Raheek Kanjo's Recent LinkedIn Posts

إذا عم بتساعد خبير عربي على صناعة المحتوى انتبه ما تغلط هالغلط يلي عملته أنا وكلفني شهر من سوء التفاهم عميل عم نشتغل مع بعض من سنتين تقريبًا بأحد الاجتماعات خبرني أنه حابب يعمل Masterclasses على لينكدإن بمجاله وأنا طبعًا شجعته، واقترحت عليه مواضيع وبدأنا بالتحضير للمحاور لمدة 4 أسابيع كل أسبوع ارجعله بخطة أفضل للماستركلاس وهو يرفضها بالآخر خبرني أنه مجاله لأن دقيق وصعب والخبراء فيه كتار على المنصة، فلازم تكون المعلومات يلي عم نناقشها (غير مسبوقة) هون وقفنا شوي وصرنا نتناقش نحن (ليش) عم نعمل هاد الماستركلاس؟ الهدف البعيد أكيد عميل محتمل لعميلي، يلي هو شخص ما عنده خبرة في هاد المجال وبدو يتعلم وهون أدركت أنه غلطي كان إني عم خبرو كيف يصنع هاد المحتوى بدل ما ضوّيلو على (ليش) ـ ليش انشر معلومة بحسّها بديهية؟ ↳ لأنه البديهي عندك .. ممكن يكون اكتشاف عند غيرك ـ ليش انشر وخلّي الناس تحكم عليي وتقول "مؤثّر"؟ ↳ خلّينا نقول "مُوثِّق" مو "مؤثّر" خبرتك بكل هالسنين ما بتستحق توثيق؟ وصدقني، الشخص يلي رح يحكم عليك أصلاً ليس من جمهورك المستهدف ـ ليش انشر وفي ناس أشطر مني وأكتر خبرة؟ ↳ لأنه الناس ما بتتعلّم بس من الأشطر بتتعلّم من يلي بيحكي بلغتها وبيشبهها. خبروني .. بتعرفو أسباب تانية بتمنع الخبراء العرب من صناعة المحتوى؟

"هالأسلوب ما بيناسب المحتوى التسويقي على لينكدإن." 🔴 سمعت هالجملة بعد بوست كتبته بالفصحى وخلّتني فكّر: أين الأدب من المحتوى التسويقي؟ وهل فعلاً أحدهما يضرّ بالآخر؟ (في جواب علمي بالآخر 😁) أول شي لازم نتّفق عليه: "الأدبي" مو يعني فصحى، ولا تنميق، ولا اقتباسات شعراء الأدبي يعني توظيف أدوات الأدب بأي لغة أو لهجة: 🔹 صورة يشوفها القارئ 🔹 إيقاع منسجم بين الكلمات والجمل 🔹 عاطفة يشعر فيها القارئ مثال سريع تشوف الفرق: عادي: "تطبيقنا يوفّر لك الوقت." منمّق: "انطلق نحو آفاق الإنتاجية مع حلّنا المبتكر." أدبي: "الساعة ٩ الصبح، فنجان القهوة برد، وقائمة المهام طويلة فتحت التطبيق، وبعد دقيقتين بس كل شيء منظم على مكتبي بالوقت والمهام" علميا، في نظرية بعلم النفس اسمها "الانتقال السردي" (Narrative Transportation) بتقول إنه لما القارئ ينغمس بقصة، بيتذكّرها أكتر وبيتأثّر فيها عاطفيًا أكتر، وبيقاوم الإقناع بشكل أقل. لهيك الأدب مو إكسسوارات للنصوص التسويقية أو البيعية الأدب هو أقصر طريق إلى قلب القارئ وبس هيك 🙋

تعال خبرك كيف ممكن لينكدإن يساعدك تتوسع لليوتيوب (إذا بتحب تتوسع طبعًا 😁) مؤخرا عم لاحظ أنه منشورات لينكدإن مادة دسمة جدًا لليوتيوب لكتير أسباب رح احكيلك ياها أنا قبل ما اتخصص في الكتابة التسويقية على لينكدإن اشتغلت 3 سنوات ك سكريبت رايتر فقط .. فمن خبرتي مع السكريبت، هو ما كتير بيختلف عن المنشورات يلي عم تكتبها يوميًا على لينكدإن السكريبت في أساسه بيعتمد على صوتك وأسلوبك الشخصي، وهالشي موجود بالمنشورات هوك؟ موجود سرد خفيف لطيف؟ موجود المعلومات والقيمة؟ موجود .. لازم 😁 أوك في أساسيات السكريبت طبعًا بتختلف ولكن .. إعادة تدوير بسيطة للمنشورات بتقدر تستفيد منها على اليوتيوب وتصورها خصوصًا أنه المحتوى التخصصي العربي مطلوب على اليوتيوب أيضًا والحقيقة بعرف شخص بيعمل هيك وهو Mohamad Jandali‏ .. ما شاء الله عليه محتواه مميز على يوتيوب ولينكدإن وأوقات بشوف منشور الو ع لينكدإن وبرجع بحضرو يوتيوب عادي لأن أسلوبه بالشرح مميز والحقيقة ألهمني اعمل هيك بمنشوراتي كمان 🤩 وبس هيك 🙋

بدأت اليوم بقراءة كتاب "أمة الدوبامين" .. هل مهم تقرأه أنت؟ الحقيقة موضوعه كنت عم فكر فيه الفترة الماضية كتير بسبب روتين حياتنا اليومي يلي بيتطلب تنبيه دائم مشاهدة مقاطع الفيديو القصيرة بكثرة فقدان قدرتنا على التركيز يعني زمان بالـ 2012 مثلاً كنت قادرة اقرأ حوالي كتاب أو 2 باليوم .. كان ما عندي مشكلة إني فرغ 6 لـ 7 ساعات من يومي للقراءة اليوم بعيّر مؤقت مشان أجبر حالي التزم بوقت معين .. وما يمضى اليوم بدون ما اقرأ شي أبدًا والحقيقة كان في فكرة بالكتاب كتير جذبتني وهي أنه كيف هاد التنبيه المستمر، (فرط الدوبامين) بخلينا نفقد قدرتنا على الاستمتاع بالمتع الصغيرة بالحياة متل المشي .. اللعب مع قطة (معلش أنا بحبهن 😄) ، حتى الكتابة البسيطة .. التعبير لأجل التعبير فقط موضوع مفيد جدًا .. وبتوقع كتير ناس حكت فيه، بحب اسمع منكن شو عندكن معلومات عنو؟

ولا كورس بالدنيا بيقدر يعمل منك كاتب الكورسات بتعطيك الخريطة بس ما بتعطيك المهارة ولا النَفَس الإبداعي الأساس بالكتابة شغلتين ما الهم بديل: 1️⃣ القراءة والتحليل الشخصي: يعني تقرا كل شي بيوقع تحت إيدك (إعلانات، مقالات، بوستات، وحتى لافتات الشارع) وتفكك النص بمخك: ليش هالسطر جذبني؟ كيف قدر هاد الكاتب يقنعني؟ 2️⃣ التجريب: يعني تكتب وتمسح، وتكتشف عيوبك وتصلحها بإيدك لحتى يطلع معك نص مرتب. أنا ماني ضد الكورسات .. بل ضد الاعتماد عليها بالمطلق الله يذكره بالخير الأستاذ Rami Badrah رامي بَدرَهـ كان يقلنا بمعسكر كتابة المحتوى أنه جزء كبير من نتيجة الكورس بيتوقف على جهدنا وتعبنا الشخصي وتطبيقنا العملي على القواعد يلي عم نتعلمها. هامش: هاد الكورس من الأستاذ رامي واحد من أهم الكورسات يلي أخدتها واستفدت منها بحياتي المهنية بالمطلق .. إذا ناطر من كورس مدفوع يمسك إيدك ويعملك مبدع ومحترف بدون ما تتعب بالبحث، والقراءة والتغذية البصرية اليومية.. فعم تشتري وهم الكورس ممكن يختصر عليك وقت بس التعلم الذاتي والجهد الشخصي هني يلي بيصنعوا اسمك ككاتب.