Yosra Alfatih's Recent LinkedIn Posts

رسميًا GCE 🔥 Google Certified Educator ◽ويمكن دي من أكتر الشهادات المميزه عندي لأنها ما كانت مجرد امتحانات، كانت تأكيد لحاجة أنا مؤمنة بيها من زمان و هي انو سوق العمل بيتغير و الانسان الشاطر لازم يتغير معاه. ◽كل اللي بيعرفني بيعرف اني متحيزة لي أدوات قوقل بشكل غير طبيعي من أول Google Workspace لحدي Gemini و NotebookLM و كل مميزاتهم اللي بتتحدث بصوره دوريه، و دا ما تحيز عاطفي لا لا لكن لانو دايمًا بحس إنهم سابقين الناس بخطوة و قادرين يدوني اللي عايزاه بالضبط. ◽ومع التغيير الحاصل في التعليم وسوق العمل، بقى واضح جدًا إنو المعلم و المدرب اليوم ما كفاية يشرحو كويس، لازم يعرفو: - كيف يستخدمو التقنية بذكاء - كيف يصممو تجربة تعليمية تفاعلية - كيف يوظفو الـ AI بدل ما يخافو منه - وكيف يخلو التعلم أسهل وأسرع وأكثر تأثيرًا وده بالضبط الخلاني أخد شهادات دي ◽ المميز فيها إنها ما بتركز على الأدوات بس لا لا بتركز على كيف تفكر كمعلم حديث كيف تدير الفصل، كيف تتواصل، كيف تبني محتوى، وكيف تستخدم التكنولوجيا لخدمة التعلم ما لمجرد الإبهار. ◽و أخيراً، أنا مؤمنة إنو أي زول في مجال التعليم أو التدريب وما بدأ يفهم أدوات الذكاء الاصطناعي والتقنية الحديثة حيتعب يواكب الفترة الجاية لانو التعليم الليله = تجربة + تفاعل + تقنية + فهم للإنسان. ✨ما شاركتا كل شهادة براها لانو كنت منتظرة اللحظة دي عشان أشاركهم سوا و أقول ليكم إني بقيت معلم معتمد من قوقل 🔥 نحن أحياء و باقون و للحلم بقية 🖤 أنا يسرى الفاتح مدرب تطوير شخصي ومهني و مساعد تدريس جامعي، تابعني للمزيد من النصائح عن التعليم و التطوير. #YosraAlfatih #Devolopment #LinkedinForSudan

💡 الناس بتفتكر إنو النجاح مسألة اجتهاد فردي بس و بتغفل عن حاجة مهمه ◽ الليله بتصادف ذكرى انضمامي لي Arab Data Hub | مجتمع البيانات العربي كقائد لمشروع مِراس المشروع الأعظم على الإطلاق اللي خدم 20+ جهه عشان تطلع فايده من بياناتها مجاناً 🔥 وصدقاً دي من الخطوات البعتبرها نقطة مهمة في رحلتي. ◽ دخلت المجتمع عشان أتعلم و أفيد و استفيد لكن لقيت فيه حاجات أكبر بكتير من مجرد معرفة أو مهارات و الموضوع كان أكبر من فرصة. ◽ لقيت علاقات مهنية وفرص، وتجارب، ومساحات، جربت فيه حاجات جديدة ما كنت متخيلة إني أعملها و واحدة من أهم الحاجات اللي رسخت عندي إنو البيئة بتفرق جداً يعني: ▫️ لما تكون وسط ناس بتتعلم، طبيعي تلقى نفسك بتتعلم. ▫️ لما تكون وسط ناس بتشارك الفرص، طبيعي تلقى فرص أكتر. ▫️ ولما تكون وسط ناس بتشجعك وتجرب وتغلط وتعيد المحاولة، بتلقى نفسك بتتقدم. ◽ عشان كده دايماً بقول اختيار البيئة الصح ممكن يغير حياتك المهنية أكتر من كورسات كتيرة لأنو في النهاية الإنسان بيتأثر بالناس اللي بقضي معاهم معظم وقته. ◽ ممتنة جداً لكل التجارب، والفرص، والأشخاص اللي عرفتهم في المجتمع، ممتنه لكل النجاحات اللي حققناها سوا علي مستوي المجتمع او المستوى الشخصي. ◽ و أخيراً انا حاليا بقيت مؤمنة أكتر من أي وقت تاني إنو وجودك في مجتمع داعم للنمو ما رفاهية دي واحدة من أسرع الطرق إنك تتطور وتنجز أكتر ف لو إنت هسي في بيئة بتشجعك تتعلم وتكبر، حافظ عليها ولو ما لقيتها لسه فتش عليها لأنو البيئة المناسبة مرات بتختصر عليك سنين كاملة من التخبط. ✨ أنا يسرى الفاتح مدرب تطوير شخصي ومهني و مساعد تدريس جامعي، تابعني للمزيد من النصائح عن التعليم و التطوير. #YosraAlfatih #Devolopment #LinkedinForSudan

💡أنا برضو عندي 24 ساعة… لكن يومي أطول ◽عشان تنجز حاجات كتيره ما بالضروره تكون مضغوط اليوم كلو، الفرق في تلاته حاجات بس: ▫️بداية اليوم بدري ▫️كتابه المهام ▫️ إدارة الأولويات و إداره الأولويات هي مربط الفرس ح اديكم ليها حل نهائي و مجاني🔥 ◽زمان كنت بحس اليوم قصير، مهما حاولت أعمل ما بلحق لحدي ما غيرت طريقتي و بقيت بخطط من بالليل لليوم الجاي، ف أول ما أصحى بكون محدده عايزه اعمل شنو و متين وببدا أشتغل عليهم وأنا لسه عندي طاقة وتركيز بدل اضيع طاقتي و انا بفكر انجز شنو و اخلي شنو. ◽و النتيجة انو اليوم بقى أوضح و التشتت قل و الإحساس بالإنجاز بقى حقيقي لاني مركزه علي اولوياتي بس ما سايبه نفسي لي زحمة اليوم تسوقني كيفما اتفق، ف المشكلة ما في الوقت المشكلة في كيف بتستخدمو. ◽وعشان كده عملت كتيب “إدارة الأولويات في زمن التشويش الإلكتروني” مختصر، عملي، بدون تعقيد و مجاني بالكامل، و في النهاية فيه تمبلت جاهزة للطباعة تخليك تبدأ ترتب يومك بدون تفكير زيادة. ◽لو إنت حاسي انو يومك بيضيع و ما عارف تبدأ من وين نزل الكتيب دا و افهم المشكله و عالجها من جزورها، ح تلقو لينك التنزيل في قسم المميز في بروفايلي. ✨و أخيراً، إذا لم تجدول نفسك جدولتك المُلهِّيات، نظم نفسك تنتظم. #YosraAlfatih #Devolopment #LinkedinForSudan

💡البوست ما للإحتفال بالشهادة، هو جرس إنذار ليك ◽السنه الفاتت الناس كانت بتردد "الذكاء الاصطناعي ما ح يستبدلك لكن الشخص اللي بيستخدمو هو اللي ح يستبدلك" في ناس اخدتها انها مبالغه لكن دا الواقع الحاصل الآن. ◽في 2026 (سنه الذكاء الاصطناعي) السوق اتغير أكتر و مجال التعلم والتطوير تحديداً بقى في مرحلة جديدة تماماً ف كان لازم اتعلم كيف أكون جزء من التغيير ما ضحية ليهو و أكون مدربة و مدرسه بتفهم السوق الجاي لانو : ▫️المدرب/المُعلم بقي ما بس يشرح بقى لازم يصمم تجربة تعلم ذكية. ▫️المحتوى بقي ما ثابت بقى يتولد ويتحدث بالـ AI ▫️الناس ما عايزة معلومات عايزة حلول سريعة ومخصصة. ◽ الكورس ركز على 3 محاور مهمة جداً: ▫️كيف تستخدم الـ Generative AI في تصميم المحتوى التعليمي. ▫️كيف تربط الذكاء الاصطناعي بالـ Business فعلياً. ▫️كيف كمدرب/مُعلم تواكب التغيير بدل ما تتجاوزه. ◽دي كانت اول شهاده اخدها في يناير و اتذكرتا انزلها اسي بعد الموضوع بتاع اوركال. ◽أخيراً، ما محتاجة اكلمكم عن أهمية الAI في بوستات كفايه اتكلمت عن الموضوع و ابعد من كده الواقع قدامك بيحكي، بس عايزه اقول ليكم كلما تبدو بدري كل ما تكونو في المقدمة. ✨لسه بتتعلم بنفس طريقة 2015…ولا بديت تواكب 2026؟ #YosraAlfatih #Devolopment #LinkedinForSudan

💡ليه ما قادر تحدد مسارك المهني بوضوح؟ ◽المشكله الأساسيه اللي بساعد الخريجين و المهنيين الجدد و اللي عاملين شفت للكارير بتاعهم هي وضوح المسار المهني ليهم. ◽أغلب الاستشارات و الاسئله اللي بتيجي بتكون انا مشتت انا تايهه انا عايز كم مجال مع بعض انا بقرا و ما بتقدم، و مشكلتهم ما بتكون نقص مهارات بل عدم وضوح. ◽في الكاروسيل دا جمعتا ليكم اهم أسباب للتشتت المهني و حلول عملية ليها. ✨اذا بتعاني او عانيت من التشتت المهني في بداياتك ياتو سبب حسيتو هو اللي كان ليهو تأثير أكبر. #YosraAlfatih #Devolopment #LinkedinForSudan

عَلُّو الصوت #YosraAlfatih #Devolopment #LinkedinForSudan

💡جربتا الشغل الحكومي و الخاص و الفريلانسر و التطوع و دي خلاص تجربتي الشخصية ◽في بداية الحياة المهنيه الواحد بيكون محتار اعمل شنو و اختار شنو؟؟؟ البوست دا فيهو اللي اتوصلتا ليه من تجربتي عشان اختصر الطريق لي اللي ما جربو لسه. ◽الشغل الحكومي: ▫️ح يضمن ليك استقرار وظيفي و علاقات كويسه و الزمن مرن نوعاً. ▫️لكن بالمقابل التطوير فيهو بطئ و العائد المادي ما احسن حاجة . ◽الشغل الخاص ▫️التطوير اسرع نوعاً ما و العائد المادي كويس و امتيازات اكتر. ▫️لكن الاستقرار الوظيفي فيه اقل و الخطر أكبر و ماف مرونه في الزمن. ◽الفريلانسر ▫️التطوير فيهو سريع و الزمن فيهو مرن جداً (ممكن تشتغل ساعتين او 24 ساعه عادي) و العائد المادي انتا و شطارتك و النتايج رائعه. ▫️الخطر فيهو عالي و الضغط النفسي عالي و ممكن ما تقدر تفصل بينه و بين حياتك. ◽التطوع ▫️التطوير فيهو كبير و الخطر صفر و المرونه عاليه و العلاقات ممتازه. ▫️يمكن يكون نقطه الضعف الوحيده هي عدم ضعف العائد المادي و لكن بالمقابل في بركة في يومك و حياتك بتكون و دي احسن من اي عائد. ◽و أخيراً، كل الحاجات دي من تجربتي الشخصيه و ممكن تختلف من مكان لي مكان و من شخص لي اخر حسب ظروفه و عقليته. ◽اكتبو لي في التعليقات تجاربكم مع انواع الوظايف عشان الفايدة تكون كبيرة و نشوف تجارب ناس تانيه ما يكون من تجربتي انا بس. ◽أنا يسرى الفاتح مدرب تطوير شخصي ومهني و مساعد تدريس جامعي، تابعني للمزيد من النصائح عن التعليم و التطوير. #YosraAlfatih #Devolopment #LinkedinForSudan

💡برنامج ماكينزي خلاني اعرف ليه كنتا ببدأ ألف حاجة و ما بكملها، و كيف استمر ◽قبل اي حاجة التقديم لي ماكينزي متاح ح اسيب ليكم اللينك و ح اكلمكم عنه ف اخر البوست و علاقته شنو بي موضوع الإستمرارية. "تخيل لو كل حاجة بدأتها كملتها للأخر.. كان زمانك فين دلوقتي" ◽دي الجمله اللي بدا بيها ابو زيد الفيديو بتاعو دا و وقفتني، كلنا بنبدأ كورسات، كتب، أو عادات جديدة وبنتحمس في الأول وبعد شوية بنوقف، و نبدأ تااااني حاجة و نوقف و هكذا و نقعد نلف في دايره مغلقه و نجمع كميه من المعلومات المشتته. ◽طيب الحل شنو؟ كيف تستمر؟ ح تستمر بي حاجتين أساسيتين : ▫️تخيل الخسارة: لما تقيف اتخيل ح تخسر شنو لو ما استمريت؟ الانسان بيخاف من الفشل اكتر من حبه للنجاح. ▫️اركب الأتوبيس وما تسوق انتا: و دا اللي اتعلمته من ماكينزي لو مشيت براك ح تكون مشتت و مرهق ، لكن لما تنضم لمجموعة أو مجتمع ليهم نفس الهدف، حماسهم و دعمهم ح يخليك تنجز رغماً عنك لمجرد إنك وسطهم. ◽برنامج ماكينزي فورورد كان المثال العملي للبيئة دي لانو التطور بتاعي و نسخه يسرى الحالية دي كانت بعد دخلته و لقيت المجتمع الداعم اللي فيه. ◽و للناس اللي ما بتعرفه هو برنامج مجاني بالكامل بيطور مهاراتك في حل المشكلات، المرونة، التواصل، الأدوات الرقميه ، وبيدخلك وسط شبكة عالمية من الخريجين تساعدك تستمر وتنجح. ◽و زي ما بيقول جيمس كلير: "واحدة من أكثر الطرق الفعالة لبناء عادة هي الانضمام لمجتمع يكون فيه السلوك المنشود هو الطبيعي عندهم". ◽التقديم لي برنامج ماكينزي متاح الان ح اسيب ليكم اللينك في الكومنتات التقديم ح يقفل يوم 20 أبريل، و ح اسيب ليكم لينك الفيديو بتاع ابو زيد اللي كتبتا منه البوست دا برضو. #YosraAlfatih #Devolopment #LinkedinForSudan

✨بمناسبة اليوم العالمي للقراءة ◽أنا ما بقدر أتكلم عن الكتب كـ معلومات أو عادات الكتب بالنسبة لي كانت دايماً مكان. ◽مكان بمشي ليهو في كل الحالات لانو: لما طلعنا من بيتنا قبل 3 سنين اول حاجة فكرتا فيها اشيل ياتو كتاب لاني ما ممكن اشيل المكتبه كلها عشان اقرا لما رجعنا بيتنا اول حاجة جريت عليها المكتبه و حسيت انو كل الفقدناه هين قصادها عشان ح ارجع اقرا اول حاجه اشتريتها لما وصلنا المكان الجديد كانت كتب عشان اقرا في طرق السفر الطويله شديد اللي مشيناها كنتا بقرا لما الكهربا او الشبكة تقطع كنتا بقرا لما اتعب من الشغل بقرا لما انضغط بقرا ◽القرايه و الكتب بالنسبة لي مكان آمن، مكان ببدأ منه من جديد كل مرة و بطلع منه شخص مختلف عن اللي دخله. ◽بحب اتعلم حاجات جديده و قصص و تجارب جديدة، يمكن عشان كده اتجهتا لمجال التعليم و التطوير. ✨أخيراً، الكتب ما مجرد صفحات الكتب عوالم تانية ف أقرو يا جماعه أقرو قدر ما تقدرو كفايه انو او كلمه نزلت في القرآن الكريم كانت "إقرأ". ◽الصوره في وحده من الرحلات الكتيرة و الطويلة اللي مشيناها التلاته سنين الفاتت و الكتاب و القرايه كانو رفقه السكة🖤 #YosraAlfatih #Devolopment #LinkedinForSudan

💡 سلسلة التطوير بالقرآن الكريم، آيات و مهارات 2-1 ◽لما المشركين قرروا يقتلوا النبي ﷺ أو ينفوه، طلع من مكة مع صاحبه أبو بكر الصديق متجهين لي المدينة المنورة، اختبأوا في غار ثور 3 أيام والمشركين وراهم عايزين يقبضوهم. ◽الموقف كان صعب جدا و الخطر محيط بيهم و احتمال الموت كان هو الأكبر و هنا بدأ أبو بكر الصديق رضي الله عنه يجزع و خاف علي النبي ﷺ ف طمنو و قال ليهو: "ما ظنك باثنين الله ثالثهما" وجاء في القرآن: "لَا تَحْزَنْ إِنَّ اللَّهَ مَعَنَا" التوبة (40) ◽الموقف لسه صعب و الخطر لسه قائم لكن اليقين و الكلام الطيب غير طريقة التعامل مع الأزمة، النبي ﷺ كان بيطمئن أبو بكر و يؤكد ليهو أن معية الله هنا معية حفظ ونصر وتأييد، رغم أن الأسباب الظاهرة كلها ضدهم. ◽في الأزمات: ▫️ما تنكر الواقع. ▫️لكن ما تهول المشهد. ▫️ولا تنقل خوفك للناس اللي معاك. ◽دورك كقائد في بيتك، في شغلك، في فريقك إنك تذكر الناس بالحاجات اللي نسوها وسط التوتر، تذكرهم بي نقاط قوتهم بي إمكاناتهم بالخيارات المتاحة. ◽و أخيراً الهدوء ما معناه إنو ما في خطر معناه إنك شايف الخطر لكن عارف انو التوتر ما ح يفيدك و شايف انو يد الله و لطفه فوق كل الأسباب. ✨الأزمات تكشف معدن الشخص، إما يزيد خوف الناس أو يزرع فيهم طمأنينة تخليهم يفكروا بهدوء ويلاقوا حل، و في اللحظة الحرجة الكلمة الهادية ممكن تكون سبب نجاة. #YosraAlfatih #Devolopment #Quran #LinkedinForSudan