Hala AlAli - حلا العلي's Recent LinkedIn Posts

والله ما كنت مفكرة أنقذ حدا هداك اليوم.. بس وقتها ربنا أختارني اتدخل و أكون العنصر الفعال 😅🙏🏻 مروحة و بسوق بأمان ربنا.. و بلشت إشعارات الواتساب ترن و ترن و ترن.. قصة حقيقية...لأنه عنجد ربنا بيحطني بحياة الناس لسبب.❤️ وصلت و صفيت و أعطيت رباعي زي الأسد.. فتحت المسجات… و كانت صاحبتي بتحكيلي بآخر ڤويس باعتيته: “حلا مشان الله...عندي مقابلة بالإنجليزي بعد بكرا 😭” رنيت عليها فورًا: "يا عيوني شو في…احكي" البنت بدها بوزشن بتحلم فيه.. فرصتها.. و ميتة خوف. "زمان ما عملت مقابلات.." "الإنجليزي موترني.." "مزبطش اخد معك زمان ياريت اخدت.." "بلحق؟" "بنقدر ننجز بساعتين و نص؟" و كل مرة تسألني.. كان جوابي واحد: "حتعدي أمها..بس صحصحي معي" ⬆️🔋🔥 هاد الحكي كان 26/8. سلسلة مقابلاتها بلشت 28/8. و الوقت حرفيًا معدوم. قولتكم.. بنت العلي كانت قد التحدي؟ 😉 شوفوا الكاروسيل لتعرفوا إذا اتحليت ولا لأ 😌 كله تيسير من ربنا قبل ما يكون بشطارتي❤️ #InterviewsPrep #interviewSOS ⚡🧨

كلنا ملزقين قدام التلفونات ع قناة الجزيرة و العربية و بحالتي عال BBC و ال CNN و بنتابع اللي قاعد بيصير حولينا 🚀 اللي بيعرفني بيعرف انه انا ما بتابع عشان الاخبار نفسها.. اللي بينكش فضولي هو اللغة اللي الإعلام بيستخدمها لنقل الخبر! جربوا تابعوا التغطية بالإنجليزي...نادرًا ما حتسمعوا كلمة: Attack الأمخاخ الصحفية "المكرنبة" بتبدلها بجُمل زي: 📝 Launched a military operation 📝 Carried out a strike 📝 Responded with force ليش يا ترى؟ انا بعشق علم اللغة النفسي لكثير اسباب و منها جزئية الكلمة و المعنى المبطن اللي بيأثر عالمستمع! كلمة Attack مباشرة جدًا واضحة ما فيها مساحة للتفسير اما الاشياء الثانية.. بتعطي مجال فضفاض انه الواحد يفسرها براحته و الاشي المثير للإهتمام انو نفس الفكرة موجودة بالإعلام العربي كمان😅 نادرًا ما نسمع خبر بصيغة مباشرة زي: "شنت الدولة هجومًا على المدينة" بدلها بنسمع: 📝 شنت عملية عسكرية 📝 استهدفت مواقع 📝 نفذت ضربة 📝 ردت بعمل عسكري شايفين و حاسين بالفرق؟ نفس الحدث بالمللي.. بس اختيار كلمة مختلفة بدل الإحساس بالخبر بشكل كامل! اللغة بالإعلام هي "إدارة انطباع" بإمتياز و هاد رأيي الشخصي ك حلا ⚠️ حتى بالشغل و بحياتنا اليومية: "This idea is wrong" و "I think we might need to revisit this approach" نفس المسج بس التأثير النفسي مختلف ١٨٠ درجة 📢 كلماتنا بتوصف واقعنا و بتصنعه.. شو أكثر كلمة سمعتوها بالأخبار و استغربتوا منها؟ خلينا نحلل الموضوع سوا ✌🏻️ و الله يفرجها علينا و على الجميع 🙏🏻🌙 #Psycholinguistics #Englishlanguage #Medialanguage

اتوقع كلنا متفقين انه في ناس بتعرف إنجليزي.. بس في ناس لما تحكي بينحسبلها ألف حساب. و إذا انت جديد هون.. اهلا و سهلا فيك 🤍 يمكن شفت حسابي صدفة...و يمكن لأنك حاسس انه لغتك قوية بس مش عارف تعكسها مزبوط! انا حلا 👋🏻 بشتغل بمجال اللغة الإنجليزية صرلي اكثر من ٨ سنوات و دربت +٥٠٠ شخص من مجالات مختلفة من طلاب لمدراء ل C-level Executives انا ثنائية لغة (AR/EN) و احدى خريجات برامج التبادل الثقافي من وزارة الخارجية الأمريكية (Global UGRAD) و مصنفة على Favikon كرقم ١ بالمحتوى التعليمي اللغوي على مستوى المملكة 🇯🇴 معروفة عاللينكدان ب "حلا إنجليزي" و مرات بينحكالي "The English Language Architect" 🏗️ يعني انا محسوبة على جماعة هندسة اجدع ناس 🫵🏻 و برضو بينحكالي "The Language Therapist" لإنه الشغل معي بيتجاوز موضوع اللغة! شغلي بيركز كمان على الثقة و الوعي و الحضور شغلي مش تحفيظ قواعد ولا تصحيح أخطاء عالسريع ولا "اي اشي يسلك" شغلي هندسة لغتك الإنجليزية عشان تعكس موقعك و خبرتك و فوقهم مستواك ✅ بشتغل 1:1 مع ناس بدهم: • يبلشوا Presentation قدام C-level بثقة • يعترضوا بدون ما يبينوا ضعاف • يختاروا كلمات تعكس وجودهم القيادي • يحكوا بنبرة ثابتة مش معتذرة الفكرة مش باللغة لأنها موجودة عند الاغلبية.. اللي ناقص هو الحضور القوي 👑 إذا هدفك تتعلم تحكي إنجليزي في اماكن كثيرة بتقدر تجربها بس إذا هدفك: لغتك تصير بمستوى مسؤوليتك و تدخل اي غرفة و انت مرتاح و واثق انك مهندل "الطابق".. من هون بنبدأ 😉🩵 #LeadershipCommunication #ExecutiveEnglish

ليه ال Presentations بالعادة بتكون معبية أجواء روبوتات؟ 🤖 قبل ما ادردش معكم شوي شوفولي هالسكرينشوت من شغل طالب دربته على presentation رح يعمله هاليومين 🔥 (لأنه حلا بتطلع أحسن نسخة لغوية عندك بدون ما تخليك تكون نسخة عن غيرك 🔦) ازنخ مشكلة بالبريزينتيشن هي كيف تبلش! لو بتحكي عن علم الذرة او كيف ترسم شمس بزاوية الدفتر.. الضربة القاضية هي أول جملة 🥊 "Today I’m going to talk about.." الجملة مش غلط بس مش جملة تنحكى قدام طاولة مليانة C-Levels يمين و شمال 😅 انا ك حلا بتوقع انه انت مش جاي "تحكي عن موضوع" انت جاي تعكس خبرتك و شخصيتك ✈️ لو بدك الناس تصحصح من اول ٥ ثواني بتقدر تبلش هيك: "This presentation answers one question" او "The decision we need to make today is.." بهدول الجمل انت قاعد بتحكيلهم: – في سبب نسمع – في اشي لازم نقرره – مش رح اضيع وقتكم معك اول ٥ ثواني.. يا بتخلي الكل مركز يا بتصير background noise مثل اغنية لفيروز و انت بتسوق او حبة بنادول الصبح 💊 انسوا أجواء الروبوتات و التبصيم و اعكسوا شخصيتكم و لغتكم المرتبة 🔥 و هاي جملة ثانية قوية تبلشوا فيها: 🎈 Before we look at the slides, here’s what actually matters راجعتلكم بكمشة Boosters حلوين لتنعشوا فيها الوضع 😌🥊 بس جد ليه الكل منزل نفس ال Software؟ 😂 خميسكم ونيس ✈️ #Englishlanguage #Presentations #Confidence

بدكم تضلوا تكذبوا على حالكم زي كل سنة؟ ولا بدكم عنجد تتغيروا؟🗣️ "بدي احسن الإنجليزي" مش هدف! و هو السبب إنكم كل سنة بنفس المكان 😅 انا بعرف و انتوا بتعرفوا.. أنه ٦٠٪ من اللي هون كتبوا نفس الهدف قبل سنة بنفس الحماس و على نفس الدفتر الجديد. و بعد شهرين؟ طقعوا لكلشي 😉 نصيحة ختامية لل ٢٠٢٥ و لبداية ال ٢٠٢٦: ما تفوت عالسنة الجديدة بدون هدف لغوي واضح. مبدأ المعابطة عمره ما زبط ولا رح يزبط 🫵🏻 إذا بدك تدخل ال ٢٠٢٦ صح، امشي معي على هدول الثلاث خطوات: 🔋 اختار سياق واحد ليش بدك اللغة؟ شغل؟ مقابلات؟ اجتماعات؟ سفر؟ اللغة بدون سياق = تعب عالفاضي. 🔋 اختار نتيجة تحس فيها (مش أصير B2 ولا C1) زي مثلا: - بدي أحكي بدون توتر - بدي اشرح فكرتي بثقة قدام الناس - بدي أمثل خبرتي صح بالإجتماعات 🔋 اعمل روتين صغير مش نظام عسكري! إشي بسيط تقدر تلتزم فيه: ١٠ دقايق حكي تحضر فيديو واحد تفهم فكرته تكتب جملتين قبل النوم عن إشي حلو حماس البدايات بيتبخر 🫧 و الدليل نص الكوكب لسا بيشفت أهدافه من ٢٠٠٩ لل ٢٠٢٦ 😅 المعادلة الثابتة: هدف واضح + التزام بسيط = نتيجة خرافية ✈️ احكيلي هدفك اللغوي لل ٢٠٢٦ My English goal for 2026 is … عشان اعطيك رأيي و اول خطوة تعملها ✅ اللي داخل عالسنة الجاية بنفس السيستم.. رح يطلع منها بنفس النتيجة.. القرار إلكم و انا جاهزة أساعد اللي قرر 🔥 #NewYearNewMe #Englishlanguage #Speaking

بتعرف صوت الضمير اللي بيزن ع اشي منيح؟ هاي أنا 🧒🏻 نعيد و نكرر: مشكلتك مع الإنجليزي.. أبسط من موضوع التبصيم مشكلتك إنك كل مرة بدك تحكي.. شرطة القواعد بتطلعلك من تحت لتحت 🚨 و بتسلخك بلوك ما إلو حل 👍🏻 صديقتي اللي بالسكرينشوت.. ما كان ناقصها كلمات.. ما كان ناقصها الباست بارتسبل اجدع قاعدة.. ما كان ناقصها معلومات! كانت أفكارها ضايعة.. لأنها متعودة ع أجواء البرزنتيشن الروبوتي 🤖 اشتغلنا ساعتين حلوين: عالتسلسل عالفكرة عطريقة الحكي من مبدأ ال Storytelling و سوتها و اخدت العلامة الكاملة 😉 و اللي صار معها بيصير مع أي حدا بيشتغل معي صح ✅ و لأني بحب أفيد كوكب الأرض و بلكي نهاية التبصيم كانت على ايدي.. بدي أستغل معكم آخر ٤ أيام من هالسنة صح 🔥 رح أعمل Mini-challenge أمشي فيه معكم يوم بيوم عشان: ✈️ نعمل Restart اللغة ✈️ نعطي المخ كاسة يانسون لغوية ✈️ و نشل بخت القواعد 🫵🏻 😱 بدون مصاري 😱 بدون كتب 😱 بدون "أبصم و امشي" شو رح أعمل كل يوم: نصيحة وحدة خفيفة قابلة للتطبيق و اللي بيلتزم فيهم كلهم رح يشوف أنه اللغة بعمرها ما كانت المشكلة! ❤️ إذا حاس/ة حالك: "فاهم بس مش قادر أحكي" 🥺 أو "بعرف إنجليزي بس بخاف أشغل الأحبال الصوتية" 🙂 اكتب/ي IN بالكومنت.. و خلونا نختم هالسنة بإشي يرجع ثقتكم باللغة و يرجع ثقتكم بحالكم 🫵🏻 هدف ال٢٠٢٦: تصيروا تشوفوا الإنجليزي على حقيقته.. أداة حلوة مش سجن تضلكم قاعدين فيه!🫵🏻 مين جاهز؟ 😉 #EnglishLearning #SpeakingEnglish #PresentationSkills #EnglishWithHala 🎉

عمركم شفتوني و أنا آينشتاين الإنجليزي؟😝 تعالوا اورجيكم ليه لازم اليوم تغيروا نظرتكم.. بخصوص تعلم الإنجليزي و أي لغة ثانية 🥶 بعرف إني زهقتكم و انا بحكي أنه اللغة مش: قواعد + كلمات + رشة تبصيم هاد مش هبد من عندي..علم اللغويات هيك بيحكي 🤓 عمو تشومسكي - الأب الروحي لعلم اللغويات - أفنى حياته و خلايا مخه بالمجال هاد و درس كيف البشر بيتعلموا اي لغة 🧠 عمو تشومسكي توصل لشغلة على قد ما هي بسيطة.. على قد ما هي إبداع: اللغة كل أساسها قدرة عقلية فطرية! مش Chrome Extension بتنزلها عالمخ متى ما انحشرت بالزاوية 🤕 يعني المخ ما بيعمل Processing للإنجليزي زي ما بيعمل مع التاريخ أو الرياضيات! معقول عمركم ما سألتوا حالكم ليه الأطفال احباب الله: 🧒🏻 بيحكوا الجمل صح 🧒🏻 بدون ما يعرفوا شو يعني "لام مزحلقة" 🧒🏻 بدون ما حدا يشرحلهم قاعدة وحدة؟ رح أبسطلكم الجواب و بدون تعقيد: المخ بيشتغل على تمييز الأنماط (Patterns Recognition) و قيسوا هاد الحكي على كثير اشياء تعلمتوها و بتعرفوها 🧠 تعالوا هسا أخدكم عالجانب المظلم تبع ال١٤ سنة اللي ضيعتوهم بتبصيم الإنجليزي جوا المدرسة 🙂 🚧 بدل ما تتعلموا بطريقة: • تفهموا اللغة • تستخدموا اللغة • تستخدموا اللغة و تغلطوا شوي • تثبتوا المعلومة الصح 🤕 اللي صار: • حفظتوا اللغة • بعدتوا عن الأشياء الفعلية تبعت اللغة • انزرع الخوف جواتكم من استخدام اللغة • اخترتوا تسكتوا عشان ما تغلطوا و بعلم اللغويات في فرق قد المريخ بين Knowing about the language و Using the language نيجي شوي لمخازن ال B12 و وين كل جزئية من اللغة بتتخزن: ❄️القواعد بتقعد و بتتربع بالذاكرة الواعية ❄️ الحكي الفعلي اللي بدوش تفكير بيقعد معزز مكرم بالذاكرة التلقائية شو الاشكالية مع اختنا بالله الذاكرة التلقائية مع الإنجليزي ك لغة ثانية: 🥶 ما بتشتغل تحت ضغط 🥶 ما بتحب الامتحانات 🥶 بتعمل بلوك أول ما تشغل شرطة القواعد جوا راسك 🚓 بيكفي تفلسف علمي لهون.. رح اترككم مع كمشة تساؤلات..وقفوا عندها و تمخمخوا عليها: 🧠 ليش المخ بيعمل بلوك بس تيجوا بدكم تحكوا؟ 🧠 ليش القواعد المبصومة بتتبخر أول ما تبلشوا تعبروا؟ 🧠 ليش الفكرة جاهزة بس الجملة سارحة؟ 🧠 ليش كل ما ركزتوا ع "الحكي الصح"..يادوب طلع معكم شوية حكي؟ تحياتي لبصيمة القواعد 🤓 يوم لا ينفع التبصيم.. ولا ينقذك التصريف الثالث (الباست بارتسبل) يا معلم 🫵🏻😝 #Linguistics #Neuroscience #Fluency

برد عمان و كاسة شاي سخنة مع ثالث يوم من التحدي ☃️ اليوم قررت اخلي جو التحدي رايق.. لأنه راحت عن بالي شغلة مهمة و أدركتها مبارح.. نسبة منيحة من الموجودين هون بيخافوا يبينوا بصورة "المش عارف" او اللي "لسا بيتطور"..😅 و خافوا يشاركوا عالعلن بالتحدي بس اجوا عالInbox و أبهروني بإبداعاتهم!❣️ هاد بوست لحاله رح احكي عنه بعدين.. اليوم ما بدي إلا نعمل حركة صغيرة و ان شاءالله تفرق جوا المخ بطريقة حلوة🧠 بدي نربط المشاعر مع اللغة! بالعادة اللي بيصير زي ما حكيت من قبل التبصيم للقواعد بيجي بالأول بعدين الإحساس باللغة (إذا وصل الشخص لهاي المرحلة بالأصل)😅 اللي بدي اياه اليوم انه تجرب العكس: ✈️ تمرين اليوم (٣–٥ دقايق و على أقل من مهل مهلك) كون قاعد و متدفي و مرتاح و اختار ذكرى بسيطة: 💕 لمة عيلة 💕 موقف بيضحك مع مديرك 💕 لما كنت تستلم أرباح المقصف 💕 لحظة شكرت فيها ربنا على شغلة ما بدي قصة ما بدي موشحات كل المطلوب: 1️⃣ فكر بالذكرى هاي 2️⃣ اكتب بس نقطة وحدة عنها بالإنجليزي مش جملة قواعدية نقطة فيها معنى يعني زي: 🌟 Family dinner 🌟 Warm house 🌟 Quiet night 🌟 Felt safe 🌟 Miss this feeling ❌ تكملهاش للنقطة ❌ تدورش عالقاعدة ❌ تسألش حالك صح ولا غلط اكتب اقرأ براسك تذكر الشعور الحلو حط القلم عجنب الهدف أنه تروق المخ و تورجيه أنه المعنى بيكفي و مش رح يتدمر كوكب الأرض لو ما كملت 🙏🏻 هاي خطوة صغيرة بس رح تهدي شرطة القواعد شوي و تخلي اللغة تطلع من مكان حب مش من مكان امتحان و خوف ⚠️ إذا عملت التمرين حتى لو كتبته لحالك وما وريته لحدا.. ابدعت، الله يعطيك العافية ✅ ما تخلوا الخوف من كلام الناس يوقفكم من إنكم تشتغلوا على حالكم ما في حدا مختم العلم ولا بيعرف كلشي بهاي الدنيا.. ضلكم تطوروا ولا عزاء للحاقدين 😉 #EnglishLearning #Speaking #Emotions #EnglishwithHala 🔋

الشعب الأردني تخصصه جملة "لد عليي جاي" 👀🤚🏻 ما اتوقع نقدر نوصل "إحساس" الجملة بالإنجليزي بس أقرب إشي إلها: Look او Listen to me 😶‍🌫️ بنحكيها لما بدنا: 🫡 نصحصح اللي قدامنا 🫡 او نقول: اسمعني و ركز معي نفس الإحساس بنقدر نوصله بس نبدأ الجملة و نستخدم Look – The meeting is at 3 P.M. – Look, it’s at 2:30 P.M. بعرف نيتك صافية و قصدك توصل معلومة.. بس الطرف الثاني ممكن يسمعها كتصحيح مباشر او ك "أبو العريف معك"🥶 هل الكلمة غلط؟ طبعًا لا! بس زي "لد عليي جاي" إلها وقتها و مكانها و المعنى اللي بدك توصله بيفرق متفقين انه اللغة هي الاشي اللي بتحكيه بصوتك بس برضو اللغة.. هو كلشي ما بتحكيه بصراحة 😉 اللغة أداة.. و الشاطر اللي بيعرف يستخدمها 🔥 شو في مصطلحات عجيبة بنحكيها بالعربي بس مستحيل توصل نفس الجو بالإنجليزي؟ إتحفوني 😎 بداية يوم لطيف عليكم 🌟🫡 #English #Speaking #EnglishUsage ✈️

"حلا شو الأثر اللي عم تتركيه بالدنيا؟" هاد اللي ضليت افكر فيه و انا قاعدة و بسمع و بشارك.. رح اجاوب بدون تردد: حلا مش عم بتعلم إنجليزي! حلا عم بتعلم الناس كيف يحكوا و هم رافعين راسهم 🙏🏻 أثرها بينشاف بعيدًا عن كل كلمة جديدة انحفظت.. أثرها بينشاف لما شخص كان صوته مش مسموع.. و صار يفوت الاجتماع و يبلش اول جملة بدون "maybe" 🌻 انا بفك عقدة بشيل رهبة بكسر فكرة إنو الطلاقة هي سرعة و بزرع فكرة إنو القوة هي وضوح! 🌻 الأثر تبعي: لغوي نفسي مهني حلا بتساعد ناس كانوا دايمًا "the second voice in the room" و بتعطيهم الجرأة يصيروا the voice that sets the room! 😎 شو الأثر تبعي؟ انا عم بغير علاقة الناس بصوتهم و لما أغير علاقة الإنسان بصوته.. انا غيرت علاقته بالعالم!🌻 حلا عم تترك أثر اسمه: "انا بستاهل أكون مسموع" ❤️ و هاد النوع من الأثر.. ما بينمحى شكرًا لنادي المدربين الأردني و القائمين عليه و لكل حدا شارك اليوم و كانت طاقته بتجنن 🙏🏻 شكرًا لكل حدا وقفني و حكالي "انتي حلا إنجليزي!"😍 شكرًا لل Speakers الأكثر من رائعين 🔦 أيڤينت اليوم عن ال AI كان خرافي و طلعت بكمية معلومات و أفكار مرتبة! 📑📕 صور سريعة مع احلى صبايا و ياريت اقدر اعمل تاغ للكل.. يلا قوموا و كونوا الأثر 🫵🏻 JTC - Jordan Trainers Club Abdulfattah Darabseh Farah Oweis فرح عويس I SHRM-CP Sireen Abu Slayyeh Hamzah Kamal Samah Natour Reem Al Naqah Nauras Abul Haija Sinamis Bayouq Hana Muheisen, SHRM-CP, MBA, TOT Hana Abu Atiyyeh Ruba AbuQaud Amal Mansi, PMP

مفكر إنك هربت من المدير الكيوت لما استخدمت الردود تبعتي بالجزء الأول من "فن الرد المحمود"؟ 😅 مهو المدير الكيوت إحتمال كبير يكون ذكي زيادة عن اللزوم.. و يحشرك بالزاوية 🙂 مش رح اقطعكم بنص الطريق✌🏻️ شوفولي ردود حلا اللي ملهاش حل لما: ⚠️ يبعتلك المدير إيميل من اللاشيء بس نبرته لطيفة و كاتبلك عشان يحسسك بالذنب "Can you send this tonight? It won’t take long." بدل ما تبلع الطُعم و تحكي "Sure" جاوب كالآتي: I can share a brief outline now, and finalize the full version tomorrow morning to ensure a proper execution. ما حكيت لأ بس ضروري المدير يتذكر انه الشغل النظيف بدو وقت 😉 ⚠️ المدير تذكر إنو في شغل إضافي برا الأشياء اللي انت مبلوش فيها و بعتلك إيميل انك تصير involved بمشروع او تاسك جداد: رد عالإيميل بالجملة الدبلوماسية "I’m currently wrapping up X and Y. Would you like me to prioritize this instead?" هيك بتوثق كلشي قدام المدير عشان لو صار ما صار ما تتبهدل 📝 اليوم انقذتك من موقفين زنخين بس هسا الدور اجا عليك 👀: لو المدير كتبلك: "Just a quick thing before you log off.." شو رح ترد؟ جماعة ال HR وينكم غطستوا؟ 😂🔋 #Emails #Englishlanguage

نهاية قرن نوڤمبر.. و انا و بسبوس جايين نحكيلكم اشي ملوش خص بالإنجليزي 🔪 كل الناس شايفين حلا اللي "بتنقذ الإنجليزيات" 🚑 و اللي دايمًا ثابتة.. و شعارها المعروف "يا جبل ما يهزك ريح" 💨 الأغلبية عاللينكدان بيحبوا يورجوكم انهم عايشين بالالا-لاند و بوستات طاقة إيجابية و حياة مثالية🎈 بس انا بحب دايمًا أورجيكم جميع زوايا الحياة.. من المنيح للمش منيح.. مفش لالاند عندي 📌 انا بعطي من قلبي.. و بطلع الشخص من "حفرة الخوف" لأرض كلها ثبات 🙏🏻 و بشوفه بينتقل خطوة بخطوة من "انا متردد" ل "ثقتي تمام" 🙌🏻 و هاي احلى شغلة باللي بعمله ⬆️🔋 بس.. الشغل بياخد طاقة.. السشن معي مو رفعة عتب.. بتناقش بأفكار عميقة.. حرفيًا القعدة معي و المواضيع اللي بفتحها.. Therapy فوق الإنجليزي 😂 بس الناس ما بتشوف قديش بتعب عشان اضل Full energy🔋 بمرق بأيام بتكون طاقتي بالسالب.. بمرق بأيام بكون مش طايقة احكي كلمة.. بمرق بأيام بكون نفسي اتقوقع على حالي.. بس! لما بتعب...برجع اقوم.. بالآخر انا إنسانة مش Superwoman 🦸🏻‍♀️ بس إنسانة عندها قدرة غريبة ترجع تبني حالها بعد كل تجربة.. To rise from the ashes like a phoenix🔥🙏🏻 كل يوم بذكر حالي انه ربنا معطيني الصحة.. ربنا معطيني أهل بحبهم و بيحبوني.. ربنا معطيني شغل I go above and beyond for و انا مبسوطة و راضية.. بعيدًا عن الإنجليزي.. انت أقوى مما بتتخيل.. و آخر الشهر هو بداية جديدة.. حط أهدافك قدام عيونك و ما تخلي اشي يوقفك ⬆️🔋 #GoodbyeNovember #Gratitude 🙏🏻

بسة صغيرة قد الفطعة خلتني اشتغل ١٢ ساعة باليوم!😵‍💫 في ناس بيزيدوا ساعات شغلهم عشان إلتزامات معينة.. عشان يكملوا دراسة مثلاً... عشان يكبروا البزنس تبعهم... بس انا قصتي شوي غير!😅 هاتوا احكيلكم القصة الغريبة و "أثر الفراشة" اللي اليوم صفنت و استوعبته: 🐾 قبل ٧ سنين، بأول شغلي، كنت لسا ببني اسمي و سمعتي…يعني شغل كثير + و مش هالمصاري الواو! صحيت بيوم و لقيت بسة صغيرة بالكراج تحت سيارة أبوي و سميتها "سمول" و أبوي حكالي: "يابا هاي مسؤوليتك..أنا ما رح أتدخل بشلن" 🐈 🐾 و من هون بلشت افكر: كيف بدي اهندل هالطابق هاد؟ سمول بدها اكل مرتب و إلا ما تحتاج دكتور، ضروري ادير بالي عليها منيح… لهيك اضطريت أشتغل أكثر.. و بطريقة مش مخططة، سمول هي اللي رفعتلي حس الإلتزام و المسؤولية! و ضغطت حالي من ٨ ساعات ل ١٢ ساعة شغل باليوم زي الأسد ❤️ 🐾 سمول سحبت معها صاحبات جداد.. و ال١٠ ليرات الأسبوعية اللي كنت راصديتهم للحلوة هاي صاروا ٤٠ دينار من ورا طاقتها الاجتماعية الزيادة (ع مين بدها تطلع يعني؟؟! 😆).. والله لو اضل احلف من هون لبعد بكرا.. كل ليرة انحطت على سمول رجعتلي أضعاف أضعاف أضعاف.. حلا العلي و شغلها تطور و كبر من ورا بسة!! ربنا بس يحط شغلة صغيرة بطريقكم.. ما بتكون عبث.. أكبر تغييرات حياتكم بتبلش من مسؤولية صغيرة ما خططوا إلها ❤️ قصة سمول نهايتها شوي حزينة.. بعدين بحكيلكم 😔 ملخص هالقصة شوفولي اياه بهاي الجملة الحلوة اللي بتقدروا تستخدموها: "Take care of the small things, and the big things will take care of themselves" ❤️ *بتقدروا تشوفوا سمول بالنص - عاليمين فتحية و عالشمال سيمبا 🐈

بكل فخر..من الأردن 🇯🇴 و بكل فخر.. بنت العلي عملتها ✈️ كثير مبسوطة اشوف اسمي بالمرتبة الثالثة ضمن فئة صناع المحتوى التعليمي على مستوى الوطن العربي! 😍 مع نخبة متميزة من صناع الأثر بجميع المجالات 💙 Ismael Al-Hinti | Ala'a Mannoun | Amr Al-Madadha | Muhammad Gawish | Ahmad Fareed Al Saif | Abdulrahman Samii | Hani Shaker Hassan Shehata . | Yaakoub Benarab الصدفة ما وصلتني لهون ولا "شطارتي بالإنجليزي" وصلت بعد ٧ سنين شغل حقيقي على لغة كل Client اختارني و على طريقة تفكيره و أسلوب حضوره و حكيه!🧠 و وصلت (و هاد الأهم) من رضى أهلي و دعمهم و دعمكم إنتوا شخصيًا.. عيلتي على اللينكدان 🙏🏻 ما بيهمني كم كلمة بتعرفها بالإنجليزي.. بيهمني مين انت لما تحكي.. الأرقام ما رح تبني اسمي ولا رح تحدد قدراتي ولا رح ترسم طريقي بس اليوم اخترت أخلي الأرقام تعكس أثر شغلي 🙏🏻 حبيت اليوم أوقف الجزء المنطقي مني شوي.. و أفرح بالمكان اللي وصلتله بعد تعب سنين ❤️ و على قولة عمر العبداللات: “علااا علااا علم بلادنا علااا” 🇯🇴 ان شاءالله بداية ال٢٠٢٦ مميزة عالكل.. الحمد لله دائما 💙 #Favikon #EducationalContent #Englishlanguage ✈️

صباح آخر أحد بالسنة و خلينا نبلش صح و بدون معابطة انت بتعرف و انا بعرف.. و جارك أبو محمد بيعرف أنه مخك بيعمل "تسجيل خروج" أول ما تحاول تحكي.. التوتر و الضغط النفسي مش صحابك بأي إشي.. و خصوصًا باللغات 😅 لهيك هدفنا لأول يوم من التحدي واضح جدًا: ما بدنا نحكي 🔇 ولا نحفظ 🤨 ولا نفتح كتاب 📖 بس بدنا نعمل إشي واحد: (و إذا حبيت تكمل اكثر..ممتاز بس الخمس دقايق مناح) ✈️ تمرين اليوم (٥ دقايق بس) 1️⃣ افتح فيديو قصير (حد أقصى ٥ دقايق) 2️⃣ اسمعه مرة وحدة بدون ترجمة 3️⃣ بعده مباشرة اكتب ٣ جمل فهمتهم (مش كلمات - جمل كاملة) بس هيك… و بس 😼 إذا حسيت مخك أروق شوي و إنك قدرت تلقط فكرة او فكرتين من اللي انحكى يعطيك العافية، أبدعت ✅ ❌ ممنوع توقف الفيديو ❌ ممنوع تترجم ❌ ممنوع جلد الذات او المقارنات الهدف مش نفوت أجواء امتحانات التوجيهي الهدف نكسر أول حاجز خوف نفسي 🫵🏻 رح أترك فيديو واحد للي حاب يجرب وضعه بإشي انا مختاريته و فيه أفكار حلوة: https://lnkd.in/dYaN9Jcj (مش شرط تستخدمه بس حبيت أسهل عليك المهمة) إذا عملت التمرين اكتب DONE بالكومنت و اذا حابب تشارك جملة وحدة طلعت معك انا جاهزة اقرأ الإبداعات 🧠📖 و إذا ما قدرت.. احكيلي وين عصلجت معك الأمور و بساعدك 🌟 بكرا اليوم الثاني (إذا الله أحيانا) و رح نبلش نفك عقدة شرطة القواعد 🚨🫵🏻 #EnglishLanguage #LearnEnglish #Speaking #EnglishwithHala 🎉

لو فارس كرم يعرف إنكم بتتطلعوا عالقواعد.. كان صار معو علة 😷 من الآخر و بدون لف و تجميل: انتوا مفكرين انه القواعد هي اللي مخربة الإنجليزي تبعكم 😅 بس للأسف انتوا محبوسين من ورا طريقة تفكيركم الامتحانية 🙃 القواعد مش محور الكون 🌍 حتى لو وزارة التربية ضيعت ١٢ سنة من حياتكم و انتوا "بتحشوا" قواعد الماضي المستمر جوا مخكم 🧠 انا شخصيًا بآمن انه المخ بيتعلم اللغة من المعنى و من السمع👂🏻 مش من القواعد شو يعني هالحكي يا حلا؟ 🤯 يعني لما مخك يسمع جملة زي: Yara was running late 🏃🏻 مخك ما بقعد يحلل: Past continuous + verb + bla bla bla مخك رح يفهم المعنى بالأول: آه، يارا كانت متأخرة و شكلها كانت معجوقة 😅 و هون مربط الفرس: القواعد بتيجي للترتيب بس ما تشوفها كنقطة انطلاق ⬆️ عشان هيك بتشوفوا ناس: بعرفوا يشرحوا ليه الجملة "صح" بس لما ييجوا يحكوا رح يوقفوا بنص الفكرة 😅 لأنه مخهم مضيع طاقته و شغال Grammar check مش شغال تواصل ولا تفاعل🪫 و هاد الاشي بشوفه كثير بالSessions تبعوني: تردد.. خوف من الغلط.. سؤال: "انا عم بحكي صح؟".. و لسا جملتين على بعض ما إنحكوا 😔 مش رح أنكر أهمية القواعد، بس انا ضد إنك تبدأ فيها ❌ و من الآخر برضو: بس تنحط تحت الأمر الواقع و تصير بدك تحكي..صدقني رح تطقع للقواعد كلها و تحكي 😏 إذا لسا: ❌ بترجم من عربي لإنجليزي حرف بحرف ❌ بتوقف حكيك لأنك مش متأكد من القاعدة لغتك مش ضعيفة.. انت بس تعلمتها بالعكس ⏪ اسأل اليوم حالك سؤال واحد بس: كم فكرة ذكية راحت عليك.. كم إنترڤيو طقعتلها.. كم Presentation كنسلته من الخوف.. بس لأنك كنت بدك تحكي "صح"؟ 👀 #EnglishLanguage #LanguageAcquisition

عادي انه تقرير من ٨ صفحات يخليك تصفن أسبوع؟😅 بالنسبة إلي.. تقرير مؤشر اللغة الإنجليزية للأردن ما كان مفاجأة 😅 بس بنفس الوقت ما حبيت اشوف الواقع قدامي Full HD على قولتهم.. يمكن لأني بعرفه.. و شايفته.. بس ما كنت حابة يتأكد. تعليقاتكم على البوست اللي قبل كانت خرافية و كل واحد فيكم أكدلي على شغلة وحدة: العبرة مش قديش بنعرف إنجليزي ولا كم قاعدة بصمنا العبرة انه نطلع من القوقعة اللي صرلنا سنين قاعدين جواتها لغويًا.. و نبلش نشوف تعلم و تعليم اللغة بطريقة مختلفة تمامًا 🙏🏻 اقعدوا مع أتخن صاحب شركة بالأردن و رح يبصم بالعشرة على اللي رح أحكيه: الإنجليزي القوي صار ينطلب قبل شهادتك🗣️ يا بتلحق حالك و تطلع من ال comfort zone اللي وزارة التربية و التعليم حطتك فيها.. يا بتضل تحكي: "البلد شغالة عالواسطة" 😉 كثير بحب اشوف اسم الأردن متصدر بأي تقرير بشكل إيجابي.. لأنه عنجد إحنا مش ناقصنا إشي!❤️ و انا من منبري هذا.. رح أضل شغالة اغير نظرتكم عن اللغة.. و أساعدكم تشوفوها و تفهموها بشكل أوضح و اعمق 🙌🏻 و اللي صرلي ٧ سنين بعمله مش رح يتغير: بدي أعطي كل كلاينت عندي Presence حقيقي و لغة قوية تعكس مكانهم الحقيقي 🔋 يلا قوموا إطلعوا من القوقعة 🐚 #English #Speaking #BeBrave 🧠

لما مديرك يبعثلك إيميل قبل نهاية الدوام ب ٥ دقايق 😐 هيك بتخيل كل حدا فيكم حيكون شكله (و اللابتوب مسكر نص تسكيرة) انسوا ليش هسا فطن يودي لأنه هاي قصة حزينة السؤال: كيف نرد بدون ما ننفصل من الشغل؟ 👀 سواء عالمدير او على اي ايميل زنخ كيف نعمل هروب تكتيكي محترم بدون ما نبين انو قاعدين بنهرب؟ 😎 ابدعولي و ورجوني مهاراتكم الدبلوماسية عشان أورجيكم بالبوست الجاي كمشة جمل حلوة 😈 #Emails #LateReplies #English

بدك يصير اسمك "حوت البريزينتيشنز" زي ما انت حوت بالإيميلات و الكتابة؟ 🐋 دير بالك من صوتك صوتك يا بيرفعك.. يا بيفضح توترك 😅 شو المشكلتين اللي بالعادة بشوفهم و انا بدرب الكلاينت تبعي؟ ⚠️ اول مشكلة: نبرة الصوت بتلعلع زيادة و الجملة بتنقلب سؤال مثال: "The results improved by 18%?" (نبرة طالعة لفوق) شو المسج اللي بيوصلني ك مستمعة: – انت مش متأكد – انت يمكن غلطان – كإنك بتحكيلي "صححيني لو انا غلط" بس لما النبرة تكون هادية و متمكن منها بتصير: "The results improved by 18%" (نبرة هادية و نازلة) هون بتورجيني ال Ownership تبعتك هون بتعكس شخصيتك القيادية ⚠️ ثاني مشكلة: سرعة سونيك بالحكي 🏃🏻 ليه تطلع حالك بشكل البني آدم المعجوق! متوتر و سرعة = طار البريزينتيشن كلو 😰 مثال: "We reviewed the data and decided to shift the strategy to focus on long-term retention because short-term growth wasn’t sustainable" موشح بيزنطي انحكى بسرعة ٧٧٧ كم بالثانية بالمقابل: "We reviewed the data." بتتنفس براحتك "We shifted the strategy." تطليعة واثقة "Long-term retention is now the priority" الفكرة وصلت و انت ملك و رايق 👑 حرفيًا نفس المعنى بس بدون ما أحس انك طاير 😅 أهم نقطة بكل الحكي هاد: تحكمت بصوتك = تحكمت بحضورك 🏃🏻 السرعة الزيادة = توتر 🗣️ النبرة العالية = ثقة متزعزعة 😅 التردد = ضعف 😎 الوقفة الصح = سيطرة ياريت الموضوع كان أبسط من هيك بس للأسف هيك اللعبة و هيك قوانينها 😉 سؤال للي بيعملوا Presentations كثير: شو أكثر جزئية لغوية بتوتركم لما تحكوا؟ العبارات؟ انكم تبلشوا بالحكي؟ الختامية؟ #English #Presentations #Speaking

مبارح كان عيد ميلاد مُلهمي و بداية السنة الثامنة من رحلتي بالشغل ❤️ قبل فترة قرأت نص حسيته بيوصف علاقتي مع ابوي تمامًا و حابة أشاركه.. بعيدًا عن الإنجليزي و بعيدًا عن قصص النجاح اللي بيحبها اللينكدان. "أكتر إشي بحبه بأبوي هو التسامح. ممكن أزعله كثير، وبنفس اليوم يحكي معي بحب وكأنه ما صار إشي. بيسمعني، وبيحترم وجهة نظري حتى لو ما كانت مقنعة بالنسبة إله. أبوي هو معنى الاحتواء. اللي اكتشفته مع الوقت إنه العالم برا مش نسخة عن أبوي. تسامحه، طولة باله، وحتى قسوته أحيانًا كانت دايمًا نظيفة… بلا حقد، بلا انتقام. أول ما انفتحت عالعالم صار في تصادم. لأني كنت مفكرة كل الناس زي أبوي… واكتشفت إنه هو حالة نادرة." ❤️ المهندس عاهد العلي هو اللي علمني أكون دغري صريحة و واضحة وما أمشي مع التيار بس عشان اعمل Fit in 🙌🏻 السمعة الطيبة و الشغل المحترم اللي صرلي ٨ سنين ببنيه ما كان رح يكون لولا الأساس اللي زرعه جوا روحي. أبوي علمني الصبر، و حب الشغل النظيف حبني زي ما انا.. بدون ما يحاول يغيرني.❤️ لكل شخص كنت جزء من رحلته خلال هالسنين شكرًا على ثقتكم.. و شكرًا لأنكم سمحتولي أكون جزء من قصتكم 🙏🏻 الحمدلله على ما كان و ما سيكون 🙏🏻 #رحلة_التغيير #Englishlanguage #Speaking 🔋

انا مش آلة محتوى. و اخيرًا استوعبت هاي النقطة اللي صرلي سنين بحاول اني ألاقي إلها اي تصريفة 😅 المحتوى تبعي قوي لأنه طالع من قلبي...مش لأنه "لازم انزل كل يوم و اجيب لايكات عفق"! و لأني دايمًا صريحة معكم.. و بحب أكون على حقيقتي بعيدًا عن "لالاند اللينكدان"... المحتوى اللي عندي بيخلصش.. بس نفسيتي حبت تعمل قفزة حرة لل Protection Zone تبعت مخي 🧠 بين صفارات الإنذار و الأخبار و اللون الأحمر تحت كل شاشة ... و بين المستقبل اللي مش معروفله ملامح عاللي قاعد بيصير.. ما في مهرب من الإحتراق النفسي! و بالنسبة الي ك حلا: لما تكون نفسيتي مش احسن اشي.. الصعوبة مش بالشغل نفسه.. الصعوبة عندي اني اقعد و أعبر عن اللي جواتي.. عودت حالي من فترة اني أعبر لو ١% عن اللي بحسه و هاد الاشي بيصير معي بالإنجليزي... خليني أورجيكم كمشة جُمل ممكن تساعدكم تفرغوا شوية طاقة سلبية: 🌧️ I’m not at my best today, but I’ll do what I can. 🌧️ I might need a bit more time to get this done properly. 🌧️ Can I get back to your message later? I'm not feeling my best and I want to give it the focus it deserves. كونوا بخير و الله يهونها علينا جميعًا و يحمي بلدنا من كل شر ❤️🇯🇴 و ان شاءالله ربنا بيهدي البال و بترجعوا تشوفوا بوستات "حلا إنجليزي" معبية المكان 🌟🙏🏻 تذكرتك و انا عم بكتب Hana Abu Atiyyeh شكرًا على وجودك بالحياة 🌎🧡 #SelfLove #MentalBreak

لسا وجهك بيصير 😮 لما تسمع حدا بيحكي إنجليزي بثقة؟ طيب سؤال صريح: ليش صوتك بيصير واطي اول ما تفوت الاجتماع؟ كيف بدك تبين قوي و اول جملة بتطلع منك: "I just think.." "Maybe we could.." "Sorry but.." مين اقنعك انه الاعتذار قبل الفكرة "ذوق"؟ كمان شغلة.. السرعة مش الاشي الواو.. تقريط الأحرف مش بريستيج.. كل الموضوع هو وزن الجملة! شوف الفرق و احكم: 🥶 بدل: If it’s okay 😏 Let’s cut to the chase خلينا ندخل بالموضوع مباشرة 🥶 بدل: I just wanted to check 😏 Let’s be on the same page خلينا نتأكد انه احنا متفقين 🥶 بدل: Whenever you have time 😏 This needs immediate attention شفت الفرق؟ ما في اعتذار ما في تردد بس احترام مع رشة ثقة 💯 لما تحكي.. لا تستأذن على وجودك الإنجليزي هو بداية الطريق و الهدف انه صوتك ينسمع مش بس ينفهم 😉 خميسكم هيبة 👌🏻 #SpeakwithImpact #English #Confidence

كلنا متفقين انه اي انسان بيبعت إيميل قبل نهاية الدوام ب ٥ دقايق هو انسان رايق😅 لما يوصل إيميل النكد و الموضوع مش urgent رسميًا 😐 لا تختفي 😐 ما تكتب "Tomorrow" و تختصر 📩 حلا رح تنقذك بكمشة ردود ملهاش حل: ⚠️ اذا بدك تأجل لليوم اللي بعده بدون ما تبين انك عم تعمل هروب تكتيكي Thank you for sharing this with me. I’ll review it first thing tomorrow morning and get back to you ASAP. رد محترم و واضح بدون وعود وما بينت انك مسكر اللابتوب 😌 ⚠️ الموضوع بدو شغل اكثر من ٥ دقايق Thanks for brining this to my attention. I’ll need some time to go through it properly. I’ll share a detailed response tomorrow. كلمة properly عاملة درع ضد الأسافين لسا الوضع بروفيشينال و رواق ⚠️ لو المدير بده اشي سريع جدًا I'm happy to share a quick initial thought now, and I’ll follow up with a full response tomorrow. لساتك كريم و محترم بس مش رح تقعد زيادة بالمكتب 🧘🏻 انك تقول "حاضر" على حساب وقتك مش رح يخليك تصير ابن الشركة ولا رح يتذكروا قعدة المكتب بعد الدوام وقت الزيادة السنوية 🥲 احمي حدودك و حالك.. بالآخر الإيميل مش ساحة معركة بس برضو مش عقد استعباد 🙃 مين منكم مستعد يجرب وحدة من هدول الردود المرة الجاي اذا المدير الكيوت حب يخليك تقعد زيادة بالمكتب؟ 👀 ولا لسا بتعطوها وحدة "Noted" و بتفكحوا؟🤬 #EmailSOS #Englishlanguage #SmartReplies

ما بتحبوا مبدأ "الصراحة راحة" ع يوم أثنين مغيم صح؟ معلش رح تحبوه خاوة بس نخلص التحدي 😝 استكمالًا لسولافتنا اللي بلشناها مبارح.. شو لب مشكلتك مع الإنجليزي؟ ١٤ سنة فطور غدا عشا قواعد و فوقهم سنة توجيهي كلها دوسيات قواعد.. مشكلتك مش قواعد! مشكلتك بتبلش لما تحاول تشغل القواعد و انت بتحكي 🤨 بتقدر توكل منسف كركي و كنافة بتشرشر قطر سوا؟ طبعًا لا! يعني تخيل يا رعاك الله.. طالع و سايق سيارة ID crozz موديل سنتها.. السيارة متحمسة بدها تفعط و تطير.. بس كل ٣ ثواني.. بتوقف حالك عشان تتأكد أنه ما اكلت مخالفة 🚓😅 أقل واجب تقلب كل الطلعة نكد و تعجيق🙃 شو هي "شرطة القواعد"؟ هي الصوت اللي بتشبه قرابتك أم محمد اللي بتضل تسأل و تزن: صح ولا غلط؟ Past simple ولا perfect? لازم أقول has been ولا was؟ هاد و انت لسا بتقول يا هادي ما طلعت جملة كاملة ع بعضها 😒 اليوم بدنا نعمل حركة وحدة: نفصل التفكير عن الحكي 👏🏻 ✈️ تمرين اليوم (٥–٧ دقايق) 1️⃣ اختار أبسط موضوع ممكن يخطرلك (قهوة الصبح / شو عملت اليوم / آخر فيديو شفته) 2️⃣ حضر نفسيتك ٣ دقايق بعدين احكي عنه دقيقة كاملة بصوت عالي او تسجيل صوتي حرفيًا خلي صوتك يلعلع 🗣️ 3️⃣ خلال الدقيقة: ❌ ممنوع توقف ❌ ممنوع تصحح حالك ❌ ممنوع تعيد الجملة حتى لو حسيت الوضع زي الجعمكة خلصت الدقيقة؟ بس هيك.. يلا كمل حياتك الطبيعية 🧠 ملاحظة قد أقمار كوكب زحل: انا مش عم بلغي القواعد.. انا عم بغير وقتها! بدنا القواعد يصير مكانها: بعد ما تخلص الحكي مش بنصه إذا حسيت: ✅ الحكي صار نتوفة أسهل ✅ التوتر خف شوي ✅ الأفكار مشت يعطيك العافية، ابدعت ✅ إذا عملت التمرين اكتب DONE و احكيلي: كانت الدقيقة سهلة ولا طويلة؟ اذا حسيت أنه شرطة القواعد لسا ملزقة فيك: احكيلي وين علقت و بساعدك 🫵🏻 تلحلحوا قبل ما نفوت عاليوم الثالث 🔋 #EnglishLearning #EnglishLanguage #Speaking #EnglishwithHala 🧠

ليه الكل مصدوم من تصنيف الأردن بالإنجليزي؟ أكيد ما صحينا فجأة و لقينا وضع اللغة واقع من طيارة ✈️😅 المشكلة موجودة من زمان.. و معروفة أسبابها و بتنحل! بس بدها اعتراف صريح إنو في مشكلة و شجاعة حقيقية انه نواجهها 🙏🏻 المشكلة انه مدارسنا بتعلم الإنجليزي بس بتخليش الطلاب يحكوا اللغة. و برأيي المتواضع جدًا...اللي قاعد بيصير مش أعجوبة: 📖 في فرق كبير بين تعلم اللغة و تعليم اللغة معرفة القاعدة إشي و استخدام اللغة تلقائيًا اشي مختلف تمامًا 😅 و نظامنا التعليمي ركز اكثر على التبصيم و تعليم اللغة ضمن أُطر ضيقة. 📖 ما في استخدام فعلي و حقيقي للغة داخل الصف لهيك اللغة انحصرت بامتحان و كمشة معاني بينحفظوا و بيتبخروا أول ما يخلص التسميع 🤨 تخيلوا شو رح يصير مع نفس الطالب لما ينحط بموقف حقيقي و ينطلب منه يحكي on the spot؟ 📖 التنمر اللغوي و شرطة القواعد 🚓 كم حدا فيكم سكت و بطل يحكي بس لأنه حدا ضحك عليه أو صححله شغلة باللغة بأسلوب جارح؟ للأسف..جزء كبير من المشكلة نفسي قبل ما يكون لغوي 😓 📖 ثقافة العلامات أهم من الفهم ولا مرة تقريبًا انسألنا: كيف حسيت و انت بتحكي؟ ليش اخترت هالكلمة؟ شو المعنى اللي حابب توصله؟ السؤال الوحيد الثابت كان: هاد صح ولا غلط؟ أكيد الحل مش بكتاب جديد ولا منهاج بريطاني لازم نلاقي طريقة جديدة و عملية.. شو رأيكم؟ من تجربتكم الشخصية: شو فعليًا ممكن نعمل لنحسن مستوى اللغة و نرفع تقييم البلد على أرض الواقع؟🧠 #Englishlanguage #مؤشر_إتقان_اللغة #Speaking

شكله عاجبتكم القعدة بسجن القواعد؟ 😡 لمتى بدكم تضلوا حابسين أفكاركم عشان مخكم متفجر من ورا المضارع البسيط المتحور زي كورونا 🤓 انا لو بعرف إنو الوضع هيك كان فتت طب و اخترعت Antibiotic للقواعد💉🤕 طيب، شو هدف هاد الكاروسيل و ليه نازل هسا بالذات؟ ❄️🥶 لأنو لازم أطلعكم من خانة: "بدون قواعد مش حقدر أحكي”🥺 لخانة: "طز عالماضي المستمر.. المهم فكرتي توصل"🔥 ارحموا مخكم من أجواء Microsoft Word و Grammarly و خلوا بنت العلي تورجيكم جانب حلو و مختلف للإنجليزي 🙏🏻 مين منكم بيقدر يجاوبني على هدول الأسئلة بصراحة: (طبعًا بدها شوية جرأة قدام كل اللينكدان)🔌 • كم مرة حبست فكرة حلوة من الخوف؟ • كم مرة كنسلت meeting بسبب القواعد؟ • كم مرة تمنيت تحكي براحتك، بس ما قدرت؟ لو يرجع فيي الزمن.. كان عنجد درست طب 😅 بس ربنا إلو حكمة.. أعطاني مخ بيحب يشوف الكوكب أقوى لغويًا 🧠❤️ #Fluency #Speaking #EnglishLanguage

ركزوا و صحصحوا معي لأنه مضلش اي حجة لإلكم 😡 أول يوم من آخر شهر بال2025.. و لسا في ناس بتحط "أعذار" إنه ما عندهم وقت يبلشوا يزبطوا إنجليزياتهم لحالهم او معي 😩 بس عندهم وقت يقعدوا سنة ضوئية عالTiktok😉 و طبعًا لسان حالهم بقول: "مشان الله رجعوني للKG عشان اتعلم إنجليزي صح"🙃 خدولي كمشة هال Tips العملية اللي لو إلتزمتوا بجزء منهم او حتى فيهم كلهم.. لغتكم رح تعيط من ال LEVELING UP اللطيف قبل ما السنة تخلص 🔋⬆️🔥 ١- احجز ١٠ دقايق من وقتك الثمين و اسمع ل Podcast بالإنجليزي *الإنجليزي الطبيعي مش تحليل حياة طلال ابو غزالة ولا حرب الخليج 😩 ما تخلي حماس البدايات يوديك عالCNN رحم الله امرئ عرف قدر نفسه 😅 في عندكم هدول الخيارين حلوين: The Diary of a CEO أو Lex Fridman clips --------------------------------- ٢- احكي مع AI فيو خاصية ال Conversation بس من مبدأ التدريب عالخفيف مش التقييم⚡ *أنا شخصيًا ك حلا ضد هيك اشي عالمدى الطويل لأنه بعمره ال AI ما رح يغطي على اللمسة الإنسانية اللغوية و التلقائية البشرية.. بس احسن من البلاش ك خطوة مبدئية🔋 في هدول الخيارين حلوين: TalkPal / Speechify Conversations ----------------------------------- ٣- أكتب جملة وحدة بالانجليزي عن يومك او شغلك على دفترك بدل ما تضيع وقتك ع جروبات الغيبة و النميمة 😒 *الفكرة إنه اللغة تبلش تصير جزء من استخدامك اليومي.. كيف بتستخدم العربي؟ بالزبط بدك تصير تدخل الإنجليزي على نفس السيستم 🧠 ----------------------------------- ٤- ما نحكي إنجليزي زي العربي حرفيًا و هاي أهم نققققطة 🔪 *يعني مثلا كثير ناس بتعلق بالانجليزي على كلمة "استصعبت" لأنه مخهم مش قادر يحولها فوري لإشي سريع و مرادف بالإنجليزي 😅 استصعبت = الاشي كان صعب = It was hard for me to.... خلصت فكت ما في داعي نحكي حرفيًا..بسطوا الحكي لحتى تضلكم داعسين 🚗 ----------------------------------- ما تشوفوا إنهم اشياء سهلة و "يييي كيف بدهم يعملولي فرق" 🙀 الفكرة بالإستمرارية 😉 و إذا حسيتوا إنكم وصلتوا لمرحلة "بدي حدا يدلني عالطريق"... حلا Google Maps الإنجليزي موجودة 🤓😌 يلا قوموا زبطوا إنجليزياتكم!😡 #EnglishTips #SelfImprovement #DecemberVibe 🙌🏻