Zeinb Drebati's Recent LinkedIn Posts

شو اللي صاير بـ لينكدإن مؤخراً؟ عنجد صار أقرب لفيسبوك من منصة مهنية… صور شخصية مع اقتباسات، أدعية ومنشورات عاطفية، قصص مبالغ فيها الـ engagement، محتوى ماله أي علاقة بالشغل أو الاختصاص وين المحتوى الحقيقي؟ وين فرص العمل الحقيقية؟ وين النقاشات المهنية المفيدة؟ حرفياً عم ننقّب لحتى نلاقي بوست مفيد بين كل هالضجيج. هل المشكلة بالخوارزمية؟ ولا المستخدمين؟ ولا لينكدإن نفسه عم يتحول لمنصة social media عادية؟

بـ بداية أي رحلة بصناعة المحتوى، في فكرة واحدة تقريباً الكل بيصدقها إنه لازم نكتب بطريقة “مثالية” حتى نُؤخذ على محمل الجد. بس مع الوقت، بتكتشف أنه المشكلة ما كانت بقلة الاحترافية… بل بزيادة التصنّع لأنه المحتوى الحقيقي ما بينجح لأنه منمّق، بينجح لأنه واضح، صادق، وقريب من الناس. و ببساطة: الناس ما بتتفاعل مع الكمال… لا بتتفاعل مع الشيء اللي بتحسّه حقيقي، فإذا كنت عم تشتغل على تطوير محتواك، بلّش من هون وخفّف “الفلترة”… وقرّب أكتر لصوتك الحقيقي. شاركوني رأيكم شو أكتر فكرة كنتوا مصدّقينها عن كتابة المحتوى وطلعت غلط؟ 👇

يبدو أن سلسلة "البحث عن عمل في 2026" انتهت أسرع مما توقعت 😄 بعد فترة مليانة بالمقابلات، المواقف الغريبة، والدروس الكثيرة… متحمسة شارك أني بلشت مرحلة جديدة كـ Social Media & Digital Marketing Specialist مع Let’sOps دخولي لهاد المجال خطوة مختلفة ومهمة بالنسبة إلي، خصوصاً لأنه بيفتحلي باب لتجربة قطاع جديد بالكامل والتعلّم أكثر عن عالم التقنية، الخدمات الرقمية، وتسويق حلول B2B. ممتنة لكل تجربة مررت فيها بالفترة الماضية، حتى المواقف الغريبة بالمقابلات، لأنها كانت جزء من الطريق لهون، ويبدو أن المحتوى القادم على LinkedIn، رح يصير مليان دروس وتجارب من داخل العالم التقني بداية جديدة… وإن شاء الله تكون خطوة كبيرة للأمام 💜

بـ كتابة المحتوى، في هوس غريب بالنصائح متل أفضل وقت للنشر، عدد الكلمات، شكل الهوك، وطريقة كتابة السطر الأول… بس نادراً ما حدا يحكي عن الأساس، والفكرة أنه في محتوى بينكتب صح بكل المقاييس… ومع ذلك، ما بيترك أي أثر. وفي محتوى بسيط جداً، بس فيه فكرة حقيقية… وبيوصل لآلاف الناس، لأنه بالنهاية، الناس ما بتتفاعل مع التقنيات بتتفاعل مع المعنى. لهيك قبل ما تطوّر أسلوبك اسأل حالك هل عندي شي فعلاً يستحق يُقال؟

في نوعين من المحتوى محتوى مرتب وذكي… ومحتوى بخليك توقف وتفكر، والمشكلة أنه أغلبنا بركّز على الأول، وبيستغرب ليش التفاعل ضعيف. الناس ما بتدخل وبتقرأ لتنبهر… بتدخل لتشوف حالها، أفكارها، ومشاكلها، لهيك، قبل ما تسأل اذا هاد المحتوى منيح، اسأل اذا هاد المحتوى رح يحسس حدا بشي؟

إذا بتشتغل متلي بكتابة المحتوى أو السوشال ميديا… رح خبركم يلي لاحظته مؤخراً في فكرة كنت مقتنعة فيها لفترة إنه كل ما كان المحتوى أبسط… كان أقوى وهاد الشي صحيح… بس مو دائماً لأنه في نوع محتوى، إذا بسّطته زيادة عن اللزوم… بتخسره وطبعاً مو لأنه معقد… بل لأنه بحاجة فهم حقيقي قبل ما ينكتب، وهون المشكلة مو بالبساطة… المشكلة لما تتحول البساطة لسطحية. لأن لما تختصر فكرة لدرجة تفقد معناها، أو تستخدم كلمات عامة لتهرب من شرح شيء ما فهمته عالآخر هون القارئ ما رح يقول "واو قديش المحتوى واضح"… رح يحس إنه في شي ناقص، ومع الوقت، هاد النوع من المحتوى ما بيبني ثقة… حتى لو كان سهل وسريع. الشي اللي عم أرجع أكتشفه بهالفترة إنه في محتوى لازم ينفهم قبل ما ينكتب… مو بس ينكتب بطريقة حلوة

مرحبا 🌸 عم حاول أعمل Mapping لشركات تقنية بالمنطقة سواء ضمن سوريا أو دول الخليج لأنه خلال الفترة الأخيرة، صار عندي اهتمام أعرف أكثر عن الشركات الناشئة والمتوسطة يلي عندها منتجات فعلية (مش مجرد أفكار)، خصوصاً يلي عم تشتغل على منصات رقمية أو أنظمة داخلية أو منتجات تقنية أو حتى عندهم تطبيقات مثل يلا غو وما شابه ذلك فـ إذا بتعرفوا شركات بهالمواصفات (أو حتى شركتكم) ياريت تذكروا اسمها أو تعملوا Tag من فضلكم، حابة أتعرف على المشاريع الموجودة بالسوق بشكل أوسع وأفهم كيف عم تبني منتجاتها اليوم أي ترشيح رح يكون مفيد جداً لمشروعي🙏

بعد الاستطلاع الأخير… أغلب الأصوات كانت لـ الفكرة 👀 وبصراحة؟ ما بعتقد في عنصر واحد لحاله بيصنع محتوى ناجح، لأن المحتوى الناجح عبارة عن حلقة متكاملة. الفكرة تجذب الانتباه، والـ Hook يخلي الشخص يكمل، والتصميم بساعد يوصل الرسالة بشكل أوضح، وغياب أي عنصر منهم… ممكن يضعف المحتوى كله، لكن برأيي في عنصر كثير ناس تتجاهله رغم أهميته وهو البساطة، لأنك ممكن تمتلك فكرة قوية وهوك ممتاز مع تصميم مرتب لكن إذا كان المحتوى معقد، أو عم يحاول يبدو أذكى من اللازم فالناس غالباً رح تكمل scrolling. وبالنهاية… المحتوى الناجح مو المحتوى يلي يبهر الناس فقط، بل يلي بخليهم يفهموه بسهولة ويحسوا إنه قريب منهم

إذا العميل ما فهم عليك بالمحتوى التقني… غالباً لأنه المحتوى انكتب ليستعرض… مو ليوصل الفكرة فعلاً، وهي واحدة من أكثر الأشياء اللي لاحظتها مؤخراً كـ كاتبة محتوى بالمجال التقني، في شركات عم تكتب محتوى مليان مصطلحات: Infrastructure Scalability CI/CD Cloud Architecture Automation وبعدها بتستغرب ليش هي الناس ما بتتفاعل مع إنه المشكلة مو بالخدمة أصلاً، المشكلة بطريقة شرحها لأنه العميل ما بده يحس حاله داخل محاضرة تقنية 😅 هو بده يفهم كيف هالشي رح يحل مشكلة عنده؟ كيف رح يوفر وقت؟ كيف رح يمنع مشاكل؟ كيف رح يساعد الشركة تكبر بدون فوضى؟ وهون الفرق بين محتوى يحاول يبان ذكي… ومحتوى بخلي العميل يوثق فيك. وهذا بالضبط النوع من المحتوى اللي عم نحاول نبنيه مع Let'sOps، محتوى تقني… بس مفهوم، حقيقي، وقريب من مشاكل الشركات فعلاً، وبصراحة؟ بشوف أنه المحتوى التقني بصير أكتر تأثير لما بيجمع بين الوضوح واللمسة الإنسانية، مو لما بيكتفي بالمصطلحات بس😄 أصدقائي التقنيين وخبراء المجال شو أكثر شيء بيزعجكم بالمحتوى التقني اليوم؟

أنا كـ شخص بيشتغل بمجال الكتابة والماركيتنغ خليني خبركم ليش اشتريت كتاب "Sell Like Crazy" من أول إعلان؟ لأنه هاد الكتاب مو بس كتاب… هو درس بـ علم النفس + التسويق + المبيعات وأكيد عندي مجموعة أسباب حابة شارككم فيها 1️⃣ العنوان شدني مباشرة يعني بيع بشكل جنوني، فـ إذا عندك طموح ترفع مبيعاتك أو تبلش مشروعك، العنوان وحده كافي ليشعل فضولك. 2️⃣ الإعلان استهدفني بدقة لأنه التسويق اليوم ذكي جداً، والإعلان وصلني وقت ما كنت محتاجة فيه حل لمشكلة المبيعات أو البيزنس والدماغ قرأه كشيء مخصص الي شخصياً وقررت اشتري بدون تردد. 3️⃣ صبري سوبي سلطة ومصداقية وهاد الرجل مشهور بـ عالم التسويق، مؤسس وكالة King Kong وظهر في Shark Tank ولأنه النجاح الشخصي والخبرة العملية بتعطي ثقة كبيرة يعني إذا نجح معاه، ممكن ينجح معي 4️⃣ الإعلان حلّ ألم محدد، من خلال تشخيص المشكلة كيف ببيع أكثر؟ كيف ضاعف دخلي؟ والكتاب عطاني خطوات عملية، والدماغ تحرك بسرعة لحتى يتخذ القرار. 5️⃣ سهولة الشراء كان في سهولة بالشراء زر واحد، رابط مباشر، خطوة سهلة، فـ القرار صار أسهل وأسرع هي الأسباب دفعتني اشتري الكتاب، وهيك نحنَ منشتري بالمشاعر وليسَ بالمنطق، وهاد يلي بحاول احكي عنه دائماً بـ منشوراتي علم النفس التسويقي يلي هو أساس التسويق الصح.

في شركات بتصرف آلاف الدولارات على التسويق... وبتنسى أهم عنصر فيه. لما منشوف حملة تسويقية ناجحة أو محتوى حقق نتائج قوية، أول شيء منسأل عنه عادة مين كتب المحتوى؟ مين عمل الاستراتيجية؟ مين كان مسؤول عن التسويق؟ بس نادراً ما حدا يسأل كيف كانت بيئة العمل يلي طلع منها هاد الشغل؟ ومع الوقت، صرت مقتنعة أنه جودة المحتوى والتسويق ما بتعتمد فقط على مهارة الأشخاص، بتعتمد كمان على البيئة يلي عم يشتغلوا فيها، لأنك ممكن توظف أفضل كاتب محتوى، وأفضل مسوّق، وأفضل مصمم وتعطيهم كل الأدوات يلي بيحتاجوها، وبالنهاية تطلع النتائج أقل من المتوقع. وطبعاً مو لأن الفريق مو شاطر بل لأن البيئة نفسها ما عم تساعدهم ينجحوا لأن المحتوى الحلو ما بينولد من الفراغ، بينولد من نقاشات، من تبادل أفكار، من مساحة آمنة تخليك تقول رأيك حتى لو كان مختلف، ومن فريق بيعرف إن الهدف مو إثبات مين الصح... الهدف إننا نوصل لأفضل نتيجة. برأيي، كتير من الأفكار التسويقية الناجحة ما كانت الأذكى، كانت ببساطة الأفكار يلي انسمحت إنها تنحكى، وكتير من الأفكار الرائعة ماتت قبل ما تشوف النور... مو لأنها سيئة بس لأنه ما كان في بيئة تسمعها. وأكيد المحتوى مو مجرد كلمات والتسويق مو مجرد حملات، بالنهاية، هني انعكاس مباشر للناس والثقافة وبيئة العمل الموجودة خلفهم. ويمكن أفضل شيء تعلمته خلال الفترة الأخيرة... أنه بيئة العمل الجيدة مو رفاهية هي عامل أساسي بالنجاح، وبالراحة النفسية، وبجودة الشغل نفسه، وممتنة فعلا إني عم عيش هالتجربة اليوم مع أشخاص يؤمنوا بالتعاون والاحترام قبل أي شيء آخر

ببداية رحلتي بمجال المحتوى، كنت مفكرة أنه المطلوب مني شيء واحد فقط هوي إني اكتب، بس مع الوقت اكتشفت أنه الكتابة هي الجزء الأسهل، لأنه قبل ما تكتب... لازم تفهم مين عم تخاطب؟ شو المشكلة يلي عم يحاول يحلها؟ ليش ممكن يهتم أصلاً بالمحتوى؟ وشو الهدف من كل كلمة عم تنكتب؟ لهيك كل ما تعمقت أكثر بالمجال، كل ما اقتنعت أكتر أنه كاتب المحتوى القوي مو الشخص يلي يعرف يركب جمل جميلة فقط، هو الشخص يلي بيفهم التسويق، وبيفهم الجمهور، وبيفهم كيف الناس تفكر وتقرر وتتفاعل. طبعاً مو المطلوب من كاتب المحتوى يكون خبير بكل شيء، لكن كل ما فهم الصورة الأكبر... كل ما صارت كتابته أقوى وتأثيرها أكبر.

كل فترة بيطلع سر جديد للمحتوى الناجح… مرة بقولوا لازم Hook معيّن، ومرة في قالب محدد، ومرة في طريقة كتابة مضمونة للتفاعل. وبرأيكم… شو أهم عنصر فعلاً بالمحتوى الناجح؟👇

أكبر خطأ بالمحتوى؟ إنك تحاول تبين قديش أنت بروفيشنال، يعني بدل ما تركز على قدّيش القارئ رح يفهم. وبمجال التقنية تحديداً، سهل كتير نغرق بالمصطلحات والتفاصيل والميزات، بس الحقيقة؟ المستخدم ما رح يهتم إذا كان المنتج عم يستخدم أحدث التقنيات ولا رح يهتم بعدد الميزات الموجودة فيه، هو رح يهتم بشيء واحد بس كيف رح يساعدني هالمنتج؟ وخلال شغلي بـ Let'sOps، من أكثر الأشياء يلي تعلمتها إن تبسيط الفكرة أصعب بكتير من شرحها لأن أي شخص قادر يضيف تفاصيل أكثر بس مو أي شخص قادر يحذف التعقيد ويوصل الرسالة بأبسط شكل ممكن، لهيك لما راجع أي محتوى، ما بسأل إذا هالمعلومات صحيحة؟ بسأل إذا أي شخص رح يفهمها من أول مرة؟ لأن المحتوى الناجح مو يلي يخلي الناس تقول واو، الكاتب شاطر، المحتوى الناجح هو يلي يخلي الناس تقول فهمت

الدنيا عيد… وأنا مسافرة 😅✈️ بس ما بعرف بعّد عن الأرقام والنتائج حتى بالعطلة، وأنا عم راجع نتائج شهر أيار مع Start Institution كان عندي ملاحظة واضحة جداً أنه المحتوى يلي بينجح فعلاً… مو دائماً لازم يكون احترافي، غالباً هو المحتوى يلي بيفهم الناس أكثر خلال شهر واحد فقط 2 مليون مشاهدة، +34 ألف تفاعل ومئات آلاف المشاهدات على عدة منشورات، وكل هاد أكدلي شغلة بآمن فيها أكثر يوم بعد يوم الناس ما بتتفاعل مع الكلمات فقط بل مع الشعور يلي عم تعطيها ياها الكلمات. لهيك دائماً بحاول ركز على الفضول، المشاعر، طريقة تفكير الجمهور، والبساطة لأن حتى أقوى فكرة… إذا كانت معقدة أو ثقيلة أكثر من اللازم، الناس ما رح تكملها وهون يجي دور علم النفس التسويقي بالمحتوى 👀 إنك تعرف ليش الناس عم تنقر؟ ليش تكمل قراءة وليش عم تحفظ منشور وتبعته لغيرها؟ المحتوى مو مجرد كتابة هو فهم للبشر أولاً 🤍 عيد مبارك 🥰

إذا كنت كاتب محتوى وعم تشتغل بالمحتوى لشركة تقنية فأنت ما عم تكتب بوستات بس، أنت عم تترجم أشياء معقدة وتحولها لـ قرارات مفهومة وهون الفرق الكبير. لأنه كثير شركات بتظن أنه المشكلة في التسويق… بينما المشكلة الحقيقية أحياناً تكون في أنه العميل أصلاً ما عم يفهم قيمة يلي عم تقدمه. مثلاً… شركة تقدم DevOps أو Cloud Infrastructure أو حلول تشغيل تقنية… وإذا كان المحتوى فقط مليان بمصطلحات مثل: Scalability Infrastructure Automation CI/CD Monitoring بدون ربطها بألم حقيقي عم يعيشه العميل… فأنت ما عم تشرح الخدمة… أنت بس عم تعيد تسمية المشكلة لأنه العميل ماعم يبحث عن أفضل بنية تحتية، هو عم يبحث عن ليش السيرفر ينهار وقت الضغط؟ ليش تكلفة الكلاود عم ترتفع كل شهر؟ وليش كل إطلاق جديد يتحول لأزمة؟” وهون يبدأ المحتوى الحقيقي لأنه المحتوى التقني الناجح ما بيشرح التقنية أولاً بل يشرح الخسارة الناتجة عن غيابها. وهاد بالضبط النوع من المحتوى يلي عم نحاول بناءه مع Let'sOps 💜🥰 تابعونا إذا كنتوا من المهتمين بالأمور التقنية: https://lnkd.in/dt9c_AZG

في شركات بتبني المنتج… وفي شركات بتخلي المنتج يشتغل فعلاً. المشكلة يلي عم نشوفها كثير مع الفرق التقنية اليوم مو بـ الكود المشكلة في “ما بعد الكود” وهيي مثل إطلاقات بطيئة أو غير مستقرة، أعطال مفاجئة وقت الضغط، فواتير سحابية عم تكبر بدون وضوح، أنظمة صعبة التوسع والمراقبة، وفوضى تشغيلية بتكبر مع نمو الشركة، وهون بيجي دور Let’sOps بـ كيف نخلي البنية التحتية تشتغل مثل ما المفروض تشتغل بثبات، أمان، وسرعة 💪🏽💜 فـ إذا كنت Founder أو CTO أو مسؤول عن فريق تقني والموضوع هذا عم يلمسك بشكل مباشر… بيسعدنا نشارككم قريباً محتوى عملي عن مشاكل التشغيل اللي بتكلف الشركات آلاف الدولارات بدون ما تنتبه، وأخطاء DevOps الشائعة في الشركات النامية، وكيف تبني بنية تقنية قابلة للتوسع بدون تعقيد زائد تابعوا الصفحة إذا حابين تشوفوا هذا النوع من المحتوى 👇

أكبر خطأ ممكن يوقع فيه كاتب المحتوى بـ الشركات التقنية أنه يكتب للمنتج… وينسى الإنسان يلي رح يشتري هاد المنتج وهاد شيء عم لاحظه كثير، خصوصاً بـ شركات الـ Tech و DevOps. وأنت كمسؤول محتوى أو تسويق، من السهل أنه تنجرف ورا المصطلحات متل الكلاود أو الاوتوميشن وتحس أنك عم تشرح الخدمة بشكل ممتاز… بس العميل ما بفكر بهي الطريقة من الأساس، لأنه ما بفيق الصبح وبقول أنا محتاج لـ تحسين الـ Infrastructure، هو بقول ليش الإطلاق عم يتأخر كل مرة؟ ليش الأعطال عم تظهر وقت الضغط بس؟ ليش تكلفة السيرفرات عم ترتفع بدون فهم؟ ليش الفريق التقني دايماً بـ وضع إنقاذ؟ وهون عم يبلش دورنا الحقيقي لأنه نحن ماعم نكتب لنشرح التقنية فقط… عم نكتب لنربط التقنية بالخسارة، بالقرار، وبالنتيجة، وهذا بالضبط يلي عم نشتغل عليه مع Let'sOps 💜 خلال الفترة القادمة رح نشارك محتوى عملي عن مشاكل التشغيل، أخطاء DevOps، والبنية التقنية التي قد تكلف الشركات آلاف الدولارات بدون أن تنتبه. لهيك إذا كنت مهتم بالمحتوى التقني الحقيقي أو عم تدير شركة تواجه هذه التحديات… تابع صفحة شركتنا Let'sOps لأنه القادم رح يكون أقرب لواقع الشركات… وأبعد بكثير من مجرد بوستات عابرة 💜

من فريق عمل Let'sOps كل عام وأنتم بخير 💜🐑

مقابلات العمل صارت لاختبار المهارات... ولا لاختبار الصبر؟ سؤال خطر ببالي بعد أكثر من تجربة مرقت ضمن فترة البحث عن عمل، لأن بعض عمليات التوظيف اليوم صارت تشبه ماراثون أكثر من كونها مقابلة عمل، مقابلة أولى ثم مقابلة ثانية ثم مهمة ثم مقابلة مع الإدارة ثم انتظار ثم انتظار أكثر وأحيانا... بدون أي رد أو رسالة اعتذار مختصرة بعد أسابيع. الموضوع مو أن الشركات ما لازم تتأكد من اختيارها بالعكس. التوظيف قرار مهم للطرفين، لكن برأيي، في فرق بين عملية توظيف مدروسة... وعملية توظيف تستهلك وقت وجهد المرشح بدون مبرر واضح، خصوصا لما يكون المرشح موظف أصلا، وعم يقتطع من وقته وجهده ليحضر للمقابلات والاختبارات. ويمكن الرأي مو شعبي... لكن كل ما كانت عملية التوظيف أبسط، أوضح، وأكثر احتراماً لوقت الناس... كل ما أعطت انطباعا أفضل عن الشركة نفسها لأن تجربة المرشح تبدأ قبل التوظيف مو بعده. (طبعاً تذكرت هالشي لأن اليوم في شركة ردتلي خبر بالرفض بعد 3 أشهر ونصف من التقديم 😁)

من فريق Let'sOps، نسأل الله أن يجعله عاماً مباركاً عليكم وعلى أعمالكم 💜