Mahmoud Nader's Recent LinkedIn Posts

قبل بداية السنة بفكرك أن مشكلتك كموظف مش أن يتم تقييمك أنك ضعيف قد ما المشكلة أنك شايل زيادة بالتالي تحس أنك مضغوط تتحمل شغل 3 اشخاص و بعدين يتم اتهامك أنك مش منظم ومش قد الضغط والشغل قبل ماتلوم نفسك حط حدود و متضغطش نفسك في شغل زي دا نصيحتي ليك دور علي مكان تتطور فيه من نفسك فعلا – فيه موظفين بتشتغل بضمير عندها طاقة و دماغ بتبتكر – مش موجود فيه لف و دوران – مدير دايما بيدعمك وبيحفظ حقوقك – فيه هيكل اداري محترم مش اي عشوائية في توزيع المهام وخلاص

مهم جداً أنك في أي مكان بتشتغل فيه أسعى تكون الأعلى قيمة مش الأعلى صوتا. القيمة بتسيب أثر أكبر من الضوضاء و المشاكل ؛ هي اللي بتخلي الناس فاكرة ومقدّرة اللي بتعمله فعلاً. القيادة مش بس مسمى أو Title على كارت؛ القيادة بتبان في المواقف، في طريقة اتخاذ القرار، وفي تأثيرك اليومي على الفريق والنتايج. اشتغل على بناء قيمة حقيقية: طوّر مهاراتك، قدم حلول، وخليك شخص يُعتمد عليه. كده هتكون قائد حتى لو ماخدتش اللقب الرسمي.

في عالم الشغل النهاردة، لازم يكون عندك فكرة عن بعض الحاجات المهمة اللي بتفرق في تقديم نفسك. لما تيجي تقدم على وظيفة، فيه أربع مفاهيم لازم تكون عارفها. CV (Curriculum Vitae) - Resume - Biography- Portfolio. هنتكلم عن كل واحد فيهم بشكل سهل وبسيط. 1. CV (Curriculum Vitae): ده مستند شامل بيحكي عن تفاصيل مسيرتك المهنية بالكامل بكل شئ. فيه كل حاجة من خبراتك، تعليمك، مهاراتك، والتدريبات اللي شاركت فيها والكورسات اللي أخدتها. يعني هنا بتدي صورة كاملة عن "أنت مين". 2. Resume : الـ Resume هو الأختصار الأنيق. بيكون مختصر ومرتب، عشان يركز على أهم مهاراتك وخبراتك اللي تناسب الوظيفة اللي انت مقدم عليها فقط. صفحة أو اثنين تكون كفاية، وده عشان تشد انتباه اللي بيعين بسرعة 3. Biography : السيرة الأدبية بتكون كأنك بتحكي قصة حياتك. فيها تفاصيل عن خلفيتك، إنجازاتك وآرائك. تُستخدم في السياقات الأكثر شخصية 4. Portfolio : ده عبارة عن معرض لأعمالك! لو شغلك في مجال إبداعي، زي التصميم أو الكتابة أو الماركتنج، في الـ Portfolio بتظهر شغلك بشكل واقعي. يعني دايماً خلي عندك واحدة جاهزة للعرض! كل مستند له هدفه وطريقة استخدامه. باختلاف وظيفتك و كمان نوع الوظائف اللي بتقدم عليها حاول تميز بينهم واختار الأنسب لكل موقف

اكبر مشكلة لدي اي بني ادم هي إننا عايزين نعمة بدون " مُنغصات " و أول ما تيجي المًنغصات بنفشل في امتحان الشكر .. و تبقى الحاجة اللي كنت بتبكي ليل نهار علشان تجيلك بقت هي الحاجة اللي بتتمنى زوالها لمجرد إنها جت بشوية مُنغصات و ده طبيعي جدًا . ربنا بيستجيب لنا .. و بيكرمنا .. بس إحنا اللي مُتخيلين الدنيا زي الأفلام كل حاجة بتيجي سهلة و على المزاج بالظبط، خلي بالك تكون بتتبطر على نعمة في حياتك لمُجرد إن فيها مُنغصات لأن في قصة قصيرة بتقول : نسي شكرها ففقدها . ( و الفقد مش ضروري فقد النعمة .. و لكن فقد لذتها ) . علي سبيل المثال - يارب شغل في أي مكان، يارب أي شغل، يجي الشغل بس، و تشتغل، و مع الوقت : شغل مُقرف مش مرتاح مواصلات و بهدلة ! طيب لو الشغل قريب من البيت : شغل مُمل، حاسس اني مش شايف الدنيا ! طيب لو الشغل جوا مصر : عايز اسافر بقى ، مش لاقي نفسي هنا . طيب لو الشغل برا مصر : تعبت من الغربة و حاسس إني ألة بتجيب فلوس . طيب لو شغال في مكان تحت إدارة حد : نفسي اشتغل لوحدي، زهقت من إن حد هو اللي بيديني أوامر . طيب لو شغال لوحدك : كان نفسي ابقى شغال في مكان و متحملش كل المسؤليات دي . لو انتا في اي مرحلة من المراحل دي لازم تعود نفسك علي جملة واحدة مفيش غيرها "الحمد لله "

اعتبرها مجرد نصيحة بلاش تكتب أو تخلي حد يكتبلك حرف واحد في الـ CV أو لينكدان من غير ما تقرأ وتتأكد إنه صح ومطابق للواقع.. بيبقى شكلك وحش جدًا في الانترفيو وبتحرج نفسك جدًا.

من المواضيع المهمة جدا هي Layers Of HR واللي بتوضحلك ان الموضوع مش عبارة عن مرتبات وتعيينات و ملفات فقط ال Scope اوسع بكتير الحقيقة إن الـ HR “طبقات”… وكل طبقة بتبني اللي بعدها. بس المشكلة إن شركات كتير بتحاول تقفز لـ Strategic HR وهي لسه بتعاني في الأساسيات: بيانات ناقصة، سياسات غير واضحة، وتجربة موظف “عشوائية”. الصورة دي بتلخص “Layers of HR”… بس خليك واخد بالك من نقطتين مهمين: 1. مش هتعرف تعمل Workforce Planning محترم من غير HRIS وAnalytics شغالين صح. 2. الاستراتيجية من غير تنفيذ قوي = عرض PowerPoint حلو…لكن هيبقي مفيش أثر. لو عايز تحول HR لـ HRBP حقيقي: ابدأ بتثبيت القاعدة (Tech + Core Processes)، بعدها فعّل Talent & Engagement، وساعتها الاستراتيجية هتبقى “قرار” مش “شعار”. HR بيتبني على 5 طبقات: Technology → Core Processes → Talent → Engagement → Strategic HR نبدأ بالقاعدة 1 ): HR Technology HRIS / ATS / LMS / Analytics من غير داتا… مفيش قرار. ومن غير قرار… مفيش استراتيجية. ثم 2) Core HR Processes Payroll — Benefits — Compliance — Policies دي “السلامة التشغيلية” بتاعة HR. لو فيها ثغرة… كل اللي فوقها هيقع. ثم 3 ) Talent Management Recruiting — Onboarding — Performance — L&D هنا بتبدأ تحوّل التوظيف من “سد عجز” إلى “بناء قدرات”. 4) Employee Engagement Employee Experience — Wellbeing — Culture & Values — Inclusion المعيار هنا: هل الموظف حاسس بالإنصاف والمعنى؟ ولا مجرد حضور وانصراف؟ Strategic HR (5 Workforce Planning — Talent Strategy — Leadership Dev — Succession دي قمة الهرم… ومش بتشتغل من غير قاعدة قوية تحتها.

احنا بنعيّن الموظف اللي يحل المشكلة ويقولنا نعمل إيه، مش الموظف اللي نحركه بالريموت ونفكر له يعمل إيه. ستيف جوبز قال جملة شهيرة: “إحنا مش بنوظف الأذكياء علشان نقولهم يعملوا إيه، إحنا بنوظفهم علشان هم يقولولنا نعمل إيه.” كل مرة تلاقي إنك محتاج تفكر في الحل، وتوجّه الموظف للحل، وهو مش بيشغل دماغه ومستني منك الأوردر… اعرف على طول: يا إما إنك اخترت غلط، يا إما إن منهجيتك في الإدارة مفيهاش مساحة تخلي الناس تفكر، ومفيش صلاحيات حقيقية الناس تقدر تتحرك من خلالها من غير ما ترجعلك في كل صغيرة وكبيرة.

بعد سنين شغل خليني اؤكدلك بأن كيلو ال Technical Skills بجنيه و جرام ال Soft Skills بدهب بس خليك فاكر أن تربيتك بألماظ الدنيا كلها أهم شئ أنك تكون متربي وتسيب سيرة كويسة

أكتر حاجة بتعلي قيمتك في الشغل، سواء لسه موظف أو مدير ، مش إنك أذكى واحد ولا عندك مواهب خارقة. القيمة الحقيقية إن التعامل معاك يكون سهل. ترد بسرعة، ما تكبّرش المواضيع، ما تعملش دوشة على الفاضي ، وتحب تسهّل الشغل على اللي حواليك. تساعد غيرك من غير ما تستنى مقابل، وتبقى مرن وجاهز في أي وقت. في ناس بتحاول تلمع نفسها، بس في الآخر اللي بيسيّب أثر بجد… هو الشخص الهادي، المتعاون، واللي وجوده مريح في المكان.

الرزق نوعان .. رزق يطلبك و رزق تطلبه فأما الذي يطلبك فسوف يأتيك و لو على ضعفك و أما الذي تطلبه فلن يأتيك إلا بسعيك و هو أيضاً من رزقك فالأول فضل الله و الثاني عدل من الله

فيه فرق كبير بين العدل والمساواة، خصوصًا فيما يخص المرتبات. المساواة بتقول إن كل الموظفين اللي عندهم نفس المسمى في الشركة ياخدوا نفس المرتب، وده طبعًا مش صحيح. أما العدل فبيأكد إن كل واحد ياخد اللي يستحقه، سواء من خلال مجهوده أو اداءه ، خبراته، أو الشهادات اللي طور بها نفسه. لما تحط الزيادة السنوية، لازم يكون فيه نسبة ثابتة عشان مواجهة التضخم ودا شئ عادي، لكن لازم كمان يكون فيه نسبة متغيرة تعتمد على أداء كل موظف ومجهوده ونتائجه. هنا يبقي أنت حققت العدل العدل هو الأساس.

خلي بالك متكتبش في إعلان التوظيف Competitive salary إلا لو انت عامل Salary survey محترم ومتأكد ان المرتب بتاعك Competitive بجد، كمان على قد ما تقدر اكتب الـ Responsibilities الصحيحة اللي هيقوم بيها الموظف عندك بجد؛ بلاش تاخدها Copy من ChatGPT أو أي مكان بدون ما تراجعها وتتأكد انها متوافقة مع متطلبات شركتك. حاجات تبان بسيطة بس هي بتأثر على مصداقية شركتك وممكن تضيع مجهود شهور وتتفاجئ انك بتبعت الـ Job offer ويترفض أو الموظف يسيبك في أول 3 شهور ويضربلك الـ Recruitment cycle كلها وتضطر تبدأ من أول وجديد بسبب أخطاء كان من الممكن تفاديها بإنك تحافظ على الشفافية وتقول اللي انت هتعمله فعلاً وبس وتسيب الـ Candidate يقرر.

بشوف موظفين كتير ال CV عندها أطول من الشغل نفسه، مسميات كتير وصفحات كتير و شهادات اكتر بس لما تيجي للواقع الخبرة أقل من طول الـ CV الخبرة في اللي اتعمل بجد وفي اللي اتعلمته من الشغل، ممكن CV قصير بس صاحبه فاهم وبيشتغل صح وممكن CV طويل وكلام كتير بس من غير تأثير حقيقي في الاخر الشغل هو اللي بيبان مش الورق عشان كدا مش محتاجين ATS للسيفيهات محتاجين جهاز كشف الكذب عشان كل شخص ياخد حقه

مجرد نصيحة بلاش تشتري رضا الإدارة وتبيع ضميرك. لما الناس تعتبر التطبيل ذكاء… اعرف إن المكان بقى مريض ومش محتاج موظفين، محتاج جمهور. أوعي تبقي دهان بتتغطّى بيها قرارات كسرت ضهر غيرك. المناصب بتروح والمديرين بيتغيروا… وفي الآخر محدش بيفتكر مين كان “قريب من الإدارة”، لكن كله بيفتكر مين كان جدع ومين كان ملوش ثمن . واللي يفرّط في ضميره مرة… بيفضل يسدد الأقساط طول عمره لأن اللي بيطبل النهارده… هو أول واحد بيتباع بكرة.

أوقات الموظف بيستقيل عشان مبيتعلمش جديد والمكان مش بيضيف له، وأوقات عشان مش قادر يتوافق أو يتعايش مع البيئه المحيطة ، وأوقات لسوء الاداره في المكان. في كل مره كنت لازم بتتعلم درس مهم من المكان اللي اشتغلت فيه ودرس أهم وانت بتسيبه. -مفيش اسوء من انك تكون موظف لفتره كبيره ف مكان ومش راضي عن نفسك او دورك الوظيفي وخايف تتحرك!!! اللي رزقك بشغلك الحالي قادر يرزقك تاني وتالت بس انت حاول. -أفتكر دائماً "أن الخبره عمرها ما كانت بعدد السنين اللي قضتها ف مكان، الخبره بعدد التجارب اللي مريت بيها" ف طول ما انت بتجتهد وبتسعي ربنا هيفتح ليك سكك وأبواب بعدد الأنفس اللي بتتنفسها ما تخفش من الرزق الرزق جاي جاي، لو في حاجه لازم تخاف منها انك تستني قطر مش معاك تمن تذكرته ف حاول تجتهد عشان لما يجي رزقك، تكون جاهز له.

الترقيات والزيادات والتقدير للموظف لما بييجوا في وقتهم، بيكون أحسن بكتير من إنك تحاول تراضي الموظف بعد ما يكون فقد الأمل وخلاص قرر يمشي بدل ما تبذل مجهود خرافي عشان تِثني موظف عن الاستقالة.. ابذل نص المجهود ده في إنك تحسسه بقيمته وهو لسه معاك. " كل شئ في وقته افضل من بعد فوات الاوان "

من اكتر الدروس اللي الحياة علمتهالي ان ٩٠% من المشاكل بتعدي على خير أو بخساير طفيفة ومحتملة وان العكننة اللي بتعيش فيها لأيام بسبب توقع سيناريوهات سيئة هي أوهام بتنغص عليك حياتك لأن ٩٠% من السناريوهات المخيفة دي ما بتحصلش اصلا فبالتالي توقعك للبلاء بيضايقك في حياتك اكتر من البلاء نفسه نصيحة مخلصة = دع القلق وابدأ الحياة وأحسن الظن بالله

عيب أوي لما تعمل اعلان توظيف وتضييع وقت ومجهود مرشحين وتكاليف مواصلات واجازات و لبس فورمال وغيره وتأخيرات علي بداية الانترفيو وتوتر و يبقوا جايين كل تركيزهم و أمالهم يتقبلوا ثم تطلع في النهاية مش عارف انت بتدور علي أيه كويس

أسئلة لسه عليها علامات استفهام كتير لو Budget بتاعه الشركه أقل من المرتب الحالى للمرشح بتجيبه ليه الشركة وتعمل معاه انترفيو واتنين وتلاته !! ولو الشركه تكون طالبة سينيور لوظيفه وحضرتك جبت حد فريش مستغرب ليه إن الشغل مش بيتم صح !! ولو مش بتوفر مواصلات ولا بتدى بدلات رايح تجيب ناس من آخر الدنيا ليه ومتوقع يكملوا!! كلها غلطات مش منطقية سهل علي المرشح الأمور وخلي الموضوع واضح و اختار المرشح الانسب للوضع في شركتك وبس .

تذكرة لنفسي ولكم وسط سباق الـ LinkedIn.. عارفين إيه السعادة الحقيقية؟ مش الـ Promotion اللي مستنيها، ولا الشهادة اللي بتجري وراها.. رغم أهميتهم. السعادة هي إنك تدرك إن الدنيا دي بجد "لعب ولهو" زي ماربنا وصفها، ﴿ اعْلَمُوا أَنَّمَا الْحَيَاةُ الدُّنْيَا لَعِبٌ وَلَهْوٌ﴾.. الآية دي لازم تكون قدام عينينا وإحنا بنشير نجاحاتنا هنا. مش تقليلاً من تعبنا، بس عشان نفهم إن النجاح الدنيوي مش هو "المهم"، الأهم هو اللي هنروح بيه عند ربنا. وده مش معناه إننا منشتغلش، لا، بس معناه إننا مندّيش للأمور أكبر من حجمها لو ركزنا شوية، هنلاقي إننا بنعطي للأمور أكبر من حجمها: لو جات الوظيفة بنفتكر إننا ملكنا الدنيا.. وده مش حقيقي. ولو ضاعت فرصة بنفتكر إنها النهاية.. وده برضو مش حقيقي. في الآخر، أهم "Success Story" ممكن تحققها هي إنك تكون راضي وقريب من ربنا، ده لوحده "إنجاز" أكبر من أي مسمى وظيفي في العالم. النجاح في الشغل والشهادات حاجة تفرح، بس خلونا فاكرين إنها "وسيلة" مش "غاية" الدنيا محطة و المهم الختام ربنا يرزقنا وإياكم حسن الخاتمة

في الشغل حاول دايمًا تختصر الكلام، وما تدخلش تفاصيل حياتك وشخصيتك في كل حوار. خلّي شغلك هو اللي يبان، وسيب شطارتك هي اللي تتكلم عنك بدل ما تشرح كتير. بيئة العمل مش مكان فضفضة ولا صحوبية زيادة عن اللزوم، دي مكان إنجاز والتزام وحدود واضحة. كل ما كلامك يقل، قيمتك بتعلى، وكل ما تحافظ على مسافة محترمة، المشاكل بتبعد عنك. اشتغل بهدوء، واحتفظ بطبيعتك الحقيقية لناسها… برّه باب المكتب.

لو حصل المعجزة و اتبعتلك الفيدباك برفض بعدما حضرت انترفيو بسبب من الاسباب دي -انت Over Qualified -محتاجين حد اصغر فى السن شوية -مرتبك اعلى من ال Salary Range عندنا -محتاجين حد اشتغل فى ال Industry بتاعتنا -محتاجين حد سنوات الخبرة بتاعته اكبر شوية -مكان سكنك بعيد عن مقر الشركة تأكد أن ال HR مش شايف شغله كويس لانه لو راجع ال CVs وعمل Screening بشكل مهنى محترم مكنش جاب ناس لا تنطبق عليهم متطلبات الوظيفة وبعدين يقولهم الكلام ده لو انت HR و بتعمل الكلام ده فاسمحلى اقولك انت انسان مؤذى للناس وللمكان اللى انت شغال فيه لانك بتضيع وقت وفلوس ومجهود الطرفين.

هنصحك نصيحة سريعة كده وحطها في الاعتبار . مش شرط تشتغل حاجة بتحبها علشان تعرف تنتج وتترقى وتجيب فلوس! أغلب الناس ميعرفوش أصلا هما عايزين إيه علشان يحبوه أو لا، اللي نشأ في عائلة كلها دكاترة بنسبة كبيرة هيطلع دكتور مثلا وقس على ذلك المحاسبين والمهندسين. إلا لو اللي مجبش مجموع كويس فبيضطر يدخل حاجة تليق بمجموعه. المهم إنت تحاول تركز في الحاجة اللي قدامك، بلاش يحركك الشغف فقط ، ولكن يحركك الانضباط، ودي نقطة مهمة جدا جدا. الشغف بيروح وييجي وينفض لما الواحد مبيوصلش، لكن الانضباط إنك تلتزم؛ والالتزام يصنع المرء رغما عنه. دخلت أي كلية ؟ يبقى ركز في ورقتك وشوف مهاراتك واثقلها مع الوقت. مش لازم تكون اللي مفيش منه، لكن على الأقل مثابرتك بتعلمك وبترقيك لحاجة أكبر وتبرز فيك ما لم تره. مش كل الناس هتبقى مبرمجين ولا كل الناس هتبقى صناع محتوى فائقين. كل في مجاله، مهما كان مجالك إيه، إنت بس محتاج حد قديم يعلمك بكفاءة الخط اللي تمشي عليه؛ وتجتهد أيما اجتهاد علشان تعرف تواكب. وافتكر إن ده سعي واحتسبه لوجه الله، وإن شاء الله توصل لشيء يرضيك؛ مش شرط المبتغى اللي إنت حاطه في دماغك.

زمان … لما كانت ساعات العمل من 9 لـ 5 … مديرك كان هو اللي يراقب أدائك خلال ساعات العمل ومُجرد ما الساعة تدق الخامسة، فأنت حر تمامًا وعقلك بينفصل عن الشركة، وده كان بيخلي المجتمع يتحرك بإيقاع واحد (نخرج، نأكل، ننام ونستيقظ، نصلي معًا)، وبشكل لا واعي بيخلق لحظات حميمية ما بين أفراد المجتمع. إلى أن ظهرت فكرة ساعات العمل المرنة والعمل عن بُعد ومفهوم الإنجاز … وصاحب العمل قال لك يا سيدي تعالى الشغل وأمشي زي ما أنت عاوز أو تشتغل من البيت المهم الإنتاجية … وده ظاهريًا يبدو قمة الحرية، لكن فجأة وجدنا إن العمل تسرب ليملأ كل فراغ في حياتنا. ففي النظام ده عادي أنك ترد على إيميل في أي وقت وأنت جالس مع أسرتك، وأنت اللي بتراقب نفسك، وبما أنك عاوز تثبت كفاءتك، فغالبًا هتجلد ذاتك وتشتغل ساعات أطول وفي الإجازة كي لا تشعر بالذنب أو يتهمك أحد بالتقصير. يعني مثلًا … في أوقات السيزون المرونة معناها أنك تكون متاح للعمل طوال اليوم ومحدش هيحاسبك لو جيت الشغل الساعة الواحدة ظهرًا أو اشتغلت من البيت المهم تنجز. ومع النظام ده … كل واحد بقى له توقيته الخاص وساعات عمله الخاصة وبقى صعب أن تلتقي مع أحبابك، وده بشكل لا واعي فتت اللحظات الحميمية والزمن الجماعي وتعززت الفردانية. عارف الإشكالية الأكبر فين ؟ إن النظام ده يتعارض مع مفهوم المواقيت … إزاي ؟ أنت وقتك مش ملك عشان يكون مرن … وقتك مُقسم بمسامير شرعية كونية لا يمكن تغييرها. يومك محور ارتكازه ومركزه هي مواقيت الصلاة … يومك عبارة عن مواقيت صلاة يتخللها عمل وليس العكس، لكن في النظام المرن الإنتاجية والديدلاين هي والمركز، والصلاة هي العنصر المرن اللي ممكن ضغطه أو تأخيره ليتناسب مع سير العمل … وبالتالي العمل المرن يحول الصلاة من موعد مُقدس إلى مُقاطعة للتركيز. ومواقيت الصلاة مش موضوعة هباءً … دي مواقيت شرعية كونية مرتبطة بحركة الشمس ... يومك بيبدأ مبكرًا وينتهي مبكرًا، الليل سكن ولباس، وقت السحر، صلاة الفجر، أوقات أذكار الصباح والمساء، صلاة الضحى، ساعة الإجابة يوم الجمعة، انتظار الصلاة … لكن نظام العمل المرن يتجاهل الشمس تمامًا ويتيح لك أن تعمل في أي وقت، المهم تنجز. وده ممكن يؤثر على الفطرة البيولوجية اللي بنيت عليها العبادات، وهيأثر على عبادات زي صلاة الفجر أو قيام الليل وأوقات الأذكار اللي ممكن بشكل لا واعي تشتغل فيهم وتغفل عن فضائل هذه الأوقات ... يعني مع الوقت تفقد حساسية استشعار الأوقات المُباركة لأنك أصبحت تتعامل مع الوقت كوحدة قياس صناعية صماء. فمثلًا انتظار الصلاة، وما بين الأذان والإقامة، وبعد الصلاة … دي كلها أوقات عبادة وسكينة، لكن العمل المرن يقوم على مبدأ ملء كل ثانية، والموظف المرن دائماً في حالة جري للحاق بمهام متراكمة، وده بيخلي لحظات السكون والانتظار في الصلاة مصدرًا للتوتر بدلاً من الطمأنينة. كمان النظام ده بيقتل فكرة الجماعة ويعزز الفردانية، فأفضل الصلاة هي صلاة الجماعة، ولها وقت محدد يجتمع الناس فيه، كذلك صلاة الجمعة، صلاة العيد، الإفطار في رمضان، كلها شعائر تتطلب تزامن المجتمع، لكن مع العمل المرن بيكون صعب نجتمع لأن كل واحد أصبح له توقيته الخاص. الخلاصة … ساعات العمل المرنة ممتازة لو تملك سيادة على ذاتك … وإذا كنت تملك القدرة على قول لا، وعلى إغلاق هاتفك، وعلى رسم حدود مقدسة بين وقتك ووقت الشركة، فهي نعمة عظيمة … غير كده فهي قيد غير مرئي يجعلك موظف 24/7 وتظن أنك حر، وتدريجيًا هتلاقي نفسك بتصلي قضاءً، أو تجمع الصلوات، أو تصلي بلا خشوع، لأن ساعة الرأسمالية لا تتطابق مع مواقيتك الكونية المُقدسة.

الموضوع مش بالمظاهر . ولا بفطار رمضان. ولا بصور المناسبات. ولا بدورة الكورة الرمضانية. اشتغلت في مؤسسات كبيرة بتصرف على الاحتفالات أكتر ما بتصرف على تطوير الناس. واشتغلت في أماكن صغيرة جدًا ماكانش عندها أي فعاليات… بس كان عندها عدل واحترام ونظام واضح. والفرق كان واضح جدًا. ثقافة الشركة الحقيقية مش بتظهر في الصور اللي بتنزل. بتظهر في وقت الضغط. في وقت الخلاف. في وقت القرارات الصعبة. هل في عدالة؟ هل في تقدير للمجهود بعيدًا عن اللقطة الحلوة؟ الاهتمام بالموظف مش Event موسمي. مش صورة جماعية. مش بوست احتفالي. الاهتمام بالموظف بيبان في تفاصيل صغيرة يوميًا… تفاصيل محدش بيشوفها غير اللي جوه المكان.