدة. ومش شايفكم شركة فيديو. ببساطة: 💠هو ما شافش حاجة تثبت إنكم تعرفوا تعملوها كويس. زي ما انا عمال اقول انا اللي بساعد الشركات تحافظ على العميل القديم فى ال B2B وتلاقيني عامل كورس محاسبة ... " منطقي تشترك " ؟ لو جيت انا هستغرب اصلا 😄 💠 فبالتالي، أنت دلوقتي محتاج تبدأ معاه من الأول. لأنك ببساطة بتطلب منه يعمل حاجة صعبة: إنه يسيب الشركة التانية اللي أموره معاها تمام، بص: 💠 ما تعتمدش على ثقة العميل فيكم يعني ما تدخلش عليه بعشم إن طالما مبسوط في اللي بياخدة منكم، يبقى تلقائي هيشتري الخدمة الاخري. لا. ادخل بدخلة قيمة " بس قيمة عنيها مفتوحة"  وده محتاج مذاكرة منك… علشان لما تقدم القيمة بتاعتك، تقدمها وأنت فاهم هو بياخد إيه من الشركة التانية. وبلاش بقى جو: "العميل مش فاهم المنتج" أو "العميل مش مدرك القيمة". المهم إنك انت اللي تفهم العميل شايف الموضوع إزاي… علشان تعرف تاخده معاك السلم خطوة خطوة.

صباح الخير … كشخص بيتعامل مع العملاء في مجال الـ B2B وعايز تحقق نمو لشركتك في مهارات لو عندك، تقدر تحقق تقدم في 2026 🔹 الصبر بتتحرك بخطوات هادية مستمرة مش مستعجل 🔹 بتقيّم الخطوة: أنا شايف إني بتحرك لقدّام وبقرب من الهدف الكبير وبعدّل الخطة… هدف ثابت، وخطة مرنة 🔹 معنديش مانع أغلط: مش مهم عندك شكلك، ولا مهم عندك تقييم الآخرين الفشل بالنسبالك هو "إنك خفت من التجربة" 🔹 بتستمتع بكل مرحلة: نقطة الوصول لحظات قصيرة المشوار هو حياتك اليومية مش مأجّل الفرح لنقطة الوصول 🔹 بتكتشف ميزة في نفسك: بتنمي الوعي بذاتك… قدراتك إنت مين، وجاي هنا تعمل إيه 🔹 معترف بمحدوديتك كإنسان… وبتسعى مفيش قصة إننا هنوصل للسحاب بكرة الصبح وهنركب جناحات أنا وإنت محدودين بس عندنا قدرة إننا نحسّن إنتاجيتنا بالوقت 🔹 الأهم على الإطلاق: إنك تقدر تهدّي نفسك بتعرف تتعامل مع الضجيج والدوشة اللي بتتسرّب لنفسك أنا بقول على دول مهارات ليه؟ عشان المهارة هي حاجة بتبدأ كده: - مبعرفش أعملها دلوقتي - بالتدريب والممارسة - بقيت بعرف أعملها أفضل شكرا.

خدعة .....لو عرفت مين صانع القرار في شركة العميل… يبقى أنت كده تمام. آسف… أنت كده مش تمام اوي إحنا دايمًا بنهتم نعرف مين اللي بياخد القرار  ... وبنعتبر ان دي لو تمت ..يبقي الموضوع خلصان. وبننسي البطل المستخبي : وهو الشخص اللي بيعطّل القرار. ركز معايا… وأنت بتبيع للشركة ، أنت بتتعامل مع " مصالح أفراد جوّه الشركة"   وكل فرد بيحاول يحمي مصلحته. هدفك كـ Account Manager إنك تفهم خريطة المصالح طول ما الحساب معاك… وإلا عمرك ما هتعرف تكبّر الشغل جوّه نفس الحساب. طيب… إيه مصلحة حد إنه يعطّل البيعة ؟ خصوصًا لو اتعامل معاكم قبل كده خد عندك بعض من الاسباب ♠️ مش بيرتاح لك… فا مثلا كنتوا في اجتماع فيه 3 أو 4 من شركة العميل، وهو كان بيتفاوض معاك، وإنت كنت “شاطر قوي” في الردود… لدرجة إنك أحرجته قدّام الناس. الشخص اللي احرجتة دي بقي حطك فى دماغة. هيعطّل “المراكب السايرة” من غير ما يبان إنه السبب. ♠️ عايز يدخل مورد تاني تابع .. دي مش محتاجة شرح… 🙂   ♠️ بيحمي نفوذه جوّه الشركة لو المنتج او الخدمة اللي انت بتقدمها هيقلّل سيطرته على جزء من الشغل، أو هيقلّل اعتماد الشركة عليه… طبيعي يقاوم. حتى لو مقتنع إنة كويس. علشان كده… مهم جدًا ترسم " خريطة المصالح" دي علشان تعرف مين هيوقفهالك. بدل ما إنت قاعد تبعت Follow-ups، بدون اي رد وفيه “معركة” شغالة جوّه الشركة… وإنت مش عارف عنها أي حاجة. لو في نطاق شغلك الاحتفاظ بالعميل وزيادة الشغل معاة (في الـB2B ) ، The Next Win مجتمع جديد عملتة من فترة , و بنتكلم فيها عن كل التفاصيل اللي تهمك بخصوص الموضوع دة ( العميل القديم) التفاصيل فى التعليق

ممكن أقولك على حاجة ! عايز توصل لمرحلة إن العميل "هو اللي عايز يتعامل معاك مرة واتنين....." ؟ انسى المنتج، انسى الخدمة، انسى العرض، وانسى السعر… زي ما بقلك كدة. كل ده ييجي في المقام التاني. السؤال الأهم: "أنت شخص يتصدق؟" "أنت شخص مريح؟" بتحاول تكبر الحساب اللي معاك ب Cross -Selling و Upselling وحاسس كانك بتكسر فى الحجر ؟ عزيزي… إنت المنتج. إنت البيعة. أنا عملت صفقات بأرقام ضخمة… وقابلت ناس خبرة 20 و30 سنة… صاحب شركة.. مدير حسابات مخضرم. وفي الآخر ألاقيه يقولي: "عارف… إنت شخص مريح، نتوكل على الله." العميل بيبقى قلقان… وكل ما توعده أكتر، قلقه ممكن يزيد. فية فرق ما بين انك تقول هعمل كذا وانة يصدقك بجد. وده سر إنك تبني Portfolio من الشركات. ناس تفضل تكمل معاك سنين طويلة. وساعتها، توصل لمرحلة تقول فيها للعميل: "آسف، مش هبيع لك… لأنك مش هتستفيد." وده عقلية الشخص اللي بيفكر long-lasting. بعيد عن صراخ العالم بالكلمات المبهرة " نكبر بسرعة" ... " النمو باي تمن" ... لو عندك اللي يمشي ال Cashflow في الشركة. ابني بيزنس يعيش سنين ... حتي لو قلت للعميل اسف مش هعرف ابيع ليك زي ما فية صاحب شركة بيفكر كدة هو محتاج لعيب فى الفريق بردة يفكر كدة ... دوروا علي بعض هتلاقوا بعض. وصلت لهنا ...برافوا عليك .. بس أسيبك فى مزيد من الحيرة انت فين دلوقت ... علطول بتجري تمضي ومش مهم بكرة هيكون فية اية ؟ ولا شايف انك بتبني مبني واقف على ارض صلبة ؟

مش أهم حاجة تكون أرخص سعر. ولا حتى تكون أفضل جودة. المهم إن العميل يصدقك في اللي بتوعد بية. خصوصا لو عايزة يطول معاك.

ازاي تختار الشخص اللي هيكون مسؤول عن كبار العملاء - Key Accounts ؟

فا انت بقي يا شادي كتبت قبل كدة عن " أخطر وقت في الاجتماع، لما تقول للعميل ال B2B : 🔴 هنعمل 1 2 3 " وده بعيد تمامًا عن أرض الواقع أنا بقى دلوقتي في أرض الواقع .... العميل مضى على " الوعود " وجايلي عشان ينفذ أحلامه ... واللي هي أصلًا مش موجودة عندنا. أنت في موقف غلس جدًا ... بصراحة مش هكدب عليك. أصل أي إجابة غالبًا هتضايق العميل ... أيوة أنا كـ Account Manager أعمل إيه دلوقتي .... ركز معايا عشان مفيش حلول سهلة ... لكن ممكن تحسن من وضعك كتير لو عملت التالي : 🔰 اسعى إن الاتفاقات الأولية تكون موثقة ما بين البائع وما بين العميل لمنع تكرار الأمر 🔰 افهم توقعات العميل بدري بدري عشان كل ما الخلاف بيظهر متأخر حدته بتكون أكبر. 🔰 عيد ضبط الصورة من البداية بشكل هادئ ومن غير صدام. فرّق بين اللي اتقال كاحتمال واللي اتفهم كالتزام. 🔰 حوّل الحوار من “مين قال إيه” إلى “هنمشي إزاي من هنا”. " ركز في دي" 🔰 صعّد داخليًا لو الموضوع ده متكرر " اتأكد إن الإدارة شايفين اللي بيحصل" أخيرًا... لو أدركت إن الشركة كإدارة بتتغافل عن فكرة الـ Over Promise هنا يا عزيزي قرارك >>> ومحدش يقدر يقولك تعمله إيه ... لأن أنت كده بتعمل شغلانة مش بتاعتك ....... أنا بجيبلك من الآخر. فاهم قصدي؟ فية Community جديد عملتة بيكلم كل المهتمين ب : - الاحتفاظ بالعميل الحالي - تحقيق ارباح اضافية بعد البيعة الاولي من نفس العميل. أسم ال Community دة " The Next Win " لو مجال شغلك B2B , و مهتم بالموضوع دة وعايز تنضم, شوف أول تعليق

يا أستاذي… 👨‍💼 لو أنت مدير أو صاحب شركة B2B وعندك فريق بيتابع العميل بعد أول بيعة المهمة دي ما تعملهاش بإيدك وهي " البحث عن ادوات للشغل اليومي" قابل الشباب واطلب من كل واحد التالي : 🔷 دور على ٤ أدوات تساعدك " 1. تسرّع الشغل 2. وتعلي جودته. ولما يجيولك بالادوات مطلوب يجاوبوا على الاسئلة دي : ‼️ الأداة دي هتحسّن إيه بالضبط؟ ‼️ وإزاي نقيس التحسّن؟ مثال واقعي استخدام ( CRM) محترم. - تنظيم البيانات فا نقدر نحدد فرص نمو كل حساب - ال KPI هيكون مثلا : زيادة الربحية السنوية 10 % لية تعمل القصة دي ؟ عشان تعوّد فريقك على : - إنهم يستخدموا أدوات تطوّر شغلهم. - إنهم يدوروا دايمًا على أدوات جديدة ويجرّبوا.

كنت في تدريب امبارح، واتفتح موضوع الـ(AI Automation). يعني: بدل ما بني آدم يعمل الشغلانة… نخلي ال (AI) يقوم بيها. الناس اتصدمت مني : "بلاش AI مع العملاء بشكل مفرط يا جماعة!" وده غريب… لأنّي من أكتر الناس اللي بتنادي باستخدام الذكاء الصناعي في الشغل. بقيت بشوف كتير الوقت اللي فات ( شركات بتحاول تدخل أدوات AI في كل حاجة… كأنها هدف في حد ذاتها ) كأن النجاح = "عملنا اوتميشن لقد اية من الشغل ". مبروك ..الشغل باظ .. يا اللي عميلك شركة افتكر ديما : شغلانتنا مبنية على الثقة والتفاعل والتفاصيل الصغيرة. ( مكسبك ان الراجل دة يشتري منك مرة واتنين وتلاتة ....) ومن هنا اختار الاداة اللي تحقق ليك النتيجة دي مش اللي تسرع الشغل فى المطلق . انت عارف ان ال Ai - مش بيفهم الكلام اللي ما اتقالش (اللي بين السطور). - مش بيعرف يلقط نبرة التوتر أو الارتباك في صوت العميل. - مش بيقدم تعاطف حقيقي وقت ما العميل بيكون محبط. هقولك علي نقاط بمشي عليها لما بستخدم اداة معينة : 1️⃣ أنا عايز منها إيه بالضبط؟ (وفّر وقت؟ حسّن الخدمة؟) 2️⃣ هل فيها تفاعل إنساني ولا مجرد تنفيذ خطوات؟ 3️⃣ هل فعلاً الأداة دي هتقدّم نتايج أحسن من العنصر البشري؟ 4️⃣ إيه هي الـKPIs اللي هقيس بيها نجاح الأداة بعد ما أطبّقها؟ إيه أكتر تجربة محبطة حصلت لك مع أدوات الـ AI في شغلك ؟

لما العميل يعرف إنه اتعامل مع هواة… ده أسوأ انطباع ممكن ياخده عن شركتك. لما يكتشف إن الـ Account Manager مش فاهم الاتفاق اللي تم بينه وبين المبيعات. أي عميل وهو بيمضي العقد لأول مرة بيكون محتاج يطمن: “هو أنا أخدت القرار الصح ولا لأ؟” سوء تسليم الحساب من الـ Sales للـ Account Manager ممكن يخلّيه ياخد الانطباع السيئ ده… ويبدأ يشعر إن الخدمة مش هتكون بالمستوى المتوقع. وهنا دي مسؤوليتك كمدير. إنك تحط نظام يضمن تسليم وتسلم منضبط وواضح. هشارك معاك بعض الأمور اللي لازم تتسلّم رسميًا للشخص اللي هيتابع مع العميل بعد كده: 🔧 ليه اشترى أصلًا؟ (السبب الحقيقي… مش الرسمي) عايزين نعرف: هو اشترى علشان يحل أزمة؟ يثبت نفسه داخليًا؟ يسبق منافس؟ الـ Account Manager لازم يفهم الدافع النفسي قبل التجاري. 🧰 إيه كان البديل التاني اللي قدامه؟ مين كان بينافسنا على الصفقة؟ واختارنا ليه؟ علشان يعرف: نقطة قوتنا اللي لازم نحافظ عليها، ونقطة ضعفنا اللي المنافس ممكن يضغط منها. 🔵 إيه الوعود اللي اتقالت خارج العرض الرسمي؟ خد بالك من دي رجال المبيعات هيفهموا قصدي 🙂 شغل سنين ممكن يضيع في جملة زي: “ما تقلقش… دي سهلة وهنظبطها.” فلو اتقالت جملة زي دي، على الأقل لازم تبقى معروفة للـ Account Manager. عملية التسليم والتسلم دي لازم تكون بشكل رسمي: إيميل واضح، أو مستند مكتوب للتوثيق. علشان مايبقاش فيه “اتقال ومااتقالش”.

كان عندي تدريب من كام يوم ولفت نظري شخص فى الحضور ... عادة بدردش مع الناس قبل ما أبدأ كنوع من كسر الجو الرسمي وفوجئت ان فية شخص ( حوالي 40 سنة ) بيجي كل يوم مكان الشغل في 4 ساعات رايح و 4 ساعات راجع ...8 ساعات فى المواصلات يوميا 😶‍🌫️ الشخص دة بقي كان - متفاعل جدا اثناء التدريب - منتبة لكل اللي بيتقال - وكان باين جدا علية علامات الرضا الشخص دة مش منطقي على الاطلاق ! دة عندة كل ما يبرر انة يعمل عكس ال 3 اللي فوق دول وبعدين فكرت شوية في .. لية بقينا بنقدر جدا فكرة " عدم الرضا " ما تستغربش .. كتير من البودكاست اللي بنسمعها بتخلط ما بين ( الطموح ) (وعدم الرضا ) وتلاقيهم بيزعقوا كدة : - ما ترضاش باللي انت فية ... أسعي للاحسن " يا استاذ دول مش عكس بعض" - شوف فلان بيعمل اية وانت بتعمل اية " يا بية احنا مختلفين" - لازم كل يوم تكون افضل من اليوم اللي قبلة " يعني لو فية يوم تعبان ومش قادر ,انا كدة مش حلو بمقاييسك" فا كن حذر للكلمات الرنانة المفعمة بالقوة " خصوصا لو حد بيزعق وهو بيقولها" ببقي عايز اقولة يتزعق لية ..... وَطّي صوتك 😣 * عندي طموح كبير ...بس بفكر نفسي كل يوم بالامور الحلوة اللي عندي بالفعل * مؤمن بالتطوير الشخصي ... بس مش كل يوم هتشوف تغيير ملحوظ * غيري بيطير .... بالتوفيق ..اللي يناسبة مش ضروري يناسبني عيش الحياة الحلوة بالنسبالك .. مش اللي غيرك هيرسمها ويقولك هي دي الحياة اللي تستحق انها تتعاش

سألتة سؤال " ومعرفش يرد عليا "

خطر جدا إنك تبقي شغال في الاتجاه الصح... بس للناس الغلط  ودة بيحصل ببساطة لما تكون مش شايف   " خريطة العائد مقابل الاستثمار " .....  يعني اية ؟ ركز معايا ...  انت شركة بتدير صفحات السوشيال ميديا للشركات الاخري ..   عميلك اللي عملتلة موقع اللكتروني قبل كدة , عايزك تدير لية الصفحات الخاصة بشركتهم. بعد اجتماعات كتير ورايح وراجع مع العميل ... العميل اتبسط جدا من اقتراحتكم وشاف ان افكاركم ( مبدعة  - اتبذل فيها مجهود  و ...... ) مبروك يا جماعة كانت رحلة شاقة والحمدالله نجحنا .....  لحظة كدة ! 🔷 هو انت بتخاطب مين في شركة " العميل" ؟ 🔶 انت : فريق التسويق ..ما أصل دي شغلانتهم 🔷مممم : طيب هو مين اللي دفعلكم الفلوس ... 🔶انت : صاحب الشركة 🔷ممتاز..هل قابلتوا صاحب الشركة ولو مرة ؟ 🔷هل هو مقتنع بان اللي دفعة ... اخد بية قيمة ؟ 🔷معلش اخر سؤال .... هل هو شايف ان المنافس الارخص ...مش هيعرف يقدم نفس اللي بتقدمة ؟ 🔶انت : بدأت تتعصب شوية .. ما دي شغلانة فريق التسويق ... انا مالي !! وبعدين نستغرب بعد شوية ... " ان علي الرغم من تحقيق نجاحات سابقة , العميل بيقرر يروح للارخص .. " ‼️ خلي بالك يا عزيزي ... انا اتعلمت الموضوع دة بالطريقة الصعبة على مدار 15 سنة مع العملاء وانت بتقدم القيمة بتاعتك ...لازم تفكر فى حاجة اسمها :   " خريطة العائد مقابل الاستثمار " ..... ودة معناة ببساطة إنك تبين لكل المؤثرين فى صناعة القرار " العلاقة الواضحة بين كل جنيه بيدفعه و القيمة اللي بتعود علية" ➖ فريق التسويق عايز يشوف نمو في التفاعل والوعي بالعلامة — دي القيمة بالنسبالهم. ➖لكن صاحب الشركة مش بيقيس لايكات… هو عايز يشوف أثر مباشر على الإيرادات فا لو ما ترجمتش إن التفاعل دة هيحقق ارقام  — يبقى مش هتعرف تهرب من المقارنة اللي مبنية علي السعر. والسؤال .. هل واجهت حاجة زي كدة ؟ بذلت كل مجهود وفعلا قدمت قيمة ..بس العميل راح للأرخص في المشروع اللي بعدة؟

كل شغلانة فيها "ناس جاية تاكل عيش" وناس "صنايعية". والصنايعي ده... هو اللي بيعرف يستخدم: *المعلومات * الأدوات عشان يطلع نتائج أفضل " بمجهود اقل" وفي صنعة البيع لكيان كبير أو مؤسسة... محتاج تفهم إن: ‼️ "وضع الشركة وقت طلب المنتج بتاعك" ‼️ "هو اللي بيحدد الصفقة هتطول قد إيه" فين الخدعة بقى؟ (إن طالما ده العميل بتاعي) يبقى أكيد لما يحتاج منتج أو خدمة تانية، هييجي ياخد مني، أو على الأقل أنا هكون أول اختيار ليه. الإجابة وبمنتهى الثقة: "مش ضروري خالص". 🙂 العميل الشاطر... هو اللي ما بيحصرش نفسه في مورد واحد، حتى لو بيتعامل مع المورد ده بقاله سنين. عميل متعب؟ صح. بس شاطر. طيب... ما تقولنا إزاي نقدر نتوقع "المدة اللي الصفقة هتاخدها عشان تتم". حاضر. 👀 ركّز في اللحظة اللي جايلك فيها الطلب: 1️⃣ شركة طلبت الخدمة لمشروع شغال حاليًا واكتشفت متأخر احتياجها. معناها فيه ضغط تسليم… غالبًا القرار بيتاخد في وقت قليل . وده غير... 2️⃣ شركة بتسأل علشان تقارن. ده ممكن ياخد شهور… وساعات يتحوّل لـ "هنبعتلك لما نقرر". خلي بالك " غالبا العميل مش هيوضحلك النقطة دي " نقطة هو مستعجل ولا معاة وقت , وساعات يديلك معلومة مش صحيحة. 😶 انت اللي محتاج توصل للحقيقة. عشان كدة خليك صنايعي... استخدم # الأدوات و # المعلومات علشان تفهم واقع الصفقة فا "تحقق نتائج افضل بمجهود اقل ".

المشكلة مش إن الفريق بيغلط… المشكلة إنه لما بيغلط، ما بيقولكش. من أكتر من 10 سنين... كنت بشتغل في شركة ما، وكان معايا عميل أنا المسؤول عن شغله في الشركة. وعملت غلطة كانت "ممكن تطير الحساب كله من عندنا". في لحظة ما... قررت أروح أقول لمديري على اللي حصل: "واللي يحصل يحصل بقى... أفضل ما الشغل يبوظ... يمكن يلحق معايا". وفوجئت برد فعل منه غير متوقع: *هدوء *سمعني للآخر *واتناقشنا في مخرج للمشكلة الموقف ده فرق جدًا معايا لما بقيت مدير... وإزاي وجود بيئة آمنة للفريق بيغير جدًا في الأجواء وجودة النتائج. خلي بالك... لو أنت المدير اللي بيلوم على طول والكل بيتجنب الكلام معاك... هتحصد نتائج إنت أول واحد هتتضرر بسببها: 1️⃣ بتخسر أول إنذار مبكر كان ممكن ينقذك من مصيبة… وتحوّل الغلطة لكارثة. 2️⃣ بتبني بيئة ظاهرها انضباط… لكن جواها خوف بيشلّ المبادرة. 3️⃣ بتفقد ثقة الناس اللي عايزة تتعلم… وبتحتفظ باللي بيجيد التمثيل. واخد بالك كم الخساير اللي إنت بتخسرها؟ راجع نفسك... اللي هتكسبه لما تتعلم تدي أمان وثقة لفريقك… أكبر بكتير من إنك تشاور على الغلطان علشان تخلي مسؤوليتك.

والتليفون يرن وتلاقي الجملة دي علي لسان واحد من اكبر العملاء عندك : " احنا مش عايزين نكمل العقد ..ما شفناش نتيجة قوية من التعاون الحالي " دة نوع المكالمات اللي بيوقع القلب ..... ربنا يحفظنا  لكن يا تري ..هل هو بيتكلم بجد ؟ يعني فعلا عايز يمشي ولا بيقول كدة وعايز يوصل لهدف تاني ؟ لو بتدير علاقة ممتدة مع شركة "عميل عندكم " فالموقف ده ممكن تتعرض لية . انت شغلك تحافظ علية وتكبرة .. وهو دلوقتي بيرجعك " لما قبل نقطة الصفر " 🤔   عايز الحق ! .. كتير منهم بيستخدموا جملة الانسحاب دي عشان يضغط عليك وعلي شركتك.. فا يقدر ياخد خصم..مميزات اضافية ..وغيرة ( فيهم حريفة علي فكرة ) بص كدة ..دي علامات لو شفتها يبقي هو فعلا قرر الرحيل ومش بيهدد : 1.    كلامه بقى عام جدًا… من غير أي تفاصيل. 2.    بطل يسأل على الخطط الجاية أو التطويرات. 3.    ما بقاش بيشتكي زي الأول… بقى "بيعدّي". 4.    الاجتماعات بتتأجل… أو بتتلغي في آخر لحظة. ( بشكل متكرر) مش محتاج تستني لحد ما تيجي المكالمة دي .. راجع الحسابات اللي عندك دلوقتي . والحق قبل التليفون ما يرن. وابعتها لشخص ممكن يحتاج البوست دة

اللحظة اللي بتحدد (هتكسب قد اية من العميل دة ) مش لحظة التوقيع... لكن هي أول مرة العميل هيستخدم المنتج أو الخدمة.

كنت بشتغل Account Manager في شركة، وبعدين جاتلي شركة كبيرة بنتعامل معاها و عايزين يشتروا منتج معين عندنا. يعني داخلين محددين هم عايز إيه… والناس دي مش بتتكلم في فلوس قوي. فا من شكلها بيعة زي الفل. لكن للحظة… بدأت أفكر بشكل مختلف. و بدأت أفهم أكتر: 🔰 إيه المشروعات اللي مركزين فيها الفترة دي ؟ 🔰 و إيه الاولويات اللي تفرق معاهم ؟ والنتيجة؟ إني بعتلهم 3 منتجات مش منتج واحد بس. 😃 والسبب بسيط جدًا: - إني ما اتعاملتش مع الطلب المباشر اللي عند العميل، - اتعاملت مع تفاصيل الاحتياج اللي عنده. الموقف ده فادني جدًا لما بقيت مدير، وبقيت ديما بقول للفريق : 1. الاحتياج الحقيقي مش دايمًا واضح… بس دايمًا قابل للاكتشاف. العميل مش دايمًا عايز يخبي، دورك إنك تسمع المسكوت عنه… وتفهم عمق الاحتياج.   2. اسأل نفسك: هو هيستخدم المنتج في إيه؟ السؤال ده بس بيقلب المشهد. لأنك لما تفهم “الاستخدام”، تقدر تبني حل متكامل. 3. أوقات العميل بيختبرك مش بيشتري منك بس. بيشوف هل هتمشي وراه في أول طلب… ولا هتسأله السؤال اللي محدش قبلك سأله.   اعمل Save للبوست دة عشان تراجع مع فريقك على النقاط دي .

صعب جدًا تبقى في النص بين الكل… بتحاول تراضي العميل, وفي نفس الوقت تظبط إيقاع 4 ..5 ادارات تانية… مابين حسابات , operations ..... وكل واحد فيهم شايف إن أولوياته أهم. الإحساس بالضغط طبيعي جدًا، ومش ضعف ولا تقصير. بس الخطوة اللي ممكن تفرق فعلًا , هو انك - تحسن علاقات مع الناس عندك في شركتك... - حاجات كتير مش بتمشي بشكل رسمي - لكن عشان انت شخص علاقتك كويسة بالناس جرب ..مش هتخسر حاجة