Zeyad Ahmed - زياد أحمد's Recent LinkedIn Posts

بما اني دي تاني شركة اشتغل فيها ك Data Analyst فحابب ابدأ اشاركك التاسكات اللي بنقابلها في شغلنا بحيث أنقلك الواقع بعيدا عن التصورات الوهمية لكن في البداية حابب أنوه ان الشركتين هما في حجم أقل من 250 موظف .. ممكن الواقع هنا يختلف كتير عن الشركات المالتي ناشونال فحط دي في الحسبان.. ولكن هرجع اقولك ان انت بتحاول تجهز علشان ايا يكن الفرصة اللي تيجي قدامك وتكون مناسبة تكون جاهز ليها فأنا هنقلك واقع الشركات الصغيرة والمتوسطة

مشروع تحليل بيانات حقيقي .. لأصحاب الهمم الحقيقية في التعلم والتطوير أول تاسك : عايزين نشوف تأثير الاجازات الرسمية على المبيعات عندنا فيه اكتر من طريقة واكتر من مقارنة .. الشاطر اللي يجمعهم ويعرف يوصل لأدق واحدة حسب الداتا اللي هيجبها إن شاء الله من ضمن سلسلة يوميات محلل بيانات اللي بدأنها سويا من فترة قريبة هيكون من ضمنها تاسك مطلوبة مني في الشغل هقولكم عليها .. تجيب داتا من اي موقع زي Kaggle مثلا وتطبق عليها التاسك دي وتشيرها عندك في بوست مع شرح الخطوات طبعا والعقبات اللي واجهتك وهكذا ومتنساش طبعا تشيره معانا هنا في الكومنتات علشان أفضل مشروع هنشاركه هنا إن شاء الله مهلة المشروع أظن أسبوع كفاية جدا رغم انها بتكون تاسكات بسيطة ولكن اكيد عندكم مشغوليات تانية مين هيشارك في التاسك دي ؟

بسم الله نبدأ شابتر جديد مع شركة العسال التجارية ك Data Analyst ونسأل الله التوفيق فيما هو قادم

السلام عليكم من منطلق لما توصل متصعبهاش على اللي بعدك قررت أنا من موقعي هذا : عمل جروب واتساب للمهتمين بتعلم مجال تحليل البيانات وإتقانه أنا مش هشرح حاجة فيه : احنا هنتابع سويا تقدمك في الخريطة اللي هنتبعها وهنشارك مصادرها المجانية إن شاء الله من ناحية هتحس بتشجيع زمايلك وهكون معاكم لو فيه حد عطل في حاجة وهكذا هنبدأ أول مجموعة ب 20 شخص فقط : 10 شباب و 10 بنات لو حبيت تدخل سيب كومنت ب "يلا بينا" وهبعتلك التفاصيل إن شاء الله {فَأَمَّا الزَّبَدُ فَيَذْهَبُ جُفَاءً ۖ وَأَمَّا مَا يَنفَعُ النَّاسَ فَيَمْكُثُ فِي الْأَرْضِ}

من واقع خبرة ٣ سنين في الشركات كمحلل بيانات خليني اقولك ليه السوق مليان محللين بيانات .. وليه كتير جدا منهم مش لاقين فرص ؟! لعدة أسباب رئيسية كلها هتندرج تحت نقطة كبيرة ( مسميات فقط ) يعني معظم محللين البيانات اللي بتشوفهم على لينكدان دول حاطين مسمى مش أكتر وده بيرجع لنهج الكورسات وخاصة الشاملة في بيع المسمى .. انك بتد ما تخلص الكورس الشامل ده هتكون محلل بيانات طب ليه بتطلع بمسمى بس ؟ لإن ببساطة كل فصل في الكورس ده لوحده محتاج مدة محترمة علشان تغطي مفاهيمه كويس جدا وتدرب عليه كويس جدا وتهضمه .. فتستغرب ازاي كورس واحد هيعلمك كل حاجة في كام شهر ! طب ما انا كده متعلمتش وبقا عندي وهم العلم وبالتالي هيعطلني عن اني اتعلم كويس فيما بعد وفي نفس الوقت هيجيلي احباط اني مش لاقي فرص البوست ده لسه له تكملة مهمة خاصة بتقسيم المجال لفرونت اند وباك اند وهيكون معاه خريطة مرسومة لأول فصل في المجال إن شاء الله لو مهتم ننزل التكملة قولنا في الكومنتات ومتنساش طبعا تناقشني في النقطة دي لو عندك وجهة نظر مختلفة

أول مشروع أساسي إلى حد ما يتطلب مني في الشركة : - عايزين يا بشمهندس ملف جوجل شيت نحط فيه رقم الصنف اللي عايزين نطلبه من المخزن التاني والشيت يحط باقي المعلومات من نفسه .. ويعمل نسخة لورقة تانية خاصة بالمخزن التاني فيها معلومات مشتركة ومعلومات خاصة بالمخزن التاني فقط والورقة تترتب بترتيب تلقائي بناء على عمود معين .. وبعدين لما التحويل يتعمل على السيستم نرفعه على جوجل شيت والملف يقارن التحويل بالمطلوب ولو مطابق يتعلم عليه ان التحويل ده خلاص تم ويتنقل ورقة تانية ويتشال من الورقتين الاولانين بفضل الله عملتلهم حاجة قوية فاقت توقعاتهم ولكن خلينا نشوف سوا تفتكر ممكن نعمل حاجة اوتوماتيد كده ازاي وتكون بكفاءة عالية ؟ #يوميات_محلل_بيانات

تعالا اقولك ازاي محللين البيانات فطرتهم في التعلم انتكست وبقوا ماشيين بالشقلوب كان الطبيعي في أي مهنة لما حد بيجي يتعلمها انه يفهم المهنة دي بتعمل ايه وايه المهارات المطلوبة فيها ... ركز معايا المهارات هاااا وكان يبدأ يتعلم المهارات دي ويطبقها على أي أداة يقدر يطبق بيها المفاهيم والمهارات دي وكان يتقنها كويس ويبدأ يشتغل عادي جدا ... ومن مراحل تطويره في المسار الوظيفي انه يبدأ يشوف طرق تانية أو أدوات تانية تخلي شغله أسرع وبكفاءة أعلى ... انت فاهم الفرق ؟؟ انت بالفعل بتعرف تعمل الوظيفة والمهمة المطلوبة بأداة معينة ... ولكن عايز تبدأ تطور من سرعة العملية دي أو تديها بعض الإضافات مش عايز اطول في الموضوع ده ولكن للأسف حاليا الدنيا متشقلبة عايزك تفهم انت في الشغلانة دي مطلوب منك ايه بالظبط تعمله وابدأ افهم المطلوب ده واتعلمه بأداة واحدة ( اكسيل ) ولما تتقن المهام دي .. اما شوف طرق وأدوات تانية تطور بيها من المهام دي اتمنى تكون الرسالة وضحت واتمنى تتعلمو صح

قواعد البيانات ( Databases ) مهمة لمين ؟ واتعلمها منين ؟ ده اللي هنوضحه بشوية تفصيل في البوست ده إن شاء الله قواعد البيانات مهمة لمين ؟ مهمة لكل واحد في مجال البيانات ( Data ) .. ومهمة لأشخاص تانية كتير ولكن هنا هنركز على أهميتها لمحلل البيانات ( Data Analyst ) مهمة لإنك بالضروري هتتعامل مع بيانات على شكل جداول وبينها علاقات علشان تقدر تجيب منها التقارير أو التحليلات ( Reports / Analysis ) اللي عايزها مهمة لإنك بالفعل أوقات كتير هتتعامل مع قواعد البيانات علشان تستخرج منها البيانات اللي عايزها ( Extract Data ) ومهمة علشان تقدر تفتح لنفسك فرص أوسع من كونك محلل بيانات بتاع تصميم تقارير بس ( Dashboards Design ) زي إنك فيما بعد تكون مهندس تحليلات ( Analytics Engineer ) وممكن كمان تعجبك فتدخل في وظايف خاصة بقواعد البيانات زي مصمم قواعد البيانات ( Database Designer ) او مطور قواعد بيانات ( Database Developer ) أو حتى مسئول قواعد البيانات ( Database Administrator ) .. وهكذا وخليني أقولك انك لما تتعلم مفاهيم قواعد البيانات وترابطتها ببعض هيفرق جدا جدا في عقليتك في التحليلات اللي هتعملها وتقدر تكتشف تقارير أوسع من اللي كنت بتعملها .. وهيفرق في مكانك في السوق جدا مش مجرد معاك مسمى محلل بيانات وخلاص طب نتعلمها منين ونتعلم منها ايه ؟ هتلاقي شوية مصادر في التعليقات تفيدك إن شاء الله في تعلمها وممكن في بوست تاني إن شاء الله نوضح أقسام لغة SQL وتتعلم منها ايه على حسب مجالك متنساش طبعا تصلي على الحبيب

استفدت ايه من حضوري في ملتقى التوظيف التابع ل هيئة تنمية صناعة تكنولوجيا المعلومات أول مرة أحضر ايفينت خاص بفكرة التوظيف ونقل الخبرات وما شابه وحقيقي أنا طلعت الحمدلله بشوية فوايد مثمرة - عرفت ازاي أقدر أحدد مشكلة عدم حصولي على وظيفة بناء على المرحلة اللي بوصلها وبعدين متوظفش .. وبناء عليه أقدر اعرف حل المشكلة إيه - قعدت جلسة كارير كوتشينج مع جد من الأفاضل أ/ شريف جعفر .. واللي بصراحة مبخلش عليا بأي معلومة وكان حد متعاون جدا جزاه الله عني خيرا - استفدت جدا بصراحة من المحاورة الجميلة بين أخونا أحمد السباعي وأخونا علي خالد وكانت عن موضوع الفري لانس وازاي تقدر تبدأ وتكون قوي في المجال ده .. واللي بالمناسبة أخونا احمد السباعي عامل زي كورس كامل مجاني في موضوع الفري لانس من الألف للياء نظري وعملي على موقعه Freelanzawya اظن اسمه كده يعني .. انصحكم بيها - واخيرا وليس آخرا اتعرفت على أخ جميل وهيكون شريك في رحلتي في مجال Data Analysis ‏Youssef Ahmed ElQady‏ وبس يا سيدي ده كان ملخص سريع عن استفادتي من الايفينت واللي بنصحك تبقا تحضره لو جاتلك الفرصة علشان تستفاد انت كمان

في بداية مجالك ك Data Analyst ؟ الفيديو ده هيجاوبلك على معظم التساؤلات اللي عندك ويزيدك وعي إن شاء الله أخونا بشمهندس ‏Mohamed Medhat‏ جزاه الله خيرا .. كان عمل Document جميل فيه إجابات معظم الاسئلة اللي جاتله في Mentor Sessions من الناس اللي في بداية مجال Data Analysis وبس يا سيدي .. لو حسيت ان ممكن حد يستفيد بيه ممكن تشيره ملحوظة: الفيديو معمول باستخدام Goggle Notebook LM عن طريق اعطاؤه الملف اللي قولنا عليه

بقالك فترة مخبط ومش عارف تلتزم في عادات كتيرة عايز تظبطها وتاسكات كتيرة متراكمة عليك ؟! كل اما بيحصل معايا الموضوع ده وبيكون طبعا بالتزامن مع تقصيري الشديد في حق الله ورسوله من البعد عن القرآن والسنة ودروس الدين والنوافل بكون دايما مشتت وعايز اظبط كل حاجة تاني ومبقاش عارف ابدأ بإيه الأهم ولكن دايما ربنا بيلهمني اني اركن كل حاجة وابدأ بإصلاح علاقتي بالقرآن والسنة ... ومن هنا ربنا بيكرمك كرم غير عادي في كل الأمور الباقية وبتلاقي تيسير عجيب في التزامك بباقي المهام الدنيوية فلو انت يا صديقي او يا زميلتي ( علشان طبعا مفيش حاجة في الإسلام اسمها ولد صاحب بنت ) بتقابلك نفس المشكلة فعندي ليك الحل بالخطوات العملية : - ورد القرآن ( مشاهدة تفسير سورة من القرآن م/ علاء حامد - د/ أحمد عبد المنعم ) - حفظ السورة اللي فهمتها واتعلمتها - روح لشيخ سمع عليه السورة علشان يصححلك أخطاء التلاوة - اسمع شرح رياض الصالحين (ش/ خالد السبت - أو كتاب الشرح لابن عثيمين ) - احفظ الحديث اللي هتتعلمه ممكن تبدأ بالالتزام بورد القرآن أول اسبوع او اسبوعين مثلا وبعدين تضيف ورد الحديث ومتنساش طبعا تطبق اللي بتتعلمه + يكون عندك ورد مراجعة للي حفظته ومن غير ما تسأل ازاي هتلاقي كل حياتك بقت متيسرة وقادر تعمل باقي المهام الخير ليك فقد قال سبحانه: وَمَنْ يَتَّقِ اللَّهَ يَجْعَلْ لَهُ مَخْرَجًا * وَيَرْزُقْهُ مِنْ حَيْثُ لَا يَحْتَسِبُ وَمَنْ يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا {الطلاق:2-3}

أغلب الطلاب والخريجين يخسرون أول 10 فرص وظيفية… بسبب CV ضعيف وحساب لينكدإن فارغ. وفي مِهَن قررنا نحل هذه المشكلة مجانًا. ميزة جديدة داخل Mehan.ai مصممة خصيصًا لهم وتقدم شيئين أساسيين: ↲ سيرة ذاتية احترافية جاهزة للتقديم ↲ تحسين كامل لحساب لينكدإن بالصياغات الصحيحة كل هذا… بدون رسوم. بدون قيود. ومن أول يوم. ارفع سيرتك. دع مِهَن يعالجها. ثم خذ النسخة الجاهزة بصيغة احترافية. وبعدها انتقل لتحسين حسابك على لينكدإن خطوة بخطوة حسب مستواك الحالي. في الفيديو شرحت كل شيء بالتفصيل وكيف تبدأ خلال أقل من دقيقتين. وجميع الميزات المتقدمة مفتوحة لك كتجربة كاملة لمدة 3 أيام. لو أنت طالب أو خريج جديد… هذا أقصر طريق لبداية مهنية قوية. Amran Al Kerata Khaled Elahmad https://lnkd.in/d4T-ENJQ

انا مش اتش ار .. ولكن هديك شوية نصايح تساعدك تلاقي وظيفة إن شاء الله والسي في ده مش منزله علشان بدور على شغل علفكرة .. منزله علشان يكون مرجع لو حد حابب يعمل زيه - بعبع ATS خليني اقولك انا بدأت اشك إن المستفيد الوحيد من موضوع تريند ATS ده هو الناس اللي شغالة في الاتش ار علشان يقدمو خدمة عمل CV متوافق مع ATS ولكن خليني افاجئك واقولك إن شركات قليلة جدا في مصر اللي بتستخدم ال ATS في فلترة ال CV فقبل ما تجري وتحرق علشان تعمل CV متوافق مع ATS .. شوف اصلا حجم الشركات اللي بتقدم عليها عامل ازاي لان ATS موجود مع الشركات الكبيرة اوي مش المتوسط والصغير والناشئة فلو حضرتك مش مستهدف الشركات الكبيرة مش محتاج تركز مع موضوع ATS زي ما انت فاكر _______________________________________________________________________________ ولكن فيه حاجة مهمة انصحك تعملها .. انك فعلا تروح لحد بيقدم خدمة عمل CV علشان يطلع منك معلومات مفيدة يكتبها في CV انت مكنتش عارف انها مفيدةويصيغها بأسلوب مقنع ويحفز اللي بيقرأه انه يوظفك فعلا .. ويحذف معلومات كنت فاكرها مهمة او مفيدة وهي للاسف بتعمل تأثير عكسي والجدير بالذكر ان زميلي وصديقي Khaled Tarek كان هو اللي عاملي ال CV ده واللي بالمناسبة ده اللي استخدمته وانا بقدم على الشركة الحالية فممكن تتواصلو معاه ويقدملكم خدمة أنا ضامنها ومجربها وجابت نتيجة ومتنساش طبعا إن كلها أسباب وأن الرازق هو الله ولكن من باب الأخذ بالأسباب والسعي إن شاء الله السلسلة دي هتكون مستمرة على هاشتاج #ازاي_الاقي_شغل وهيكون فيه سلسلة أخرى إن شاء الله بخصوص تحليل البيانات في واقع الشركات هتكون على الهاشتاج ده #يوميات_محلل_بيانات ونسأل الله أن يجعلنا سببا في نفع الناس كما جعل غيرنا سبب في نفعنا وأن يكون وجودنا على هذه المنصة ذا جدوى وإفادة وليس مجرد استعراض وتمثيل واننا نعوض اللي كنا بنحاول نلاقي حد يعمله وهو في مكاننا .. فلما نوصل نساعد غيرنا ومنصعبهاش عليه

بشمهندس عبدالرحمن درس لي Databases و SQL وحقيقي هو اللي رجعلي الأمل في إني أكمل في التراك ده فبرشحه بشدة بصراحة لو حد حابب يتعلم التراك ده ممكن يشترك في الجروبات اللي بيعملها .. وكلك بص بصة على Roadmap دي علشان تستفاد منها وتفهم ليه بتتعلم دي قبل دي وهكذا

لكل اللي كان عايز ينضم لبرنامج تعليم مجال تحليل البيانات ( المجاني بالكامل ) واللي اتكلمنا عنه كتير الفترة اللي فاتت وبدأنا بالفعل مع أول مجموعة ولكن ! لاحظت ان الطريقة دي هتكون ابطأ في اني اساعد عدد أكبر من الناس وهتكون بتخلي ان حد مش ملتزم بالخطة ياخد مكان حد ملتزم ملحقش ينضم في المجموعة وهكذا فقررت .. إننا نشارك أول خطوة مطلوبة منك في التراك اللي هنمشي عليه وأول ما تخلصها هتبعتلي رسالة على الايميل ده : Zeyad.Ahmed.Abdelhalem122@Gmail.com تكتب فيها اسمك ثلاثي وإنك أنهيت أول مرحلة في تراك تحليل البيانات ( مقدمة في قواعد البيانات ) بعدها بيتم تجميع عدد أشخاص انتهوا من نفس المرحلة ونعمل اجتماع اونلاين نناقش فيه المواضيع ونجاوب فيه على الاسئلة ونطبق بعض التمارين على المرحلة المنتهية وبالتزامن طبعا ببعتلك المرحلة اللي بعدها علشان متكونش قاعد فاضي لما تنتهي من أول مرحلة بالنسبة لأول مرحلة معانا ( مقدمة في قواعد البيانات ) https://lnkd.in/dKj4J-mX مُطالب منك تتفرج عليها بتركيز تام .. وبتطبيق عملي مع المحاضر وتدوين النقاط المُستفادة من كل محاضرة تقدر تشارك المنشور مع زمايلك في الرسايل وتقدر تشاركه على صفحتك وتقدر تعمل لزمايلك منشن في التعليقات وبفكرك اني مش محتاج منك حاجة في البرنامج ده تماما وكل النشر والحاجات دي لإفادة الناس .. أما أنا فأجري على الله والله عنده حُسنُ الثواب بالتوفيق 🤍

ايوة يعني اتعلم ايه في قواعد البيانات ( Database ) ؟! تعالا ناخد لفة سريعة كده تفهمك ايه اللي محتاجه من قواعد البيانات في البداية عايزك تكون واعي وفاهم فكرة ان قواعد البيانات مهمة لأي حد شغله قائم على البيانات ( برمجة - علوم بيانات - تحليل بيانات - هندسة بيانات ) ولكن! المواضيع اللي بتكون مشتركة دي وبتكون ضخمة ومليانة مفاهيم وأصلا فيه ناس شغلها كله عبارة عن المادة دي بس ... يبقا تفهم انها متشعبة جدا وصعب انك تلم بكل تفاصيلها .. فبتبدأ بالمفاهيم الأساسية فيها والموضوعات العامة ومن هنا ممكن أصلا توجهك في مسارك الوظيفي تفكر تغيره بناء على اللي شوفته وحبيت انك تكمل فيه ... هنا بقا بتبدأ تمسك المفاهيم المتعلقة بالتراك اللي هتكمل فيه وتبدأ تدرسها بشكل أعمق وأكثر تعقيدا ولكن في البداية ؟ مينفعش تنط علطول كده ولازم تاخد على الاقل القشور وتفهم الموضوع من فوق داير ازاي وهتلاقي في البوست اللي فات لينك بلاي ليست لطيفة تقدر تعتمد عليها في الدخول المبدأي لقواعد البيانات

ازاي بنقع في فخ أو بنوصل لمرحلة إني مش عارف اطور نفسي في مهارة معينة أو اتعلم فيها حاجات زيادة ؟؟ خلينا متفقين إنك لما بتحط في دماغك إنك اتعلمت المهارة دي بشكل كامل عقلك اللاواعي بيثبطك بعد كده انك تحاول تتعلم فيها حاجة جديدة أو تطور منها طب وايه المشكلة في كده ما انا اتعلمتها بشكل كامل فعلا فمش محتاج اطور فيها حاجة او اتعلم حاجة زيادة فيها ده الفخ بقا اللي بتقع فيه للأسف وسببه كالتالي : المشكلة إنك فاكر إنك اتعلمتها بشكل كامل ولكن ده مش حقيقي ... إنت ممكن تكون اتعلمت الأساسيات بس بتاعتها او وصلت مثلا لمرحلة متوسطة ولكن لسه مخلصتهاش للآخر ... طب اعرف ازاي اني خلصتها للآخر ؟ طب هو اصلا هتستفاد ايه لما تقول لنفسك إنك خلصتها للآخر ؟ مش هتستفاد حاجة ... بالعكس هتضر إنك مش هتطور فيها بعد كده وهنا المشكلة لازم تكون دايما على استعداد ان فيه حاجات لسه متعرفهاش ولسه عندك استعداد تتعلم أكتر وأكتر وخليني أقولك ان الموضوع ده شائع جدا جدا في تعلم محللين البيانات لل SQL أنا اتعلمت أمر Select .. جميل ولكن!! ... الأمر ده مش مجرد التركيبة بتاعته بس انت ممكن تعمل بيها حاجات كتير جدا جدا وفيه معاه إضافات كتيرة تخليك تتعلمه على أكثر من مستوى من الصعوبة أصلا فلازم زي ما اتفقنا انك تكون مستعد دايما للتعلم المستمر

هل تحليل البيانات فيه فرونت اند وباك اند !! دي الإشكالية الكبيرة حاليا في السوق والخلل الواضح في محللين البيانات وده اللي هنوضحه إن شاء الله في البوست ده خليني أقولك ممكن فعلا ميكونش فيه مسميات في تحليل البيانات فيها كلمة باك اند او فرونت اند ولكن .. بالفعل مهام محلل البيانات بتنقسم لقسمين .. والغريب والمؤسف إن توجه معظم الكورسات وتوجه الشباب اللي بيتعلمو إنهم يهتمو بجزء الفرونت اند بشكل كبير يطغى على الباك اند اللي بالمناسبة بدونه انت بتكون واخد مسمى محلل بيانات ومش عارف تلاقي فرصة كله مهتم ينشر انه عمل داشبورد وينشرها وازاي شكلها حلو وفيها مميزات كتيرة وفيها صفحات كتير وماشابه ولكن .. فين شطارتك في الجزء الأساسي في تحليل البيانات ؟ الجزء المتعلق بفهم سياق البيانات وبتتجمع منين وترابطها ببعض ازاي وهتتنضف على اساس ايه وهنجهز منها بيانات ايه على اساس ايه كل دي أجزاء مهمة جدا بيغفل عنها الكثير في المجال للأسف دي فايدة اصلا الجزء ده ؟ ده ممكن نسيبه اختبار بقا للناس تقولنا في التعليقات كده ونتناقش فيها سويا ونعمل بيها بوست آخر إن شاء الله فيه مزيد من التفصيل وإحالة على بعض المصادر المجانية اللي تساعدك في إتقان الجزء ده

ليه فيه ناس خبراتهم كبيرة ومعاهم مميزات اكتر مني بكتبر ومع ذلك بنشوفهم بقالهم فترة كبيرة بيدورو على شغل ؟ هنجاوب على السؤال ده في البوست ده إن شاء الله سألني النهاردة حد من الشباب الجميلة اللي لحق مكان في أول جروب بنتابع معاهم رحلة تعلم تحليل البيانات بشكل مختلف تماما عن الكورسات وبشكل مجاني تماما قبل ما تقول إنها دعاية .. وهتلاقي تفاصيل البرنامج ده في الكومنتات إن شاء الله المهم : قالي انه بدأ يكون محبط لإنه بيشوف ناس على لينكدان خبراتهم ومميزاتهم أكتر منه بكتير ومع ذلك مش لاقيين شغل بقالهم فترة .. فانا ازاي هلاقي شغل وانا اقل منهم هنقسم الإجابة لكذا نقطة وهتكون كلها إجابات مادية بحت ١- مين قالك ان خبراتهم بالفعل أكبر منك ؟ .. وارد جدا جدا يكون كله كلام وانه فاضي من جوا وده اللي بيظهر في الانترفيو فعلا ومبيظهرش للناس على لينكدان ٢- ممكن يكون مش عارف يوصل لمرحلة الانترفيو بسبب طريقة كتابة السي في وصياغته اللي مش متناسبة مع تفضيلات الاتش ار الحالية ٣- ممكن يكون مش قادر يبرز خبراته ومهاراته ويكتبها بشكل يساعده يبيع مهاراته دي ٤- ممكن السوفت سكيلز عنده مش كويسة وبيظهر ده في الانترفيو ومبيظهرش طبعا في السي في ٥- ممكن يكون له تفضيلات خاصة في الوظايف ويكون هو بنفسه بيستبعد وظايف كتيرة مش مناسبة تفضيلاته ٦- ممكن ميكونش بيقدم على وظايف بكفاءة ومثابرة في البحث والتقديم وفيه اسباب اكتر صدقني بس علشان مطولش عليكم اكتر من كده انت مش شايف الصورة كاملة .. انت شايف بس سي في مكتوب فيه شوية كلام ولذلك حبيت اطمنكم ان كل اللي بتشوفوه ده مش شرط يكون بيعكس الواقع او حاجة وأهم حاجة : { وَأَن لَّیۡسَ لِلۡإِنسَـٰنِ إِلَّا مَا سَعَىٰ (٣٩) وَأَنَّ سَعۡیَهُۥ سَوۡفَ یُرَىٰ (٤٠) ثُمَّ یُجۡزَىٰهُ ٱلۡجَزَاۤءَ ٱلۡأَوۡفَىٰ (٤١) } ... يعني يا صديقي انت بتسعى في طريق .. الله يرى ذلك السعي وسيجازيك عليه في الطريق الافضل لك .. لن يضيع الله سعيك فلا تنس ان تدعو بأن يراضيك الله بأقداره لك فعل الخير يأتيك وانت لا ترضى

تفتكر أنهي أحسن .. الشغل في شركات كبيرة ولا الشغل في شركات ستارت اب او شركات متوسطة ؟ من واقع خبرة واقعية مريت بيها مع المستويين سواء شركة مالتي ناشينوال او شركة لسه بادئة من سنة او شركة بقالها 60 سنة في السوق ولكن حجمها صغير بفضل الله اشتغلت في ال3 أنواع دي فقادر أقولك ان مفيش حاجة فيهم أحسن من التانية ليه ؟ لإن الطبيعي كل حاجة وليها مميزات وعيوب مميزات الشركات الكبيرة : مهام وظيفية محددة جدا .. فريق تقدر تستفاد من خبرات زمايلك او مديرينك وتتعلم منهم وتسأله .. اسمك شغال في شركة كبيرة .. مع شوية امتيازات أخرى جانبية عيوب الشركات الكبيرة : مش هتعرف تتعلم انك تتشقلب .. يعني زي ما قولنا بما ان ليك مهام وظيفة محددة جدا يعني مش بتكون مجبر تخبط في باقي المهام فبالتالي اوقات كتير جدا طالما مش مطلوب منك حاجة مبتعملهاش ... + ان مش كل البيانات مفتوحالك فمش قادر تتحرك برة الخط اللي مرسوملك ... وانا بشوف بصراحة ان للي المبتدئين ده بيكون عيب يخليه يختار الشركات المتوسطة والصغيرة أفضل علشان يقدر يتشقلب بين الأقسام كلها ويعرف دومين HR ودومين المبيعات والماركتينج والسيلز وكل حاجة في الشركة تقريبا بيقدر يحتك بيها ويفهم مؤشراتها ومتطلباتها وبالتالي بيبني أساس قوي ومتشعب يناسب اي وظيفة بعد كده ويكون مؤهل لأي قسم فيما بعد ... + ان في الغالب معاه داتا الشركة كلها فبيقدر يربط الأحداث كلها ببعض ويعمل علاقات سببية ويفهم الشركة كلها ماشية ازاي ويقدر يحلل كل الأقسام فأنا بشوف إن لو انت مبتدأ حاول تستهدف الشركات الصغيرة والمتوسطة .. واللي مش هتلاقيها كتير على لينكدان .. ممكن الاتش ار بتاعها يكون هنا وبينزل بوستس ولكن هتلاقيهم أكثر على فيسبوك وجروبات التليجرام والواتساب بتاعة الوظايف و موقع وظف ولازم تعمل حسابك إنك في الأول هتكون مرن جدا في المهام الوظيفية وخودها بنية انك بتتعلم وانك لسه بتدرج ... أنا بدأت تحليل بيانات وانا شغال خدمة عملاء عن طريق اني بدأت اعمل KPIs بتاع زمايلي وابعته للفريق والمدير في ايميل ... وبعديها روحت شركة تانية كان المهام الاساسية هي اني مسئول في قسم التشغيل بس بحتك شوية في عمل بعض التقارير بالاكسيل .. فهنا المقصد خليك مرن وكل يوم هتتعلم جديد طول ما انت مرن وبتحاول وبتسعى وكل ده ممكن تختلف معاه بسهولة طبعا لإن دي مش مسلمات وإنما هي تجربة شخصية ووجهة نظر شخصية متنساش تقولنا بقا لو عندك رأي تاني أو لو عندك إضافة في النقطتين تلاتة دول واسف على الإطالة 🤍 #ازاي_الاقي_شغل

بقالنا فترة بنتكلم عن Roadmap للدخول في مجال تحليل البيانات ولكن!! من صدق نية الشخص في الحصول على الأجر من الله من مساعدة الآخرين أن يكون همه الأول والأساسي أن يرشدهم لما فيه خير لهم في الآخرة قبل الدنيا فمن هذا المنطلق أشارك معكم Roadmap لدخول الجنة واللي للأسف معظم الناس زهدوا في تعلم دينهم وفي تزكية أنفسهم وتطهيرها وانشغلو بالدنيا فقط كما يقول الله تعالى : {يعلمون ظاهرا من الحياة الدنيا وهم عن الآخرة هم غافلون} (الروم:7). يوجد أكثر من شخص بالفعل باذلين مجهود في نشر تعلم الدين ولكن معظمهم متخصصين في جزء معين فقط ولم أجد مثل هذا الشخص الجميل الذي عنده شمولية كاملة في الدين وكذلك محتواه وتنظيمه وتدريجه وشموليته https://lnkd.in/dkvuUMVq وأذكرك بقول النبي ﷺ وَعَنْ أَبي الدَّرْداءِ، قَال: سمِعْتُ رَسُول اللَّهِ ﷺ، يقولُ: منْ سَلَكَ طَريقًا يَبْتَغِي فِيهِ علْمًا سهَّل اللَّه لَه طَريقًا إِلَى الجنةِ، وَإنَّ الملائِكَةَ لَتَضَعُ أجْنِحَتَهَا لِطالب الْعِلْمِ رِضًا بِما يَصْنَعُ، وَإنَّ الْعالِم لَيَسْتَغْفِرُ لَهُ منْ في السَّمَواتِ ومنْ فِي الأرْضِ حتَّى الحِيتانُ في الماءِ، وفَضْلُ الْعَالِم عَلَى الْعابِدِ كَفَضْلِ الْقَمر عَلى سَائِرِ الْكَوَاكِبِ، وإنَّ الْعُلَماءَ وَرَثَةُ الأنْبِياءِ وإنَّ الأنْبِياءَ لَمْ يُورِّثُوا دِينَارًا وَلا دِرْهَمًا وإنَّما ورَّثُوا الْعِلْمَ، فَمنْ أَخَذَهُ أَخَذَ بِحظٍّ وَافِرٍ. رواهُ أَبُو داود والترمذيُّ.  عن مُعَاوِيَةَ بن أبي سفيان رضي الله عنهما قال: سَمِعْتُ النَّبِيَّ صَلَّى اللهُ عَلَيْهِ وَسَلَّمَ يَقُولُ: مَنْ يُرِدِ اللَّهُ بِهِ خَيْرًا يُفَقِّهْهُ فِي الدِّينِ. والله المستعان 🤍

ليه معايا معلومات كتير وأدوات كتيرة ومش عارف استغلها ؟ هنا بتظهر مشكلة العصر الحالي ( السرعة من أجل التحصيل السريع من أجل مواكبة السرعة الحاصلة في كل شيء من حولنا ) للوهلة الأولى ممكن تقول ما ده هدف مطلوب فعلا وغاية محمودة .. ولكن ! خليني أقولك ليه الهدف ده مش مظبوط ومش غاية صحيحة ومش وجهة مظبوطة خالص لإن السباق في الدنيا هنا ملوش نهاية زي المارثون مثلا بالعكس .. هنا مش الأسرع هو اللي هيكسب بل أصلا مفيش مكسب وانت مش بتسابق حد خالص علفكرة استمتع بالرحلة وتمهل في التعلم ... واعلم أن علم قليل بإتقان عمل .. أفضل من علم كثير بدون إتقانه اتعلم بإتقان يا صديقي وبلاش تستعجل وتجري وخلاص

كلمة أخونا Ahmed Hatem Eldib بيقولها كتير ( أغبى منك ووصلو ) وأنا بضم صوتي لصوته وبقولك أغبى منك واشتغلو

#يوميات_محلل_بيانات السلسة اللي كتير من الناس منتظرها منذ أعلنت إني هبدأ أنقلكم التفاصيل العملية الواقعية في البداية شوية تنويهات كده : - معظم شغلي كمحلل بيانات كان مع شركات متوسطة وناشئة (اللي في الغالب هي اللي دايما بتحتاج محللين بيانات كل شوية علشان مبيكونش عندهم تنظيم وعايزين حد يعمل سيستم للداتا وهكذا ... والشركات الكبيرة برضو بتطلب بس بفتح عينك على نقطة ممكن تكون غايبة عنك) - ممكن تكون في شركة سينيور وتروح لشركة تانية تبقا جونيور عادي جدا ... فاللي هقوله هو من واقع خبرتي العملية ممكن تتوافق مع شركات تانية وممكن تختلف وده وارد جدا - معظم اللي هقوله والنصايح والتوجيهات والترشيحات هي مجرد وجهة نظر وقناعة تتفق معها او تختلف بدون الإطالة أكتر من كده في المقدمة خلينا نبدأ بأكثر موضوع بدأ يثير الجدل في تحليل البيانات واللي للأسف الكلام فيه غير واقعي ومش بيحرك المتفرج لخطوة يعملها تفيده أنهي أهم لمحلل البيانات ( يفهم بيزنيس ولا يتعلم أدوات ) طبعا الناس اتقسمت فريقين وللأسف خالفهم الصواب نظرا لإن للأسف على المنصة حاليا كتير جدا جدا بيكتب بوستات بدون ما يكون ليه خبرة عملية مجرد حضوره كورس بس مش أكتر ... واللي بالمناسبة بنصح دايما انك تكون متفاعل على المنصة وبتشارك في النشر ولكن مش شرط نشر نصايح طالما انت لسه فارغ من جوا .. ممكن تحكي مواقف قابلتك في الكورس او البروجيكت اللي شغال عليه وما شابه ... لكن متقدمش نصايح بدون ما تكون فعلا مصدر لشخص ينصح ويكون مر بتجارب عملية حقيقية طيب يعني برضو ايه الصح ؟ وجهة نظري : بتتعلم في الأول تحليل البيانات بشكل عام عبارة عن ايه وبيهدف لإيه وأنواعه وأشكاله ... ثم بتتعلم داتا بيز علشان تفهم العلاقات بين الجداول والدنيا بتمشي ازاي ... ثم بتتعلم أول أداة ( اكسيل بدون أي نقاش ) ... طب بتعلم ايه فيها ؟ الكلام ده خاص بأي أداة جاية ... بتتعلم الواجهة بتاعتها عبارة عن ايه وتفهم كل قسم فيها بيعمل ايه بشكل عام .. وبتتعلم الأساسيات البسيطة خالص ... ثم ؟ ثم بقا بتمسك دومين واحد وتبدأ تتعلم تطلع KPIs بتاعته بالأداة اللي انت بتتعلمها حاليا ... وتبدأ تعرض نفسك لأكثر من شكل من أشكال الداتا من السهل للمعقد في نفس الأداة عادي جدا بكده انت بقيت متقن الأداة دي بشكل كبير جدا جدا وأي حاجة هتطلب منك في الدومين ده هتعرف تعملها بالأداة اللي معاك .. وبقيت شاطر تيكنيكال وشاطر بيزنيس .. وده بجد علفكرة ... انت في الغالب في الاول بتبقا عبارة عن منفذ طلبات بتطلب منك بس من مديرك وبتنفذها ... فلو انت متدرب عليها كويس هتنفذها بسهولة ويسر وحتى في الانترفيو هتعرف تعديه بسهولة ... لكن لو متعلم الأداة بشكل عام ولكن متدربتش على السيناريوهات اللي هتقابلها ( KPIs ) هتلاقي نفسك بتقف قدام الطلب فاتح بوقك ومش عارف تعمل ايه وبتفضل شايف انك فعلا مش متمكن من الأداة اللي معاك .... كده انت اتعرضت انك عرفت وفهمت الطلبات بتاعة الدومين دي عبارة عن ايه وبتتحسب ازاي وبتطبقها ازاي بالأداة اللي معاك ... + اتعرضت لأشكال كتيرة من أشكال الداتا فعرفت تتعامل مع سيناريوهات كتيرة انك تحصل على المعلومة اللي مطلوبة منك ... كل ما بتقابلك مشكلة بتروح تتعلم حلها وبتطبقها بايدك دي أثبت في الدماغ من مجرد مشاهدة فيديوهات بتشرح الأداة وخلاص اللي بتحللك مشكلة بتفضل ثابتة في دماغك ... وياليت حد أختصر عليا الطريق وقالي النصيحة دي ومتنتقلش من أداة لأداة تانية غير لما تخلص اللي قولتلك عليه في الأداة الأولى وتعدي على على المجالات المختلفة اللي هتلاقيها في البوست اللي كنت مشيره قبل ده

بما إن أغلب الناس اللي بيتكلمو وبيقدمو محتوى عن تحليل البيانات بيهتمو بجزء العرض النهائي والتركيز على استخدام الأدوات في التحليلات فقررت إني أحاول اسد الفجوة بين المُتعلم وبين الواقع الحقيقي وهي مرحلة التحليل الحقيقية اللي بعدها هبدأ اعرض شغلي واصمم لوحة التحكم وما شابه اسأل الله أن تكون مجموعة منشورات تساعدكم بالفعل على إتقان المجال ده وتكون خطوة فارقة في طريقكم وأن ينفعنا جميعا بهذه المنشورات أول حاجة خلينا نوضح انت اصلا كمحلل بيانات المفروض (كعلم وكتب يعني) تكون مهتم باللي حصل بالفعل (الماضي يعني) .. يعني عملنا ايه الفترة اللي فاتت واللي بيسموه التحليل الوصفي ... واللي حصل ده حصل ليه واللي بيسموه التحليل التشخيصي فيه مرحلتين تانيين ولكن متقدمين شوية وبيحتاجو معرفة أقوى وبتبدأ تتشعب في مسميات تاني زي عالم البيانات وهكذا فهنركز الفترة دي إن شاء الله على شرح التحليل الوصفي والتحليل التشخيصي يبقا كده أول مهام محلل البيانات: 1- ايه اللي حصل الفترة اللي فاتت ومستوانا وأدائنا كان عامل ازاي وحققنا المطلوب والمتوقع مننا ولا لا والخطط اللي كانت مرسومة نجحت ولا لا والأساليب اللي اتبعناها الفترة اللي فاتت كانت مفيدة ولا مُضرة .... كل ده هيندرج تحت شرح ايه اللي حصل (التحليل الوصفي) دول كانو شوية أمثلة تفهمك أكتر عن النوع ده ولكن طبعا فيه اسئلة أكتر من كده بكتير ولكن دول كافيين يفهموك الهدف من النوع ده ... المرحلة دي على قد ما ناس كتير بتهملها في حديثها عن تحليل البيانات إلا إنك بدونها وبدون فهم حيثياتها كويس مش هتقدر تكون شاطر في المرحلة اللي بعدها ... ودي مرحلة أصلا هي بدايتك في أي شركة وبدايتك في المجال بشكل عام لحد ما تبدأ تفهم البيزنيس ده ماشي ازاي وايه اللي بيأثر عليه وهكذا ... وبطبيعة الحال أول حاجة اي حد بيعملها لما يجيله معلومات انه يقرأ ايه اللي حصل وبعد كده يبدأ يهتم بتفاصيل الاسباب 2- بعد ما بتقولهم اللي حصل ... بنبدأ بقا نبحث اللي حصل ده حصل بسبب ايه بالظبط .. سواء كانت حاجة حلوة علشان نستمر عليها ونستثمر فيها ونطورها اكتر فبالتالي نكسب أكتر و ننمو أكبر أو وحشة علشان نجتنبها ونبطل نعملها علشان برضو نكسب أكتر وننمو أكبر ... وهنا بيبدأ دورك في خدمة البيزنيس يكون ملموس وفعال أوي لإنك بتشاور بالضبط على النقطة الفارقة في المكسب والنمو وهنا نختم بجزء مهم في فهمك لمهنتك ... انا كشركة أصلا محتاجة محلل البيانات ليه ؟ خلينا نشوف شطارتكم كده في سرد أسباب واقعية وفعلا توضح احتياج الشركة لمحلل البيانات ونناقشها سوا وننزل منشور قريباً إن شاء الله يوضح النقطة دي بتفصيل ومتنساش طبعا تصلي على الحبيب

أوصي بشدة بالبشهمندس محمود لما عنده من إمكانيات جبارة اللهم بارك عن معرفة شخصية ... وخبرة في بناء أنظمة وهياكل بيانات الشركات المتوسطة والاستارت اب

ازاي كثرة مهاراتك ممكن تأثر على نفسيتك ! قبل ما تتسرع وتكتب في لينكدان و CV بتاعك شوية أدوات كتيرة .. وبعدين ترجع تضايق انك مش لاقي وظيفة بالرغم انك كاتب أدوات ومهارات كتيرة ! أحب أقولك ان المشكلة كانت في وهم المعرفة .. قبل تكتب الأداة او التيكنيك اللي بتعمله .. تأكد إنك بالفعل تكون بتعرف تعملهم وتعمل شغل ومشاريع بيهم مش مجرد خدتهم في كورس او شوفتلهم فيديوهات وخلاص علشان متقعش في فخ وهم المعرفة اللي بيمنعك تطور من نفسك أصلا في الحاجات دي وفي نفس الوقت بيخلي الناس تشوفك بتكتب حاجات غير حقيقية عن نفسك فاهتم انك تقيم نفسك كويس في المهارات والأدوات وعيد حساباتك وتقييمك لنفسك علشان تقدر تتعلم وتتقن الحاجات دي وتلاقي وظيفة إن شاء الله بالتوفيق 👏🤍

حبايبنا الغاليين ... سؤال للنقاش المفتوح ايه الفرق بين استخدام الذكاء الاصطناعي بشكل أعمى .. واستخدام الساعة مثلا او أي أداة عموما استبدلنا بيها طريقة القرون الماضية في الوصول للنتيجة المطلوبة ؟ علما بأن استعمالنا الحالي للأدوات مثل الساعة تقريبا استخدام أعمى لا نفقه شيء عما وراءه ولو عطلو او شيء معظمنا مش هيعرف يوصل للنتيجة المطلوبة من غيرهم مش عايز اوصل لحاجة معينة من النقاش على قد ما عايز اشوف آراء تفيدني في النقطة دي

مطلوب في شركة العسال مسؤول عمليات (Operations Officer) 💡الهدف من الوظيفة : تنفيذ ومتابعة العمليات اليومية للشركة بما يضمن سلاسة دورة العمل بين المبيعات، المخازن، والعملاء، مع الحفاظ على دقة البيانات، سرعة التنفيذ، وجودة الخدمة. 💡المهام والمسؤوليات : 1️⃣ البيانات والعملاء ● إدخال وتحديث بيانات العملاء على النظام بدقة (بيانات التواصل، العناوين، التصنيفات). ● مراجعة البيانات والتأكد من صحتها واستكمال أي بيانات ناقصة. ● متابعة طلبات العملاء والتنسيق مع الأقسام المعنية لتنفيذها. 2️⃣ عروض الأسعار والمبيعات ● إعداد عروض الأسعار بناءً على طلبات العملاء وسياسات التسعير المعتمدة. ● إرسال عروض الأسعار للعملاء والمتابعة للحصول على الموافقات. ● تعديل العروض حسب الملاحظات وبالتنسيق مع الإدارة أو قسم المبيعات. 3️⃣ تسليم وتسلم البضائع ● تجهيز أوامر التسليم بناءً على الطلبات المعتمدة. ● التنسيق مع المخازن لضمان توافر الأصناف المطلوبة قبل التسليم. ● متابعة عملية تسليم البضاعة للعملاء والتأكد من استلامها بشكل صحيح. ● مراجعة مستندات التسليم (إذن تسليم – فواتير – مرتجعات إن وجدت). 4️⃣ المتابعة مع المخازن ● متابعة طلب البضاعة من المخازن طبقًا لاحتياجات المبيعات والعملاء. ● التنسيق المستمر مع أمناء المخازن لتأكيد الكميات والأصناف. ● الإبلاغ عن أي نقص أو تأخير في البضائع واقتراح حلول تشغيلية. ● متابعة حركة البضاعة (صرف – تحويل – مرتجعات). 5️⃣ المتابعة والتقارير ● إعداد تقارير تشغيلية دورية عن الطلبات، التسليمات، والمشكلات التشغيلية. ● متابعة الطلبات المفتوحة حتى الإغلاق الكامل. ● التنسيق مع الإدارة لحل أي معوقات تؤثر على سير العمل. المكان : بجوار محطة مترو أحمد عرابي او ابورواش بالتنسيق مع المدير مواعيد العمل من ١٠ صباحا ل ٧ مساءا 💰 المرتب : من 8 ل 12 ألف حسب الخبرة + بونص التواصل عن طريق الواتساب فقط مع بشمهندس عمر العسال ( مدير التشغيل ) 201271444786⁩+ انا مش اتش ار ومليش أي مصلحة من الإعلان الوظيفي ده غير إني عرفت ان الشركة اللي انا شغال فيها عندهم وظايف شاغرة فقولت أساعد غيري زي ما كنت بشتكي ان الشركات مبتعرضش الوظايف الشاغرة اللي عندها بالتوفيق ومتنساش تصلي على الحبيبي 🤍

من أكتر الحاجات اللي بتساعدني أستفاد من لينكدان بشكل فعال إني كل فترة بدخل افلتر Connections اللي عندي وال Following اللي عاملها طب ليه بعمل كده ؟! ببساطة لإني مُقدر أهمية الوقت وبالتالي بكون محتاج ان الوقت اللي هقضيه على المنصة هنا إما أستفيد منه أو أفيد غيري وفي الحالتين هكون محتاج ان المحتوى اللي يظهر قدامي إما محتوى أنا مهتم به أو شخص أنا مهتم بدعمه ( صديقي مثلا ) وبفضل برضو يكون في نفس مجالي علشان الالجرويذم بتاعة لينكدان متقعدش تقترح عليا حاجات مش مفيدة ليا كل فترة بدخل ابص على كل بروفايل عندي اخر كام بوست منزله .. لإن وارد جدا يكون نوع المحتوى بتاعه اتغير ومبقاش مفيد ليا ... او مبقاش اكتيف على المنصة أصلا وهيكون عامل عندي زحمة على الفاضي وانا بصراحة مبحبش الزحمة وقد يصل الأمر إني أدخل ابص على تفاعلاته على المنشورات التانية لإنها بشكل أو بآخر بتظهرلي في Home Page فبالتالي لو بيقعد يتفاعل مع منشورات كتيرة مش مفيدة ليا بضطر الغي متابعته حفاظا على وقتي وذهني وده بيساعدني بشكل شخصي وبيساعدني كمان اني اقدر اتفاعل مع المحتوى اللي بيظهر قدامي ( اللي هيكون قليل جدا ) فهيكون عندي طاقة اتفاعل واشارك واتكلم وهكذا ... عكس ما بيكون المحتوى كتير على الفاضي بيستنفذك ذهنيا جدا وبس كده حبيت اشارك معاكم النقطة دي لعلها تكون مفيدة أو تنورلك حاجة تانية مفيدة تستفيد بيها ولو عند حاجات تانية بتعملها بتساعدك تستفيد من المنصة بشكل فعال متبخلش علينا بيها

ازاي من خلال داتا المبيعات اللي عندي أقدر أحدد الحد الأدنى للصنف؟ هنا جه دوري كمحلل بيانات اني ابدأ أعيد حساب كميات الحد الأدنى لكل صنف مبنية على أرقام حقيقية ومبيعات حصلت بالفعل مش مجرد توقعات من الحاجات اللي بلاحظها في شركات كتير اشتغلت فيها .. إن حد الطلب أو الحد الأدنى للكمية بيكون دايما مش مظبوط ... لذلك في الشركة الحالية جبت مبيعات السنة اللي فاتت كلها وبدأت أطلع منها حسابات بسيطة خالص تساعدني في تحديد الحد الأدنى وتساعدني كمان في تحديد الكمية اللي هتطلب زي ما قولتلكم من يومين اني اتطلب مني اعمل ملف جوجل شيت يساعد الشركة في تنظيم عملية طلب النواقص من المخزن الرئيسي والربط بينهم وهكذا وبفضل الله عملت حاجة Automated بالكامل وكمان ضيفت عليها ان يطلب الصنف تلقائي لما يوصل لحد الطلب ويطلب قد ايه كمان طب حسبنا حد الطلب ازاي ؟ جبنا Mode ( العدد الأكثر تكرارا ) لكل صنف في كل فاتورة .. يعني الصنف ده ايه اكتر كمية بتطلب في الفاتورة الواحدة ؟ ده كده بالنسبالي مينفعش الكمية اللي عندي تكون اقل منه .. لإن مينفعش عميل يجي يشتري وميلاقيش الكمية كاملة ودي الكمية اللي أكثر فواتير البيع كانت بتطلب من الصنف ده طبعا الحد الأدنى هيختلف من مكان لمكان ممكن يخليه الكمية اللي تكفي فاتورة واحدة وممكن يخليه الكمية دي في عدد فواتير معين بتكون على حسب عدد الفواتير اصلا اللي بتتباع في اليوم في العموم وعدد الفواتير اللي بتتباع كل يوم من الصنف ده ونقطة كمان مهمة على حسب بتقدر توفر البضاعة في خلال قد ايه من بعد ما تطلبها ؟ طب بالنسبة لكمية الطلب ؟ هنحسبها ازاي ؟ دي هنشوف فيها آرائكم وأفكاركم كده واقولكم حسبتها ازاي في البوست الجاي علشان منطولش عليكم أكتر من كده #يوميات_محلل_بيانات

لو هدي نصيحة مهمة لأي حد في مجال تحليل البيانات هتكون : راجع الأرقام اللي طلعتها كويس جدا وقارنها ببعض وشوف هي منطقية ولا لا ليه ؟ لإن وارد جدا تكون نسيت خطوة فلترة معينة .. او في الدمج بين جدولين حصل تكرار لقيم مينفعش يتعملها تكرار اصلا .. او وانت بتجمع قيم فيه خلايا كانت فاضية فعملية الجمع محصلتش اصلا .. وهكذا لازم لازم تراجع نتايجك كويس جدا ومتستعجلش على انك تقول خلصت التقرير اتفقنا ؟ لو قابلك موقف وانت بتراجع اكتشفت فيه حاجة الأداة دي بتعملها في حالات معينة بتخلي الأرقام تبوظ احكيلنا عنها ونستفيد سوا

1- الشخص اللي كان بيراكم المواد لغاية يوم الامتحان كبر وبقا بيراكم البوستات المحفوظة 2- الشخص اللي كان بيقعد يحتفظ بكل حاجة من حاجاته حتى لو مش هتنفعه كبر وبقا بيحتفظ بملفات وكتب ملهاش لازمة 3- الشخص اللي كان بيتفرج على حاجات مش مهتم بيها كبر وبقا بيعمل فولو لأي حد 4- الشخص اللي مش فاهم لينكدان بيقعد يبعت طلبات تواصل لكل الناس الأرقام اللي فوق تقدر تعتبرها Primray Key (PK) وتقدر تنتقل مباشرة للنقطة اللي تهمك في الجزء التالي عن طريق Foreign Key (FK) علما إن العلاقة بينهم One to One شوية أنماط للناس في الواقع بتاعنا حاليا للأسف بتعطلهم جامد عن الوصول لهدفهم المطلوب 1- بقيت بتراكم المنشورات المحفوظة وبدون أي مراجعة دورية ليهم وبدون وضعهم دون خطة تعلم مثلا أو قراءة ... وعلى عكس المواد هنا مفيش وقت امتحان وبالتالي بتظل تراكم وتراكم دون اي استفادة 2- بتقعد تحمل ملفات و PDFs تبع مجالك ولكن برضو مبتراجعش أصلا هل انت محتاجهم فعلا ولا دي حاجات مش مستواك ومش تبع المسار بتاعك .. وفيه منها ملفات مكررة أصلا وملفات منها مفيهاش فايدة ... وبرضو بتقع في فخ تراكم الملفات دون مراجعة ودون وضعها في خطة قراءة وتعلم 3- بقيت بتعمل فولو لناس كتيرة لمجرد ان فيه بوست جه قدامك وعجبك ... طب ما يمكن ده بوست استثنائي وده اصلا مش تخصص كتابته .. ليه متخوشش تبص بصة على محتواه وتتأكد إنك فعلا مهتم باللي بينشره ؟ علشان فعلا الحاجات المهتم بيها والمفيدة ليك تظهرلك بسهولة بدل ما تقعد تسكرول كتير بدون فايدة ... وبرضو كل فترة تدخل تبص بصة هل الناس اللي متابعها لسه محتواهم بيخدم هدفك ولا اتغير ومبقاش مفيد ليك فتلغي متابعتهم 4- مبقتش تفرق في استعمالك للينكدان بين الكونيكت وبين الفولو .. اي حد عايز تتابعه بقيت بتعمله كونيكت وخلاص .. طب هل ناوي تعمل علاقة زمالة معاه فعلا ويبقا بينكم تواصل بشكل دوري !! ... لإن لو إجابتك لأ فخليني أقولك إن بتقول لخوارزمية لينكدان إن أنت شخص بتعمل كونيكت وخلاص ... لو مش ناوي تنشئ علاقة تواصل حقيقية مع الشخص ممكن تكتفي بمجرد الفولو وتستفيد من محتواه .. أما لو ناوي فعلا تنشئ علاقة زمالة معه ابدأ بإنشاء العلاقة قبل إرسال الكونيكت ولا تنس أن العلاقة بتكون مفيدة للطرفين وليس لطرف واحد فلا تكن أنانيا لو كان عندك مشكلة من دول قولنا حليتها ازاي أو هتبدأ تغيرها ازاي

هل احنا فعلا في لينكدان عايشين في عالم موازي ؟!! شوفت بوست من فترة بيتكلم عن الموضوع ده وان الناس في لينكدان عايشين في عالم موازي بعيدا عن اللي بيحصل في فلسطين مثلا او اللي بيحصل حاليا في العالم كله وهكذا وخليني اوضحلك الإشكالية دي بنقاط هتغير وجهة نظرك عن الموضوع ده: - تأثرك بالقضايا الإسلامية ده من كمال إيمانك طبعا ولكن ! ... هذا لا يجعلك تتقاعس عن عملك وعن تطورك وحياتك الطبيعية وإلا كان النبي صلى الله عليه توقف عن كل شيء حزنا على تعذيب قريش لأصحابه ! - الحزن أمر طبيعي والتأثر كذلك ولكن يوجد حد لكل شيء حتى يكون حزن إيجابي - إذاعة القرآن الكريم لما كانت بتعمل إعلانات التبرعات كتير كانت الناس بتنزعج منها رغم انها خير ولكن كانت بتوصل الناس إنها تبطل تفتح الإذاعة أصلا ... كذلك انت في مشوارك لازم تدرك هل جمهورك هيسمع ولا اصلا هيبطل يسمعك خالص ... يعني بمعنى أصح هل كلامك هيعمل أي تأثير ولا بالعكس ؟!! - اعتبر ان انت هنا في كورس .. مفيش مانع لو جت السيرة تقولها ولكن الأصل التطوير والعلم والمعلومات - خليك حد الناس محتاجاه علشان يتقبلو منك الحاجات دي علشان هما فعلا محتاجينك - صاحبي شغال ريموتلي مع شركة في لبنان .. بيحكيلي انهم أجلو إجتماع في يوم علشان فيه ضرب عندهم وإحتمال مبنى الشركة يتم استهدافه او بيوتهم الشخصية وزمايله بالفعل تركوا منازلهم وذهبوا لملاجئ أو بيوت أخرى ... ولكن لم يمنعهم هذا عن استكمال حياتهم بقدر استطاعتهم ومع ذلك سيتم استكمال الاجتماع في اقرب وقت فانا بقولك اوعى تكون الشخص اللي هما عايزينك تكونه ... اتكلم واحزن ولكن استمر في التطوير والعمل علشان تنفع الأمة بحاجة فعلا وتكون كلمتك لها تأثير والناس محتاجة لكلامك فمضطرين يسمعو لأي حاجة بتقولها داخل منشورك او المؤتمر أو ما شابه ... فهمت حاجة ؟

ما يطلبه المشاهدون ... اسال عن اي حاجة تخص مجال تحليل البيانات والشغل فيه واجاوبك من واقع خبرتي إن شاء الله

موجود في لينكدان علشان تستفيد من خبرات الآخرين ؟ إن شاء الله البوست ده هيكون مفيد ليك لا أخفيكم سراً سئمت من المحتوى المتكرر والذي لا يمت للواقع بصلة في أغلب الأحيان ولذلك قررت إن أنا أنزل البوست ده .. لإني في بدايتي مع لينكدان كنت بدخل اسكرول وبستفاد من المحتوى المعروض فعلا فليه منخليش البوست ده مفيد للناس اللي عايزة تستفاد بالاسكرول في لينكدان! لو فيه أشخاص انت متابعهم وشايف إنهم بيضيفو قيمة حقيقية من خلال منشوراتهم اعملهم منشن هنا في التعليقات علشان غيرك يشوفهم ويتابعهم ويستفاد من خلالك ومن خلالهم .. وانوي انه يكون علم نافع ينتفع به حاجتين مهمين بس ياريت يكونو متوافرين في الأشخاص اللي هتعملهم منشن - يكون بينشر فعلا باستمرار مش خامل على لينكدان - يكون بالفعل شغال في الجزء اللي بينشره مش مجرد كورسات وبس ويااااه بقا لو تعمل تقسيمات كده او عنوان للمواضيع اللي بيتكلمو عنها يبقا جزاك الله خيرا وممكن طبعا تشارك المنشور مع زمايلك علشان يستفادو ويفيدو برضو

تفتكر ايه هو تحليل البيانات من وجهة نظر الناس ومن الواقع الحقيقي ؟ ده اللي هنعرفه النهاردة مع تلخيص كتاب Head First Data Analaysis #DataAnalyst #DataAnalysis #Excel #PowerBI #SQL #Mindset #Tableau

عندي عادة كده من وانا صغير اني بحب المدرسين اللي استفادت منهم ودايما لما بشوفهم بروح اسلم عليهم ومكملها مع محاضرين الكورسات اللي بحضرها بشمهندس عبدالرحمن بنصح أي حد حابب يحط رجله في مجال تحليل البيانات انه يحاول يتعلم منه بأي طريقة ... ولما تشترك معاه وتبدأ تحضر محاضرات له هتعرف ليه بنصح بيه جامد كده

فيديو هيساعدك جدا في كتابة ال CV بطريقة صحيحة لو انت شخص مش عارف توصل لمرحلة الانترفيو .. فغالبا المشكلة عندك في ال CV ومحتاج تتفرج على الفيديو ده أما لو انت شخص بتوصل لمرحلة الانترفيو عادي فأنصحك متشتتش نفسك واعرف ان كده CV بتاعك كويس ومش محتاج تعديل للخطوات اللي بتعملها وبس يا سيدي متنساش لو حسيت ان الفيديو ممكن يفيد زمايلك اعمله شير ملحوظة : الفيديو معمول بأداة Google Notebook LM عن طريق إعطاءه مصادر ورقية من أشخاص خبرة في كتابة ال CV والمقابلات والتوظيف

هل سايب أثر جميل ليك في المكان اللي بتروحه ولا لا؟ اوعى تفتكر ان الشاطر هو اللي بينجح لوحده وبيخبي المعلومة امبارح جالي Offer من نفس الشركة اللي كنت استقالت منها من شهر وده إن دل .. يدل على إن النهايات لازم تكون بالمعروف وتكون سايب أثر عنك كويس بغض النظر عن ال Offer والمفاوضات اللي بتتم حاليا بشمهندس مصطفى حقيقي من الناس اللي كنت مبسوط جدا من ساعة ما جه اشتغل معانا في قسم ال Data ربنا يوفقه يارب ويكتبله الخير دايما

ازاي استقالتي من العمل خليتني اتعلم حاجات جديدة ! النهاردة كان تاني حضور ليا في Events اللي بتتعمل للشباب الطلبة وال Fresh بحضور أشخاص متخصصين في ينقلو وعي وعلم خاص بالجزء المتخصصين فيه .. وجزاهم الله خيرا على المجهود المبذول في ال Events دي كنت طول ما انا شغال طبعا مبيكونش عندي وقت اروح اقضي يوم كامل في ايفينت زي ده مثلا .. وخاصة اني تقريبا من وانا في ثانوي وانا دايما مشغول في الشغل او التدريب الرياضي والتحكيم أيام ما كنت لسه بصحتي 😅 ولكن لما أُتيحت ليا الفرصة مترددتش إني أحضر مع الشباب الجميل ده سعيد بصراحة حضوري ايفينت Sumood Summit - Youth Edition التابع لشركة صمود لخدمات الموارد البشرية واللي بصراحة كان يوم روحه جميلة وطلعت بشوية استفادات حلوة واستلهامات جديدة في الايفينت ده بالذات رجعتلي ذكريات الدروس والكورسات الأوفلاين .. والنقطة المميزة عندي وهي السؤال المستمر للاستفادة بأكبر كم ممكن .. واللي بفضل الله دي نقطة قوة عندي في مجال Data Analysis مبسوط بثناء المحاضرين على نوعية أسئلتي بصراحة واللي كانت بتشجعني أركز معاهم أكثر وأخرج انا والشباب بأكبر فائدة ممكن ونسأل الله التوفيق لنا ولكم جميعا يارب ❤️

البوست بتاعك مش هيتشاف بدون هوك قوي

ازاي يا بشمهندس نطبق اللي اتعلمناه على مشاريع محاكية للواقع ؟ لا هو ازاي انت مكنتش بتتعلم أصلا على مشاريع محاكية للواقع ؟!! ازاي بجد كنت موجود في كورس وخرجت منه ولقيت نفسك متعلم حاجة والواقع حاجة تانية ؟!! ولكن خلاص اللي حصل حصل بقا ... تعالا أقولك هتمسك مهمة واحدة بس من مهام تحليل البيانات وتبدأ تشتغل عليها بشكل فردي على كذا سيناريو ولنقل مثال تنظيف البيانات : المفروض طبعا تكون فاهم ايه تنظيف البيانات ده وايه خطواته وايه معاييره وهتبدأ بداتا بسيطة ثم تزداد تعقيدا وطبعا ممكن تستعين بأداة AI تقولها تعملك داتا فيها أكثر من مستوى على حسب الصعوبة في تنظيفها وهكذا ده تمرين على المهارة نفسها ممكن طبعا تطبق التمرين ده مرة بكل أداة انت بتتعلمها حاليا ولكني أفضل إنك تخلص المهارات اللي معاك كلها أول مرة بالاكسيل بس وبعدين تنتقل لأداة تانية طبعا متنساش ان المهارات دي كلها هتكون مبنية على حسب الهدف اللي عايز توصله في النهاية وهنا هقولك انك تجيب KPIs بتاعة دومين معين وليكن المبيعات وتبدأ تطلعها من الداتا اللي معاك وبعدين فيما بعد تبقا تنتقل لمجال تاني وهكذا اتمنى تكون الطريقة وصلت بسهولة اختصارا : - تحديد الهدف من المهمة ( KPIs مجال معين ) - تحديد المهارة اللي هتبدأ تدربها - تحديد أداة واحدة للتطبيق - إرسال الخطة لنموذج ذكاء اصطناعي وإخباره بإنشاء بيانات تساعدك على تدريب هذه المهارة وتكون التدريبات مدرجة من السهل للصعب والبيانات تخدم الهدف المطلوب استخراج KPIs مجال كذا من السهل للصعب أيضا يعني نقدر نقول هنعمل مصفوفة : - المهارة " تنظيف بيانات " ( سهلة - متوسطة - صعبة ) - المجال " مبيعات KPIs " ( سهلة - متوسطة - صعبة ) - الأداة المستخدمة " إكسيل " بنفس الترتيب كده .. مش هينفع تنتقل من مستوى صعوبة في KPIs إلا لما تخلص ال 3 مستويات في المهارة على المستوى الأول من KPIs وبعدين تاخد ال 3 مستويات بتوع المهارة وتعدي بيهم تاني على المستوى التاني من KPIs وهكذا وبعديها عندك حرية إنك تبدأ بتغيير المجال كله .. أو تغيير المهارة .. أو تغيير الأداة ولكن نصيحتي .. خلي تغيير الأداة آخر حاجة خالص .. وابدأ بتغيير المهارة لإن KPIs هيكون سهل تفهمها إن شاء الله وتستخدم المهارة على أي مجال فيما بعد بسهولة طبعا طبعا .. ابدأ بتطبيق المهارات بترتيبها أصلا في عملية تحليل البيانات علشان تقدر تكمل عليها بعد كده في كل مستوى في المهارات اللي بعدها علشان توصل للنهاية بعد كده بقا ابدأ اشتغل مشاريع كاملة من الأول للآخر مرة واحدة لكن بالطريقة اللي فاتت دي هتقدر تقول أنا متقن لمهارة كذا وكذا بالتوفيق

ازاي وصلت من 700 connect ل 50 في أقل من 24 ساعة ! واه بالمناسبة انت قرأت صح .. من 700 ل 50 مش العكس 😅 تعالى احكيلك القصة كاملة لو حابب تستفاد من وجهة نظر غيرك قعدت مع نفسي كده في لحظة صفا ولاحظت حاجة مهمة .. ان LinkedIn عندي بقا مليان Posts مش في مجالي خالص ولا ناس اعرفها حتى ولا اي حاجة .. طب وايه المشكلة ؟! المشكلة انك ترجع كده تبص انت اصلا داخل LinkedIn ليه ! واه المفروض يكون عندك أهداف وأسباب متسيبش الموضوع عبثي كده أنا واحد لما لقى ان السوشيال ميديا بتضره أكثر ما بتنفعه .. حذف أكونتاته من عليها .. يعني معنديش فيسبوك ولا انستجرام وما شابه اكتفيت باليوتيوب ان لو فيه موضوع معين عايز اتعلمه بدخل اسيرش عليه مخصوص مش سايب نفسي حتى للاقتراحات تشتتني طب والمقالات المفيدة والمهمة ؟ في الغالب لو حاجة مفيدة ليا فعلا .. ربنا بيسخرلي اللي يوصل المعلومة المفيدة دي عن طريق واتساب او نقاش مفتوح في الواقع الحقيقي ولكن من باب الأخذ بالأسباب دخلت LinkedIn علشان يكون الجزء المهني عندي على قد ما أقدر اكون بواكب فيه التطورات وما شابه لكن بالنسبالي الحياة الاجتماعية بكتفي باستوري الواتساب اعرف منها آخر أخبار أصدقائي اللي مهتم فعلا أعرف أخبارهم علشان هما أصدقائي فعلا ... بجانب طبعا لقاءنا كل فترة في الحياة الحقيقية طيب نرجع تاني .. داخل LinkedIn ليه ؟ استفيد في المقام الأول .. فأي حاجة مش مفيدة ليا هتكون ضد هدفي كده كده والاستفادة مش مرتبطة بالتعلم فقط .. ممكن كلمة طيبة لصديقي .. او دعم محتوى مفيد بالتفاعل معاه بس فرجعت عملت فلترة كده .. وفضلت محافظ على الأشخاص اللي اتعاملت معاهم قبل كده فعليا .. واللي بالمناسبة ممكن يكون التعامل ده بدأ من هنا في LinkedIn بالفعل وتطور لحضور ايفينت سوا او ما شابه او لسه محصلش نصيب اننا نتقابل .. ولكن بالفعل فيه تواصل بينا وده الفيصل لما اكون عامل Connect مع ناس عارفها بالفعل او اتعرفت عليها بالفعل .. هيكون أدعى اني اعملهم Support على منشوراتهم حتى لو مش في مجالي .. بس الشخص نفسه أصبح يهمني شخصيا او أكون عامل Follow لشخص شفته بالفعل مفيد ليا في المنصة وابدأ برضو أتفاعل مع المحتوى المفيد بتاعه علشان ينتشر .. ولو أُتيحت الفرصة اتواصل معاه بشكل فعلي اتواصل معاه ونعمل Connect وساعتها يكون فعلا زميل ليا وبس يا سيدي حبيت بس أحكي التجربة دي وبصراحة من أول ساعة وحسيت إن عندي طاقة فعلا اتفاعل مع Posts المفيدة او مع زمايلي الحقيقين في مختلف المجالات

نشارك التحليلات بتاعتنا بشكل عامل ازاي ؟ ده اللي هنعرفه في الفيديو ده من ملخص كتاب Storytelling with Data let's practice

مش عارف تعرض بياناتك ازاي أو على أساس إيه ؟ ده فيديو بسيط تلخيص لكتاب Storytelling with data هيشرحلك ايه النصايح العملية في عرض البيانات والتحليلات وبس يا سيدي .. لو حسيته مفيد متنساش تشيره مع زمايلك ملحوظة : الفيديو معمول باستخدام أداة Google Notebook LM

شوية نصايح ليك كإنسان عايش معانا على الأرض: - بلاش تاخد انطباع عن الشخص لمجرد انه من جيل معين او منطقة معينة .. ممكن تحط ده في عين الاعتبار ماشي لكن متتعاملش على اساسه ومتفعدش تحلل كل تصرف على اساس الانطباع ده لإنك هتكون متحيز جدا لتأييد الفكرة دي في دماغك وتحلل كل موقف بانحياز - راجع معتقاداتك والأمور اللي من خلالها بتحكم على اللي قدامك بيها .. لان المجتمع اللي انت واخد منه خبرة حابب اقولك إن اللي خلقهم كان دايما بيذكر إن إكثرهم مش كويسين .. فسيبك من جو السوق والشارع علمني والحياة علمتني لإنك بكده ضامن إنك اتعلمت غلط .. وهتلاقي معظم الوقت الأفكار اللي عندك اصلا الدين بيقولك ان الفكرة دي غلط تماما - اتعلم دينك كويس جدا علشان هتلاقي فيه كل خير ليك في الدنيا والآخرة ... وبالمناسبة الدين صحيح انت مأمور بتعلمه ومأمور بتطبيقه في حياتك الدنيوية .. فاتعلمه علشان متقعدش تجرب في الدنيا بآراء ونظريات ناس مخلوقة زيك .. فشوف الخالق دلك على الطريق وقالك كل حاجة فيه متبقاش غبي بقا وتسيب ده وتروح لواحد تاني تسأله عن الطريق للاسف كل اللي قولته ده موجود في المجتمع بكثرة .. وللاسف بيكون عندهم جهل مركب .. انه جاهل وفاكر نفسه بيفهم وبيتهم الآخرين بانهم هما اللي جاهلين ... بأي مرجعية ! بالولا حاجة فنسأل الله العافية وأن يخرجنا من هذه الدنيا على خير